Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 SARNAQÄWI

Cristor arkañ laykojj taqe kun jaytawayta

Cristor arkañ laykojj taqe kun jaytawayta

“Diosan arunakapa yatiyir saräta ukhajja, jan kuttʼanimti. Kuttʼanïtajj kayunakam pʼakiräma” sasaw tatajajj sitäna. Ukatwa utat sarjjañ amtayäta. Ukhaw Diosar serviñ laykojj taqe kun jaytanukuñ qalltawayta. Ukhajj 16 maranikïskayätwa.

KUNJAMÄNSA uk cuenttʼapjjäma. 29 de julio, 1929 maranwa nasta. Filipinas markankir Bulacán provincianwa jilsuwayta. Uka tiemponjja, Filipinas markajj qollqet pistʼatänwa, pobrekïpjjayätwa. Waynitöjjayäta ukhaw guerrajj qalltäna. Japón markankir ejercitopaw Filipinas markar mantanipjjäna, niyakejjay jaya cheqan jakasipjjchiyätjja, janiw sinti jan walinakan uñjasipkayätti. Janiw radiosa, televisionasa, ni periodicos utjapkitänti, ukatwa kunatï pasaski ukanak jaqenakan arupatak yatipjjerïta.

Nayajj kimsaqallqo wawanakat payïrïtwa. Kimsaqallqo maraniruw mamajan tatapampi mamapampejj jupanakampi jakir irpapjjetu. Catolicöpkchiyätsa abuelitojajj yaqha religionanakar istʼakiriwa, amigonakapajj churapjjerïki uka qellqatanaksa imasiriwa. Jupajja, Protección, Seguridad, Descubierta folletonakwa tagalo arut * uñachtʼayitäna, Bibliapas utjarakïnwa. Biblia liyiñajj wal gustitäna, yamas Mateo, Marcos, Lucas, Juan libronak liyiñajj walpun gustitäna. Ukaw Jesusat yateqasis sarnaqañatak yanaptʼitu (Juan 10:27).

JESUCRISTON KAYUP ARKAÑ YATEQTA

Japón markan ejercitopajj 1945 maranwa sarjjapjjäna. Ukhaw awk taykajajj utar kuttʼanjjam sapjjetäna, abuelitojas jupanakampi sarjjam sarakitänwa. Ukatwa awk taykajamp sarjjayäta.

Mä qhawqha tiempotjja, diciembre 1945 maranwa, Angat sat markat Testigonakajj markajan yatiyañataki jutapjjatayna. Utajarojj mä jilïr jilataw visittʼapjjetu, Bibliajj ‘qhepa urunakat’ kamsisa ukwa qhanañchtʼapjjetäna (2 Tim. 3:1-5). Ukatsti uka jakʼankir mä markan Bibliat yatjjatañataki tantachasipkäna ukaruw invittʼapjjetu. Awk taykajajj janiw sarapkänti, nayakiw sarayäta. Ukanjja mä pä tunkaniw tantachasipjjayäta. Yaqhepajj Bibliatwa jisktʼapjjarakïna.

Kuntï parlapkäna uk janiw taqpach amuyirïkti, ukatwa sarjjañ munayäta. Sarjjañampïskayäta  ukhamaruw cantañ qalltapjjäna. Ukajj wali sumapunïnwa, ukatwa quedasiyäta. Cantañ tukuyasajj oracionampiw tukuyapjjäna, ukatsti mä domingojj Angat markanwa tantachasiñäni sasaw invittʼasirakïna.

Ukar puriñatakejj 8 kilometronakwa sarapjjayäta, Cruz familian utapanwa mä 50 tantachasipjjayäta. Wawanakas Bibliat amuytʼañajj chʼamäki ukanaksa arstʼapjjarakïnwa, ukajj wal musparayitäna. Mä qhawqha tantachäwinak qhepatjja, Damian Santos jilïr jilataw ‘utajan aka arumajj qheparam’ sasin invittʼitäna. Jupajj precursoränwa, nayrajj alcaldetaynawa. Uka arumajj niya arum paqaraw Bibliat parlapjjta.

Biblian qallta yatichäwinakap yatjjatasajj waljaniw Diosar serviñ jankʼak qalltapjjayäta. Jukʼa tiempokiw tantachäwinakar sarasipkayäta ukhaw bautisasiñ munapjjtati sasin jisktʼapjjetäna. Nayajj “jïsa” sayätwa, Cristor arkañsa wal munayäta (Col. 3:24). Uka jakʼankir mä jawiranwa 15 de febrero urun, 1946 maran panini bautisasipjjta.

Bautisasjjasajja, Jesusjamaw yatiyir sarañasa sasaw amuyasipjjerïta. Ukajj janipuniw tatajar gustkänti. Akham sitänwa: “Diosan arunakap yatiyir sarañatakejj wali waynitüsktawa. Jawiran umar apantapktam ukajj janiw mä yatiyirir tukuyktamti” sasa. Diosaw Reinopat yatiyasiñap muni sasaw qhanañchayäta (Mat. 24:14). Akham sarakiyätwa: “Kuntï Diosar siskta ukampejj phoqañajawa” sasa. Ukhaw kunjamtï qalltan siskayäta ukham tatajajj utat alisnukutu. Jupajj janipuniw utat uta yatiyir sarañäj munkänti. Ukhaw Diosar serviñ laykojj nayrïr kuti taqe kun jaytanukta.

Ukhajj Cruz familiaw utapar katoqtʼapjjetäna. Nora sat sullka phuchapampiru nayampirojj precursoräñatakiw chʼamañchtʼapjjetäna. Panpachaniw 1 de noviembre, 1947 maran precursorat Diosar serviñ qalltapjjta. Norajj yaqha markaruw sarjjäna, nayasti Angat markanwa Diosan arunakap yatiyañ yanaptʼaskakiyäta.

MAYAMPWA TAQE KUN JAYTANUKTA

Kimsa maranak precursorat serviskayäta ukhaw Earl Stewart jilatajj sucursalat jutäna, Angat markankir jachʼa plazanwa 500 jila jaqenak nayraqatan mä discurso inglés arun arstʼäna. Tukuyarojj nayaw tagalo arun mä qhawqha arunakampi qhanañchtʼayäta. Paqallqo maranakakiw escuelar sarayäta, profesoranakajj inglés arutwa jilapartejj parlapjjetäna ukaw inglés yateqañatak yanaptʼitäna. Bibliat apstʼat qellqatanakasa jukʼakiw tagalo arun utjäna, ukatwa inglesat liyirïta, ukaw uka aru jukʼamp yateqañatak yanaptʼarakitäna. Ukhamatwa Stewart jilatan discursopsa, yaqha discursonaksa inglesat tagalo arur traduciyäta.

Stewart jilatan discursop tagalo arur jaqokipkayäta uka urojja, ‘sucursalajj Betelan yanaptʼañapatakiw maya, jan ukajj pani precursor jilatanakar thaqasipki’ sasaw jilatajj congregacionar yatiyäna. “Aumento de la Teocracia” sat jachʼa tantachäwiruw 1950 maran Nueva York (Estados Unidos) markar misioneronakajj sarapjjañapäna, ukatwa Betelan yanaptʼajj munasïna. Nayampir mä jilatampiruw invittʼapjjetäna, ukhaw ukan yanaptʼañatakejj mayampi taqe kun jaytarakta.

Betelan yanaptʼañjja, 19 de junio, 1950 maranwa qalltta. Betelajj nayra utänwa, jachʼarakïnwa, jachʼa arbolanakampi muytatarakïnwa, taqpach oraqejj mä hectareänwa. Ukanjja, mä 12 waynanakaw trabajipjjayäta. Alwajj cocinanwa yanaptʼayäta, niya 9 alwa horasarusti isinak planchiriw sararakirïta. Jaypʼunakajj niya ukhamanakwa lurarakirïta. Walja markanakat jachʼa tantachäwi utjkäna ukat misioneronakajj kuttʼanjjapkchïnsa, Betelan yanaptʼaskakiyätwa. Revistanak correor apayañatakiw wakichtʼayäta, revistanak sapa phajjsi katoqañatak qellqayasipki ukanakwa qellqayäta, visitanakar katoqaski ukansa yanaptʼarakiyätwa. Kun lurañtï mayipkitäna ukanwa yanaptʼayäta.

GALAAD ESCUELAR SARAÑATAKIW FILIPINAS MARKAT SARJJTA

Khä 1952 maranjja, Filipinas markat paqallqo jilatanakaruw Galaad Escuelar clase 20 ukar sarapjjañajätak invittʼapjjetäna, ukajj kusiskañapunïnwa. Kunanaktï Estados Unidos markan uñjapkayäta ukanakajja, jilapartejj wali musparkañänwa. Janiw ukanak jiskʼa markajan uñjirïkti.

Galaad Escuelar sarapkta ukanakampi.

 Estados Unidos markanjja, utan kun lurañatakis maquinanak utjkäna ukanaksa apnaqañ yateqapjjañajänwa. Uka markajj thayarakïnwa, mä alwajj caller mistta ukhajj janqʼokïnwa, ukhapuniw khunu uñjta. Wali thayapunïnwa.

Ukham jan walinakas utjkchïnjja, Galaad Escuelankañaw jukʼampi sumäna. Yatichirinakas wali sum yatichapjjäna. Ukanwa kunjamsa qellqatanak liytʼasajj sum yateqsna, kunjamsa sumpach yatjjatsna ukanak yatichapjjetäna. Uka escuelan yateqaniwaykta ukaw Diosar jukʼamp sum serviñatak yanaptʼawayitu.

Uka escuela tukuyasajja, Nueva York markankir Bronx cheqaruw mä qhawqha tiempotak precursor especialat khitapjjetäna. Ukhamatwa julio 1953 maran “Sociedad del Nuevo Mundo” sat jachʼa tantachäwir sarayäta. Uka tantachäwi tukuyarojja, Filipinas markaruw Diosar jukʼamp serviskakiñatak kuttʼanjjayäta.

SUM JAKASIÑWA JAYTANIWAYTA

Sucursal sarayiri jilatanakajj akham sapjjetänwa: “Jichhajj congregacionanak tumptʼiriw saräta” sasa. Ukajj Jesusan kayunakap jukʼamp jakʼat arkañatakiw yanaptʼitäna, jupajj Diosan ovejanakap uñjañatakejja, jiskʼa, jachʼa markanakaruw saräna (1 Ped. 2:21). Visitañajäkäna uka circuitojj wali jachʼänwa, Luzón marka chika taypinkänwa, ukajj Filipinas markan jukʼamp jachʼa islawa. Bulacán, Nueva Écija, Tarlac, Zambales provincianakaruw sarañajäna. Yaqhep markanakar puriñatakejja, Sierra Madre cheqankir wali saytʼat qollunakwa pasañajäna. Pasajeronak apiri autojj janiw utjkänti, ukatwa tronconak apiri camionanakampi apayasirïta. Tronconak pataruw sarirïta. Awisakiw apañ jan munapjjerïkituti. Cheqas ukham viajiñajj chʼamakïnwa.

Jilaparte congregacionanakajj machaqäsipkänwa, jiskʼanakakirakïnwa. Tantachäwinak sum sarayasiñapatak yanaptʼatajsa, yatiyir sarañataki yanaptʼatajsa jilatanakajj wal yuspärapjjäna.

Qhepatjja, Bicol cheqankir circuitoruw cambiapjjetäna, ukanjja jayanakankir jiskʼa gruponakaw jukʼamp utjäna. Testigonakajj jan utjkäna ukanakanjja, precursor especialanakaw utjäna. Mä kutejj alojaskayäta ukan bañopajj pä tablanakan ayjjatat mä pʼiyakïnwa. Taqjjatta ukhajja, alliranttawayjjänwa. Jayapuniw uka qʼañunak pichasta, uka qhepatwa juntʼum umasir saraskta.

Uka tiemponwa Norat mayampi piensjjayäta. Jupajj Bulacán markanwa precursoräñ qalltäna, uka tiempotakejj Dumaguete markanwa precursor especialäjjäna. Nayajj uka markar visitiriw sarta, qhepatsti cartanak qellqasipjjerïta. Ukat 1956 maranwa casarasipjjta. Casarasipkta uka nayrïr semanajja, Rapu Rapu islanwa mä congregacionar  visitapjjta. Congregacionanak visitañatakejj qollunakwa kayuki makatapjjañajäna. Esposajampi ukham jayanak sarañajj kusiskañänwa.

BETELAR KUTTʼAÑATAKIW INVITTʼAPJJETU

Niya pusi maraw congregacionanak visitasipkayäta, ukhaw Betelar sarjjañatak mä invitación katoqapjjta. Betelarojj enero 1960 maranwa puripjjta. Ukanjja walja lurañanakampi phoqeri jilatanakampi trabajisajj wal yateqawayta. Esposajajj kunantï yanaptʼajj munaski ukanwa yanaptʼiri.

Mä discurso arstʼaskta, uksti cebuano aruruw traducipjjäna.

Betelan yanaptʼasajj Filipinas markan kunjamsa Diosan markapajj jiltawayi ukwa uñjawayta. Solterökas Betelar jutkayäta ukhajja, Filipinas markan niya 10.000 jilat kullakanakakiw utjäna. Jichhajj 200.000 jilaw utj-jje. Betelitanakajj 435 ukhaniw Diosat yatiyañ yanaptʼasipkaraki.

Niyakejjay Diosan markapajj jukʼampi jiljjattaskchïnjja, Betel utajj jiskʼakëjjänwa. Ukatwa Oraqpachan Jilïr Irpirinakajj sucursal jachʼaptayañatak mä jachʼa oraqe thaqapjjam sapjjetäna. Ukatwa vecinonakach utap aljañ munaskpacha sasin imprenta sarayir jilatampejj utat uta jisktʼir sarapjjerïta. Janiw khitis aljañ munkänti. Yamas maynejj akham sapjjetänwa: “Chino jaqenakajj janiw aljapkti, antisas alapjjtwa” sasa.

Albert Schroeder jilatan discursop traduciskta.

Mä urojja, mä vecinow akham jisktʼapjjetäna: ‘¿Janit oraq alasiñ munapkta? Estados Unidos markar sarjjañatakiw oraq aljaskta’ sasa. Ukhamatwa wali chʼamjamäkäna ukanakajj phoqasiñ qalltawayi. Yaqha vecinojj oraqep aljañ munarakïnwa, jupaw mayni vecinonakarojj oraqep aljapjjañapatak chʼamañchtʼäna, “Chino jaqenakajj janiw aljapkti” siskäna ukas aljapjjetänwa. Jukʼa tiemponakwa sucursalajj pä ukchʼampi jiljjattäna. Jehová Diosaw ukhamäñap munpachäna.

Khä 1950 maranjja, Betelan nayaw taqet sipans sullkäyäta. Jichhajj nayampi esposajampiw taqet sipans jilïripjjta. Cristoru taqe cheqar arkatajat janipuniw arrepentiskti. Awk taykajajj utat jaqonukupkchitänsa, Jehová Diosaw mä suma familia churawayitu. Diosar servirejj kawkirus sarkchiñänejja, Jupajj yanaptʼapunistaniwa. Esposajampejja, Jehová Diosar taqe bendicionanakapat walpun yuspärapjjta. Jupajj kunja suma Diosasa uk ‘yantʼapjjañapatakiw’ taqenir chʼamañchtʼapjjta (Mal. 3:10).

Mä kutejja, impuestonak cobriri Mateo Leví sat chacharuw Jesusajj arkiripäñapatak jawsäna. ¿Mateojj kunsa lurpachäna? “Taqe kun jaytanukusaw jupar arkañ qalltäna” sasaw Bibliajj qhanañchi (Luc. 5:27, 28). Nayajj walja kutiw Cristor arkañ laykojj taqe kun jaytawayta, yaqhanakarus ukham lurapjjañapatakiw taqe chuyma chʼamañchtʼta, ukham lurasajj walja bendicionanakwa katoqapjjani.

Filipinas markan Diosan markapajj wal jiljjattaski, ukanwa kusisit yanaptʼaskta.

^ Párrafo 6 Uka folletonakajja, Jehová Diosan Testigonakapan luratawa, jichhajj janiw imprimisjjeti.