Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Nyzhnya Apsha (Ucrania) markan 2012 maran apaskäna uka Kimsa Uru Jachʼa Tantachäwi

Cosecha apthapiñajj waljawa

Cosecha apthapiñajj waljawa

QHEPA urunakanjja, arkirinakajajj walja cosecha apthapipjjani sasaw Jesusajj arsuwayäna (Mat. 9:37; 24:14). Uka arunakajj Transcarpatia (Ucrania) sat cheqanwa phoqasiski. Uka jakʼankir kimsa markanakanjja, 50 congregacionanaka ukat 5.400 jila yatiyirinakaw utji. * Amuytʼañataki, uka markanakan jakasir jaqenakatjja, pusinit mayniw Jehová Diosan Testigopajja.

¿Uka cheqan jakasirinakajj kunjamäpjjesa? Vasile jilatajj akham siwa: “Jupanakajj Bibliar respetapjjewa, cheqaparjam sarnaqañsa wali wakiskirit uñjapjje, familjamas mayachtʼataw jakasipjje, maynit maynikamas yanaptʼasipjjarakiwa. Kunarutï creyktan ukar janis iyawsapkchejja, Bibliat mä texto uñachtʼayatajj istʼapjjewa” sasa.

Cheqas walja yatiyirinakajj utjki uka cheqanakan yatiyañajj jilat kullakanakatakejj chʼamakiwa. Amuytʼañataki, mä congregacionanjja, 134 yatiyirinakaw utji, ukampis territoriopanjja 50 utanakakiw utji. ¿Kunsa jilat kullakanakajj predikañatak lurapjje?

Kawkjantï yatiyirinakajj munaski uka cheqanakaruw waljanejj yatiyir sarapjje. 90 marani Ionash jilatajj akham siwa: “Territoriojanjja, sapa pä utanwa mä yatiyirejj utji. Nayajj usutätaj laykojj jakaskta uka cheqanwa yatiyta, ukampis uka nayrajj 160 kilometronak jaya cheqaruw yatiyir saririyäta, ukanjja húngaro aru parlirinakaruw yatiyirïta” sasa. Cheqas yatiyirinakajja, uka cheqanakar sarañatakejj wal chʼamachasipjjañapawa. Ionash jilatajj akham saskakiwa: “Trenat sarañatakejj pusi alwa horasaruw sartañajäna, ukatsti sojjta jaypʼu horaskamaw yatiyañajarakïna, ukhaw trenajj utajar kuttʼjjäna. Semananjja paya jan ukajj kimsa kutiw ukham lurayäta” sasa. ¿Ukham lurasajj kunjamakis jikjjatasi? Jupajj akham saskakiwa: “Wali kusisitätwa. Mä familiajj jan khitin visittʼañjam cheqanwa jakasi, jupanakar Bibliat yatichasajj kusisitätwa” sasa.

Cheqas janiw taqe jilat kullakanakajj uka congregacionanakat jupjam jaya cheqanakar sarirjamäpkiti. Ukampis territoriopan taqe jaqer yatiyañatakejj taqeniw chʼamachasipjje, chuymankipstat yatiyirinakas chʼamachasipjjarakiwa. 2017 maranjja, uka kimspach markanjj chikataniw jaqenakajj Jesusan jiwatap amtirejj sarapjjatayna, mä arunjja, uka markanakankir yatiyirinakat niya mä ukhampis sarapkaspa ukhamänwa. Ukhamajja, kawkjansay Diosar serviskstanjja, ‘trabajiñajj waljaw’ utjaski (1 Cor. 15:58).

^ Párrafo 2 Uka markanakan sutipajj akanakawa: Hlybokyy Potik, ­Serednye Vodyane, Nyzhnya Apsha.