Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Kunjamäpachänsa Jesusajja?

¿Kunjamäpachänsa Jesusajja?

Janiw khitis kunjamänsa uk yatksnati. Jupajj janiw mä fotsa apsuyaskänti ni pintayaskänsa. Ukampis Jesusarojja, walja maranakaw pintirenakajj cuadronakapan pintawayapjje.

Pintapkäna ukanakajja, janiw Jesusajj kunjamänsa uk sum yatipkänti. Jupanakajj jakapkäna uka tiempon jaqenakajj kunjamäpjjänsa, religionanakan creenciaparjama jan ukajj jaqenakajj munapkäna ukarjamakiw Jesusar pintapjjäna. Ukaw Jesusajj kunjam jaqënsa, kunanaktï yatichkäna ukanaksa mayjtʼayäna.

Pintirinakajja, Jesusarojj jachʼa ñakʼutani, jukʼa sunkhani, jan chʼamani jaqëkaspas ukhamwa pintapjje. Jan ukajj llakit jaqëkaspas ukhamwa pintapjje. Yaqhepasti Jesusarojj jan jakʼachaskay mä angeläkaspas ukhamwa pintapjjaraki. ¿Kunjamäpachänsa Jesusajja? ¿Kunjamatsa uk yatsna? Ukatakejj Bibliat yatjjatañaw wakisi, ukaw Jesusajj kunjamänsa uk amuytʼañatak yanaptʼistani.

“NAYATAKEJJ MÄ CUERPO WAKICHARAPISTAJJA”

Ukham sasaw Jesusajj oración luräna, inas bautisaskäna uka urojj uk sischïna (Hebreos 10:5; Mateo 3:13-17). ¿Uka cuerpojj kunjamänsa? 30 maranak nayrajja, Gabriel angelaw Mariarojj akham säna: “Jumajj usuriptätawa, mä yoqall wawa ususïta, [...] uka wawajj santo ukhamarak Diosan Yoqapa satäni” sasa (Lucas 1:31, 35). Ukhamasti Jesusajj perfecto jaqënwa, kunjamtï Adanajj qalltan perfectökäna ukhama (Lucas 3:38; 1 Corintios 15:45). Jesusajj suma cuerponïpachänwa, inas María taykapar uñtasitächïna, jupajj judía warmïnwa.

Jesusajj uka tiempon jakasir judío jaqenakjamarakiw sunkhanïna, janiw romanonakjamäkänti. Sunkhani jaqenakajj suma uñjata, respetata ukhamäpjjänwa, ukatwa sunkhap sum khuchurasipjjerïna. Jesusajj ukhamarakiw sunkhapas suma khuchurtʼata, ñakʼutapas qʼoma peintʼata sarnaqerïpachäna. Sansón chachjam nazareonakakiw ñakʼut jan khuchurasipjjerïkänti (Números 6:5; Jueces 13:5).

Jesusajj chʼaman jaqëpachänwa, jupajj 33 maranak aka oraqenkkasajj jila partejj carpinterotwa trabajïna, uka tiemponjja janiw jichjam walja herramientanakajj utjkänti (Marcos 6:3). Diosat yatiyañ qalltkäna ukhajja, Jesusajj sapakiw “aljirinakarojj ovejanakamp vacanakamp chik templot alissüna. Turkirinakan qollqenakapsa waranukünwa, mesanakapsa qʼal jaqorpayäna” (Juan 2:14-17). Ukham lurasajj chʼamanïtapwa uñachtʼayistu. Diosajj mä cuerpo wakicharapkäna ukampejja, munañap phoqañapänwa, ukatwa Jesusajj akham säna: “Diosan Reinopat suma yatiyäwinak yaqha markanakar yatiyir sarañajajj wakisirakiwa, nayajj ukataki khitanitätwa” sasa (Lucas 4:43). Jesusajj Palestina taqe markpachanwa Diosat yatiyäna, ukatakejj chʼamanïñaw wakisïna.

“NAYAR JUTAPJJAM, [...] NAYAW JUMANAKAR SAMARAÑ CHURAPJJÄMA”

Jesusajj kunja munasirïnsa ukajj qhanaw ajanupan amuyaspachäna. Ukatwa qarjatanakasa, llakitapkäna uka jaqenakas Jesusan arunakapar jankʼak istʼapjjpachäna (Mateo 11:28-30). Jesusan munasirïtapajja, arunakapar jukʼamp confiyañatakiw jaqenakar yanaptʼäna. Wawanakas Jesusan ukar jutapjjarakïnwa, ukatwa Biblianjja ‘wawanakar  qhomjjartʼänwa’ sasajj qhanañchi (Marcos 10:13-16).

Jesusajj janïr jiwayatäkäna ukhajj walsa tʼaqeskchïnjja, janiw llakit sarnaqerïkänti. Amuytʼañataki, Caná markan utjkäna uka casarasïwinjja, Jesusajj umwa suma vinor tukuyäna, ukhamat casarasïwin kusisiñ utjañapatakejj yanaptʼäna (Juan 2:1-11). Yaqha horasanjja, Jesusajj jan armkay yatichäwinakwa jaqenakar yaticharakïna (Mateo 9:9-13; Juan 12:1-8).

Taqe luratanakapat sipansa, Jesusajj Diosan arunakap jaqenakar yatiyasaw wiñay jakañ suytʼäwinïpjjañapatak yanaptʼawayi (Juan 11:25, 26; 17:3). 70 discipulonakapajj Diosat yatiyanisajj kuttʼanipjjäna ukhajja, Jesusajj ‘kusisiñampi phoqtʼatänwa’, ukatjja akham sarakïnwa: “Sutinakamajj alajjpachan qellqatätap laykuw kusisipjjañamajja” sasa (Lucas 10:20, 21).

“JUMANAKAJJ JANIW UKHAMÄPJJAÑAMÄKITI”

Jesusajj aka oraqenkkäna uka tiemponjja, religión pʼeqtʼirinakajj jachʼañchayasïña, sum uñjatañ thaqapjjäna (Números 15:38-40; Mateo 23:5-7). Ukatwa Jesusajj apostolonakapar janiw ukhamäpjjañamäkiti sasin ewjjtʼäna (Lucas 22:25, 26). Jesusajj sänwa: “Escribanakat amuyasipjjam, jupanakajj kayukam purir isinakamp isintasisaw taqe cheqans sarnaqañ munapjje, qhatunakan aruntayasiñsa wal munapjjaraki” sasa (Marcos 12:38).

Jesusajj janiw religión pʼeqtʼirinakjamäkänti, jupajj mayni jaqenakjamakïnwa, ukatwa awisajj Jesusajj khitïnsa uk jaqenakajj jan amuyapkänti (Juan 7:10, 11). 11 apostolonakapat sipansa, janiw jukʼamp jachʼa jaqëkänsa ni jukʼamp chʼamanïkansa. Ukatwa aljantkäna uka Judas chachajj Jesusar uñtʼapjjañapatakejj “mä señal” churäna, jampʼattʼasa (Marcos 14:44, 45).

Jesusajj kunjamänsa uk janis sum yatkstanjja, janiw kunjamtï cuadronakan pintapki ukhamäkänti. Ukhamarusa kunjamäpunïnsa uk sum yatjjatañat sipansa, kunjamsa Jesusarojj jichha tiempon uñjañasa uk yatiñaw jukʼamp wakiskirejja.

“AKAT MÄ JUKʼAMPIROJJ JANIW AKAPACHAJJ MAYAMPSA UÑJ-JJETANITI”

Uka arunak arskäna ukat mä qhawqha horanakatwa Jesusar jiwayapjjäna, imtʼanjjapjjarakïna (Juan 14:19). Jupajj “jakañap churañatakiw juti, ukhamat waljanir juchat kutsuyañataki” (Mateo 20:28). Kimsa urunak pasatatsti Diosajj ‘espíritu cuerponwa jaktayarakïna’, ukhamat discipulonakapajj “jupar uñjapjjañapataki” (1 Pedro 3:18; Hechos 10:40). Jaktayatäjjäna ukhajja, ¿Jesusajj kunjamäpachänsa? Amuyatajj janiw nayrjamäjjänti. Juparojj janiw amigonakapas uñtʼjjapjjänti. María Magdalena sutini warmejja, jupajj huerta uñjir jaqëpachawa sasaw amuyäna, ukat Emaús markar sarapkäna uka pä discipulonakapasa, mä forasteropachäwa sasaw Jesusat amuyapjjarakïna (Lucas 24:13-18; Juan 20:1, 14, 15).

¿Jichhürunakan Jesusajj kunjamäpachasa? Jesusan jiwatapat 70 maranak pasjjäna ukhajja, apóstol Juanajj walja visionanakanwa Jesusar uñjäna. Juanajj janiw mä cruzan wal tʼaqesiskir mä jaqer uñjkänti, jan ukasti Jesusarojj “reyinakansa Reyipa, munañaninakansa Tatitupa” ukhamwa uñjäna. Jupajj niyaw Dios contra saytʼirinakarusa demonionakarus tukjani, ukatjja walja bendicionanakwa apanirakini (Apocalipsis 19:16; 21:3, 4).