Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 15 YATICHÄWI

Jesusat yateqasiñajja, chuymasan sumankañ utjañapatakiw yanaptʼistu

Jesusat yateqasiñajja, chuymasan sumankañ utjañapatakiw yanaptʼistu

“Diosaw sumankañapjja churapjjätam, uka sumankañapasti jaqenakajj kuntï amuyki ukat sipansa jukʼampiwa” (FILIP. 4:7).

CANCIÓN 113 Sumankapjjapuniñäni

¿KUNANAKATSA YATJJATASKAÑÄNI? *

1, 2. ¿Kunatsa Jesusajj wali llakit uñjasïna?

JIWAYATÄÑAPÄKÄNA uka urojja, Jesusajj wali llakitaw uñjasïna. Enemigonakapan wali tʼaqesiyat jiwayatäñapatakejj mä qhawqha horanakakiw faltjjäna. Niyakejjay Awkipar wal munaschïnjja, janipuniw chuymap ustʼayañ munkänti. Ukham jan walinakan Diosat jan jitheqtatapajja, Diosan sutip qʼomachasiñapataki, jaqenakajj wiñay jakañ katoqapjjañapatakiw yanaptʼañapäna.

2 Jesusajj ukhamansa uñjaskchïnjja, sumakiw chuymapan jikjjatasïna. Mä qhawqha horanak nayrajja, “sumankañajwa churapjjsma” sasaw apostolonakapar säna (Juan 14:27). ‘Diosan sumankañapaw’ jupampïskäna, mä arunjja, Jehová Diosampi sum apasir mä jaqejj kunjamatï chuymapan sumak jikjjataskejja, ukhamarakiw Jesusajj chuymapansa amuyupansa sumak jikjjatasïna (Filip. 4:6, 7).

3. ¿Kunsa aka yatichäwin yatjjatañäni?

3 Jan walinakansa uñjaskchiñänejja, janiw khitis Jesusjamajj wali llakit uñjaskañäniti (Mat. 16:24, 25; Juan 15:20). Ukampis llakit uñjasiñäni ukhajja, ¿kunas jan sint llakisiñatak yanaptʼistani? Ukatakejja, Jesusajj aka oraqenkkäna ukhajj kunsa luräna, jan walinakan uñjaskañäni ukhajj kunsa jupat yateqasisin lursna ukwa kimsa toqet yatjjatañäni.

JESUSAJJ ORACIÓN LURAPUNIRÏNWA

Oración lurañajj chuymasan sumankañ utjañapatakiw yanaptʼistu. (Párrafos 4-7).

4. Kuntï 1 Tesalonicenses 5:17 textojj siski ukarjamajja, ¿kunatsa Jesusajj jiwayatäñapäkäna uka urojj walja kutiw oración luräna sasin sissna?

4 (1 Tesalonicenses 5:17 liytʼañataki). Jiwayatäñapäkäna  uka urojja, Jesusajj walja kutiw oración luräna. Sañäni, jiwatapajj kunjamsa amtasiñapa uk uttʼaykäna ukhajja, discipulonakapar tʼantʼa janïr pasaykasasa vino janïr pasaykasasa, mä oracionwa luräna (1 Cor. 11:23-25). Pascua amtapkäna uka cheqat sarjjañatakisa, mä oracionwa discipulonakapamp luräna (Juan 17:1-26). Getsemaní lugarar puripjjäna ukhasti, walja kutiw Jesusajj oración luräna (Mat. 26:36-39, 42, 44). Janïr jiwkasin kuntï siskäna ukas mä oracionänwa (Luc. 23:46). Ukhamajj jiwayatäñapäkäna uka urojja, taqe kunwa Jesusajj oracionan Diosar yatiyäna.

5. ¿Kunatsa apostolonakajj yantʼat uñjasipkäna ukhajj ajjsarayasipjjäna?

5 Jesusajj walja kutiw Awkipar yanaptʼa mayisïna, ukaw aguantañatak yanaptʼäna. Ukampis uka arumajja, apostolonakajj janiw ukham lurapkänti, ukatwa yantʼat uñjasisajj ajjsarayasipjjäna (Mat. 26:40, 41, 43, 45, 56). ¿Kunsa ukat yateqsna? Diosat jan jitheqtañatakejja, Jesusjamarakiw oración jan jaytas lurañasa. Ukampis ¿kunsa mayisiñasa?

6. ¿Kunjamsa Diosar confiyañajj chuymasan sumankañ utjañapatak yanaptʼistani?

6 ‘Jumar jukʼamp confiyañ yanaptʼita’ sasaw Jehová Diosar mayisiñasa (Luc. 17:5; Juan 14:1). Jesusan taqe arkirinakapaw yantʼat uñjasiñäni, ukatwa ukham mayisiñasa (Luc. 22:31). Jan waltʼäwinakajj may may utjani ukhaw Diosar confiyañajj chuymasan sumankañ utjañapatak yanaptʼistani, ¿kunatsa? Mä jan waltʼäwi jan askichirjamäjjañäni ukhajja, Diosar confiyasaw uka jan  waltʼäw amparapar katuyjjañäni. “Diosakiw uka jan waltʼäw nayat sipansa jukʼamp sum askichaspa” sasin confiyañajja, chuymasansa amuyusansa sumankañ utjañapatakiw yanaptʼistani (1 Ped. 5:6, 7).

7. Kuntï Robert jilatajj siski ukatjja, ¿kunsa yateqsna?

7 Kunayman jan walinakansa uñjaskchiñänejja, Diosar mayisiñaw chuymasan sumankañ utjañapatak yanaptʼistani. Diosar taqe chuyma serviri Robert sat jilïr irpirit parltʼañäni, jupajj 80 maranëjjewa. Jilatajj akham siwa: “Filipenses 4:6, 7 textow kunayman jan waltʼäwinakar saykatañatak yanaptʼawayitu. Awisajj jan qollqeniw uñjasirïta, mä tiempos janiw jilïr irpirit sirvjjayätti” sasa. ¿Kunas jilatarojj jan sint llakisiñatak yanaptʼäna? Jupajj saskakiwa: “Llakista ukhajj jankʼakiw Diosar mayista. Cheqas Diosar taqe chuyma walja kut mayista ukhajja, jukʼamp sumaw chuymajan jikjjatasta” sasa.

JESUSAJJ TAQE CHUYMAW YATIYÄNA

Diosan arunakap yatiyañajj chuymasan sumankañ utjañapatakiw yanaptʼistu. (Párrafos 8-10).

8. Juan 8:29 qellqatarjamajja, ¿kunas Jesusarojj jan sint llakisiñatak yanaptʼarakïna?

8 (Juan 8:29 liytʼañataki). Jesusajj arknaqat uñjaskasas janiw sint llakiskänti, ¿kunatsa? Uka jan waltʼäwir saykatasajj Awkiparuw kusisiyaskäna, ukwa Jesusajj yatïna. Sinti jan walinakan uñjaskasas Diosar istʼapunirïnwa. Niyakejjay Awkipar wal munaschïnjja, Jupar serviñaw jakäwipan nayrankäna. Janïr aka oraqer jutkasajja, Jesusajj taqe kun lurañwa Awkipar yanaptʼäna (Prov. 8:30, NM). Aka oraqenkkäna ukhasti, taqe chuymaw Awkipat kunatï cheqäki uk  yatiyäna (Mat. 6:9; Juan 5:17). Ukaw jupar wal kusisiyäna (Juan 4:34-36).

9. Diosan arunakap jan tiempon yatiyañajja, ¿kunjamsa chuymasan sumak jikjjatasiñatak yanaptʼistu?

9 Jehová Diosar istʼañasapuniwa, Jupar ‘serviñansa wal trabajiñasaraki’, ukwa Jesusat yateqassna (1 Cor. 15:58). ‘Diosan arunakap jan tiempon yatiyktan’ ukhajja, janiw jan waltʼäwinakasat sint llakisjjtanti (Hech. 18:5). Jaqenakajj jiwasat sipansa jukʼamp jan walinakanwa uñjasipjje. Ukampis Diosar munasiña, arunakaparjam sarnaqañ yateqapjje ukhajja, sum jakasjjasajj jukʼamp kusisitäpjjewa. Uk uñjañajja, “Diosajj ukhamarakiw nayar cuiditani” sasin jukʼamp confiyañatakiw yanaptʼistu. Ukaw chuymasan sumak jikjjatasiñatak yanaptʼarakistu. Janis kunatak sirvkaspa ukham nayratpach amuyasir mä kullakajj akham siwa: “Diosan arunakap jan tiemponi yatiyañajja, jan sint llakisiñatakiw yanaptʼitu, kusisitäñatakis yanaptʼarakituwa. Yatiykta ukhajja, Diosan jakʼapankkiristsa ukhamwa amuyasta” sasa.

10. Kuntï Brenda kullakajj siski ukatjja, ¿kunsa yateqsna?

10 Brenda sat mä kullakat parltʼarakiñäni. Jupasa imill wawapasa, jan qollañjama esclerosis múltiple sat usunïpjjewa. Kullakajj silla de ruedas ukampikiw sarnaqasi. Ukhamäsajj awisakiw yatiyirejj utat uta sari, jilapartejj cartanak qellqasaw yatiyi. Jupajj akham siwa: “Janiw akapachan qollaskäti, uk yatiñajj usujat jan sint llakisis jukʼamp yatiyañatakiw yanaptʼitäna. Cheqas predicañajj jan naya pachpat llakisiñatakiw yanaptʼitu. Yatiykta uka jaqenakar jukʼamp yanaptʼañataki, kuna bendicionanaktï jutïrin katoqkañäni uk sapa kuti amtañatakiw yanaptʼarakitu” sasa.

JESUSAJJ AMIGONAKAPAMPIW YANAPTʼAYASÏNA

Amigonakasajj chuymasan sumankañ utjañapatakiw yanaptʼapjjestu. (Párrafos 11-15).

11-13. 1) Apostolonakasa Jesusan yaqha discipulonakapasa, ¿kunjamsa cheqpach amigonakäpjjatap uñachtʼayapjjäna? 2) ¿Kunjam jikjjatasiñatakis amigonakapajj Jesusar yanaptʼapjjpachäna?

11 Diosan arunakap yatiykasajja, Jesusajj kunayman jan walinakanwa uñjasïna. Ukhaman uñjaskäna ukhajja, jupat jan jitheqtir apostolonakapaw mä cheqpach amigor uñtasit yanaptʼapjjäna. Ukham amigonakatjja, Proverbios 18:24 textojj akham siwa: “Mä amigow utji jilat sipansa jukʼamp suma” sasa. Jesusajj uka amigonakapar wal munasïna. Uka tiemponjja, janiw mä jilapas jupar creykänti (Juan 7:3-5). Familiaranakapasa, “loqheratawa” sasaw mä kutejj sapjjäna (Mar. 3:21). Apostolonakapajj janiw ukhamäpkänti, ukatwa jiwayatäñapäkäna uka nayrajj jupanakar akham säna: “Jumanakajj nayamp chikapuniw sarnaqapjjtajja, yantʼanakan uñjaskta ukhasa, janirakiw jaytapkistati” sasa (Luc. 22:28).

12 Apostolonakajj awisajj pantjasipkchïnsa, qhawqsa jupar confiyapjjäna ukaw Jesusatakejj jukʼamp wakiskirïna (Mat. 26:40; Mar. 10:13, 14; Juan 6:66-69). Ukatwa niya jiwayatäñapäkäna ukhajj jupanakar akham säna: “Nayajj taqe kunanaktï Awkijat istʼkta ukanakwa jumanakar yatiyapjjsma, ukatwa amigonaka sasin jumanakar sapjjsma” sasa (Juan 15:15). Cheqas amigonakapajj walpun Jesusar chʼamañchtʼapjjpachäna, yanaptʼapkäna ukas wal kusisiypachäna (Luc. 10:17, 21).

13 Janiw apostolonakakejj Jesusan amigopäpkänti, yaqha amigonakapasa amiganakapas utjarakïnwa. Jupanakaw yatiyañansa yaqha ukhamanakansa yanaptʼapjjäna. Yaqhepajj utaparuw manqtʼasiñatak invittʼapjjäna (Luc. 10:38-42; Juan 12:1, 2). Yaqhepasti, jupamp chikaw viajipjjäna, kunatï jupanakan  utjkäna ukampis yanaptʼapjjarakïnwa (Luc. 8:3). ¿Kunatsa Jesusajj ukham suma amigonakanïna? Jupaw mayninakan amigopäñatak nayraqat chʼamachasïna, yanaptʼañatakis jankʼakïnwa, janirakiw jan lurirjamäpkäna uks maykänti. Jesusajj jan pantjasirïkchïnsa, yanaptʼapjjatapat wal amigonakapar yuspäräna. Uka amigonakapajja, walpun Jesusarojj chuymapan sum jikjjatasiñatak yanaptʼapjjpachäna.

14, 15. 1) ¿Kunsa suma amigonakanïñatakejj lurañasa? 2) ¿Kunjamsa amigonakasajj yanaptʼapjjestani?

14 Suma amigonakajj Diosat jan jitheqtañatakiw yanaptʼapjjestani. Ukham amigonakanïñatakejja, jiwasaw mayninakan amigopäñatak nayraqat chʼamachasiñasa (Mat. 7:12). Biblianjja, khitinakatï yanaptʼa munapki ukanakar tiemposampi chʼamasampi yanaptʼañatakiw chʼamañchtʼistu (Efes. 4:28). ¿Yanaptʼa munir jilat kullakanakajj congregacionasan utjiti? Inas maynejj usutätap layku, jan ukajj jilïrëjjatap laykojj utat jan mistuñ puedjjchiti, ¿janit juparojj kun altʼañampis yanaptʼksna? Jan ukajj pisin jakasiri mä familiarojja, ¿janit mä kutis manqʼañamp yanaptʼksna? Internetan jw.org® cheqar mantañsa, jan ukajj JW Library® sat aplicación apnaqañsa yatstan ukhajja, ukar mantañ yateqapjjañapatakiw mä qhawqhanir yanaptʼaraksna. Jiwasatï yaqhanakar yanaptʼañatak chʼamachasiñäni ukhajja, kusisitaw jakasiñäni (Hech. 20:35).

15 Amigonakasajj jan walinakan uñjaskañäni ukhaw chʼamañchtʼapjjestani, chuymasan sum jikjjatasiñatakis yanaptʼapjjarakistani. Kunjamtï Eliú chachajj Job chachar sum  istʼkänjja, ukhamarakiw amigonakasajj jan walin uñjaskañäni ukhajj istʼapjjestani (Job 32:4). Cheqas janiw kunsa lurañäni uk jiwas lanti amtapjjañap suyañasäkiti. Ukampis Bibliarjam ewjjtʼanakap sum istʼañasawa, ukhamatwa yatiñanïtas uñachtʼayañäni (Prov. 15:22). Yanaptʼa munañäni ukhasti, David reyjamarakiw amigonakasan yanaptʼap humilde chuymamp katoqasiñasa (2 Sam. 17:27-29). Ukham yanaptʼasir amigonakajj Diosan mä suma regalopawa (Sant. 1:17).

CHUYMASAN SUMANKAÑ UTJAÑAPATAKEJJA, ¿KUNAS YANAPTʼISTANI?

16. Filipenses 4:6, 7 qellqatarjamajja, ¿khiti taypikis sumankañ katoqsna?

16 (Filipenses 4:6, 7 liytʼañataki). Nayajj churkta uka sumankañ “Cristo Jesús” taypiw katoqapjjasma sasajja, ¿kunatsa Jehová Diosajj sispachïstu? Chuymasansa amuyusansa sumankañ utjañapatakejja, Jesusajj kunjamsa Diosan amtanakap phoqasiñapatakejj yanaptʼaski uk sum amuyañasawa, taqe chuymaw ukar confiyañasaraki. Sañäni, Diosajj kunjamsa Jesusan jiwatapjjarojj juchanakas perdonistu uk yatiñajj wal chuymachtʼistu (1 Juan 2:12). Diosan Reinopan Reyit uttʼayat Jesusajj niyaw kunanaktï Supayasa, jupan apnaqat akapachas lurkistu ukanak chhaqtayjjani, uk yatiñajj jutïr urunak suytʼañatakiw yanaptʼarakistu (Is. 65:17; 1 Juan 3:8; Apoc. 21:3, 4). Kuna luräwtï Jesusajj aka qhepa urunakatak jaytawaykistu uk phoqañatakis jupaw yanaptʼaskistu, uk yatiñajj ukhamarakiw chʼamañchtʼistu (Mat. 28:19, 20). Cheqas chuymasan sumankañ utjañapatakejja, chuymachtʼatäñasa, jutïr urunak suytʼañasa, chʼamañchtʼatäñas wali wakiskiriwa.

17. 1) Mä cristianorojja, ¿kunas chuymapan sum jikjjatasiñapatak yanaptʼaspa? 2) Juan 16:33 qellqatarjamajja, ¿kunarus atipjañäni?

17 Ukhamajj chuymasan sum jikjjatasiskakiñatakejja, ¿kun lurañas jan walinakan uñjaskañäni ukhajj yanaptʼistani? Kuntï Jesusajj lurkäna ukwa lurañasa. Maya, oración lurañasapuniwa. Paya, jan walinakan uñjaskasas Jehová Diosar istʼaskakiñasawa, arunakapatsa taqe chuymaw yatiyaskakiñasa. Kimsa, amigonakasan yanaptʼap katoqasiñasawa. Ukham lurañäni ukhajja, Diosan sumankañapaw chuymanakassa amuyunakassa jarkʼaqani, Jesusjamarakiw kunayman jan waltʼäwinakar atipjañäni (Juan 16:33 liytʼañataki).

CANCIÓN 41 Oracionajar istʼakitaya

^ Párrafo 5 Taqeniw jan walinakan uñjasisajj wal llakistanjja. Aka yatichäwinjja, chuymapan sumankañ utjañapatakejj kunsa Jesusajj luräna ukwa kimsa toqet yatjjataskañäni, jan walinakan uñjasisajj kunsa jupat yateqasisajj lursna ukwa yatjjataskarakiñäni.