Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Diosar uñtʼañajj kunjamsa yanaptʼiristamjja?

¿Diosar uñtʼañajj kunjamsa yanaptʼiristamjja?

Jichhakamajja, Diosajj kunjam Diosasa ukwa mä qhawqha uñjawaytanjja. Diosajj Jehová sutinïtapa, ukhamarak wali munasiri Diosätapwa Bibliajj yatichi, ukwa yateqtanjja. Kunanaksa Diosajj lurawayi, kunanaksa jutïrin lurarakini ukwa yateqaraktanjja. Diosat yatiñajj utjaskakiwa, ukampis inas jumajj akham jisktʼasta: “¿Diosar uñtʼañajj yanaptʼitaspati?” sasa.

Bibliajj akham siwa: ‘Jumatejj Diosar thaqäta ukhajja, Jupajj jikjjatayasïtamwa’ sasa (1 Crónicas 28:9). Jumatï Jehová Diosar uñtʼañatak chʼamachasïta ukhajja, Jupan amigopäyätawa (Salmo 25:14). ¿Diosan amigopäñajj kunjamsa yanaptʼiristamjja?

Kusisitaw jakasïta. Diosajj ‘kusisir Diosawa’ sasaw Bibliajj yatichi (1 Timoteo 1:11). Ukhamasti, jumatï Diosar jakʼachasiñataki, ukhamarak Jupat yateqasiñatak chʼamachasïta ukhajja, kusisitaw jakasïta. Kusisit jakasiñasti, jan usuntañataki ukhamarak llakimp jan aynachtʼañatakiw yanaptʼätam (Salmo 33:12). Janiw ukakïkiti, jan wali luräwinak apanukuñataki, sum sarnaqañataki, ukhamarak mayninakamp sum apasiñatakiw yanaptʼarakïtam. Diosar uñtʼasajja, salmonak qellqerjamaw akham säta: “Nayasti Diosaruw jakʼachasï, ukaw nayarojj kusisiyitu” sasa (Salmo 73:28).

Diosajj janiw jumat armaskaniti. Jehová Diosajj amigonakapar akham siwa: “Nayaw sarañamäki uka thak uñachayaskäma” sasa (Salmo 32:8). ¿Kunsa uka arunakajj amuytʼayistu? Diosajj sapa mayni servirinakapatwa llakisi, kunatï jupanakatak wakiski ukwa churaraki (Salmo 139:1, 2). Jehová Diosan amigopäyäta ukhajja, Jupajj janipuniw jaytkätamti.

Jutïrin wali kusisitaw jakasïta. Jehová Diosajj janiw jichha tiemponak kusisit jakasiñatak yanaptʼkätamti, jan ukasti, jutïrin kusisit jakasiñatakiw yanaptʼarakïtam (Isaías 48:17, 18). Bibliajj akham siwa: “Khitinakatï wiñay jakañ katoqapkani ukanakajja juma sapa cheqpach Diosar uñtʼasipkakiñapawa jumajj khitankta uka Jesucristorus ukhamarakiw uñtʼasipkakiñapa” sasa (Juan 17:3). Kuntï Diosajj jutïritak arsuwayki ukajja, “kunjamtï mä anclajj barcor katjjäskejja, ukhamarakiw jakäwisar [aka jan wali tiemponakan] katjjasi” (Hebreos 6:19).

Diosar uñtʼañasa, amigopäñas kunjamsa yanaptʼiristam ukwa aka yatichäwin mä qhawqha toqet uñjawaytanjja. Jumatï jukʼamp yatiñ munsta ukhajja, Jehová Diosan Testigonakapampiw parltʼasma, jan ukajj Internetan jw.org cheqaruw mantasma.