Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Suma chuymanïña: ¿kunjamsa suma chuymanïsna?

Suma chuymanïña: ¿kunjamsa suma chuymanïsna?

TAQENIW suma chuymanita, taqe kuns cheqaparjam uñjirita uñtʼayasiñ muntanjja. Ukampis ukajj janiw jichhürunakan faciläkiti. ¿Kunatsa? Walja jaqenakaw ‘kunatï walïki ukar uñisipjje’ (2 Tim. 3:3). Jupanakajj kunatï walïki jan walïkaraki ukjja, amuyuparjamakiw amtapjje, ‘kunatï jan walïki ukarojj “waliw” sapjjewa, walïki ukarusti “janiw walïkiti” sapjjarakiwa’ (Is. 5:20). Kunatï jakañ vidan paskistu ukas janiw suma chuymanïñatak yanaptʼkistuti, pantjasir jaqerakïtanwa. Ukatwa Diosar walja maranak serviri mä kullakjam amuyassna, jupajj akham siwa: “Janipuniw nayajj suma chuyman jaqëkiristti” sasa.

Ukampis taqeniw suma chuymanïsna. Ukajj espíritu santon achupawa, uka espíritu santojj pantjasïwinakasata, akapachajj aynachtʼayañ munkistu ukat sipansa jukʼamp chʼamaniwa. Jichhajja, suma chuymanïñajj kamsañsa muni, kunjamsa jukʼamp suma chuymanïsna ukwa yatjjataskañäni.

SUMA CHUYMANÏÑAJJ ¿KAMSAÑSA MUNI?

Mä qhawqha arunjja, suma chuymanïñajj jan walinak jan luraña sañwa muni. Suma chuyman mä jaqejja, taqe kunsa cheqaparjam lurañatakiw chʼamachasi, kunatï walïki ukwa luraraki, jaqe masiparus yanaptʼapuniwa.

Yaqhepajj familiaparusa amigonakaparus yanaptʼapjjapuniwa. Ukampis Dios nayraqatan suma chuyman mä jaqejja, janiw ukak lurkiti. Pantjasir jaqëtas laykojj janiw suma chuymanipunïktanti. Bibliajj akham siwa: “Oraqenjja janiw khitis aski jaqejj utjkiti, janipun juch lurasa aski lurirejja” sasa (Ecl. 7:20). Apóstol Pablojj akham sarakïnwa: “Nayanjja mä arunjja jañchijanjja, janiw kuna walis utjkiti” sasa (Rom. 7:18). Ukhamajj suma chuymanïñ munstan ukhajja, Jehová Diosatwa yateqasiñasa, Jupjam suma chuymanejj janiw utjkiti.

‘JEHOVÁ DIOSAJJ SUMA CHUYMANIWAʼ

Jehová Diosakiw kunatï walïki jan walïkaraki uk saspa. Bibliajj akham siwa: ‘Jumajj suma chuymanïtawa, kunatï walïki ukwa luraraktajja; leyinakamay yatichita’ sasa (Sal. 119:68, NM). Diosan suma chuymanïtapat kunsa uka qellqatajj amuytʼayistu uk jichhajj yatjjatañäni.

Jehová Diosajj suma chuymaniwa. Ukajj cheqäskapuniwa. “Nayasti jumansa uñjkatawa khuyapayäjja” sasin Diosajj Moisesar siskäna ukhajj kunas pasäna uk uñjañäni. Diosajj Moisesan nayraqatapan pasaskäna ukhajja, Moisesajj aka arunakwa istʼäna: “¡Dios Tatitusti, wiñay jakiriwa, ukhamarak khuyapayasiriraki. Janiw jankʼaki colerasirïkiti, jan ukasti jachʼa munasiriwa, ukhamarak cheqaraki! Waranqa wawanakaman wawanakapatakisa pachpa cheqa aski munasirikïskaniwa, ukhamarak perdonarakiwa jan wali luratanaksa, jan wali amtäwinaksa, taqe juchanaksa. Ukampis juchanirojj janiw jan castigasaki jaytkiti” sasa (Éx. 33:19; 34:6, 7). Ukhamajja, Diosan suma chuymanïtapajj taqe kunanwa uñjasi. Jesusajj aka oraqenkkäna ukhajja, ukhamarakiw suma chuymanïtap uñachtʼayäna. Ukhamäkchïnsa, akham sänwa: “Janiw khiti jaqes sumäkaspati, jan ukasti Diosakiw sumajja” sasa (Luc. 18:19).

Jehová Diosan suma chuymanïtapajj taqe luratanakapanwa uñjasi.

 Jehová Diosajj kunatï walïki ukwa luri. Diosan suma chuymanïtapajj taqe luratanakapanwa uñjasi. Bibliajj akham siwa: “Tatitojj taqenir munasiriwa, taqpach luratanakaparojj munasiñampiw uñji” sasa (Sal. 145:9). Diosajj jaqenakar jan yaqhachasa, jakañ vida churasa, kunatï jakañatak wakiski ukanak churasaw suma chuymanïtap uñachtʼayi (Hech. 14:17). Juchanakas perdonasaw suma chuymanïtap uñachtʼayaraki. Salmonak qellqeri mä chachajj akham sänwa: “Tatay jumajj munasiñanïtawa, juch pampachirirakïtawa” sasa (Sal. 86:5). ‘Jan kamskay jakir jaqenakarojja, Diosajj sumanakwa churani’ (Sal. 84:11).

‘KUNATÏ WALÏKI UK LURAÑ YATEQAPJJAM’

Diosajj jupar uñtasitwa lurawayistu, ukhamajj suma chuymanïsnawa, kunatï walïki ukwa luraraksna (Gén. 1:27). Ukhamäkchisa, ‘kunatï walïki uk lurañ yateqapjjam’ sasaw Bibliajj ewjjtʼistu (Is. 1:17, NM). Kunas suma chuymanïñatak yanaptʼistaspa uk jichhajj kimsa toqet uñjañäni.

Maya, Diosaruw espíritu santop mayisiñasa. Ukaw Jupa nayraqatan suma chuymanïñatak yanaptʼistaspa (Gál. 5:22). Kunatï walïki ukar munasiñatakisa kunatï jan walïki ukar uñisiñatakis yanaptʼarakistaspa (Rom. 12:9). Bibliarjamajja, ‘kunatejj sumäki uk lurañatakisa, arsuñatakis’ Diosaw yanaptʼistani (2 Tes. 2:16, 17).

Paya, Diosan Arupwa liyiñasa. Ukham lurtan ukhajja, Jehová Diosaw kunatï walïki uk yatichistu, “taqe suma luräwinak lurañatakis” wakichtʼarakistu (Prov. 2:9, NM; 2 Tim. 3:17). Diosan Arupat liytʼtan lupʼiraktan ukhajja, chuymaruw Diosata ukhamarak amtanakapat parlir suma yatichäwinak imtanjja. Uka yatichäwinakajja, wakisini ukhaw yanaptʼistani (Luc. 6:45; Efes. 5:9).

Kimsa, “kunatï walïki” uk yateqasiñatakiw chʼamachasiñasa (3 Juan 11). Khitinakatsa suma chuymanïñ yateqassna ukanakatwa Bibliajj parli. Nayraqatjja, Jehová Diosampita Jesusampitwa yateqassna. Tabita warmimpita Bernabé chachampitwa yateqasiraksna (Hech. 9:36; 11:22-24). Jupanakat Bibliajj kamsisa, yaqhanakarus kunjamsa yanaptʼapjjäna uka toqetwa yatjjatsna. Familiasaru, jilat kullakanakasar yanaptʼañatakejj kunsa lursna ukwa amuytʼaraksna. Uka pä cristianonakajj kuna bendicionanaksa katoqapjjäna uk lupʼiñasawa. Jiwasajj ukham bendicionanakwa katoqaraksna.

Khitinakas jichhürunakan yaqhanakar yanaptʼasipki ukanakatwa lupʼiñasaraki. Sañäni, jilïr irpirinakajj wali trabajtʼirinakäpjjewa, kunatï walïki  ukaruw munasipjjaraki. Diosat jan jitheqtiri kullakanakatsa janiw armasiñasäkiti, jupanakajj arsutapampi luratanakapampiw ‘kunatejj walïki ukanak yatichapjje’ (Tito 1:8; 2:3). Roslyn sat kullakajj akham siwa: “Mä amigajajja, jilat kullakanakar chʼamañchtʼañatakisa yanaptʼañatakis wal chʼamachasi. Kunjamäsipkisa uk amuytʼasajj regalonakwa churi, jan ukajj yaqha lurañanakampiw yanaptʼi. Nayatakejj wali suma jaqepuniwa” sasa.

Diosajj ‘kunatï walïki’ uk lurañatakiw chʼamañchtʼistu (Amós 5:14, NM). Ukham lurtan ukhajja, Diosan leyinakapar jukʼampiw munastanjja, Jupa nayraqatan kunatï walïki uk luraskakiñwa munaraktanjja.

Suma chuymanïñataki, kunatï walïki uk lurañatakiw chʼamachasiñasa

Suma chuymanïñatakejj janiw wali jachʼa luräwinak lurañajj wakiskapuniti. Mä panqarat parltʼañäni, jiltañapatakejj janiw mä kutikejj walja umamp warjjatañasäkiti, jan ukasti, walja kutiw jukʼa umamp warjjattʼañasa. Jiwasajj ukhamarakiw sapa kuti mä jukʼa lurasajj mayninakar yanaptʼsna, ukhamatwa suma chuymanïtas uñachtʼayañäni.

Taqeniw kunatï walïki uk lurañatak wakichtʼatäñasa sasaw Bibliajj ewjjtʼistu (2 Tim. 2:21; Tito 3:1). Yaqhanakajj kunjamäsipkisa uk amuyañäni ukhajja, ‘jupanakar chʼamañchtʼañatakejj’ kunjam yanaptʼañsa yatiñäniwa (Rom. 15:2). Ukatakejj inas kunatï utjkistu ukamp yanaptʼañajj wakischini (Prov. 3:27). Sañäni, jiwasamp chika mä kun manqtʼasiñatakiw maynir invitsna. Usutätap yatstan ukhasti, mä tarjeta jan ukajj mä mensaje qellqtʼasaw apaysna, visitiriw sarsna, telefonotwa jawstʼaraksna. Cheqas taqeniw arunakasampejj mayninakar chʼamañchtʼsna (Efes. 4:29).

Jehová Diosat yateqasisajj taqeniruw yanaptʼañ muntanjja, ukatwa jan khitirus yaqhachktanti. Ukjja, Diosan Reinopat suma yatiyäwinakap yatiyasaw uñachtʼaysna. Kunjamtï Jesusajj siskänjja, uñisipkistu ukanakarus yanaptʼaraksnawa (Luc. 6:27). Mayninakar munasiñataki, sum sarnaqañatak chʼamachasiñäni ukhajja, janiw pantjaskañäniti. Kuna laykutejja, “ukanak contrajj janiw kuna leyis utjkiti” (Gál. 5:22, 23). Arknaqatasa jan walinakan uñjaskasas kunatï walïki uk luraskakiñäni ukhajja, kunatï cheqäki uk yateqañ munapjjañapatakiw jaqenakar yanaptʼañäni, Diosarus jachʼañcharakiñäniwa (1 Ped. 3:16, 17).

SUMA CHUYMANÏTASATJJA, ¿KUNA BENDICIONANAKSA KATOQAÑÄNI?

“Aski jaqejja”, luratanakapat bendicionanakwa katoqe sasaw Bibliajj yatichi (Prov. 14:14). ¿Kunanakäspas uka bendicionanakajja? Jaqenakar sum uñjtan ukhajja, sumwa jupanakajj uñjapjjarakistu (Prov. 14:22, NM). Janis ukham uñjapkchistanejja, suma chuymanïtasajj inas jan colerjjapjjañapataki, jan ukajj jiwasar sum uñjapjjañapatak yanaptʼchispa (Rom. 12:20).

Jan walinak jaytasin kunatï walïki uk lurañajj kunjamsa yanaptʼawayi uk waljaniw sapjjaspa. Nancy sat mä kullakajj akham siwa: “Munañajar sarnaqañ muniri, qʼañu juchanak luriri, jan respetasiri ukhamayätwa. Ukampis kunatï walïki jan walïkaraki ukanak Bibliat yateqayäta, ukarjam sarnaqarakiyäta ukhajja, kusisitaw jakasjjayäta. Jichhajj naya pachparus respetasjjtwa” sasa.

Taqe kunat sipansa, suma chuymanïtasajj Jehová Diosaruw kusisiyi. Kuntï lurktan uk janis yaqhepajj amuyapkchejja, Diosajj uñjaskiwa. Suma amuyunakassa luratanakassa uñjaskarakiwa (Efes. 6:7, 8). Jupajj suma chuyman jaqenakarojj ‘khuyaptʼayaniwa’ (Prov. 12:2). Ukhamajj suma chuymanïñatak chʼamachasiskakiñäni. Kunjamtï Jehová Diosajj siskejja, “taqe khitinakatï suma luräwinak lurapki ukanakatakejja, jachʼañchäwimpi sumankañampiw utjani” (Rom. 2:10).