Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Kunjamsa “machaq jaqëñamp” wiñayatak isthapissna

Kunjamsa “machaq jaqëñamp” wiñayatak isthapissna

Diosajj churkistu uka machaq jaqëñamp isthapisipjjam(COL. 3:10).

CANCIÓN: 126, 28

1, 2. 1) ¿Kunatsa machaq jaqëñampejj isthapissnawa sasin sissna? 2) ¿Kunjam jaqëñatsa Colosenses 3:10-14 qellqatan parli?

‘MACHAQ jaqëña’ siski uka arojja, pä kutiw Machaq Mundon Jakirinakataki Diosan Arunakapa sat Biblian uñsti (Efe. 4:24; Col. 3:10). Uka arunakajja, “Diosan munañaparjam luratäki uka machaq jaqëñampi” isthapisiñatwa parli. ¿Uka machaq jaqëñampejj isthapissnati? Jïsa, Jehová Diosajj jupar uñtasitwa lurawayistu. Ukhamasti, Jupjam suma jaqerakïsnawa (Gén. 1:26, 27; Efe. 5:1).

2 Cheqas taqeniw juchjja Adanampit Evampit katoqawaytanjja, ukatwa jan walinak lurañajj chuymasan utji. Akapachanjja, jaqenakajj jan walinak lurañaruw chʼamañcharakistu. Ukampis Jehová Diosan yanaptʼapampejj kunjam jaqëñastï jupajj munki ukham jaqësnawa. Ukatakejj kunas yanaptʼistaspa ukwa aka yatichäwin yatjjataskañäni. Ukatakejja machaq jaqëñat Pablojj qellqkäna ukwa yatjjatañäni (Colosenses 3:10-14 liytʼañataki). Diosan  arunakap yatiykasas kunjamsa ukham jaqëtas uñachtʼaysna uksa yatjjatarakiñäniwa.

JANIPUN KHITIRUS YAQHACHAÑÄNITI

3. ¿Kunjamas machaq jaqëñampi isthapit jaqejja?

3 Machaq jaqëñampi isthapisipjjam sasinjja, jan khitirus yaqhachapjjamti sasaw Pablojj sarakïna. Colosenses 3:11 texton akham sänwa: “Janiw griegosa, judiosa utjkiti, janirakiw circuncidatäñasa, jan circuncidatäñasa, yaqha markatäñasa, escitäñasa, esclavöñasa, libre jaqëñas utjkiti” sasa. * Congregacionanjja janiw khitis yaqha markatätapatsa, yaqha color jañchinïtap laykusa, ni wali qollqenïtapatsa jachʼañchasiñapäkiti. ¿Kunatsa? Cheqpach cristianonakajj ‘mayakëjjtanwa’, mä arunjja mä wawakïtanwa (Gál. 3:28).

4. 1) ¿Kunjamsa Diosan servirinakapajj maynit maynikam uñjasipjjañapa? 2) ¿Kunas jilat kullakanakarojj mayachtʼatäpjjañapatak jarkʼaspa?

4 Machaq jaqëñampi isthapistan ukhajj taqenirus respetompiw uñjtanjja, janirakiw yaqha color jañchinïtapatsa ni jan qollqenïtap laykusa yaqhachktanti (Rom. 2:11). Yaqhep cheqanakanjja, jaqenakar ukham uñjañajj chʼamakiwa. Sañäni, nayra maranakanjja, Sudáfrica marka apnaqerejj kunjam jañchinïpkäntï ukarjamaw jaqenakar jaljäna. Janqʼo jañchininakajj yaqha cheqanwa jakapjjäna, chʼiyara jañchininakasti yaqha cheqanaraki. Testigonakat waljaniw ukham jakapjjaraki. Ukampis Oraqpachan Jilïr Irpirinakajj 2 Corintios 6:13 qellqatarjam sarnaqapjjañapatakiw chʼamañchtʼäna, uka qellqatan akham siwa: “Chuymanakamjja wali jachʼa jistʼarapjjam” sasa. Ukatwa jilat kullakanakan jukʼampi uñtʼasipjjañapatakejj octubre 2013 maran mä programa waktʼayapjjäna. ¿Kunsa jilat kullakanakajj lurapjjañapäna?

5, 6. 1) Mä markanjja, ¿kunjamsa mayachtʼatäpjjañapatakejj jilat kullakanakar yanaptʼasïna? (Página 22 ukankir fotonak uñjjattʼäta) 2) ¿Kunjamsa ukajj jilat kullakanakar yanaptʼawayi?

5 Oraqpachan Jilïr Irpirinakan ewjjaparjamajja, janqʼo jañchini jilat kullakanakampi chʼiyar jañchini jilat kullakanakampiw yaqhep seman tukuyanakajj tantachasipjjañapäna, yatiyiris juntuw sarapjjañapäna, utanakaparus visittʼasipjjañaparakïnwa. Walja congregacionanakaw ukham lurapjjäna. Sucursalajja, uka toqet parlir suma cartanakwa katoqäna, Diosar jan servir jaqenakas sum parlapjjarakïna. Religión pʼeqtʼiri mä jaqejj akham sänwa: “Janiw Testigökti, ukampis Diosan arunakap yatiyañatakejj wali suma waktʼayatäpjjtawa, mayachtʼatäpjjaraktawa” sasa. ¿Kunjamsa uka programajj jilat kullakanakar yanaptʼawayi?

6 Qalltanjja, xhosa aru parlir Noma sat kullakajj inglés aru parlir congregacionankir jilat kullakanakar invittʼañ ajjsarayasïnwa, kullakan utapajj janiw qamirinakan utapjamäkänti. Ukampis jupanakampi yatiyir sarasa, utanakapar visittʼasajja, akham sänwa: “¡Jupanakajj jiwasjam jaqekïpjjarakiwa!” sasa. Ukatwa inglés aru parlir congregacionat visittʼapkäna ukhajj mä qhawqhanir manqtʼasiñatak utapar invittʼäna. Jupanakat maynïrejj janqʼo jañchini jilïr irpirïnwa. Kullakajj akham siwa: “Uka jilatajj mä plastic jiskʼa cajonarus qontʼasikïnwa, ukaw wal musparayitäna” sasa. Uka jilat kullakanakajj jichhürkamas ukham katoqtʼasisipkakiwa. Ukham lurasajj jukʼamp amigonakanïpjjewa, yaqha color jañchini, jan ukajj yaqha costumbreni jilat kullakanakar uñtʼañatakis chʼamachasisipkakiwa.

SINTTʼASIÑAMPI SUMA CHUYMAMPI UÑJASIPJJAÑÄNI

7. ¿Kunatsa jaqe masisat sinttʼasiñasapuni?

7 Supayan apnaqata akapachanjja, trabajo jan utjipansa, jan wali usunak utjipansa, jan  waltʼayañatak arknaqatasa, lunthatanak utjipansa, jan ukajj yaqha ukham jan waltʼäwinak utjipansa tʼaqesikipuniñäniwa. Ukhamanak utjipanjja, taqe chuyma sinttʼasisaw maynit maynikam yanaptʼasiñasa. Suma chuymampi mayninakar uñjañatakejj sinttʼasirïñaw yanaptʼistani (Efe. 4:32). Ukham jaqëñaw Diosjam sinttʼasirïñatakisa, jaqe masisar chuymachtʼañatakis yanaptʼistani (2 Cor. 1:3, 4).

8. Congregacionantï sinttʼasiñampi suma chuymampi taqenir uñjañäni ukhajja, ¿kunjamsa yaqhanakar yanaptʼañäni? Uk mä experienciampi qhanañchtʼma.

8 Congregacionasan inas yaqha markat jutirinakasa, jukʼa utjirini jilat kullakanakas utjchi. ¿Kunjamsa jupanakar suma chuymampi uñjsna? Amigopäñasawa, congregacionan qhawqsa yanaptʼasipki uksa sañasarakiwa (1 Cor. 12:22, 25). Uka toqet amuytʼañatakejj Dannykarl jilatat parltʼañäni, jupajj Filipinas markatwa Japón markar jakasir saräna. Trabajopanjja, janiw uka markankirinakarjam sum uñjapkänti. Ukampis mä kutejja, Testigonakan tantachäwiparuw saräna, jupajj akham siwa: “Uka tantachäwinjja niya taqenis Japón markatäpkchïnjja, wali munasiñampiw katoqtʼapjjetäna, jaya maranakas uñtʼasipkirista ukhamänwa” sasa. Jilat kullakanakajj suma chuymampiw jupar uñjasipkakïna, ukaw Diosan amigopäñatakejj yanaptʼäna. Qhepatjja bautisasjjänwa, jichhajj jilïr irpirëjjewa. Congregacionapankir jilïr irpirinakajj jilatat akham sapjjewa: “Jilatasa Jennifer esposapasa, walpun congregacionan yanaptʼasipki, jupanakajj precursoräpjjewa, kunatï wakiski ukampikiw jakasipjjaraki. Diosan Reinop thaqañanjja wali yateqaskayäpjjewa” sasa (Luc. 12:31).

9, 10. Sinttʼasirïpjjatap laykojja, ¿kuna bendicionanaksa yaqhep jilat kullakanakajj katoqawayapjje?

9 Diosan arunakap yatiyasaw ‘taqenir yanaptʼtanjja’ (Gál. 6:10). Jehová Diosan Testigonakapat waljanejja, yaqha markat jutirinakar yanaptʼañatakiw yaqha aru parlañ yateqapjje (1 Cor. 9:23). Ukham lurasajj walja jaqenakaruw yanaptʼapjje. Sañäni, Australia markankir Tiffany sat precursora kullakajja, Brisbane markan suajili aru parlapki uka congregacionanwa yanaptʼañ munäna. Ukatsti uka aru parlañwa yateqäna. Yateqañajj jupatak wali chʼamäkchïnsa, kusisitaw Diosan arunakap yatiyaski. Kullakajj akham siwa: “Jumatï Diosan arunakap kusisit yatiyañ munstajja, yaqha aru parlir congregacionaruw yanaptʼir sarasma. Ukham lurañajj yaqha markarus sarkasma ukhamawa. Testigonakajj kunjamsa oraqpachan mä wawaki jakasipjje uksa amuyarakïtawa” sasa.

¿Kunatsa cristianonakajj yaqha markat jutirinakar yanaptʼtanjja? (Párrafo 10).

10 Jichhajj Japón markankir mä familiat parltʼañäni. Sakiko sat phuchapajj akham siwa: “1990 maranakanjja, Brasilat jutir walja jaqenakampiw yatiykasajj jikisipjjerïta. Bibliapat  Apocalipsis 21:3, 4; Salmo 37:10, 11, 29 textonak portugués arut liytʼarapipjjerïta ukhajj sum istʼapjjeri, jachaqtʼasipjjarakiriwa” sasa. Uka familiajja, jaqenakat sinttʼasisaw uka aru parlañ yateqapjjäna. Sakikojj saskakiwa: “Jaqenakajj Diosar wal uñtʼañ munapjjäna, uk uñjasajj portugués aru yateqañwa amtapjjta” sasa. Tiempompejja, uka familiajj portugués arun mä congregación utjañapatakiw yanaptʼapjjäna. Qhepa maranakansa, yaqha markat jutir walja jaqenakaruw Diosar servipjjañapatak yanaptʼapjjäna. Sakikojj akham siwa: “Yaqha aru parlañ yateqañatakejj walpun chʼamachasipjjayäta, ukham lurapjjatajatjja walja bendicionanak katoqapjjta, ukatwa Jehová Diosar wal yuspärapjjta” sasa (Hechos 10:34, 35 liytʼañataki).

‘HUMILDE CHUYMANÏÑAMPI ISTHAPISIPJJAÑÄNI’

11, 12. 1) ¿Kuna amtampis machaq jaqëñampi isthapisiñasa? 2) ¿Kunas humilde jaqëskakiñatak yanaptʼistani?

11 Janiw jachʼañchayasiñ laykukejj machaq jaqëñampi isthapisiñasäkiti, jan ukasti Jehová Diosar jachʼañchañatakiw ukham lurañasa. Mä angelajj perfectökasaw jachʼa jachʼa tukusin juchar purïna, uk janipun armañäniti (Ezequiel 28:17 uñjjattʼarakïta). Jiwasatakejj humilde chuymanïñajj jukʼamp chʼamäspawa. Ukhamäkchisa, ‘humilde chuymanïñampiw isthapisiñasa’. ¿Kunas ukatakejj yanaptʼistaspa?

12 Biblia liyiñatakisa kuntï liyktan ukanakat lupʼiñatakisa, tiempo apstʼasiñasapuniwa (Deu. 17:18-20). Humilde chuymanïñatakejja, kuntï Jesusajj yatichkäna ukanakatwa lupʼiñasa, kunja humilde chuymanïnsa ukanakatsa lupʼiñasarakiwa (Mat. 20:28). Humilde jaqëtapatwa apostolonakan kayunakap jareqäna (Juan 13:12-17). Maysa toqetjja, espíritu santo churita sasaw Diosarojj sapa kuti mayisiñasaraki, ukaw jan jachʼa jachʼa tukuñatak yanaptʼistani (Gál. 6:3, 4; Fili. 2:3).

13. ¿Kuna bendicionanaksa humilde chuymanïsajj katoqañäni?

13 (Proverbios 22:4 liytʼañataki). Jehová Diosajja, servirinakapajj taqeni humilde chuymanïpjjaspa ukwa muni. Ukham chuymanïsajj walja bendicionanakwa katoqañäni. Sañäni, congregacionan chʼajjwañanak jan utjañapatakisa, tʼaqa tʼaqa jan sarnaqañatakis yanaptʼañäniwa. Jehová Diosas ‘wal khuyaptʼayasistani’. Apóstol Pedrojj akham sänwa: “Taqenisa maynit maynikam humilde chuymampi uñjasipjjam. Jachʼa jachʼa tukuñarojj Diosajj uñisiwa, humilde chuymaninakatjja jupajj wal khuyapayasi” sasa (1 Ped. 5:5).

“LLAMPʼU CHUYMANÏÑAMPI, PACIENCIA CHUYMANÏÑAMPI” ISTHAPISIPJJAÑÄNI

14. ¿Khititsa llampʼu chuymanïñatakisa paciencianïñatakis yateqassna?

14 Jichhürunakanjja, llampʼu chuymaninakasa pacienciani jaqenakasa, ajjsaririt uñtʼatäpjjewa. Ukampis janiw ukhamäpkiti. Antisas taqe chʼamani Jehová Diosan yanaptʼataw maynejj ukham suma jaqer tukuspa. Jehová Diosajj llampʼu chuymaniwa wali paciencianirakiwa, Jupatwa ukham jaqëñatakejj yateqasiñasa (2 Ped. 3:9). Jupajja, Abrahanan jisktʼanakaparusa Lot chachan jisktʼanakaparus wali pacienciampiw angelanakap toqe qhanañchäna (Gén. 18:22-33; 19:18-21). Jan istʼasiri Israel markankir jaqenakarus 1.500 maranakaw wali pacienciampi aguantarakïna (Eze. 33:11).

15. ¿Kunsa Jesusat yateqassna?

15 Jesusajj wali ‘llampʼu chuymanïnwa’ (Mat. 11:29). Discipulonakapajj pantjasir jaqenakäpchïnsa, pacienciampiw uñjäna. Aka oraqenkaskäna ukhajja, religión pʼeqtʼirinakajj jan walinaksa jupat parlapchïnjja, ina chʼusatsa juchañchapkchïnjja, Jesusajj aguantänwa. Jiwañapkamaw llampʼu chuymampi, pacienciampi aguantawayi. Tʼaqesiñ lawan tʼaqesiskäna ukhajja, jiwayañ munapkäna ukanakar  perdonañapatakiw Jehová Diosar mayïna, “kuntï lurapki ukjja janiw yatipkiti” sasa (Luc. 23:34). Jesusarojj tʼaqesiyapkchïnsa, pacienciampi llampʼu chuymampiw aguantäna. Jupajj wali yateqaskayapuniwa (1 Pedro 2:21-23 liytʼañataki).

16. ¿Kunjamsa llampʼu chuymanïtassa paciencianïtassa uñachtʼaysna?

16 Llampʼu chuymanïtassa paciencianïtassa, jaqe masisar perdonasaw uñachtʼaysna. Pablojj cristianonakar akham sänwa: “Jumanak taypin kuna quejasiñas utjchi ukhasa, maynit maynikam aguantasisipkakim, jumanakkamajj taqe chuyma perdonasipjjarakim. Kunjamtï Jehová Diosajj taqe chuyma perdonapktamjja, ukhamarak jumanakajj perdonasipjjam” sasa (Col. 3:13). Uka arunakarjam sarnaqañatakejja, llampʼu chuymanïñasawa paciencianïñasarakiwa. Ukhamatwa jilat kullakanakan mayachtʼatäpjjañapatak yanaptʼañäni.

17. ¿Kunatsa llampʼu chuymanïñasa paciencianïñas wali wakiskirejja?

17 Jehová Diosajja, “llampʼu chuymanïñampi, paciencia chuymanïñampi” isthapisipjjam sasaw ewjjtʼistu. Paraison jakasiñ munstanjja, ukham jaqëñatakiw chʼamachasiñasa (Mat. 5:5; Sant. 1:21). Ukhamtï lurañänejja, Jehová Diosaruw jachʼañchañäni, jaqe masisarus Biblian ewjjanakaparjam sarnaqapjjañapatakiw yanaptʼarakiñäni (Gál. 6:1; 2 Tim. 2:24, 25).

MUNASIRÏÑASAWA

18. ¿Kunjamsa munasiñajj jaqe masisar jan yaqhachañatak yanaptʼistaspa?

18 Yateqaniwayktan ukham suma jaqëñatakejj munasirïñaw yanaptʼistani. Amuytʼañataki, discípulo Santiagojja, qamirinakaruk sum uñjapjjatapatwa jilatanakapar cheqañchäna. “Jaqe masimarojj juma kikparjam munasiñamawa” siski uka mayitwa pʼakintasipktajja sasaw säna. Ukjjarojj akham sarakïnwa: “Jumanakatï mayninakar jachʼañchapjjsta, yaqhanakarojj jiskʼachapjjaraksta ukhajja, juchwa lurasipktajja” sasa (Sant. 2:8, 9). Jaqe masisarutï munasstanjja, janiw jukʼa yatiñanïtapatsa, yaqha color jañchinïtap laykusa, pisin jakasirïtap laykusa jiskʼachañasäkiti, janirakiw khitirus yaqhachañasäkiti. Janiw munasirjam aleqak tukuñasäkiti, jan ukasti munasiñajj chuymasanwa utjañapa.

19. ¿Kunatsa munasir jaqëñajj wali wakiskiri?

19 “Munasir jaqejj paciencianiwa, khuyapayasiriwa [...], janiw wali wal tukurïkiti” (1 Cor. 13:4). Ukhamasti, Diosan Reinopat yatiyaskakiñatakejj pacienciani, suma chuymani, humilde chuymani ukhamäñasawa (Mat. 28:19). Ukham jaqëñaw congregacionan taqenimpi sum apasiñatak yanaptʼistani. Munasirïñatak taqeni chʼamachasiñäni ukhajja, congregacionajj jukʼampi mayachtʼatäniwa, Jehová Diosarus jachʼañcharakiñäniwa. Jaqenakas Diosan cheqa yatichäwinakapat yatjjatañ munapjjarakiniwa. Biblianjja ukatwa “machaq jaqëñampi” isthapisipjjam sasajj “taqe ukanakat sipansa munasiñamp isthapisipjjam, munasiñajj wali sum mayachthapi” sasin tukuyi (Col. 3:14).

“AMUYUNAKAM MACHAQAR TUKUYASIPKAKIM”

20. 1) ¿Kunsa taqenis jisktʼasiñasa? 2) ¿Kunatsa ukham jisktʼasiñasa? 3) ¿Kunsa taqenis suytanjja?

20 Taqeniw akham jisktʼasiñasa: “¿Kunjamatsa nayra jakäwij wiñayatak apanukurista?” sasa. Jehová Diosaruw yanaptʼa mayiñasa. Jan wali amuyunak apanukuñatakisa, jan wali luräwinak apanukuñatakis chʼamachasiñasawa, ukhamatakwa Diosan Reinopar mantañäni (Gál. 5:19-21). Akham sasaw jisktʼasiñasaraki: “¿Diosatakjam sarnaqañatakejj sapürutjamat jan wali amuyunak apanukusktjja?” sasa. Pantjasirïtas laykojja, “machaq jaqëñampi” isthapisiñatakejj chʼamachasiskakiñasawa (Efe. 4:23, 24). Ukampis machaq jaqëñampi wiñayatak isthapitäjjañäni, taqenis perfectöjjañäni ukhajj sumaw jakasjjañäni.

^ Párrafo 3 Biblia qellqaskäna uka tiemponjja, “escitanakajj” janiw kunjamtï jaqenakajj markanakan jakasipki ukham jakapjjerïkänti, ukatwa yaqhachatäpjjäna.