Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 NAYRÏR JANAN PʼEQEÑCHÄWIPA | BIBLIAJJ JANIW CHHAQTAYASIWAYKITI

Bibliajj jan walinakanwa uñjasiwayi

Bibliajj jan walinakanwa uñjasiwayi

KUNAS JAN WALTʼAYÄNA. Biblia qellqerinakasa ukhamarak copiapkäna ukanakasa, papironakaru ukat pergaminonakaruw qellqapjjerïna (2 Timoteo 4:13, MT). * Niyakejjay papironakaru, pergaminonakar Bibliajj luraschïnjja, ¿kunas tiempompejj pasaspäna?

Papirojj chʼiyanoqtjjakiwa, jankʼakiw qaqarjje ukat janirakiw jayas imañjamäkiti. Nayra Egipto markat yatjjatir Richard Parkinson ukat Stephen Quirke chachanakajj uka toqet akham sapjjewa: “Tiempompejja, papirojj qʼalaw pʼiystasin tukusjje. Papirotï jan sum imasispa ukhajja, qorawrantjjaspawa jan ukajj ñusantjjaspawa. Oraqer allintasispa ukhajja, achakunakana, jiskʼa laqʼonakana ukat janqʼo kʼisimiranakan manqʼantataw uñjasispa” sasa. Jikjjataskäna uka papironakat yaqhepajja, lupiru jan ukajj chʼaranawjaruw uchasïna, ukhamïpansti jankʼakiw tukusjjapjjäna.

Pergaminojj papirot sipansa jukʼamp jayaw aguanti. Ukampis juntʼu cheqaru, chʼaranawjaru, lupiru uchaski ukhajja, jankʼakiw tukusjjaspa. * Maysa toqetjja, jiskʼa laqʼonakaw manqʼantañatak thaqhapjjaraki. Ukatwa nayra qellqatanakajj jichhürunakan jan utj-jjeti. Ukhamajj Bibliatï uka jan walinakampi chhaqtayatasapäna ukhajja, yatichäwinakapajj ukamp chikaw tukusjjarakispäna.

KUNJAMATSA JAN CHHAQTAYASKÄNA. Judionakar churatäkäna uka Leyirjamajja, reyinakajj Biblian nayrïr phesqa libronakapwa jupataki copiasipjjañapäna (Deuteronomio 17:18, NM). Ukhamarusa, copiañ toqet yatjjattʼatanakajj walja copianakwa Qollan Qellqatanakat lurapjjäna. Jichha pacha nayrïr 100 maratakejja, Israel markpachanwa sinagoganakan utj-jjäna ukhamarak Macedonia markansa utjarakïnwa (Lucas 4:16, 17; Hechos 17:11). ¿Kunjamatsa uka nayra qellqatanakajj jichhürunakan utjaskakpacha?

Rollos del mar Muerto sat nayra qellqatanakajja, qarqa pʼiyanakanwa wakullanakar imata jikjjatasiwayi.

Machaq Testamento qellqatat yatjjatata Philip Comfort chachajj akham siwa. “Judionakajj Qollan Qellqat rollonakjja, wakullanakaruw imapjjerïna” sasa. Cristianonakajj ukhamarakwa lurapjjäna, ukatwa nayra qellqatanakajj ñeqʼet lurat wakullanakana, yänak imañ jiskʼa utanakana, qarqa pʼiyanakana ukat waña cheqanakan jikjjatasiwayi.

KUNJAMSA UKAJJ YANAPTʼAWAYI. Walja nayra qellqatanakaw jichhakamajj Bibliat utjaski. Ukanakat yaqhepajj 2.000 jila maranakaniwa. Janipuniw yaqha ukham nayra qellqatanakajj utjkiti.

^ tʼaqa 3 Papirojj qellqañatakiw apnaqasi, ukajj uman jakir alit luratawa ukat uka pachpa sutinirakiwa. Pergaminosti, uywanakan lipʼichipat luratarakiwa.

^ tʼaqa 5 Amuytʼañataki, Estados Unidos markajj mä markjam yaqhaqtjjäna ukhajj mä documentow pergaminor qellqasïna. Ukampis niya 250 maranak qhepatjja, uk qellqatajj janiw liytʼañjamäjjänti.