Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Munat familiar jiwipana

Munat familiar jiwipana

Australia markankir Vanessa sat warmejj akham siwa: “Jilïr jilajajj mä akatjamat jiwjjäna ukhajja, jan jiwañapatakejj janiw kamachirjamäkayätti. Walja phajjsinakas pasjjchïnjja, jupat amtasisajj llakisiskakiyätwa, ukajj mä cuchillompis chuymajar jununtkitaspa ukhamänwa. ‘Kunatsa jiwjje’ sasaw awisajj wal colerasiyäta. Jakaskäna ukhajj jan jupamp sinti chikachasitajatsa juchañchasirakiyätwa” sasa.

MÄ MUNAT familiaraman jiwatapat inas llakita, jan kamachtʼirjama, sapaki, colerata, jumas juchanïkasma ukham amuyaschiyäta. ¿Jakañajj wakisiskakiti? sasin inas jisktʼaschiyäta.

Maynin jiwatapat jachañajj walikïskiwa. Ukham lurasajja, qhawqsa jupar munasiyäta ukwa uñachtʼayaskayätajja. Ukhamajj ¿kunsa jan sint llakisiñatakejj lurasma?

¿KUNANAKAS YAQHEPANAKAR YANAPTʼAWAYI?

‘Janiw kunas llakinakaj apaqkitaspati’ sasas amuykstajja, aka ewjjtʼanakaw yanaptʼiristam.

JACHAÑÏPAN JACHAÑA

Janiw taqenejj mä igualaki llakisktanti, janirakiw mä pachpa tiempokis llakitäktanti. Ukampisa jachañajj chuymasan sum jikjjatasiñatakiw yanaptʼistaspa. Qalltan parlaniwayktan uka Vanessa warmejj akham siwa: “Jachakwa jachaskayäta ukajj jan sint llakisiñatakiw yanaptʼitäna” sasa. Sofía warmin kullakapajj mä akatjamatwa jiwjjäna, jupajj akham siwa: “Kunatï pasawaykitu ukjjat lupʼiñajj walpun chuym ustʼayitu, jenqʼechata (infectata) mä heridsa qollayasksna ukhamawa. Qollapkistu ukhajj wal usustu, ukampis heridasan jakañapatakiw ukajj yanaptʼistu” sasa.

 KUNJAMÄSKISA UK YAQHANAKAR YATIYAÑA

Awisajj jan khitimp parlañ munañajj walikïskiwa. Ukampis maynin jiwatapat llakisiñajj mä jachʼa qʼepjamawa, janiw sapamak apkasmati. 17 marani Jared sat mä waynajj tatapan jiwatap qhepat akham sänwa: “Kuntï siskayäta ukajj inas jan qhanäkchïnti, ukampis kunjamäskayätsa uk mayninakamp parlañajj wal yanaptʼitäna” sasa. Qalltan parlaniwayktan uka Janice warmejj akham sarakiwa: “Kunjamäskayätsa uk mayninakar yatiyasajj chuymachtʼatayätwa, janiw sapak amuyasjjayätti” sasa.

MAYNIMP YANAPTʼAYASIÑA

Mä doctorajj akham siwa: “Maynejj jiwjje uka qhepat familiaranakampi amigonakampi yanaptʼayasirinakajj janiw llakimp sint aynachtʼapkiti” sasa. Kunansa amigonakamajj yanaptʼapjjeristam uk yatiyañamawa. Jupanakajj yanaptʼañ munasipkiristamwa, ukampis kunjamsa yanaptʼapjjeristam uk janiw yatipkaspati (Proverbios 17:17).

DIOSAR JUKʼAMP JAKʼACHASIÑA

Tina warmejj akham siwa: “Esposojajj mä akatjamatwa canceramp jiwjjäna, jupar wal confiyayäta. Jiwatap qhepatjja, Diosaruw taqe kuns yatiyjjayäta. Sapa alwa sartasajj Diosaruw ukür aguantañatak yanaptʼa mayisirïta. Jupajj kunaymanitwa yanaptʼitäna...” sasa. Tarsha warmejj 22 maranïkäna ukhaw mamitapajj jiwjjäna, jupajj akham siwa: “Sapüru Biblia liyiñaw wal chuymachtʼitäna. Llakinakajat jan sint lupʼiñatakis yanaptʼarakitänwa” sasa.

JIWATANAKAN JAKTANIÑAPAT LUPʼIÑA

Tina sat warmejj saskakiwa: “Qalltanjja, jiwatat jaktaniñ suytʼäwejj janiw chuymachkitänti. Esposojampïñwa munayäta, wawanakajas awkipampïñwa munapjjarakïna. Ukampis jichhajj pusi maranak pasatatjja, uka suytʼäwiw jan aynachtʼañatak yanaptʼitu. Jutïrin kunjamsa esposojampi mayamp jikisï uka toqet lupʼiñajj wal kusisiyitu, sumakirakiw jikjjatasta” sasa.

Inas uka ratpach chuymachtʼäwi jan jikjjatkchïtati, ukampis Vanessa warmin arunakapaw chuymachtʼiristam. Jupajj akham sänwa: “‘Janipuniw armkäti’ sasin inas amuysta, ukampis janiw ukhamäkiti” sasa.

Ak amtapunim: familiaramar janis armirjamäkchïtajja, jakañamajj wakisiskakiwa. Diosan yanaptʼapampejja, amigonakamampejj kusisitakïskasmawa, jakäwimas janiw inamayäkaniti. Niyaw Diosajj jiwatanakar jaktayjjani. Jupajja familiaranakamampi mayamp jikisisma, wiñayatak jan kunat llakisis jakasisma ukwa muni.