Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

“Amén” satasajj Diosatak wali valoraniwa

“Amén” satasajj Diosatak wali valoraniwa

JEHOVÁ Diosatakejja, Jupar yupaychatasajj wali valoraniwa. Kuntï Jupar jachʼañchañatak lurktan ukajj jan yäqañjamäkchisa, Diosajj uñjaskiwa, istʼarakistuwa (Mal. 3:16). Sañäni, walja kutiw amén sasin sirïpachätanjja. ¿Uk satasajj Jehová Diosatak valoranïpachati? Jïsa, valoraniwa. Kunatsa valoranïpacha uk yatiñatakejja, “amén” arojj kamsañsa munpacha, kun sañatakis Biblian apnaqasi uk uñjañäni.

‘TAQPACH MARKAW “AMÉN” SAÑAPA’

Amén siski uka arojj “ukhamäpan”, “cheqpachapuni” sañwa muni. Uka arojj mä hebreo arutwa juti, ukajj “phoqerïña”, “confiykaña” sañwa munaraki. Awisajj juicionakanwa “amén” arojj apnaqasirïna. Sañäni, mä juramento lurasaw “amén” sapjjerïna, ukhamat kuntï sapkäna ukajj cheqätap uñachtʼayañataki, ukhamarak arunakap jan phoqasajj kuna jan walinsa uñjasipjjani uk yatipjjatap uñachtʼayañataki (Núm. 5:22). Mä promesa lurasin jaqenak nayraqatan “amén” sapjjerïna ukhajja, uka promesa phoqañatakejj jukʼampiw chʼamachasipjjerïna (Neh. 5:13).

Amén arojj kunatakis apnaqasirïna ukajja, Deuteronomio 27 qellqatanwa jukʼamp qhanañchasi. Suma Oraqer mantjjasajja, israelitanakajj Diosan Leyip istʼañatakisa, “uka Leyirjamaw sarnaqapjjä” sasin arsuñatakisa, Gerizim sat qollu ukhamarak Ebal sat qollu taypinwa tantachasipjjäna. Uka Leyir jan phoqasajj kuna jan walinsa uñjasipjjani uk istʼasajja, “amén” sasaw sapjjäna (Deut. 27:15-26). Walja chachanakana, warminakana, wawanakana “amén” sapjjatapajj ¿kunjamas istʼaspachäna? (Jos. 8:30-35). Uka urun mä promesa lurapjjatap janipuniw armapkpachänti, phoqapjjarakïnwa. Ukatwa Bibliajj akham qhanañchi: “Israel markasti Diosarojj servïnwa kunapachatï Josué chachajj jakaskäna ukkhakama, ukhamaraki kunapachkamatï Israelan jilïri jaqenakapajj jakapkäna ukkhakama, kawkïrinakatï yatipkäna taqe kuntï Diosajj Israel markataki lurkäna ukanaka” sasa (Jos. 24:31).

Jesusajj “amén” sasaw sarakirïna. Ukampis kuntï maynejj siskäna ukjjar “amén” sañat  sipansa, janïr kun arskasaw “amén” sirïna, ukhamat kuntï siskani ukajj cheqäskapunitap qhanstayañataki. * Kuntï Jesusajj siskäna ukajj cheqäskapuniwa sasajj ¿kunatsa sissna? Diosan promesanakapajj Jesús taypikiw phoqasispa, ukatwa ukham sistanjja (2 Cor. 1:20; Apoc. 3:14).

‘TAQE JAQENAKAW “AMÉN” SAPJJÄNA, UKATSTI DIOSARUW YUPAYCHAPJJÄNA’

Israelitanakajja, oración lurapjjerïkäna, jan ukajj Diosar jachʼañchapjjerïkäna ukhaw “amén” sapjjarakirïna (Neh. 8:6; Sal. 41:13). Oración tukuyasin “amén” sasajja, ukankirinakajj uka mayisitar iyawsapjjatapwa uñachtʼayapjjäna. Taqpachani “amén” sasinjja, jukʼamp kusisitaw Diosar yupaychapjjäna. David chachajj Jehová Diosan arcap Jerusalenar apkäna ukhaw ukajj uñjasïna. Davidajj taqe chuymaw mä cancionar uñtasita mä oración luräna (1 Crón. 16:8-36). Ukajj chuymar purtʼkiripunïnwa, ukatwa ‘taqe jaqenakajj “amén” sasin sapjjäna, ukatsti Diosaruw yupaychapjjäna’. Taqpachani “amén” sasinjja, jukʼamp kusisitaw jikjjatasipjjpachäna.

Nayrïr patak maranakan jakir cristianonakajja, ukhamarakiw Diosar jachʼañchasin “amén” sapjjerïna. Biblia qellqerinakat yaqhepasti, cartanakapanwa uka aru qellqapjjarakirïna (Rom. 1:25; 16:27; 1 Ped. 4:11). Alajjpachankirinakasa, “¡amén! ¡Jah Diosar jachʼañchapjjam!” sasaw sapjjaraki (Apoc. 19:1, 4). Nayrïr cristianonakajja, tantachäw tukuyasin mayisipjjerïkäna ukhaw “amén” sapjjerïna (1 Cor. 14:16). Ukampis janiw jan amuytʼasisakejj “amén” sapjjañapäkänti.

¿KUNATSA “AMÉN” SAÑAJJ WALI WAKISKIRÏPACHA?

Oración tukuyasin “amén” sañajj kunatsa wali wakiskiri ukwa akhakam amuytanjja. Oración mayisisin “amén” sistan ukhajja, arunakasajj cheqäskapunïtapwa uñachtʼaytanjja. Maynin oracionap istʼasin jachʼatsa, jan ukajj  chuymasansa “amén” sistan ukhajja, kuntï istʼktan ukar iyawsataswa uñachtʼayaraktanjja. ¿Kunatsa “amén” sañajj wakisirakispa?

Diosar yupaychäwisan oracionanak sum istʼataswa uñachtʼaytanjja. Jiwasatï oración tukuyar “amén” sas taqe chuyma sañ munstanjja, oracionanak sum istʼañasawa. Diosarojj janiw “amén” sasakejj yupaychktanti, jan ukasti, oracionanak sum istʼasaw yupaycharaktanjja.

Jilat kullakanakasampiw mayachtʼastanjja. Maynejj congregacionan oración luri ukhajja, taqeniw oración juntuk istʼtanjja (Hech. 1:14; 12:5). Ukat “amén” sasasti, jukʼampiw jilat kullakanakasamp mayachtʼastanjja. Jachʼatsa, jan ukajj chuymasansa “amén” sischiñänejja, mayisitasar istʼañapatakiw Diosar jukʼamp razonanak churañäni.

“Amén” sasinjja, Diosaruw jachʼañchtanjja.

Diosaruw jachʼañchtanjja. Kuntï Jupar yupaychañatak lurktan ukajj janis yäqañjamäkchejja, Diosajj uk sum uñjaski (Luc. 21:2, 3). Kunatsa Jupar sirvtan, kunas chuymasan utji uksa yatirakiwa. Telefonotsa tantachäwinak istʼkchiñänejja, “amén” satasjja istʼaskiwa. Cheqas “amén” sasinjja, jilat kullakanakasamp chikaw Diosar jachʼañchasktanjja.

Kunjamtï yateqktanjja, “amén” sañajj janis importantëkaspa ukhamäspawa, ukampis janiw ukhamäkiti. Perspicacia librojj akham siwa: “[Amén siski uka arojja,] ‘Diosajj mayisitajar istʼapunitaniwa, iyawsitaniwa, kuntï suykta ukas phoqasipuniniwa’ sañatakiw apnaqasi” sasa. Ukhamajj “amén” sasajja, Jehová Diosaruw wal kusisiyañäni (Sal. 19:14).

^ Párrafo 6 Marcos 9:41 textonjja, “amén” arojj ‘cheqpachapuni’ sasaw aymara arun jaqokipasi.