Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 2 YATICHÄWI

Congregacionan Jehová Diosar jachʼañchapjjañäni

Congregacionan Jehová Diosar jachʼañchapjjañäni

‘Nayajj tantachäwinakan jachʼaruw aptäma’ (SAL. 22:22).

CANCIÓN 59 Jehová Diosar cantapjjañäni

¿KUNANAKATSA YATJJATASKAÑÄNI? *

1. ¿Qhawqsa Davidajj Diosar munasïna, ukham munasitapat kunsa lurarakïna?

DAVID reyejj akham sasaw qellqäna: “Tatitojj jachʼapuniwa, jachʼar aptatäñapajj wakisiwa” sasa (Sal. 145:3). Davidajj Jehová Diosar wal munasïna, ukatwa ‘tantachäwinakan jachʼar aptäna’ (Sal. 22:22; 40:5). Jiwasajj ukhamarakiw Diosar wal munastanjja, ukatwa David chachjam akham sistanjja: ‘¡Israel awkijan Jehová Diosapa, wiñayatakiw bendisitäyäta!’ sasa (1 Crón. 29:10-13).

2. 1) ¿Kunjamsa Jehová Diosar jachʼañcharaktanjja? 2) ¿Kunatsa yaqhep jilat kullakanakajj tantachäwinakan jan arstʼapki, ukat kunsa jichhajj uñjaskañäni?

2 Jichhürunakanjja, tantachäwinakan arstʼasaw Diosar jachʼañcharaktanjja. Ukampis yaqhepatakejj tantachäwinakan arstʼañajj wali chʼamawa. Arstʼañ munasipkchisa, ajjsarapjjatap laykojj janiw arstʼapkiti. ¿Kunas jan ajjsarañatak yanaptʼistaspa? Chʼamañchtʼkir arunakampi arstʼañatakejja, ¿kuna ewjjtʼanakas taqenir yanaptʼistaspa? Janïr ukanak qhanañchkasajja, kunatsa tantachäwinakan arstʼañasa ukwa pusi toqet uñjaskañäni.

¿KUNATSA TANTACHÄWINAKAN ARSTʼTANJJA?

3-5. 1) Hebreos 13:15 qellqatarjamajja, ¿kunatsa tantachäwinakan arstʼtanjja? 2) “Diosajj janiw taqenis mä igualak arstʼañas suykiti” sasajja, ¿kunatsa sistanjja?

3 Diosar jachʼañchañatakiw arstʼtanjja, ukajj mä suma bendicionawa (Sal. 119:108). Tantachäwinakan arstʼasajj ‘jachʼañchir sacrificionakwa Diosar loqtasktanjja’, janiw khitis jiwas lanti uk lurkaspati (Hebreos 13:15 liytʼañataki).  Jehová Diosasti, janiw taqenis mä pachpa sacrificio loqtañasa, mä arunjja, mä igualak arstʼañas suykiti.

4 Taqeniw mayj mayjätanjja, uk yatisaw Diosajj sacrificionakas wali valoranit uñji. Israelitanakajj loqtapkäna uka sacrificionakat parltʼañäni. Yaqhep israelitanakajja, mä oveja jan ukajj mä cabritwa Diosar loqtapjjerïna. Pobrenakasti, ‘pä paloma, jan ukajj pä paloma wawanakwa’ loqtapjjarakirïna. Jukʼamp pobrenakasti, “pä kilo wali suma jakʼu” Diosar loqtapjjerïna (Lev. 5:7, 11). Jakʼun alapajj wali minusakïnwa, ukhamäkchïnsa Diosajj wali valoranitwa uka sacrificio uñjäna, ukampis jakʼojj ‘wali suma jakʼüñapänwa’.

5 Jehová Diosajj pachpakwa amuyaski. Jupajj janiw Apolos chachjam ‘suma parltʼir jaqëñassa’, ni Pablo chachjam chuymar purtʼkiripun arstʼañassa suykiti (Hech. 18:24; 26:28). Jan ukasti, qhawqtï lurirjamäktan ukarjam taqe chuyma arstʼañaswa suyi. Pä sencill qollqemp yanaptʼiri viuda warmit amtañäni. Kunapatï utjkäna uk qʼal churatapatjja, Diosajj wali valoranitwa jupar uñjäna (Luc. 21:1-4).

Tantachäwinakan arstʼañajj jiwaspachparuw yanaptʼistu, istʼapkistu ukanakarus yanaptʼarakiwa. (Párrafos 6, 7). *

6. 1) Hebreos 10:24, 25 qellqatarjamajja, ¿kunjamsa jilat kullakanakan comentarionakapajj yanaptʼistaspa? 2) ¿Kunjamsa jilat kullakanakar arstʼapjjatapat yuspärsna?

6 Maynit maynikam chʼamañchtʼasiñatakiw arstʼtanjja (Hebreos 10:24, 25 liytʼañataki). Tantachäwinakan kunayman comentarionak istʼañajj wali kusiskañawa. Mä wawajj taqe chuyma mä qhawqha arunakamp arstʼki ukhajja, wal kusistanjja. Mä jilatasa jan ukajj kullakas Bibliankir mä yatichäw sum amuytʼatapat arstʼki ukhasti, wali chʼamañchtʼataw jikjjatasiraktanjja. Wali ajjsariri, jan ukajj parlktan uka aru yateqer jilat kullakanakajj arstʼapki ukhajja, ukhamarakiw wal kusistanjja (1 Tes. 2:2). ¿Kunjamsa jupanakar yuspärsna? Inas tantachäw tukuyatar akham sissna: “Walik arstʼtajja, arunakamajj wal chʼamañchtʼitu” sasa. Maysa toqetjja, tantachäwinakan arstʼasaw jupanakar chʼamañchtʼaraksna (Rom. 1:11, 12).

7. ¿Kunjamsa arstʼañajj jiwaspachpar yanaptʼistu?

7 Arstʼañajj jiwaspachparuw yanaptʼistu (Is. 48:17). Nayrïr toqetjja, niyakejjay arstʼañatak jukʼamp sum wakichtʼastanjja, Diosan Arupsa, kunjamsa Bibliarjam sarnaqsna  uksa jukʼamp sumwa amuytanjja. Payïr toqetjja, comentarionakasampi yanaptʼasajj jukʼamp kusisitaw tantachäwinakan jikjjatastanjja. Kimsïr toqetsti, niyakejjay arstʼañatak wal chʼamachasstanjja, kuntï arstʼkañäni ukajj janiw chuymasat jankʼak mistkaniti.

8, 9. 1) Malaquías 3:16 qellqatarjamajja, ¿kunjamsa Diosajj arstʼañatak chʼamachasktan ukarojj uñji? 2) ¿Kunatsa arstʼañajj yaqhepatak chʼamäspa?

8 Kunarutï creyktan uk arstʼañaswa Diosajj muni. Arstʼktan ukhajja, Jehová Diosajj sum istʼaskistu, arstʼañatak chʼamachasktan ukarus wali valoranitwa uñji (Malaquías 3:16 liytʼañataki). Ukatwa bendisirakistu (Mal. 3:10).

9 Kunatsa tantachäwinakan arstʼañasa ukwa jichhakam sum amuytʼawaytanjja. Ukampis inas yaqhepajj arstʼañ ajjsarasipkakchi. Jumatï ukhaman uñjasstajja, jan llakisimti. Tantachäwinakan jukʼamp arstʼañatakejj kawkïr textonakasa, sarnaqäwinakas yanaptʼistaspa ukwa jichhajj uñjañäni, mä qhawqha ewjjtʼanakatwa parlarakiñäni.

¿KUNAS JAN AJJSARAÑATAK YANAPTʼISTASPA?

10. 1) Arstʼañ horasajja, ¿kunjamsa jiwasat waljanejj jikjjatastan? 2) Arstʼañ ajjsarayastan ukhajja, ¿kunjam chuymanïtassa uñachtʼayasktanjja?

10 ¿Tantachäwinakan arstʼañatakejj amparamajj wali jathïkaspas ukhamti amuyasta? Janiw jumak ukham amuyasktati. Niya taqeniw arstʼañ mä jukʼa ajjsarayastanjja. ¿Kunatsa arstʼañ ajjsarayasta? ¿“Janiw kamsirjamäkäti”, “pantjasïwa” sasat ajjsarta? Jan ukajj ¿“janiw mayninakjam sum arstʼañ puedkäti” sasach ajjsarta? Ukham amuyañajj humilde chuymanïtamwa uñachtʼayaski, mayninakajj jumat sipansa jilïrïpkaspas ukham amuyatamwa uñachtʼayaskaraki. Diosajj ukham humilde chuymaninakarojj wal munasi (Sal. 138:6; Filip. 2:3). Ukampis Jupar jachʼañchañama, ukhamarak jilat kullakanakar tantachäwinakan chʼamañchtʼañamwa munaraki (1 Tes. 5:11). Diosajj wal munastamjja, Jupaw jan ajjsarañatak yanaptʼätam.

11. ¿Biblian kawkïr textonakapas yanaptʼistaspa?

 11 Mä qhawqha textonakat parltʼañäni. ‘Taqeniw arsutasan pantjastanjja’ sasaw Bibliajj amtayistu (Sant. 3:2). Jehová Diosajj janiw jan pantjasir jaqëñas suykiti, ni jilat kullakanakas uk suyapkarakiti (Sal. 103:12-14). Jupanakajj familiasäkaspas ukhamäpjjewa, wal munasipjjarakistu (Mar. 10:29, 30; Juan 13:35). Awisajj janiw kuntï sañ munktan uk sumpun sisktanti, uk jupanakajj yatipjjewa.

12, 13. ¿Kunsa Nehemías chachampita Jonás chachampit yateqsna?

12 Jichhajj pä chachanakat parltʼañäni, ukaw jan ajjsarañatak yanaptʼistani. Mä reyin palaciopan trabajiri Nehemías chachat nayraqat parltʼañäni. ‘Jerusalenan perqanakapasa punkunakapas qʼala tukjatawa’ sasin yatiyapjjäna ukhajja, Nehemiasajj wal llaktʼasïna (Neh. 1:1-4). “¿Kunatsa llakitäta?” sasin reyejj jisktʼäna ukhajj wal ajjsarayaspachäna. Ukatwa janïr kun siskasajj Diosar mä qhawqha arunakamp mayisïna. Ukham luratapatwa reyejj Diosan markapar wal yanaptʼäna (Neh. 2:1-8). Ukhamajj janïr kun siskasajja, orasiñajj wali wakiskiriwa, ukwa Nehemiasat yateqsna. Jonás chachat parltʼarakiñäni. Diosajj Nínive markar sarañapatak mayïna ukhajja, Jonasajj wal ajjsaratap laykojj yaqha cheqaruw sarjjäna (Jon. 1:1-3). Ukampis qhepatjja, Diosan yanaptʼapampejj Nínive markar sarasaw Jonasajj ukankir jaqenakar yatiyäna, ukham luratapajj wal uka jaqenakar yanaptʼäna (Jon. 3:5-10). Ukhamajj ajjsarañas utjkchinejja, Jehová Diosaw jupar serviñatakejj yanaptʼistani, ukwa Jonasan sarnaqäwipat yateqsna. Qhana arunjja, jilat kullakanakasajj janiw Nínive markankir jaqenakjam wali ajjsarañjam jaqenakäpkiti.

13 Chʼamañchtʼkir arunakampi arstʼañatakejja, ¿kuna ewjjtʼanakas yanaptʼistaspa? Uk jichhajj uñjañäni.

14. 1) ¿Kunatsa tantachäwinakatak sum wakichtʼasiñasa? 2) ¿Kuna horasas wakichtʼassna?

14 Taqpach tantachäwinakatak wakichtʼasipjjañäni. Sum wakichtʼasiñäni ukhajja, janiw arstʼañ sint ajjsarkañäniti (Prov. 21:5). Cheqas janiw taqenejj mä igualak wakichtʼasktanti. 80 marani Eloise sat viuda kullakajja, semana qalltkipanwa Yatiyañataki revistat wakichtʼasi. Jupajj akham siwa: “Walja urunak faltkipan wakichtʼasta ukhajja, jukʼamp kusisitaw tantachäwin jikjjatasta” sasa. Jornälpach trabajiri Joy sat kullakajja, tantachäwitak mä uru faltkipanwa Yatiyañataki revistat wakichtʼasi, jupajj akham siwa: “Ukham lurañajja, kuntï wakichtʼaskta uk tantachäwin fácil amtañatakiw yanaptʼitu” sasa. Ike sat jilïr irpirejja, walja lurañanakaniwa, precursoratwa serviskaraki. Jupajj akham siwa: “Taqpach wakichtʼasiñat  sipansa, semanan walja urunak wakichtʼasiñaw nayatakejj jukʼamp walejja” sasa.

15. ¿Kunjamsa tantachäwinakatak sum wakichtʼassna?

15 ¿Kunjamsa sum wakichtʼassna? Nayraqatjja, Diosan espíritu santopwa oracionan mayisiñasa (Luc. 11:13; 1 Juan 5:14). Ukatjja, semanan yatjjatkañäni uka yatichäwin pʼeqeñchäwipa, jiskʼa pʼeqeñchäwinakapa, dibujonakapa, ukhamarak recuadronakapwa uñjjattʼañasa. Ukjjarusti, sapa parrafotwa sum yatjjatañasa, taqpach textonak liytʼañatakiw chʼamachasiñasaraki. Ukjjarojj lupʼiñasawa, yamas arstʼañ munktan uka toqetwa jukʼamp lupʼiñasa. Sum wakichtʼasiñajj jiwasan askisatakiwa, arstʼañas janiw sinti chʼamäjjaniti (2 Cor. 9:6).

16. Wakichtʼasiñatakejja, ¿kuna yanaptʼanakas celularamana jan ukajj tabletaman utjtam, ukat kunjamsa ukanakamp yanaptʼayasta?

16 Celularanakataki, tabletanakatak utjki uka yanaptʼanak apnaqapjjañäni. Wakichtʼasiñatakejja, kunayman yanaptʼanakwa Diosajj markap toqejj churistu. JW Library® sat aplicacionajja, tantachäwin yatjjataskani uka qellqatanak celulararu jan ukajj tabletar apaqañatakiw yanaptʼistu. Ukhamatwa kawkinkkasasa kuna horasäskpasa, uka qellqatanak liytʼsna, jan ukajj grabacionap istʼsna. Yaqhepajja, JW Library® sat aplicacionampiw trabajona jan ukajj colegion samartʼkasajj tantachäwinakatak wakichtʼasipjje, jan ukajj viajkasaw ukham lurapjje. Watchtower Library ukhamarak INTERNETANKIR BIBLIOTECAukanakajja, Bibliat jukʼamp yatjjatañatakiw yanaptʼarakistu.

¿Kuna horasas tantachäwinakatak wakichtʼasta? (Párrafos 14-16). *

17. 1) ¿Kunatsa walja kuti arstʼañatak wakichtʼasiñasa? 2) Jehová Diosajj amigomäspawa: Tantachäwin arstʼañatak sum wakichtʼasim sat videojj ¿kunsa yatichistu?

17 Tantachäwin walja kuti arstʼañatak wakichtʼasipjjañäni. Janiw sapa kuti ampar aytkañäni ukhajj arstʼapunkañäniti, ukatwa walja kuti arstʼañatak wakichtʼasiñasa. Inas ampar aytkañäni ukhajja, yaqhanakajj ampar aytapjjarakchini, ukatwa tantachäw sarayir jilatajj arstʼañapatak yaqhar mayispa. Tantachäw horasapar tukuyañatakejja, inas jilatajj mä qhawqhaniruk arstʼayarakchini. Ukhamajj jilatatï nayrïr parrafonakan jan arstʼaykistani ukhajja, janiw jupatak coleraskañäniti, ni aynachtʼkañänisa. Niyakejjay walja kuti arstʼañatak wakichtʼasstanjja, qhepat arstʼaskañäniwa. Textonaksa liytʼaraksnawa. Ukampis pachpa arunakasampi arstʼañatakiw jukʼamp chʼamachasiñasa. *

18. ¿Kunatsa jukʼa arunakampik arstʼañasa?

 18 Jukʼa arunakampikiw arstʼañasa. Mä qhawqha arunakamp arstʼktan ukhaw jilat kullakanakar jukʼamp chʼamañchtanjja. Ukhamajj comentarionakasajj janiw 30 segundonakat jiläñapäkiti (Prov. 10:19; 15:23). Tantachäwinakan walja maranak arstʼasipki uka jilat kullakanakaw uka toqen jukʼamp chʼamachasipjjañapa. Jupanakatï walja minutonak arstʼapjjaspa ukhajja, mayninakajj janiw arstʼañ munjjapjjaspati, “janiw jupanakjam arstʼkäti” sasaw sapjjaspa. Maysa toqetjja, mä qhawqha arunakamp arstʼañajj yaqhanakan arstʼapjjañapatakiw yanaptʼaraki. Parrafon nayrïr jisktʼapar qhanañchañ waktʼistani ukhajja, taqpach parrafot parlañat sipansa, cheqakwa jisktʼar qhanañchañasa. Ukjjaruw yaqha toqenakat arstʼasirakispa (“ ¿Kunanakatsa tantachäwinakan arstʼasma?” sat recuadro uñjjattʼäta).

19. ¿Kunjamsa tantachäw sarayir jilatajj yanaptʼistaspa, ukat kunsa jiwasajj janïräkipan lurañasa?

19 Tantachäw sarayir jilataruw kuna parrafotsa arstʼañ muntan uk sañasa. Ukjja tantachäw janïr qalltkipanwa yatiyañasa. Ukat jilatajj parrafot jisktʼani ukhajja, jankʼakiw ampar altor aytañasa, ukhamatwa jupajj uñjistani.

20. ¿Kunatsa tantachäwinakajj amigonakampi manqtʼasiñamp sasispa?

20 Tantachäwinakajj amigonakampi manqtʼasiñamp sasiwa. Mä jilatatï utapar invittʼistaspa ukhajja, ¿janit manqtʼasiñatak kuns apkaraksna? “Kuns apä” sasinsa llakiskchiñänejja, kunatï taqenir gustkaspa uk apañatakiw chʼamachasiñäni. Jehová Diosajj ukhamarakiw tantachäwinakar invittʼistu, Jupajj wali suma manqʼäkaspas ukhamwa walja yatichäwinak wakichi (Sal. 23:5; Mat. 24:45). Kuntï apirjamäktan uk apañaswa munaraki. Ukhamajj tantachäwinakatak sum wakichtʼasipjjañäni, arstʼañatak chʼamachasipjjarakiñäni. Ukhamatwa Diosan mesapat manqʼaskasajja, yaqhanakan manqʼasipjjañapataki, mä arunjja, yateqapjjañapatak yanaptʼañäni.

CANCIÓN 2 Jehová, ¡sutimajj jachʼañchatäpan!

^ Párrafo 5 Taqeniw Jehová Diosar David chachjam wal munastanjja, jachʼañchañwa munaraktanjja. Qhawqsa Diosar munastan ukjja, tantachäwinakan arstʼasaw uñachtʼaysna. Ukampis yaqhepatakejja, arstʼañajj wali chʼamawa. Jumatï ukhaman uñjasstajja, kunatsa arstʼañ ajjsarayasta, kunas jan ajjsarañatak yanaptʼiristam uk amuyañatakiw aka yatichäwejj yanaptʼätam.

^ Párrafo 17 Jehová Diosajj amigomäspawa: Tantachäwin arstʼañatak sum wakichtʼasim sat video uñtañatakejja, QELLQATANAKA > VIDEONAKA > WAWANAKATAKI siski ukaruw Internetan jw.org cheqan mantäta.

^ Párrafo 63 FOTOT JUKʼAMP QHANAÑCHTʼAÑATAKI: Walja jilat kullakanakaw Yatiyañataki revistat arstʼañatak ampar aytasipki.

^ Párrafo 65 FOTONAKAT JUKʼAMP QHANAÑCHTʼAÑATAKI: Nayrïr foton ampar aytasipkäna uka jilat kullakanakaw arstʼañatak wakichtʼasisipki. Jupanakajj kunayman lurañanakanïpjjchisa, Yatiyañataki revistat wakichtʼasiñatakiw tiempo apstʼasipjje.