Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jupanakajj taqe chuymaw sarapjjäna: Madagascar markaru

Jupanakajj taqe chuymaw sarapjjäna: Madagascar markaru

SYLVIANA precursora kullakajj 27 maraniwa, jupajj akham siwa: “Amigonakajajja, kawkjanakantï precursoranakajj munaski ukar sarasajj wali kusisitäpjjewa, experienciap istʼasajj jupanakjamaw Diosar serviñ munayäta... Ukampis ‘janjaw ukan yanaptʼañatakejj wakichtʼatäkti’ sasaw ajjsarirïta” sasa.

¿Jumajj Sylviana kullakjamarakit amuyta? ¿Kawkjantï Diosan Reinop yatiyirinakajj munaski uka cheqar sarañ munaraktati? ¿Kunapachas sarjjerista sasat lupʼiskta? Ukhamächejja, ¡chʼamachasiskakim! Waranq waranqa jilat kullakanakaw Jehová Diosan yanaptʼapampejj kunayman jan waltʼäwinak atipjas sarapjjäna. ¿Kunjamsa Jehová Diosajj jupanakar yanaptʼawayi? Ukatakejj Madagascar markar visittʼañäni, uka markajj aka oraqpachan pusïr jachʼa islawa.

Aka qhepa 10 maranakanjja, 70 jila yatiyirinaka, precursoranakaw 11 markanakat * uka markaru sarjjapjje (uka markajj África cheqankiwa). Ukanjja, jilaparte jaqenakajj Bibliar respetapjjewa. Uka pachpa markankir yatiyirinakatsa, waljaniw uka islarojj Diosan Reinopat yatiyañatak yanaptʼir sarapjje. Jichhajj mä qhawqhanit parltʼañäni.

JAN AJJSARTʼASAW SARAPJJÄNA

Perrine, Louis

Louis ukat Perrine uka chacha warmejj 30 jila maranïpjjewa. Jupanakajj Francia markatwa Madagascar markaru sarjjapjje. Walja maranakatpachaw yaqha markan Diosar jukʼamp serviñ munapjjäna, ukampis Perrine kullakajj ajjsarayasïnwa. Jupajj akham siwa: “Jan uñtʼat cheqaru sarañ ajjsarayasiyätwa. Familiaja, congregacionaja, utaj jaytañsa, suma uñtʼat lugaranak jaytañsa, kun lurañ yatitäpkayättï ukanak jaytañsa janiw munkayätti. Naya pachpat llakisiñaw sarañatakejj jarkʼitäna, ukanakar atipjañajänwa” sasa. Kullakajja, 2012 maranwa chʼamachtʼasisajj Louis esposopampi Madagascar markar sarjjapjjäna. ¿Kunjamakis jichhajj jikjjatasi? Jupajj akham siwa: “Qalltan kunjamänsa uk amtasajj akham siristwa: ‘Jehová Diosan yanaptʼap uñjañajj Jupar jukʼamp confiyañatakiw yanaptʼawayitu’”sasa. Louis esposopajj akham sarakiwa: “¡Madagascar markan nayrïr kuti Jesusan jiwatap amtapkta ukhajja, Bibliat yatichasipkta ukanakatjja, tunkaniw jutapjjäna!” sasa.

 Jan waltʼañanakan uñjasipkäna ukhajja, ¿kunas Madagascar markan serviskakiñatakejj yanaptʼäna? Diosaruw aguantaskakiñatakejj chʼama mayisipjjäna (Filip. 4:13). Louis jilatajj akham siwa: “Jehová Diosajja mayitanakajj istʼapjjetuwa, ‘sumankañapwa churapjjetu’. Jupar serviñajj kunja kusiskañasa ukanakar chuym uchañatakiw yanaptʼapjjetu. Francia markankir amigonakajasa, Internet toqe correonaka, cartanakwa chʼamañchtʼañatakejj qellqanipjjetäna, ukhamat aguantasipkakiñajataki” sasa (Filip. 4:6, 7; 2 Cor. 4:7).

Ukham aguantapjjatapatjja, Jehová Diosajj bendisïnwa. Jilatajj akham siwa: “Octubre, 2014 maranjja, Cristiano Matrimonionakan Bibliat Yatjjatapjjañapatak Escuelaruw * sarapjjta, Francia markaru. Uka escuelankañajj Diosan mä suma regalopänwa” sasa. Graduasjjasajja, jupanakajj Madagascar markaru wasitampi khitatäsajj wal kusisipjjäna.

“¡WAL KUSISIPJÄJJA!”

Nadine, Didier

Didier, Nadine uka chacha warmejja, 2010 maranwa Francia markat Madagascar markaru sarjjapjjäna. Ukhajj 50 jila maranëjjapjjänwa. Didier jilatajj akham siwa: “Wayn tawaqökasajj precursoratwa servipjjayäta, uka qhepatjja kimsa wawanëjjapjjayätwa. Jupanakajj jilsjjapjjäna ukhajja, yaqha markan Jehová Diosar jukʼamp serviñwa amtapjjta” sasa. Nadine kullakajj akham sarakiwa: “Jayar sarjjasajj janiw wawanakajampëjjati sasaw llakisiyäta, ukampis jupanakajj akham sapjjetänwa: ‘Yaqha markaru Jehová Diosar servir sarapjjätajja, ¡wal kusisipjäjja!’ sasa, ukaw sarañatakejj chʼamañchapjjetäna. Wawanakajat jayansa jakapkstjja, sapa kutiw jupanakampejj parltʼasipjjta, ukaw kusisiyapjjetu” sasa.

Jupanakatakejja, malgache aru yateqañajj wali chʼamänwa. “Janejjay 20 maranëjjapjjstejja” sasaw kullakajj lartʼasi. ¿Kunas jupanakar yanaptʼawayi? Nayraqatajja, francés aru parlir congregacionaruw sarapjjäna. Qhepatsti, uka markankir aru yateqañatak wakichtʼatäjjapjjatap amuyasisajja, malgache aru parlir congregacionaruw cambiasjjapjjäna. Kullakajj akham siwa: “Diosan arunakap yatiyas uñtʼapkta uka jaqenakat waljaniruw Bibliat yateqañajj gusti. Visittʼatajj wal yuspärapjjetu. Qalltanjja, janis ukajj cheqäkaspa ukham amuyayäta. Precursorat aka markan Jehová Diosar serviñajj walpun gustitu. Alwanakajja, ‘¡jichhürojj Diosan arunakap yatiyiriw sarä!’ sasaw kusisita sartasta” sasa.

Didier jilatajj malgache aru yateqaskäna ukat amtasajj larusiwa. Jupajj akham siwa: “Congregacionan tantachäwi saraykasajja, jilat kullakanakan arstʼapjjatap janiw akchʼas amuyirïkti. ‘Yuspära’ sañakwa yatiyäta. Mä kutejja, mä kullakarojj jisktʼar qhanañchatapatwa yuspärta, uka kullakan qhepapan qontʼatäsipkäna ukanakajja, ‘janiw walikiti’ sasaw amuyayanipjjetäna. Uk uñjasajja, ratukiw yaqha jilatar arstʼayta, amuyatajj jupaw cheqapar qhanañchpachäna” sasa.

TAQE CHUYMAW INVITTʼATAJJ SARÄNA

Thierry jilatampi Nadia esposapampejja, “Vayamos tras metas que honran a Dios” sat dramwa mä  jachʼa tantachäwin 2005 maran uñjapjjäna. Uka dramajj Timoteo waynatwa parläna, ukaw chuymanakapar purtʼäna. Ukhamatwa yatiyirinakajj munaski ukar sarañ wal munapjjäna. Jilatajj akham siwa: “Drama tukuyjjepan amparanak tʼajjllirkasaw esposajar akham jisktʼta: ‘¿Kawkirus sarañäni?’ sasa. Jupajja, ‘uka pachpwa lupʼiskarakiyäta’ sasaw sitäna” sasa. Mä jukʼa tiempotjja, amtanakap phoqañatakiw chʼamachasipjjäna. Kullakajj akham siwa: “¡Utjapkitäna ukanakjja, jukʼaptayapjjayätwa, pusi maletar mantkirikiw utj-jjapjjetäna!” sasa.

Chʼeqa toqena: Nadia ukat Marie-Madeleine; Kupi toqena: Thierry

Jupanakajj 2006 maranwa Madagascar markarojj puripjjäna, qalltatpachaw ukan kusisita Jehová Diosar servipjjäna. Kullakajj akham siwa: “Aka markanjja, waljaniw Diosar uñtʼañ munapjje, ukaw wal kusisiyapjjetu” sasa.

Ukampis sojjta maranak pasatatjja, uka chacha warmejj mä jan walinwa uñjasipjjäna. Kullakan Marie-Madeleine sat mamapaw Francia markan tinkusa amparap pʼakjasitayna, pʼeqepsa usuchjasitayna. Mamapan doctorapampi parltʼasajja, ¿janit nanakampi Madagascar markar sarjjañ munkasma? sasaw mamapar jisktʼapjjäna. Jupajj 80 maranïkchïnsa, taqe chuymaw invittʼatajj iyaw säna. ¿Kunjamakis Marie-Madeleine kullakajj yaqha markan jikjjatasi? Jupajj akham siwa: “Awisajj yatinoqtañajj chʼamakiwa, ukampis janis kʼumaräkstjja, congregacionan yanaptʼasajj kusisitätwa. Tollqajampi phuchajampejj aka markan Diosan arunakap yatiyasajj yanaptʼasipkakiwa, ukaw jukʼamp kusisiyitu” sasa.

“JEHOVÁ DIOSAN YANAPTʼAP QHAN UÑJTA”

Riana jilatajj tandroy arunwa mä discurso arstʼaski.

Riana jilatajj 22 maraniwa. Jupajj Alaotra Mangoro sat cheqanwa jilsuwayi ukajj Madagascar markat inti jalsu toqenkiwa. Niyakejjay colegion suma notanak apsuschïnjja, universidadar sarañ munäna. Ukampis Bibliat yatjjatasinjja, janiw ukham munjjänti. Jupajj akham siwa: “Colegion yateqañ jankʼak tukuyjjañatakiw wal chʼamachasiyäta. Jehová Diosarojj akham sistwa: ‘Examentï pasäjja, jankʼakiw precursorayäjja’” sasa. Jupajj graduasjjasajja, kuntï Jehová Diosar siskäna ukjja phoqänwa. Mä precursor jilatampiw Diosar jukʼamp serviñatak sarjjäna. Ukanjja, mä trabajo katusïna, janiw sapüru trabajiñapäkänti, ukatsti precursorat serviñwa qalltäna. Jupajj akham siwa: “Ukham amtatajajj wali askipuniwa” sasa.

Ukampis familiaranakapajja, kunatsa estudiañ jaytäna ukjja, janiw amuyirjamäpkänti. Jilatajj akham saskakiwa: “Awkijasa, tiojasa, awichajan sullka kullakapasa, universidadar sarañajatakiw wal chʼamañchapjjetäna. Ukampis nayajj janipuniw precursoräñ jaytañ munkayätti” sasa. Mä jukʼa tiempotjja, Riana jilatajj kawkjantï yatiyirinakajj munaski ukaruw servir sarañ munäna. ¿Kunas ukham amtañatakejj yanaptʼäna? Jupajj akham siwa: “Lunthatanakaw utar mantasin kunayman apasipjjatayna. Ukaw Jesusajj ‘kunatï valoranïki ukanak alajjpachar imkatapjjam’ siskäna uka arunakap amtayitu. Ukatwa kunatï jukʼamp valoranïki uk jikjjatañataki, mä arunjja, Diosar jukʼamp serviñataki chʼamachasta” sasa (Mat. 6:19, 20). Jupajj uka markat jukʼamp aynach toqeruw sarjjäna. Jakkäna ukhatjja, 1.300 kilometronak sarañankänwa, uka cheqajj sequiampi aynachtʼayatarakïnwa. Antandroy sat tribunkirinakaw jakasipjjäna. ¿Kunatsa ukar jakasir sarjjpachäna?

Lunthatanakajj utapar mantapkäna ukat mä phajjsi nayraw uka tribunkir pä chachanakar Bibliat yatichañ qalltäna, ukhamatwa uka jaqenakan arupa mä qhawqhanak yateqäna. ‘Uka kasta jaqenakat waljaniw Diosan Reinopat jan kuns yatipkiti’ sasaw jupajj lupʼïna. Jilatajj akham siwa: “Tandroy aru parlapki uka cheqar sarañatakejj Jehová Diosaruw yanaptʼa mayista” sasa.

Riana jilatajj uka cheqar sarjjäna ukjpachaw jan walin uñjasjjäna. Janiw trabajo jikjjatañ puedkänti. Mä chachajj akham sänwa: “¿Kunatsa akar jutta? ¡Trabajiñatakejj markamaruw akankir jaqenakajj sarapjje!” sasa. Pä semanatjja jilatajj uka cheqatjja, niya jan qollqeniw Kimsa Uru Jachʼa Tantachäwir saräna. Ukampis qhep qhepa urojja, mä jilataw Riana jilatan saco bolsillopar qollqe uchäna. Ukajj antandroy cheqaru kuttʼañatakisa, ukan yogur aljasin mä jiskʼa negocio qalltañatakis alcansänwa. Jilatajj akham siwa: “Jehová Diosan yanaptʼap qhan uñjta, jupaw sapa kuti yanaptʼitäna. ¡Khitinakatï Jehová Diosar jan uñtʼapkäna ukanakar yanaptʼaskakiyätwa!”  sasa. Congregacionansa, waljaw lurañanakajj utjaskäna. Jilatajj akham saskakiwa: “Sapa pä semanatwa congregacionan arstʼañajäna. Jehová Diosaw markap toqejj yatichaskitäna” sasa. Jichhajja, jilatajj tandroy aru parlir walja jaqenakaruw Diosan Reinopat yatiyaskaki.

‘CHEQPACH DIOSAW BENDISI’

Jehová Diosajj nayar serviñ munapkitu ukanakarojj bendisïwa sasaw arsuwayi (Isa. 65:16, NM). Cheqas Jupar Jukʼamp serviñatak kunatï jarkʼkistu ukanakar atipjañatak wal chʼamachastan ukhajja, cheqapuniw Diosan bendicionanakap katoqtanjja. Qalltan parlaniwayktan uka Sylviana kullakarojj ukaw pasäna. ‘Kawkjantï yatiyirinakajj munaski ukarojj janjakiw sarañ puedkiristti’ sasaw qalltan amuyäna. ¿Kunatsa ukham amuyäna? Jupajj siwa: “Chʼeqa kayujajj kupi kayujat sipan mä 9 centímetro jiskʼakiwa. Cojo sarnaqasajj jankʼakiw qarirïta” sasa.

Sylviana (chʼeqa), Sylvie Ann (kupi), Doratine tawaqojj bautisaskäna uka uru.

Ukampis 2014 maranjja, congregacionapankir Sylvie Ann sat tawaqo kullakampiw markapat 85 kilometronak jayankir mä jiskʼa markar sarjjapjjäna. Jan sarirjam amuyaskasasa, Sylviana kullakajj amtapjja phoqapunïnwa. ¿Kuna bendicionsa katoqäna? Jupajj akham siwa: “Mä marakiw ukan serviskayäta, Doratine sat mä tawaqo warmiruw Bibliat yatichta, jupajj jankʼakiw mä uru jachʼa tantachäwin bautisasïna” sasa.

“NAYARAKIW YANAPASKÄMA”

Uka jilat kullakanakan arunakaparjamajja, kunatï Diosar jukʼamp serviñat jarkʼkistu ukar atipjañatak chʼamachasisajja, jiwas pachpaw Jehová Diosan aka arunakapajj cheqäskapunitap uñjañäni, Jupajj akham sistuwa: “Nayaw chʼamañchaskäma, nayarakiw yanapaskäma” sasa (Isa. 41:10). Ukatsti jukʼampiw Diosar jakʼachasiñäni. Cheqas yaqha markaru, jan ukajj markas pachpan Diosar jukʼamp serviñataki taqe chuyma sartan ukhajja, machaq oraqen kunanaktï lurkañäni ukatakiw wakichtʼasisktanjja. Kunjamtï Didier jilatajj qhanañchkänjja, “¡kawkjantï yatiyirinakajj munaski ukan serviñajj jutïritakiw wakichtʼaskistu!” ¡Yanapajj munaski ukar walja jilat kullakanak sarapjjaspa ukajj walipunïspawa!

^ Párrafo 4 Uka markar saririnakajja, Alemania, Canadá, Estados Unidos, Francia, Guadalupe, Luxemburgo, Nueva Caledonia, Reino Unido, República Checa, Suecia, Suiza uka markanakatäpjjewa.

^ Párrafo 8 Uka escuelajj Diosan Reinopat Yatiyirinakataki Escuela sasin uñtʼatäjjewa. Yaqha markan Jehová Diosar precursorat servisipki, mayitanaksa phoqapkaraki, uka jilat kullakanakajj markap pachpar sarañatakiw mayipjjaspa, jan ukajj kuna artï parlapki uka arun utjki uka escuelar sarañatakiw mayipjjaspa.