Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jehová Diosjam munasiri khuyaptʼayasirïpjjañäni

Jehová Diosjam munasiri khuyaptʼayasirïpjjañäni

“Jan kunan jaqempiru, pisi chʼaman jaqempir uñjirejj [jan ukajj khuyaptʼayasirejj] kusisiñan jaqewa” (SAL. 41:1).

CANCIÓN: 130, 107

1. ¿Kunjamsa Diosan servirinakapajj munasirïtas uñachtʼaytan?

DIOSAN servirinakapajj mä familiakiw Jupar sirvtanjja, wali munasirit uñtʼatarakïtanwa (1 Juan 4:16, 21). Munasirïtasjja, jila partejj mayninakar chʼamañchtʼasa, munasiñamp uñjasa, yaqha ukhamanak lurasaw uñachtʼaytanjja. Mayninakar munastan khuyaptʼaytan ukhajja, ‘Diosan munat wawanakapjamajj jupatwa yateqastanjja’ (Efes. 5:1).

2. ¿Kunjamsa Jesusajj Awkipat yateqasisajj munasiñ uñachtʼayäna?

2 Jesusajj Awkipatpun yateqasirïna. Jaqenakarojj munasiñampiw uñjirïna. ‘Nayar jutapjjam, taqe qarjatanaka, jatjatanaka, nayaw jumanakar samarañ churapjjäma. Nayajj llampʼu chuymanïtwa, humilde chuymanirakïtwa’ sasaw säna (Mat. 11:28, 29). Jesusat yateqasisin “jan kunan jaqempiru, pisi chʼaman jaqempi[ru]”, mä arunjja humilde jaqet khuyaptʼayastan ukhajja, Diosajj suma jaqet uñjistu, ukatwa kusisitarakïtanjja (Sal. 41:1). Jichhajja kunjamsa familiansa, congregacionansa, yatiykasas mayninakajj  kunjamäsipkis uk amuyirïtas uñachtʼaysna uk yatjjatañäni.

FAMILIASAN KUNJAMÄSIPKIS UK AMUYAÑASAWA

3. ¿Kunjamsa chachanakajj esposapar uñjapjjañapa? (Página 28 ukankir fotonak uñjjattʼäta).

3 Mä familianjja, esposow nayraqatajj familiapat llakisiñapa (Efes. 5:25; 6:4). Biblianjja, “warminakamarojj sum uñtʼapjjam”, sasaw jupanakar ewjjtʼi. Uka arunakajj “kunjamäsipkis uk amuyapjjam” sasaw jaqokipasirakispa (1 Ped. 3:7, nota). Familiapajj kunjamäskis uk amuyiri chachajja, esposaparojj yanapiriparjamaw uñji, waljanakanwa jan pachpäpkiti uksa yatirakiwa, ukampis ukhamätapat janis valoranïkaspa ukham janiw uñjkiti (Gén. 2:18). Kunjamsa esposapajj jikjjatasi uk amuyiwa, respetompiw uñjaraki, janiw jiskʼachkiti. Canadá markankir mä kullakajj akham siwa: “Esposojajj kunjamsa jikjjatasta uk amuyapunituwa, janipuniw ‘kamisaraki ukham llakisjjätasti’ sasin sirïkituti. Nayar istʼañatakis tiempo apstʼasiwa. Pantjaskta ukhas munasiñampiw ewjjtʼitu” sasa.

4. ¿Kunjamsa mä chachajj esposapar munasitap uñachtʼayi?

4 Esposapar munasir chachajja, janipuniw jan wali amtampejj yaqha warminakar uñchʼukkiti ni jan wali amtampis parlkiti, janirakiw redes sociales sasin uñtʼatäki uka toqnamsa ni Internet toqes ukham lurkiti (Job 31:1). Warmipar munasitap laykojj janipuniw engañkiti, jukʼampisa Diosaruw wal munasi jan walïki uksa uñisiwa, ukatwa ukham luri (Salmo 19:14; Amós 5:15 liytʼañataki).

5. ¿Kunjamsa mä warmejj esposopat khuyaptʼayasitap uñachtʼayaspa?

5 Mä chachajj Jesucristo pʼeqtʼiripat yateqasi ukhajja, ‘wali respetompi’ jupar uñjañapatakiw esposapar yanaptʼi (Efes. 5:22-25, 33). Ukhamatwa kullakajj esposopat khuyaptʼayasini. Sañäni, Diosan markapan walja luräwinak katoqani ukhasa, jan ukajj jan walinak utjatapat jan tiemponi sarnaqani ukhas khuyaptʼayasiniwa. Gran Bretaña toqenkir mä jilatajj akham siwa: “Awisajja, esposajajj kunatsa llakitäta uk jankʼakiw amuyi, ukatsti kuntï Proverbios 20:5 texton siski ukarjamaw yatiñap wakischi ukhajj luri” sasa.

6. ¿Kunjamsa wawanakarojj mayninakat llakisipjjañapatak taqenis yanaptʼsna, ukat kunjamsa ukajj jupanakar yanaptʼani?

6 Awk taykanakajj purapat llakisipjje ukhajja, wawanakatakejj wali yateqaskayäpjjewa. Mayninakat kunjamsa llakisipjjaspa uksa wawanakapar yatichapjjañaparakiwa. Sañäni, Tantachasiñ Utan jan tʼijnaqapjjañapatakiw yatichapjjaspa, jan ukajj kusistʼañatak tantachasktan ukhajja, jupat jilïrïpki ukanakaw nayraqat manqʼa servisipjjañapa sasaw ewjjtʼapjjarakispa. Cheqas taqeniw awk taykanakarojj wawanakapar sum yatichañatak yanaptʼsna. Mä jiskʼa wawatï punku jistʼaristani, jan ukajj yaqha ukhamanakan yanaptʼistani ukhajja, ‘walik ukham lurtajja’ sasaw sañasa. Ukajj wal jupar yanaptʼani, ‘katoqañat sipansa churañanwa jukʼamp kusisiñajj utji’ siski uka arunaksa janiw armkaniti (Hech. 20:35).

JILAT KULLAKANAKAR MUNASIÑASAWA

7. ¿Kunjamsa Jesusajj mä oqar jaqet khuyaptʼayasïna, kunsa jiwasajj ukat yateqsna?

7 Jesusajj Decápolis toqenkaskäna ukhajja, “mä oqar jaqeruw jupan ukar irpanipjjäna, uka jaqejj khakharakïnwa” (Mar. 7:31-35). Jesusajja ‘jaqenak taypit yaqha cheqar irpasaw’ uka jaqer qolläna. ¿Kunatsa ukham luräna? Niyakejjay oqarächïnjja, jaqenak taypinkañ ajjsarayaspachänwa. Jiwasajj janiw milagronak lurktanti, ukampis jilat kullakanakajj kunjamäsipkisa, kuna yanaptʼsa munapjje ukanak amuysnawa cheqas amuyañasawa. Apóstol Pablojj akham sänwa: “Mayninakajj kunjamäsipkisa  ukjja amuyapjjapuniñäni, ukhamat munasiñasa wali suma luräwinakasa jukʼamp utjañapataki” sasa (Heb. 10:24). Oqaräkäna uka jaqejj kunjamas jikjjatasïna uk Jesusajj amuyänwa, ukajj wali yateqaskayawa.

8, 9. Chuymankipstat jilat kullakanakarusa usutanakarus ¿kunjamsa munasitas uñachtʼaysna? Uk experiencianakampi qhanañchtʼam.

8 Chuymankipstat jilat kullakanakatsa usutanakatsa khuyaptʼayasiñasawa. Diosan servirinakapatakejja, jukʼa tiemponak waljanak lurañat sipansa munasiñaw jukʼamp wakiskirejja (Juan 13:34, 35). Uka munasiñaw jilïr jilat kullakanakar yanaptʼañatakisa, usutäpki ukanakar yanaptʼañatakis chʼamañchtʼistu. Jupanakarojj yatiyir sarapjjañapataki, tantachäwinakar sarapjjañapatakiw yanaptʼtanjja. Janis jiwasjam jukʼamp horanak predikirjamäpkchejja, munasiñatwa yanaptʼtanjja (Mat. 13:23). Michael jilatajj silla de ruedatakwa sarnaqe, ukampis familiapampi jilat kullakanakampiw jupar wal yanaptʼapjje. Jupajj akham siwa: “Mayninakan yanaptʼapampiw niya taqe tantachäwinakar sarta, predikiris sararakta, ukat wal yuspärta. Yamas walja jaqenakajj utjki uka cheqanakan yatiyañajj walpun gustitu” sasa.

9 Walja Betel utanakanjja, jilïr jilat kullakanaka, usutanaka ukhamaw utji. Kawkjantï trabajipki uka departamenton pʼeqtʼiri jilatanakajja, munasiñampiw jupanakar yanaptʼapjje. Ukatakejj cartanak qellqasa jan ukajj telefonot jawsasa predicapjjañapatakiw yanaptʼapjje. 86 marani Bill sat mä jilatajj jaya cheqanakan jakasipki uka jaqenakaruw cartanak apayi, jupajj akham siwa: “Cartanak qellqasa predicapjjatajat walpun yuspärapjjta” sasa. Niya 90 marani Nancy kullakajj akham sarakiwa: “Nayatakejja, cartanak qellqañajj janiw papelanak sobreru uchañakïkiti, jan ukasti Diosan arunakapa yatiyañawa. Jaqenakajj Diosat yatipjjañapawa” sasa. Ethel sat kullakajj 1921 maranwa nasïna, jupajj akham siwa: “Cuerpojajj sapa kutiw usutu. Awisajja, isi uchasiñas wali chʼamakiwa” sasa. Ukhamäkchisa telefonot predicañajj kullakar wal gusti, revisitanakapas utjarakiwa. 85 marani Barbara kullakajj akham sarakiwa: “Niyakejjay usutästjja, sapa kuti predikir sarañajj nayatak chʼamakiwa, ukampis telefonotwa predikta. Ukatwa Diosar wal yuspärta” sasa. Uka munat jilïr jilat kullakanakat mä qhawqhanejj niya mä maranjja, 1.228 horanaka, 6.265 cartanakwa qellqapjjäna, 2.000 kutiw telefonot jawsapjjarakïna, 6.315 Bibliat apstʼat qellqatanakwa lakirapjjarakïna. ¡Uk uñjasajj Jehová Diosajj walpun kusispacha! (Prov. 27:11).

10. ¿Kunjamsa jilat kullakanakarojj tantachäwin jukʼamp sum yatjjatapjjañapatak yanaptʼsna?

10 Tantachäwinakan mayninakat llakisiñasawa. Jilat kullakanakat llakisstan ukhajja, tantachäwin jukʼamp sum chʼamañchtʼasipjjañapatakiw yanaptʼañäni. ¿Kunjamsa uk lursna? Maya, mayninakar jan pantjasiyañatakejj faltkipanwa tantachäwinakar puriñasa. Awisajja kun utjipansa qheptʼañajj utjaspawa. Ukampis sapa kuti qheptʼatakpun puriñ yatstan ukhajja, kunsa jan qheptʼañatak lursna ukwa amuytʼañasa, ukhamatwa jilat kullakanakar respetatas uñachtʼayañäni. Ukat ak amtañasawa Jehová Diosampi Jesusampiw tantachäwinakar invittʼapjjestu (Mat. 18:20). Jupanakarojj wali respetompiw uñjañasa.

11. ¿Kunatsa tantachäwin arstʼapki ukanakajj kuntï 1 Corintios 14:40 textojj siski ukarjam lurapjjañapa?

11 Paya, “taqe kunsa wali suma, yäparu lurapjjam” siski uka arunakarjam lurasaw jilat kullakanakat llakisitas uñachtʼayaraksna (1 Cor. 14:40). Sañäni, plataformat arstʼirinakajj horasaparuw tukuyapjjañapa. Ukhamatwa ukjjar arstʼkani uka jilatatsa mayni jilat kullakanakatsa llakisipjjatap uñachtʼayapjjani.  ¿Kunatsa ukham sistanjja? Yaqhep jilat kullakanakajj inas wali jayatpach tantachäwinakar jutapjjchi, yaqhepajj inas autot sarapjjañapächi, yaqhepansti esposopasa jan ukajj esposapas janiw Testigöpkiti, ukatwa utar jankʼak puripjjañap wakisispa.

12. ¿Kunatsa jilïr irpirinakar respetañasa munasiñasaraki? (“ Diosan markapan irpirïpki ukanakar respetañasawa” sat recuadro uñjjattʼäta).

12 Jilïr irpirinakajj congregacionan yanaptʼañatakiw wal chʼamachasipjje, yatiyañatakis chʼamachasipjjarakiwa, ukatwa jupanakar respetañasa munasiñasaraki (1 Tesalonicenses 5:12, 13 liytʼañataki). Cheqas kunanaktï jiwas layku lurapki ukanakat wal yuspärtanjja. Ukhamasti yanaptʼapjjañäni, istʼapjjarakiñäni. Jupanakajja ‘luratanakasat Diosar cuenta churirinakjamaw sum uñjasipkistu’ (Heb. 13:7, 17).

JAQENAKAJJ KUNJAMÄSIPKIS UK AMUYAÑASAWA

13. ¿Kunjamtï Jesusajj jaqenakar uñjirïkäna ukat kunsa yateqsna?

13 Isaías profetajj Jesusat akham sänwa: “Niya pʼakisirjam soqos lawsa janiw pʼakjkaniti, janirakiw niya jiwtʼaskirjam mechsa phustʼkaniti” sasa (Is. 42:3). Jesusajj jaqenakar wal munasïna, kunjamäsipkis uksa amuyänwa. Niya pʼakisirjam soqos lawar uñtata jan ukajj niya jiwtʼaskirjam mechar uñtatäpkäna ukanakajj kunjamsa jikjjatasipjjäna uk amuyänwa. Ukatwa khuyaptʼayasiri, munasiri, wali pacienciani ukhamänjja. Wawanakasa jupan ukaruw jutapjjerïna (Mar. 10:14). Cheqas janiw kunjamsa jaqenakajj jikjjatasipjje uk Jesusjam yatksnati ni jupjamas yatichksnati. Ukampis yatiyktan uka jaqenakajj kunjamäsipkis uk amuysnawa, amuyañasawa. ¿Kunjamsa uk lursna? 1) munasiñampi  parlasa, 2) wakiski ukapachan predicasa, 3) jan jaya tiempo parlasa.

14. ¿Kunatsa jaqenakarojj munasiñampi parlañasa?

14 Kunjamsa jaqenakamp parlañasa. Empresarionakasa, politiconakasa, religión pʼeqtʼirinakas jan khuyaptʼayasiri qollqe chuyma ukhamäpjjewa. Ukatwa walja jaqenakajj usuchnoqatäpkaspasa, ananukutäpkaspas ukham jikjjatasipjje (Mat. 9:36). Waljanejja janiw khitirus ni kunarus confiyapkiti ni jutïritakis mä suytʼäwinïpkiti. Ukatwa jupanakarojj munasiñampi parlañasa. Cheqas jila parte jaqenakajja, janiw Bibliat sum yatitasata jan ukajj sum qhanañchatasat istʼapkistuti, jan ukasti jupanakat cheqpachapuni llakisitasata respetomp parlatasatwa istʼapjjestu.

15. Jaqenakajj kunjamäsipkisa uk amuyatas ¿kunjamanakatsa uñachtʼaysna?

15 Yatiyktan uka jaqenakajj kunjamäsipkisa uk amuyatas kunaymanitwa uñachtʼaysna. Sañäni, jisktʼanakampi yatichañajj wali wakiskiriwa, ukampis respetompi munasiñampiw jisktʼañasa. Mä precursor jilatan territoriopanjja, jaqenakajj ajjsarirïpjjatap laykojj janiw añcha parlapkiti. Ukatwa kuna jisktʼanakatï jupanakar phenqʼachkaspa, qhanañchañsa jan puedipkaspa ukanak jan jisktʼirïkänti. ‘¿Diosan sutip yattati?’ ‘¿Diosan Reinopajj kunasa uk yattati?’ sasin janipuniw jisktʼirïkänti. Antisas “Diosajj sutinïtapwa Bibliat yateqta, ¿uk uñachtʼayirismati?” sasaw sirïna. Cheqas sapa markaw mayj mayja costumbrenïpjje, jaqes janirakiw mä pachpäktanti, ukatwa kunjamsa predicañasa uk jan sisksnati. Ukampis jaqenakajj kunjamäsipkis uk amuyañasapuniwa, respetañasarakiwa, ukatakejj jupanakar sum uñtʼañasawa.

16, 17. 1) Jaqenakat khuyaptʼayasstan ukhajja, ¿kunapachas predikir sarañäni? 2) Jaqenakat khuyaptʼayasstan ukhajja, ¿qhawqha tiempos parlañäni?

16 Kunapachas jaqenakampi parlañasa. Utat uta yatiyir sartan ukhajja, jaqenakajj janiw suyapkistuti, kunatejj janiw invitatäktanti. Ukatwa kuna horasas tiemponïpjjaspa uka horaru sarañasa (Mat. 7:12). Sañäni, yatiyktan uka cheqan jakasir jaqenakajj seman tukuyarojj inas jukʼamp uru ikit sartasipkchi. Ukhamächi ukhajja, inas callenakana jan ukajj carritompi predicañ qalltsna, jan ukajja alwat sartapki ukanakaruw mayamp visitir sarsna.

17 Qhawqha tiempos jaqenakampi parlañasa. Jaqenakajja janiw tiemponïpkiti, ukatwa yatiykasajj jan añcha parlañasäkiti, yamas nayrïr kutejj janiw jaya tiempo parlañ wakiskaspati. Ukhamajj jankʼakiw parlañ tukuyañasa (1 Cor. 9:20-23). Jaqenakajj tiemponisipkiti janicha uk amuytan ukhajja, mayanjja istʼapjjestaspawa. Kunjamtï Diosajj sarnaqañas munki ukham chuymanïñatak chʼamachasiñäni ukhajja, Jupamp ‘chika trabajitaswa’ uñachtʼayañäni. Jehová Diosajja jupar serviñapatakejj jiwas toqew jaqenakar yanaptʼaspa (1 Cor. 3:6, 7, 9).

18. Mayninakajj kunjamäsipkis uk amuyañäni ukhajja, ¿kuna bendicionanaksa katoqañäni?

18 Yatjjatawayktan ukarjamajja, familiansa, congregacionansa, yatiykasas mayninakajj kunjamäsipkis uk amuyañatakiw wal chʼamachasiñasa. Ukham lurañäni ukhajja, jichhürunakansa jutïrinsa walja bendicionanakwa katoqañäni. Salmo 41:1, 2 qellqatajj akham siwa: “Jan kunan jaqempiru, pisi chʼaman jaqempir uñjirejj [jan ukajj khuyaptʼayasirejj] kusisiñan jaqewa, Tatituw jan waltʼañ urunakan juparojj qhespiyani. [...] Kusisiñ churarakini” sasa.