Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Diosajj jumat sinttʼaspachati?

¿Diosajj jumat sinttʼaspachati?

DIOSAN LURATANAKAPAJJ ¿KUNSA YATICHISTU?

Jaqenakajj mayninakat sinttʼasiri, chuymapan kunjamäsipkisa uk amuyiri ukhamätanwa. Rick Hanson sat doctorajj akham siwa: “Mayninakat sinttʼasiñajj chuymasankiwa” sasa.

AK AMUYTʼAM: Animalanakat sipansa, ¿kunatsa jaqenakakejj mayninakat sinttʼasiri ukhamätanjja? Diosajj jupar uñtasitwa lurawayistu sasaw Bibliajj yatichi (Génesis 1:26). Ukhamajja, kunjamtï Diosajj suma chuymanïki ukhamarakiw jiwasajj suma chuymanïsna. Kunapachatï jaqe masisat sinttʼastan ukhajja, taqe kun luriri Jehová Diosjam sinttʼasirïtaswa uñachtʼayasktanjja (Proverbios 14:31).

DIOSAJJ WALI SINTTʼASIRIWA, ¿KUNJAMSA BIBLIAJJ UK AMUYTʼAYISTU?

Diosajj wal jiwasat sinttʼasi, janiw tʼaqesiñassa munkiti. Israelitanakajj Egipton esclavonakat trabajisajj kunja tʼaqesiyatas uñjasipjjäna, kunjamsa 40 maranak wasaran muyupjjäna uka toqet parlkasajja, Bibliajj akham siwa: ‘Diosaw taqe llakinakapat salväna’ sasa (Isaías 63:9). Diosajj kunjamsa markapajj tʼaqesiskäna uk yatïnwa, wal jupanakat sinttʼasirakïna. Ukatwa akham säna: “Nayajj sum yatta jupanakan tʼaqhesitanakapjja” sasa (Éxodo 3:7). “Khititejj llamktʼi markajjarojja, ukajj nayan nayrajjaruw llamktʼaski” sasaw sarakïna (Zacarías 2:8). Ukhamajj kunapachatï maynejj jan wal lurkistu ukhajja, Diosarus jan wal lurkaspa ukhamawa.

Awisajj chuymasaw juchañchistaspa, jan ukajj janis Diosan khuyapayasiñamp katoqañatakejj walïksna ukhamwa amuyassna. Ukhamächi ukhajja, ak amtañasawa: “Diosajj chuymasat sipansa jukʼamp jachʼawa, taqe kunwa yatiraki” (1 Juan 3:19, 20). Diosajj jiwasat sipansa jukʼamp sum uñtʼistu. Kunjamanakansa uñjastan, kunas chuymasan utji, kunjamäsktansa taqe ukanakwa yati.

Jan waltʼäwinakan uñjaskañäni ukhajja, Diosajj yanaptʼistaniwa. Uk yatisaw Jupan chuymachtʼäwipsa, yatiñapsa, yanaptʼapsa thaqsna

 Bibliajj akham siwa:

  • “Jawsität ukhajj nayajj istʼämawa, yanapa mayisisatejj arnaqasïtajja, nayasti: ‘Akankasktwa’ sarakïmawa” (ISAÍAS 58:9).

  • ‘Nayasti yatiraktwa kuna amtäwinakatejj jumanakatak utjkitu ukanakjja, uka amtäwinakasti jumanakan askimatakiwa, janiw jan waltʼapjjañamatakïkiti, ukhamat qhepa urunakanjja wali suma jakasipjjañamataki, suytʼañansa phoqantataraki. Naya Tatituw ukjja arsta. Ukapachaw jumanakajj artʼasipjjetäta, ukatsti nayan ukaruw jutapjjarakïta, nayaru mayisisa, nayasti mayisitanakamjja istʼapjjarakïmawa’ (JEREMÍAS 29:11, 12).

  • ‘Jumaw jachatanakaj apthaptajja. ¿Janit ukanakajj libroman qhanäkisti?’ (SALMO 56:8).

DIOSAJJ UÑTʼISTUWA, KUNJAMÄSKTANSA UKSA YATIRAKISTUWA

Diosajj jiwasat sinttʼasitap yatiñajj ¿yanaptʼistaspati? María warmit parltʼañäni.

Jupajj akham siwa: “18 marani yoqajajj pä maraw cáncer usump wal tʼaqesiwayi. Jupajj jiwjjäna ukhajja, ‘jakañ vidajj janipuniw walïkiti’ sasaw sayäta. ‘Jehová Diosajj janiw yanaptʼawaykituti’ sasarakiw Jupatak wal colerayäta.

”‘Jehová Diosajj janiw munaskpachïtuti’ sasaw amuyayäta. Sojjta maranak qhepatjja, wali munasiri sinttʼasiri mä amigajaruw kunjamsa jikjjatasiyäta uk yatiyayäta, jupajj congregacionajankänwa. Walja horanak nayar istʼasajja, amigajajj kuntï 1 Juan 3:19, 20 textojj siski ukwa amtayitäna, ukajj chuymajarupuniw purtʼitäna. Ukanjja, ‘Diosajj chuymasat sipansa jukʼamp jachʼawa, taqe kunwa yatiraki’ sasaw qhanañchi. ‘Jehová Diosajj kunja llakitas jikjjatasta uk yatiwa’ sasaw amigajajj sum amuytʼayitäna.

”Ukhamsa yanaptʼkchitänjja, nayajj chuyma ustʼatakïskayätwa. Ukhaw Salmo 94:19 texto liytʼayäta. Ukanjj akham siwa: ‘Llakinakajajj walipun yapjjataskäna ukapachaw chuymachäwimampejj kusisiyista’ sasa. Uka arunakajj walpun yanaptʼitäna. Ukatwa Jehová Diosar oracionan jakʼachasiyäta, ‘Jupajj istʼituwa, kunjamsa jikjjatasta uksa amuyarakituwa’ sasin confiyasa. Ukham lurañajj chuymajan sum jikjjatasiñatakiw yanaptʼitäna”.

Diosajj kunjamsa jikjjatastan uk yatiwa, jiwasat sinttʼasirakiwa, uk yatiñajj wal chuymachtʼistu. Ukampis ¿kunatsa akapachan walja tʼaqesiñanakajj utji? ¿Diosat juchanakasat castigpachïstu? ¿Tʼaqesiñanakajj tukusjjpachäniti? Jutïr yatichäwinwa uka jisktʼanakar qhanañchasini.