Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 12 YATICHÄWI

‘Llakisirinakamp llakisipjjañäni’

‘Llakisirinakamp llakisipjjañäni’

“Taqe jumanakajj mä amtanikïpjjam, llakisirinakampis llakisipjjam” (1 PED. 3:8).

CANCIÓN 90 Maynit maynikam chʼamañchtʼasipjjañäni

¿KUNANAKATSA YATJJATASKAÑÄNI? *

1. Kuntï 1 Pedro 3:8 textojj siski ukarjamajja, ¿kunatsa jiwasat llakisipki ukanakampïñ wal muntanjja?

JIWASAT llakisipki ukanakampïñ wal muntanjja. Jupanakajj kunanaksa amuytan, kunjamäsktansa uk amuyañatakiw chʼamachasipjje. Kuna yanaptʼsa muntan uk yatisajj jankʼakiw yanaptʼapjjarakistu. Awisajja, janïr yanaptʼap mayktan ukhaw yanaptʼapjjestu. Ukham sinttʼasirinakarojja, mä arunjja, ‘llakisirinakamp llakisirinakarojj’ wal munastanjja (1 Pedro 3:8 liytʼañataki). *

2. ¿Kunatsa yaqhanakat sinttʼasiñajj chʼamakïspa?

2 Taqe cristianonakaw yaqhanakat sinttʼasiñ muntanjja. Ukampis awisajja, ukham jaqëñajj chʼamakïspawa, ¿kunatsa? Taqeniw pantjasirïtanjja, jiwasatak taqe kuns muniri chuymanirakïtanwa, ukatwa chʼamakïspa (Rom. 3:23). Yaqhepajja, yaqhanakat jan sinttʼasiri familianwa jilsuwayapjje, jan ukajj jan walinakan uñjasipjjatap laykuw sinttʼasirïñajj jupanakatak chʼamäspa. Maysa toqetjja, jaqe masipat sinttʼasiñat sipansa jupanak pachpa munasir jaqenak taypinwa jaktanjja (2 Tim. 3:1, 2). Ukhamajj ¿kunas mayninakat sinttʼasiñatak yanaptʼistaspa?

3. 1) ¿Kunas jukʼamp sinttʼasirïñatak yanaptʼistaspa? 2) ¿Kunsa aka yatichäwin yatjjatañäni?

3 Jehová Diosampita Jesucristo Yoqapampit yateqasiñaw  jukʼamp sinttʼasirïñatak yanaptʼistani. Jehová Diosajj wali munasir Diosawa (1 Juan 4:8). Jesusasti, Awkipjam munasirirakiwa (Juan 14:9). Jaqenakajj sinttʼasirïpjjaspawa, ukwa Jesusajj aka oraqenkkäna ukhajj uñachtʼayäna. Aka yatichäwinjja, kunjamsa Jehová Diosasa Jesusas jaqenakat llakisipjjatap uñachtʼayapjjäna ukwa nayraqat yatjjatañäni. Ukjjarusti, kunjamsa jupanakat yateqassna ukwa yatjjatarakiñäni.

JEHOVÁ DIOSAJJ SINTTʼASIRIWA

4. Zacarías 2:8 qellqatarjamajja, ¿kunatsa Diosajj servirinakapat llakisiwa sasin sissna?

4 Jehová Diosajja, servirinakapajj kunjamäsipkisa uka toqet wal llakisi sasaw Bibliajj yatichi. Israelitanakajj jan walinakan uñjasipjjäna ukhajja, Diosajj wal jupanakat llakisïna. Ukatwa Bibliajj akham qhanañchi: ‘Wali llakitäpjjäna ukapachajja, Diosajj wal llakisirakïna’ sasa (Is. 63:7-9, NM). Mä qhawqha tiempotjja, ‘markajar jan walinak lurasajj nayarus lurapkitaspa ukhamawa’ sasaw Zacarías profeta toqejj sarakïna (Zacarías 2:8 liytʼañataki). Diosajj qhawqsa servirinakapat llakisi ukajj chuymar purtʼkiripuniwa.

Jehová Diosajj sinttʼasiñatwa israelitanakar esclavöñat qhespiyäna. (Párrafo 5).

5. Tʼaqesir servirinakaparojja, ¿kunjamsa Diosajj yanaptʼi?

5 Jehová Diosajja, servirinakapajj tʼaqesipki ukhajj janiw jupanakat aleqak sinttʼaskiti, jan ukasti, yanaptʼiwa. Israelitanakajj Egipton esclavöpjjäna ukhajj kunja llakitäpjjänsa uk Diosajj uñjaskänwa, ukatwa jupanakar qhespiyäna. Moisesar akham sänwa: ‘Nayajj sumwa uñjta, kunjamtejj markajajj tʼaqesiski ukjja. Arnaqasitanakapsa istʼaraktwa. Nayajj sum yatta tʼaqesitanakapjja. Ukatwa egipcionakan amparapat qhespiyañatak jutaskta’ sasa (Éx. 3:7, 8). Diosajj sinttʼasiñatwa israelitanakar qhespiyäna. Walja maranak qhepat Suma Oraqenkjjapjjäna ukhajja, enemigonakapaw jupanak contra saytʼapjjarakïna. ¿Kunsa Diosajj lurpachäna? Bibliajj akham siwa: “Diosasti jupanakatjja khuyaptʼayasïnwa tʼaqhesisa sarnaqapjjatanakap uñjasa, ukhamarak arnaqasipjjatanakap istʼasinjja” sasa. Jupanakat sinttʼasisajja, mayampiw Diosajj juezanakar khitasajj enemigonakapat qhespiyäna (Juec. 2:16, 18).

6. Servirinakapajj pantjasipkchisa, ¿kunjamsa Diosajj jupanakat llakisitap uñachtʼayi?

 6 Diosan servirinakapajj awisajj pantjasipkchisa, kunjamas jikjjatasipjje uk Jupajj yatiwa. Jonás chachampejj kunas pasäna uk uñjañäni. Juparojja, juchañchir arunak yatiyañapatakiw Diosajj Nínive markar khitäna. Ukampis arrepentisipjjatapatjja, janiw Diosajj uka markankirinakar castigkänti. Ukatwa Jonasajj profecía arunakap jan phoqasitap laykojj wal colerasïna. Ukampis Diosajj pacienciampiw profetapar uñjäna, sinttʼasirïñapatakiw yanaptʼarakïna (Jon. 3:10-4:11). Qhepatjja, kuntï Diosajj yatichañ munkäna uk sumwa Jonasajj amuyäna, kunatï jupamp paskäna uksa jiwasan askisatakiw Diosajj Biblian qellqayäna (Rom. 15:4). *

7. Jehová Diosajj servirinakapar yanaptʼkäna ukajja, ¿kunsa amuytʼayistu?

7 Diosajj kunjamsa nayra servirinakapar yanaptʼäna uk yatiñajja, taqe servirinakapat llakisitapwa amuytʼayistu. Kunanakas llakisiyistu, tʼaqesiyistu uk Diosajj yatiwa, chuymassa uñtʼarakiwa (2 Crón. 6:30). Kunanaksa amuytan, kunas chuymasan utji, kunanaksa lurirjamätan jan lurirjamäkaraktan uk Jupajj sum yati. Janirakiw jan aguantirjamäktan ukanakamp yantʼatäñassa permitkaniti (1 Cor. 10:13). Uk yatiñajj wal chuymachtʼistu.

JESUSAJJ SINTTʼASIRIWA

8-10. ¿Kunatsa Jesusajj jaqenakat sinttʼaspachäna?

8 Aka oraqenkkäna ukhajja, Jesusajj walpun jaqenakat sinttʼasïna. ¿Kunatsa jupajj ukham chuymanïpachäna? Maya, kunjamtï yateqawayktanjja, Jesusajj alajjpachankir Awkipjamänwa, ukatwa Jehová Diosat yateqasisajj jaqenakar wal munasïna. Awkipar lurañ yanaptʼkäna ukanakat walsa Jesusajj kusiskchïnjja, jaqenakaruw jukʼamp munasïna (Prov. 8:31, NM). Munasiñatwa jupanakat llakisirakïna.

9 Paya, Jesusajj Jehová Diosjamarakiw jaqenakan chuymap uñtʼäna, mä arunjja, jaqenakajj kunjamäsipkisa, kunanaksa lurañ munapjje, kunatsa ukanak lurañ munapjje uk yatïnwa (Mat. 9:4; Juan 13:10, 11). Ukatwa wali llakit maynir uñjäna ukhajj sinttʼasiñat chuymachtʼirïna (Is. 61:1, 2; Luc. 4:17-21).

10 Kimsa, jaqenakajj kuna llakinakantï uñjasipkäna uka llakinakanwa Jesusajj uñjasirakïna. Amuyatajja, Jesusajj mä pobre familianwa jilsüna. Niyakejjay José sat uywir awkipamp trabajchïnjja, chʼama tukuñ trabajonakwa yateqpachäna (Mat. 13:55; Mar. 6:3). Jesusajj yatiyañ janïr qalltkäna ukhaw Joseajj jiwjjpachäna, ukhamasti, mä familiaran jiwatapajj kunja llakkañasa uk Jesusajj yatpachänwa. Diosar jan servir familiaranakanïñajj kunjamasa uksa yatirakpachänwa (Juan 7:5). Ukhamanakan uñjasiñaw jaqenakajj kuna llakinakanïpjjesa, kunjamas jikjjatasipjje uk amuyañatak Jesusar yanaptʼpachäna.

Jaqenakajj utjki ukat jayar irpasaw Jesusajj mä oqara chachar sinttʼasiñat qolläna. (Párrafo 11 uñjjattʼäta).

11. ¿Kunapachas Jesusan sinttʼasirïtapajj jukʼamp uñjasïna? (Nayrïr paginankir dibujo uñjjattʼäta).

11 Jesusajj milagronak lurkäna ukhaw sinttʼasirïtapajj jukʼamp uñjasïna. Jaqenakat sinttʼasiñatwa uka milagronak lurirïna, janiw obligatak lurirïkänti (Mat. 20:29-34; Mar. 1:40-42). Mä kutejja, qollañatakejj yaqha cheqaruw Jesusajj mä oqara jaqer irpäna. Qhepatsti, mä viuda warmin sapa yoqaparuw jaktayarakïna. ¿Kunatsa Jesusajj  uka milagronak lurpachäna? (Mar. 7:32-35; Luc. 7:12-15). Jesusajj uka jaqenakat wal sinteqtʼasïna, ukatwa yanaptʼäna.

12. Juan 11:32-35 qellqatarjamajja, ¿kunjamsa Jesusajj Martampita Mariampit sinttʼasitap uñachtʼayäna?

12 Lázaro chachajj jiwjjäna ukhajja, Jesusajj Martatsa Mariatsa wal sinttʼasïna. Jupanakar jachir uñjasajj “jachaqtʼasïnwa” (Juan 11:32-35 liytʼañataki). Jesusajj Lazaron jaktañap yatïnwa, ukhamajj janiw jupan jiwatapat jachkänti, jan ukasti, wali munat amiganakapajj kunja llakitäpjjänsa uk uñjasaw jachäna.

13. Jesusan wali sinttʼasirïtap yatiñajja, ¿kunjamsa chʼamañchtʼistu?

13 Jiwasajj janiw Jesusjam perfectöktanti, ukampis kunjamsa jupajj jaqenakat sinttʼasïna ukat wal yateqsna. Ukham chuymanïtapatwa jupar wal munasiraktanjja (1 Ped. 1:8). Jichhajj Diosan Reinopan Reyit uttʼayatäjjewa, niyaw tʼaqesiñanaksa chhaqtayjjarakini. Niyakejjay Jesusajj aka oraqen mä jaqjam jakchïnjja, janiw khiti jaqes jupjamajj Supayan apnaqäwipajj utjayawayki uka tʼaqesiñanak askichkaspati. Cheqas “pantjasitanakasat khuyaptʼayasiri” Reyinïñajj wali kusiskañawa (Heb. 2:17, 18; 4:15, 16).

JEHOVÁ DIOSAMPITA JESUSAMPIT YATEQASIPJJAÑÄNI

14. Efesios 5:1, 2 textorjamajja, ¿kun lurañsa muntanjja?

14 Jehová Diosasa Jesusas kunja sinttʼasirïpjjesa uk yatjjattan ukhajja, jukʼampiw mayninakat sinttʼastanjja (Efesios 5:1, 2 liytʼañataki). Jaqen chuymapan kunas utji uk janis yatkstanjja, kunjamäsipkisa, kuna yanaptʼsa munapjje uk amuysnawa (2 Cor. 11:29). Akapachan janis yaqhanakat sinttʼasiñajj utjkchejja, apóstol Pablojj siskäna ukarjam sarnaqañatakiw chʼamachastanjja. Jupajj akham sänwa: “Jan jumanak pachpatak llakisipjjamti, jan ukasti mayninakatsa llakisipjjarakim” sasa (Filip. 2:4).

(Párrafos 15-19). *

15. ¿Khitinakas sinttʼasirïñatak jukʼamp chʼamachasipjjañapa?

15 Jilïr irpirinakaw sinttʼasirïñatak jukʼamp chʼamachasipjjañapa, ¿kunatsa? Jupanakar katuyatäki uka ovejanakar kunjamsa uñjasipki ukatjja Diosaruw cuenta churapjjani (Heb. 13:17). Jilat kullakanakar yanaptʼañatakejja, jilïr irpirinakajj sinttʼasirïpjjañapawa. ¿Kunjamsa uk uñachtʼayapjjaspa?

16. ¿Kunsa sinttʼasir jilïr irpirinakajj lurapjje, ukat kunatsa ukham lurapjjañapa?

16 Sinttʼasir jilïr irpirinakajja, jilat kullakanakatak tiempo apstʼasipjjewa. Jupanakar jisktʼasajj pacienciampiw istʼapjje. Diosan mä munat serviripajj kunjamas jikjjatasi uk jan sañ puedki, ukhaw jilïr irpirinakajj pacienciamp istʼañatak jukʼamp chʼamachasipjjañapa (Prov. 20:5). Jilïr irpirinakajj jilat kullakanakar istʼañatak tiempo apstʼasipjje ukhajja, jukʼampiw jilat kullakanakajj jilïr irpirinakar confiyapjje, munasipjjaraki, jilïr irpirinakas ukhamarakiw jupanakar uñjapjje (Hech. 20:37).

17. Walja jilat kullakanakajja, ¿kunsa jilïr irpirinakat jukʼamp amtapjje?

17 Walja jilat kullakanakajja, kunjamsa jilïr irpirinakajj mayninakat llakisipjje ukwa jukʼamp amtapjje. Adelaide sat kullakajj akham siwa: “Kunjamäsktansa uk jupanakajj amuyapjjewa, ukatwa jupanakamp parltʼañajj jan chʼamäkiti” sasa. Kullakajj saskakiwa: “Jiwasamp parlasajj kunjamas jikjjatasipjje uk uñjasajj jiwasat llakisipjjatapwa amuytanjja” sasa. Mä jilatajj akham sarakiwa: “Mä jilïr irpirejja, problemajat cuenttʼaskayäta ukhajj jachaqtʼasïnwa. Uk janipuniw armkäti” sasa (Rom. 12:15).

18. ¿Kunjamsa mayninakat sinttʼasitas uñachtʼaysna?

 18 Janiw jilïr irpirinakakejj sinttʼasirïpjjañapäkiti, taqeniw ukham chuymanïñasa. Ukatakejja, familiaranakasasa jilat kullakanakas kuna jan walinakansa uñjasipjje uk amuyañatakiw chʼamachasiñasa. Wayn tawaqonakatsa, jilïrinakatsa, usutanakatsa, mä familiaran jiwatapat llakitäpki ukanakatsa llakisiñasarakiwa. “¿Kunjamasktasa?” sasin jisktʼasajja, sum istʼañasawa. Kunjamäsipkisa uk amuyatas yatipjjañapatakiw chʼamachasiñasaraki. Ukatsti, kunampitï yanaptʼirjamäktan ukampiw yanaptʼañasa. Ukham lurasajja, cheqpach munasirïtaswa uñachtʼaytanjja (1 Juan 3:18).

19. Kunjamas jikjjatasipjje ukarjamaw mayninakar yanaptʼañasa sasin ¿kunatsa sissna?

19 Janiw taqenis mä igualak jan waltʼäwinakar saykatktanti. Ukhamasti, kunjamas jikjjatasipjje ukarjamaw mayninakar yanaptʼañasa. Yaqhepatakejja, problemanakapat parlañajj chʼamakïspawa, yaqhepatakejj janiraki. Ukhamajj mayninakar yanaptʼañsa munkstanjja, janiw mayjtʼayir jisktʼanak lurañasäkiti (1 Tes. 4:11). Awisajja, mä llakitan arunakapajj janis walïkaspa ukhamäspawa. Ukampis ukhamaw jupajj jikjjatasi, uk amuyañatakiw chʼamachasiñasa. Ukhamajja, istʼañatakejj jankʼakïñasawa, janiw jan amuytʼasisajj jankʼak kuns parlañasäkiti (Mat. 7:1; Sant. 1:19).

20. ¿Kunsa akjjar jutki uka yatichäwin yatjjataskañäni?

20 Janiw congregacionan mayakejj sinttʼasirïñasäkiti, Diosan arunakap yatiykasas ukham chuymanïñasarakiwa. ¿Kunjamsa predicacionansa Bibliat yatichkasas sinttʼasirïtas uñachtʼaysna? Akjjar jutki uka yatichäwinwa uka toqet yatjjataskañäni.

CANCIÓN 130 Perdonasirïpjjañäni

^ Párrafo 5 Jehová Diosasa Jesusasa, jaqenakajj kunjamäsipkisa uka toqet wal llakisipjje. Kunsa jupanakat yateqsna, kunatsa yaqhanakat llakisiñajj wali wakiskiri, kunjamsa jaqe masisat llakisitas uñachtʼaysna ukwa aka yatichäwin yatjjataskañäni.

^ Párrafo 1 AMTAÑATAKI: Sinttʼasirïña, jan ukajj ‘llakisirinakamp llakisiñajja’, mayninakajj kunjamas jikjjatasipjje uk amuyaña, ukat jupanakjam jikjjatasiña sañwa muni (Rom. 12:15). Tʼaqesiyat uñjasipki ukanakat khuyaptʼayasiña sañwa munaraki. Ukham khuyaptʼayasiñatwa maynejj yaqhanakar yanaptʼañ munaspa. Aka yatichäwinjja, “sinttʼasiña” ukat “llakisiña” siski uka arunakaw apnaqasiskani.

^ Párrafo 6 Jehová Diosajja, ajjsarayasipkäna jan ukajj llakimp aynachtʼapkäna uka jan jitheqtir servirinakapatjja, ukhamarakiw sinttʼasïna. Jupanakat yaqhepajja, Ana, Elías, Ebed-melec satäpjjänwa (1 Sam. 1:10-20; 1 Rey. 19:1-18; Jer. 38:7-13; 39:15-18).

^ Párrafo 65 FOTONAKAT JUKʼAMP QHANAÑCHTʼAÑATAKI: Tantachäwinakanjja, kunaymanitwa sinttʼasirïtassa munasirïtassa uñachtʼaysna. Mä Tantachasiñ Utanjja, 1) mä jilïr irpiriw mä yoqall wawampiru mamapampirojj wali munasiñamp parltʼaski, 2) mä jilatampi imill wawapampejja, mä jilïr kullakaruw autor makatañapatak yanaptʼasipki, 3) pä jilïr irpirinakarakiw yanaptʼa munir mä kullakar pacienciamp istʼasipki.