Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 NAYRÏR JANAN PʼEQEÑCHÄWIPA | ANGELANAKAT ¿KUNSA BIBLIAJJ YATICHI?

¿Ñanqha angelanakajj utjiti?

¿Ñanqha angelanakajj utjiti?

Jïsa utjiwa. Amtañäni, Diosajja angelanakarojj jupanak pachpa kun lurañ ajllir luräna. Adanampir Evampir lurkäna uka qhepatjja, mä angelaw jan walinak lurañ ajllïna, ukhamat aka oraqen Dios contra saytʼasipjjañap munarakïna. Ukatwa Adanampi Evampejj Dios contra saytʼasipjjäna (Génesis 3:1-7; Apocalipsis 12:9). Uka angelajj janïr Dios contra saytʼaskipanjja, kuna sutinïnsa kuna luräwsa phoqäna uk janiw Biblian qhanañchkiti. Qhepatjja Supaya sasaw Biblian sutichi, ukajj “kutkatasiri” sañ muni, ukatjja Diablo sasaw suticharaki ukasti “kʼarintiri” sañ munaraki (Mateo 4:8-11).

Ukhamatwa Dios contra saytʼasiñajj qalltäna. Noé chachan urunakapanjja, mä qhawqha angelanakajj ‘utjäwinakap apanukusaw’ aka oraqer jaqenakar tukus saraqanipjjäna, ukhamat jan wali qʼañunak lurapjjäna. Kuna amtampitï Diosajj jupanakar lurkäna ukanaks apanukupjjarakïnwa (Judas 6; Génesis 6:1-4; 1 Pedro 3:19, 20).

¿Kunas uka qhepat pasäna? Jehová Diosajj aka oraqen jan wali jaqenak tukjañatak uma juicio apankäna ukhajja, ñanqha angelanakajj jañchi cuerpo jaytasajj alajjpacharuw espiritunakjam kutʼjjapjjäna. Ukampis Jehová Diosajj janiw uka ñanqha angelanakarojj alajjpachan katoqjjänti, janirakiw “lurañanakap” kuttʼayjjänti, jan ukasti juzgatäpjjañapatakiw “wali chʼamak lugarar” jaqontäna, Tártaro sasaw uka lugarar uñtʼasiraki (Judas 6; 2 Pedro 2:4). ‘Demonionakan apnaqeripajj’ Supayawa, munañapankapjjarakiwa, Supayasti ‘mä qhana angeläkaspas ukham tukuskaraki’ (Mateo 12:24; 2 Corintios 11:14).

Diosajj 1914 maranwa alajjpachan mä Reino jan ukajj gobierno uttʼayäna, apnaqeristi Jesusawa sasaw Bibliajj yatichi. * Uka qhepatsti Supayasa demonionakasa aka oraqer jaqokanitapjjänwa. Jichhürunakanjja, jan walinakasa qʼañu luräwinakan sarnaqañasa jukʼampiw jiljjataski. Ukanakasti demonionakajj wali coleratäpjjatap uñachtʼayi (Apocalipsis 12:9-12).

Akapachan jan walinakajj jukʼampiw jiljjattaski. Taqe ukanakaw ñanqha angelanakana jan ukajj demonionakan tukjäwipajj jakʼankatap uñachtʼayi. Niyarakiw Diosan Reinopajj uka ñanqha angelanakarojj jan walinak jan lurapjjañapatak jarktʼani, aka oraqsa mä paraisor tukuyani, waranqa maranakarakiw apnaqani. Uka pasatatsti ñanqha angelanakajj jaqenakar yantʼar puriyañatak mä jukʼa tiempow antutatäpjjani. Uka qhepatjja wiñayatakiw tukjatäpjjani (Mateo 25:41; Apocalipsis 20:1-3, 7-10).

^ Párrafo 6 Diosan Reinopat jukʼamp yatjjatañatakejja, ¿Kunsa Bibliax chiqpachapuni yatichi? sat libron 8 yatichäwip uñjjattʼäta, ukajj Jehová Diosan Testigonakapan luratawa. Internetanjja jw.org/ay cheqanwa utjaraki.