Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 NAYRÏR JANAN PʼEQEÑCHÄWIPA | DIOSAN SUMA REGALOPA ¿KATOQASÏTATI?

Wali suma regalo

Wali suma regalo

JORDANAJJ barcor uñtasit mä tajador aptʼatawa. Ukajj jiskʼakïkchisa, jupatakejj wali valoraniwa. Jupajj akham siwa: “Jiskʼäkayäta ukhaw familiajan mä amigopajj uka tajador regalito, jupajj Russell satänwa” sasa. Russell jilatajj jiwjjäna uka qhepatakwa Jordanajj uka jilatajj familian wali munat amigopätapa, ukat qawqsa abuelitoparusa awk taykaparus yanaptʼäna uk yatïna. Jordanajj akham saskakiwa: “Uka jilatat jukʼamp yatisajja, regalopajj nayatak jukʼamp valoraniwa” sasa.

¿Kunsa uka sarnaqäwejj amuytʼayistu? Mä regalojja, maynitakejj janis valoranïkaspa ukhamäspawa, ukampis yuspärasir chuyman mä jaqetakejj wali valoranïspawa. Ukhamarakiw Diosajj wali valorani mä regalo churawayistu, Bibliajj uka toqet parlasajj aka uñtʼat arunakampiw akham sas qhanañchi: “Diosajj akapachar wal munatap laykuw mä sapa Yoqapar khitani, taqe khitinakatejj jupar iyawsapki ukanakajj jan chhaqañapataki, jan ukasti wiñay jakañanïñapataki” (Juan 3:16).

¡Diosan regalopajj wiñay jakañwa churistaspa! ¿Yaqha ukham suma regalojj utjaspati? Yaqhepatakejj janis ukhamäkchejja, cristianonakatakejj ‘jila alani’ wali valoraniwa (Salmo 49:8; 1 Pedro 1:18, 19). ¿Kunatsa Diosajj jiwas layku jiwañapatak Yoqapar khitaniwayi?

Apóstol Pablojj akham siwa: “Kunjämatejj mä sapa jaqe toqe juchajj aka oraqer mantankejja, ukat jiwajj uka jucha laykurak utjejja, ukhamarakiw jiwajj taqe jaqerojj katuntawayi” (Romanos 5:12). Adán chachajja, yatkasaw Diosar jan istʼawaykänti, ukatwa jiwañar purtʼasiwayi. Adanan taqe wawanakapajja, jupan juchapatwa jiwañar katuyatätanjja.

“Juchan wajjtʼasiñapasti jiwañawa, ukampis Diosan wajjtʼäwipajj wiñay jakañawa Cristo Jesús  Tatitusana” (Romanos 6:23). Diosajj jaqenakar jiwañat ‘qhespiyañatakiw’ Jesucristo yoqapar jiwas layku jiwañapatak khitaniwayi. Uka sacrificior iyawsapki ukanakajja, wiñay jakañwa katoqapjjani (Romanos 3:24).

Diosajj servirinakapar Jesucristo toqe churki uka bendicionanakat parlkasajja, akham sasaw Pablojj säna: “¡Yuspagaratäpan Diosajja! ¡Jiwasarojj mä jachʼa churäwi churistojja, ukasti jan amuytʼkayawa!” sasa (2 Corintios 9:15). Cheqansa, Diosajj jaqenakar juchampit jiwañampit qhespiyawayki ukajj jan kikpani mä suma regalowa, ¿kunatsa ukham sistanjja? Diosan uka suma regalopajja, ¿kunatsa Jupajj churkistu uka regalonakapat sipansa jukʼamp sumäpacha? * Ukat ¿kunjamsa uka regalot Diosar yuspärsna? Jutïr pä yatichäwinakanwa uka jisktʼanakarojj qhanañchasiskani.

^ tʼaqa 8 Jesusajj taqe chuymaw jiwas layku jiwawayi, janiw khitis obligkänti (1 Juan 3:16). Ukampis Diosaw amtap phoqasiñapatakejj Jesusan jiwañap amtäna. Ukatwa aka revistan nayrïr yatichäwinakapajja, kunsa Diosajj jiwasar qhespiyañatak lurawayi uka toqet parlaskani.