Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 26 Yatichäwi

Llakitanakar yanaptʼapjjañäni

Llakitanakar yanaptʼapjjañäni

“Taqe jumanakajj mä amtanikïpjjam, llakisirinakampis llakisipjjam, jilapurjam munasipjjam, wali sinttʼasirïpjjam, humilde chuymanïpjjarakim” (1 Ped. 3:8).

CANCIÓN 107 Diosaw munasiñ yatichistu

¿KUNANAKATSA YATJJATASKAÑÄNI? *

1. ¿Kunjamsa Jehová Diosat yateqasitas uñachtʼaysna?

WALI munasiri Jehová Dios Awkisajj wal munasistu (Juan 3:16). Jiwasajj jupatwa yateqasiñ muntanjja. Ukatwa ‘llakisirinakamp llakisiñataki, jilapurjam munasiñataki, wali sinttʼasirïñataki’ chʼamachastanjja. ‘Jiwasjam creyentëpki uka jilat kullakanakasarojj jukʼampiw’ munastajja (1 Ped. 3:8; Gál. 6:10). Jan walinakan uñjasipjje ukhajja, wal jupanakar yanaptʼañ muntanjja.

2. ¿Kunanakatsa aka yatichäwin yatjjataskañäni?

2 Taqe khitinakatï Diosan markapankañ munapki ukanakajj kunayman llakinakanwa uñjasipjjani (Mar. 10:29, 30). Akapacha niya tukusiñampïskipanjja, inas jiwasajj jukʼamp llakinakan uñjaschiñäni. Ukhamajj ¿kunjamsa maynit maynikam yanaptʼassna? Aka yatichäwinjja, kunsa Lot chachatsa, Job chachatsa, Noemí warmitsa yateqsna ukwa yatjjatañäni. Jilat kullakanakasajj kuna jan walinakansa uñjasipjje, kunjamsa jupanakar yanaptʼsna uksa yatjjatarakiñäniwa.

PACIENCIANÏPJJAÑÄNI

3. 1) Kuntï 2 Pedro 2:7, 8 texton siski ukarjamajja, ¿kuna jan wali amtarus Lot chachajj purïna? 2) ¿Kuna jan walinakansa Lot chachajj Sodoma markar saratapat uñjasïna?

3 Sodoma markan jakañ amtasajja, Lot chachajj mä jan wali amtaruw purïna. Uka markajj jan wali jaqenakamp phoqantatänwa (2 Pedro 2:7, 8 liytʼañataki). Uka cheqajj wali sumäkchïnsa, kunayman jan walinakanwa ukar saratapat uñjasïna (Gén. 13:8-13; 14:12). Amuyatajja, esposaparojj uka markankañajj wal gustpachäna, uka markankirinakat mä qhawqhanimpis sum apasirakpachäna, ukatwa Diosarojj jan istʼjjpachänti. Diosajj ‘ninampi azufrempi jalluntaykäna’  ukhajj jiwataw uñjasïna. Pä phuchanakapasti, Sodoma markan jiwapkäna uka chachanakampi casarasiñatak parlatäpjjarakïnwa. Ukhamajj Lot chachajja, utapsa cosasanakapsa qʼalwa aptʼasïna, esposapas jiwataw uñjasïna (Gén. 19:12-14, 17, 26). Lot chachajj ukham jan walinakansa uñjaskchïnjja, Jehová Diosajj janiw jupatak coleraskänti.

Jehová Diosajj sinttʼasiñatwa angelanakarojj Lot chachampiru familiapampir qhespiyañatakejj khitäna. (Párrafo 4 uñjjattʼäta).

4. ¿Kunjamsa Jehová Diosajj Lot chachar pacienciamp uñjäna? (Nayrïr paginankir dibujo uñjjattʼäta).

4 Lot chachajj Sodoma markan jakañsa amtkchïnjja, Diosajj khuyaptʼayasiñatwa angelanakar khitäna, ukhamat juparusa familiaparus qhespiyañataki. Ukampis Lot chachajj janiw Sodoma markat jankʼak mistkänti. Ukatwa angelanakajj juparusa, warmiparusa, pä phuchanakaparus amparat waysuwayapjjäna, ukhamatwa Sodoma markat qhespiyapjjäna (Gén. 19:15, 16). Ukatjja, “qollu toqenakar jaltjjapjjam” sasaw angelanakajj sapjjäna. Ukampis Lot chachajja, mä jiskʼa markajj uka jakʼan utjkäna ukar sarañwa Diosar mayïna (Gén. 19:17-20). Jehová Diosajj pacienciampiw istʼäna, ‘ukar sarasmawa’ sarakïnwa. Qhepatjja, Lot chachajj uka markan jakañ ajjsarayasjjänwa, ukatwa Diosajj qalltan siskäna uka qollu toqer sarjjäna (Gén. 19:30). Cheqas Jehová Diosajj Lot chachatak wali paciencianïnwa. ¿Kunjamsa jiwasajj Jupjam paciencianirakïsna?

5, 6. Kuntï 1 Tesalonicenses 5:14 texton siski ukarjamajja, ¿kunjamsa Jehová Diosat yateqasisajj jilat kullakanakasar yanaptʼsna?

5 Jilat kullakanakasajj Lot chachjamarakiw jan wali amtanakar purisajj jan walinakan uñjasipjjaspa. Ukhamäni ukhajj ¿kunsa lurañäni? ‘Jan wali amtar puritapatwa ukhaman uñjasiski’ sasin inas amuysna (Gál. 6:7). Ukampis ukham amuyañat sipansa, kunjamtï Jehová Diosajj Lot chachar yanaptʼkänjja, ukhamarakiw jupanakar yanaptʼsna. ¿Kunjamsa yanaptʼsna?

6 Jehová Diosajj mä amtampiw angelanakar khitäna. Janiw ‘Sodoma markajj tʼunjatäniwa’ sasin Lot chachar yatiyañatakik khitkänti, jan ukasti Sodoma markat escapañ yanaptʼapjjañapatakiw khitäna. Jiwasajj ukhamarakiw jan walinakar purtʼasirjamäpki uka jilat kullakanakasar yatiyañasa, mä arunjja, ewjjtʼañasa. Ukatakejj inas yanaptʼañajj wakischini. Qalltanjja, Biblian ewjjanakapar istʼañajj jupanakatak chʼamakïspawa, ukampis paciencianïñasawa. Parlaniwayktan uka pä angelanakajj kunjamtï Lot chachar yanaptʼapkänjja, ukhamarakiw jilat kullakanakasarojj jan qarjtas yanaptʼañasa (1 Juan 3:18). Inas Biblian ewjjanakapar istʼapjjañapatakejj amparat waythapisinsa jupanakar irpksna ukham lurañajj wakischini (1 Tesalonicenses 5:14 liytʼañataki).

7. Kunjamtï Jehová Diosajj Lot chachar uñjkäna ukat yateqasisajja, ¿kunjamsa jilat kullakanakasar uñjañasa?

7 Inas Jehová Diosajj Lot chachan jan wali luratanakap uñchʼukchispäna, ukampis janiw ukham lurkänti. Walja maranak qhepatjja, Lot chachajj ‘cheqapar sarnaqer jaqewa’ sasaw apóstol Pedror qellqayäna. Uk yatiñajj wal kusisiyistu, Diosajj jan wali luratanakasat perdonistaspawa (Sal. 130:3). ¿Kunsa Jehová Diosat yateqsna? Jilat kullakanakasan jan wali luratanakap uñchʼukiñat sipansa, suma luratanakapwa uñchʼukiñasa. Ukhamtï lurañänejja, jan walinak lurapjjani ukhajj janiw jupanakatak jankʼak coleraskañäniti, ewjjtʼkañäni ukhas istʼapjjarakistaniwa.

SINTTʼASIRÏPJJAÑÄNI

8. ¿Kunas sinttʼasirïñatak yanaptʼistani?

8 Job chachajj Lot chachjamarakiw jan walinakan uñjasïna, ukampis janiw mä jan wali  amtar puritapat ukhaman uñjaskänti. Jupajj cosasanakap qʼal aptʼasïna, jaqenakas janiw nayrjam uñj-jjapjjänti, usuntjjarakïnwa. Wawanakapas taqeniw jiwarjjapjjäna. Amigonakapajj chuymachtʼañat sipansa, juchañchapjjänwa. ¿Kunatsa ukham lurapjjäna? Job chachajj kunjamsa jikjjatasïna uk janiw sum amuyapkänti, ukatwa jupat jan walinak amuyasajj jan sinttʼasis juchañchapjjäna. ¿Kunsa jan jupanakjamäñatak lursna? Maya, mä jaqejj kunjamsa jikjjatasi uk Jehová Diosakiw sum yati, uk janipun armañäniti. Paya, mä llakitamp parlkasajj sumwa istʼañasa, kunjamsa jikjjatasi uks sumwa amuyañasaraki. Ukhamatakwa jupat cheqpachapun llakisitas uñachtʼayañäni.

9. ¿Kunsa jilat kullakanakasat sinttʼasitas laykojj jan lurkañäni, ukat kunatsa?

9 Jiwasatï jilat kullakanakasat sinttʼasstanjja, janiw kuna jan walinakantï uñjasipki ukanakat yaqhanakar parlkañäniti. Arunak apnaqerejj janiw congregacionar chʼamañchkiti, jan ukasti jan waltʼayiwa (Prov. 20:19; Rom. 14:19). Janirakiw munasiri jaqëkiti, arunakapas jukʼampiw llakitanakar aynachtʼayaspa (Prov. 12:18; Efes. 4:31, 32). Ukatwa maynejj kunja suma chuymanisa uk amuyañatak chʼamachasiñasa, kunjamsa jan waltʼäwinakar saykatañapatak yanaptʼsna uks amuytʼañasarakiwa.

Mä jilatatï, jan ukajj mä kullakatï jan amuytʼasis parlani ukhajja, pacienciampiw istʼañasa, wakiskani ukapachanwa chuymachtʼañasaraki. (Párrafos 10, 11). *

10. ¿Kunsa Job 6:2, 3 texton qellqata arunakajj yatichistu?

10 (Job 6:2, 3 * liytʼañataki). Awisajj ‘jan amuytʼasisaw’ Job chachajj parläna, ukham parlatapat qhepatakwa amtasïna (Job 42:6). Llakitanakajj Job chachjamarakiw mä jan waltʼäwin uñjasisajj jan amuytʼasis parlapjjaspa, qhepatakwa amtasipjjarakispa. ¿Kunsa  ukapachan lurañasa? Juchañchañat sipansa, jupanakat sinttʼasiñasawa. Ak amtañäni, Jehová Diosajj janiw jan waltʼäwinakan llakita sarnaqañas munkänti. Ukatwa Diosan mä serviripajj jan walinakan uñjasisajj jan amuytʼasis parlaspa, Diosatsa jiwasatsa jan walinakwa parlarakispa. Ukapachanjja, janiw jupatak jankʼak colerasiñasäkiti, janirakiw juchañchañasäkisa (Prov. 19:11).

11. Mä cristianorojja, ¿kunjamsa jilïr irpirinakajj Eliú chachat yateqasisin ewjjtʼapjjaspa?

11 Mä jan walin uñjaski uka cristianor ewjjtʼañasa jan ukajj cheqañchañasa, awisajj wakisispawa (Gál. 6:1). ¿Kunjamsa jilïr irpirinakajj jupar yanaptʼapjjaspa? Eliú chachatwa yateqasipjjaspa, jupajj wali pacienciampiw Job chachar istʼäna (Job 33:6, 7). Janïr ewjjtʼkasajja, kunjamsa Job chachajj jikjjatasïna ukwa amuytʼäna. Jilïr irpirinakajj Eliú chachjamarakiw llakitar sum istʼapjjañapa, kunjamas jikjjatasi uks sum amuyapjjañapa. Ukham lurapjjani ukhajja, llakitajj taqe chuymaw ewjjtʼanakap katoqtʼasini.

CHUYMACHTʼAPJJAÑÄNI

12. ¿Kunjamsa Noemí warmejj esposopana ukhamarak pä yoqanakapan jiwatapat jikjjatasïna?

12 Noemí warmejj jan jitheqtasaw Diosar servïna, wal Jupar munasirakïna. Ukampis esposopana ukhamarak pä yoqanakapan jiwatapatjja, “jan Noemí sapjjestati, jan ukasti Mara sapjjeta” sasaw säna, uka sutejj ‘llakita’ sañwa muni (Rut 1:3, 5, 20, 21). Rut sat yojjchʼapajja, janipuniw Noemí warmirojj jan waltʼäwinakan uñjaskäna ukhajj jaytanukkänti. Janiw kunanak lurasakejj yanaptʼkänti, jan ukasti suma arunakampiw chuymachtʼäna. ‘Wal munassma, nayaw jumampïskä, yanaptʼaskarakïmawa’ sasaw Rut warmejj Noemí warmir säna (Rut 1:16, 17).

13. ¿Kunatsa jiwirin esposapasa, jan ukajj esposopas chuymachtʼatäñ muni?

13 Mä kullakan esposopajj jiwjje ukhajja, kullakajj chuymachtʼatäñ wal muni. Jilatanakampejj ukhamarakiw pasi. Chacha warminakajja, jakʼa puran jilsur pä qoqanakampi sasïpjjewa. Jilskasajja uka qoqanakan saphinakapajj wal kʼanantasi. Ukampis uka qoqanakat maynïrir saphitpach phatsusin jiwayasi ukhajja, mayni qoqajj jan walinakanwa uñjasispa. Chacha warmit maynejj jiwjje ukhajj ukhamarakiw qheparirejj jan walinakan uñjasispa. Paula * sat mä kullakan esposopajj mä akatjamatwa jiwäna. Kullakajj akham siwa: “Jakäwijajj mä akatjamatwa mayjtʼäna, jan kamachtʼirjamaw uñjasiyäta. Wali munat amigojaw jiwäna. Jupampejj taqe kunatwa parltʼasipjjerïta. Kunatï nayar kusisiykitäna ukajj jupar kusisiyarakïnwa, jan walinakan uñjasirïkta ukhas yanaptʼarakirïtuwa. Llakit uñjasirïta ukhajj chuymachtʼirïtuwa. Wali llakitapuniw uñjasiyäta” sasa.

Khitinakantï esposopasa, jan ukajj esposapas jiwawayjje ukanakarojja, ¿kunjamsa chuymachtʼsna? (Párrafos 14, 15). *

14, 15. ¿Kunjamsa mä viudarusa, jan akajj mä viudorus chuymachtʼsna?

14 ¿Kunjamsa mä viuda warmirusa, jan akajj mä viudo chacharus chuymachtʼsna? ‘Janiw kuns sirjamäkäti’ sasinsa awisajj amuychiñänejja, jupanakamp parltʼañatakiw chʼamachasiñasa. Paula kullakajj akham siwa: “Maynejj jiwjje ukhajja, uka toqet parlañajj chʼamakïspawa, uk nayajj sum amuyta. Yaqhepajja, ‘jan walinakwa sirista’ sasaw ajjsarayasipjje. Ukampis jan wali arunakat sañat sipansa, jan kun sañaw jukʼamp jan walejja” sasa. Llakitajj janiw musparaykiri arunak arsuñas suykapuniti. Paula kullakajj akham siwa: “‘Esposoman jiwatapajj wali llakkañawa’ sapjjerïtu ukhajja, wal chuymachtʼapjjerïtu” sasa.

 15 William jilatan esposapajj mä qhawqha maranak nayrakiw jiwäna, jupajj akham siwa: “Esposajajj kunanaksa lurirïna uka toqet parltʼapjjetu ukhajja, wal kusista, qhawqsa jupar munasipjjäna ukwa amtayitu. Ukajj jan sint llakisiñatakiw yanaptʼitu, chuymachtʼarakituwa. Esposajar wal munasiyäta, jupajj nayatak wali wakiskirïnwa” sasa. Bianca kullakajj akham sarakiwa: “Jilat kullakanakajj nayamp chik Diosar mayisipjje, Bibliatsa maya jan akajj pä textonak liytʼarapipjjetu ukhajja, wal chuymachtʼapjjetu. Yaqhanakar esposojat parlir istʼañasa, jupat parlir sum istʼapkitu ukhasa, wal chuymachtʼitu” sasa.

16. 1) ¿Kunsa mä viudaru, jan akajj mä viudoru yanaptʼañatakejj luraskakiñasa? 2) Santiago 1:27 qellqatarjamajja, ¿kunsa taqenis lurañasa?

16 Kunjamtï Rut warmejj Noemí warmir jan jaytanukkänjja, ukhamarakiw jiwasajj llakitanakar chuymachtʼaskakiñasa. Parlaniwayktan uka Paula kullakajj akham siwa: “Esposojajj jiwjjäna ukhajja, waljaniw yanaptʼapjjetäna. Ukampis qhepatjja jan tiemponiw taqenis sarnaqjjapjjäna. Jakäwijajj janiw nayrjamäjjänti. Walja phajjsinaka, jan ukajj walja maranak qhepatsa llakitanakar chuymachtʼañajj wakisiskakiwa, yaqhanakar uk amuyir uñjañajj wal yanaptʼasi” sasa. Cheqansa jaqenakajj mayj mayjätanwa. Yaqhepajj esposopana, jan ukajj esposapan jiwatapat ratukjamakiw yatinoqtapjje, yaqhepasti janiraki. Yaqhepajja, mä kun lurasas kuntï jiwirimpejj lurapjjerïkäna uk amtasajj wal llakisipjje. Ak janipun armañäniti, viudanakar yanaptʼañajj Jehová Diosar wal kusisiyi, jiwasarus kusisiyarakistuwa (Santiago 1:27 liytʼañataki).

17. Esposopana jan ukajj esposapan jaytanukut uñjasipki ukanakajja, ¿kunatsa chuymachtʼatäñ munapjje?

 17 Maysa toqetjja, khitinakatï esposopana, jan ukajj esposapan jaytanukut uñjasiwayapki ukanakaw wali llakit uñjasipjjaraki. Joyce kullakat parltʼañäni. Juparojja, esposopajj yaqha warmimp sarjjañatakiw jaytanukuwayäna. Kullakajj akham siwa: “Esposojamp divorciasiñajj jiwkaspäna ukat sipans jukʼampwa llakisiyitäna. Jupatï mä chijir purisa, jan ukajj usuntas jiwaspäna ukhajja, janiw jupan munañapäkaspänti. Ukampis nayar jaytañatakejj jupaw amtäna. Jiskʼachataw uñjasiyäta” sasa.

18. ¿Kunsa sapakëjjapjje ukanakar yanaptʼañatakejj lursna?

18 Sapakëjjapjje ukanakar yanaptʼtan ukhajja, jupanakar munasitaswa uñachtʼaytanjja. Amigonakanïñajj jupanakatak wali wakiskiriwa (Prov. 17:17). ¿Kunjamsa jupanakar yanaptʼsna? Inas manqtʼasiñatak invittʼsna. Jan ukajj pasiytʼiri, predikiriw jupanakamp sarsna. Bibliat familjam yatjjatktan ukarus jawstʼaraksnawa. Ukham lurasajj Diosaruw kusisiyañäni, Jupajj “llakimp aynachtʼatanakan jakʼapankaskiwa”, “ijma [jan ukajj viuda] warminakan arjjatiripa[rakiwa]” (Sal. 34:18; 68:5).

19. ¿Kun lurapjjam sistus 1 Pedro 3:8 textojja?

19 Diosan Reinopajj niyaw aka oraq apnaqjjani. Ukapachanjja, janiw tʼaqesïwinakasat amtasjjañäniti. ‘Kunatejj utjkän ukajj armatäjjaniwa’. Uka uru puriniñap wal suytanjja (Is. 65:16, 17). Ukapachkamajja, maynit maynikam yanaptʼasipjjañäni, arunakasampisa luratanakasampisa, qhawqsa jilat kullakanakasar munastan uk uñachtʼayapjjañäni (1 Pedro 3:8 liytʼañataki).

CANCIÓN 111 Wali kusisitäpjjtanwa

^ Párrafo 5 Lot chachasa, Job chachasa, Noemí warmis jan jitheqtasaw Diosar servipjjäna, ukhamäkchïnsa jan walinakanwa uñjasipjjäna. Aka yatichäwinjja, kunsa sarnaqäwinakapat yateqsna, kunatsa llakit uñjasipki uka jilat kullakanakasat sinttʼasiñasa, jupanakamp paciencianïñasa, jupanakar chuymachtʼañas wakiskiri ukanakatwa yatjjataskañäni.

^ Párrafo 10 Job 6:3 (NM): ‘Jichhajj lamar qotanakankir chʼallanakat sipansa jukʼampi jathiwa. Ukatwa jan amuytʼasis parlta’.

^ Párrafo 13 Aka yatichäwinjja, sutinakajj cambiasiwayiwa.

^ Párrafo 58 FOTONAKAT JUKʼAMP QHANAÑCHTʼAÑATAKI: Wali llakit mä jilataw mä jilïr irpirimpejj jan amuytʼasis parlaski, jilïr irpirejj sumwa istʼaskaraki. Qhepat jilatajj jan llakitäjje ukhajja, jilïr irpirejj munasiñampiw ewjjtʼaski.

^ Párrafo 60 FOTOT JUKʼAMP QHANAÑCHTʼAÑATAKI: Esposapajj jichhak jiwawayki uka jilatampiw mä chacha warmejj parltʼasipki. Mä qhawqha fotonak uñasajja, kunanaktï kullakat amtapki ukanakatwa parlasipki.