Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Munasirïtasajj janiw arukïñapäkiti

Munasirïtasajj janiw arukïñapäkiti

Janiw arumpikisa ni lakampikisa munasiñasäkiti, jan ukasti luratasampi cheqapampi munasiñasawa” (1 JUAN 3:18).

CANCIÓN: 106, 100

1. 1) ¿Kunjamas cheqpach munasiñajja? 2) ¿Kunatsa ukham sistanjja? (Aka paginankir fotonak uñjjattʼäta).

CHEQPACH munasiñajj Jehová Diosatwa juti (1 Juan 4:7). Uka munasiñajj Biblian yatichäwinakaparjamawa. Biblianjja, cheqpach munasiñajj griego arun agápe satawa. Uka munasiñajj janiw aleq munasiñakïkiti, jan ukasti jan kun suyasaki yaqhanakar taqe chuyma yanaptʼañawa. Mä diccionariojj akham siwa: “Agápe arojj luratanakasampi munasirïtas uñachtʼayaña sañwa muni” sasa. Ukham munasiñajj kusisit jakasiñataki ukhamarak jakäwisan mä amtampi jakasiñatakiw yanaptʼistu.

2, 3. ¿Jehová Diosajj kunja munasirisa uk kunjamsa uñachtʼayäna?

2 Jehová Diosajj Adanampir Evampir janïr lurkäna uka tiempotpachwa jaqenakarojj wal munasjjäna. Amuytʼañataki, aka oraqjja jaqenakan wiñay jakasipjjañapataki, taqe kunas utjañapataki, jaqenakas ukan kusisita jakasipjjañapatakiw luräna. Taqe kunsa janiw Jupan askipatak lurkänti, jan ukasti jiwasan sum jakasiñasatakiw luräna. Jaqenakarusti Paraison wiñay jakasipjjañapatakiw lurarakïna.

3 Adanampi Evampejj Dios contra saytʼasipkäna uka qhepatjja, Jehová Diosajj kunja munasirisa uk jukʼampwa uñachtʼayäna.  Wawanakapat yaqhepajj munasipjjetaniwa sasaw confiyäna, ukatwa kunatï jupanakar salvañatakejj munaskäna uk luräna (Gén. 3:15; 1 Juan 4:10). Jehová Diosajj jaqenakar salvañ amtkäna ukhajja, Jupatakejj niyas Yoqapajj jiwjjaspa ukhamänwa. Pusi waranqa maranak qhepatjja, Jehová Diosajj mä sapa Yoqapwa jaqenak laykojj churäna (Juan 3:16). ¡Ukham luratapat walpun yuspärtanjja!

4. ¿Kunatsa pantjasirïkasas Diosjam munasirïsnawa sasajj sissna?

4 Jiwasajj niyakejjay Diosar uñtasit luratästanjja, jupjamarakiw jan kun katoqañ suyasajj munasirïsna. Pantjasirïtas laykojja, awisajj ukham lurañajj chʼamakïspawa, ukampis munasirïsnawa. Abel chachajj ukhamwa luräna, kunatï wali valoranïkäna ukwa Diosar sacrificiot loqtäna (Gén. 4:3, 4). Noé chachajj ukhamarakiw munasir jaqëna, walja maranakaw jan istʼasir jaqenakarojj Diosan arunakap yatiyäna (2 Ped. 2:5). Abrahán chachasti taqe kunat sipansa Diosaruw wal munasïna, ukatwa Isaac yoqapar sacrificiot loqtañatakis jankʼakïna (Sant. 2:21). Jiwasajj jupanakjamarakiw chʼamäkipansa munasirïñ muntanjja.

¿KUNAS CHEQPACH MUNASIÑAJJA?

5. ¿Kunanak lurasas cheqpach munasirïtas uñachtʼaysna?

5 Cheqpach munasstan ukhajja, “janiw arumpikisa ni lakampikisa munasiñasäkiti, jan ukasti luratasampi cheqapampi munasiñasawa” sasaw Bibliajj qhanañchi (1 Juan 3:18). Ukham sasinjja, arunakampi maynir chuymachtʼañajj janis walïkaspa uk janiw sañ munkiti (1 Tes. 4:18). Cheqas janiw ‘munassmawa’ sañasakïkiti, jan ukasti luratanakasampi uñachtʼayañaw awisajj wakisini. Sañäni, jilat kullakanakasajj jan manqʼañanïpkaspa, isipas jan utjkaspa ukhajja yanaptʼañasawa, janiw arumpikejj chʼamañchtʼañasäkiti (Sant. 2:15, 16). Diosan arunakap yatiyañanjja ukhamarakiwa, Diosampiru jaqe masisampir munasitasatjja, janiw Jehová Diosarojj “trabajirinak yapupar khitaniñapaki” mayktanti, jan ukasti jiwas pachaw taqe chuyma yatiytanjja (Mat. 9:38).

6, 7. 1) ¿Kunas ‘taqe chuyma’ munasiñajja? 2) ¿Khitinakas jan taqe chuym munasirïpkäna?

6 Apóstol Juanajj akham sänwa: “Luratasampi cheqapampi munasiñasawa” sasa. Mä arunjja munasiñasajj ‘taqe chuymäñapawa’ (Rom. 12:9; 2 Cor. 6:6). Ukhamajj janiw aleqakejj munasirjam tukuñasäkiti. Ukham lursna ukhajj pä chuymanïksnas ukhamäspawa, munasiñasajj janiw cheqapäkaspati, inamayakïspawa.

7 Uka toqet amuytʼañatakejj mä qhawqhanit parltʼañäni. Supayajj Edén jardinan Eva warmimpi parlkäna ukhajja, jupat llakiskaspas ukhamänwa. Ukampis kʼari chuymampiw uñisiñat parljjayaskäna (Gén. 3:4, 5). Ahitofel chachajj ukhamarakiw David reyir munaskaspas ukham tuktʼäna, ukampis Davidajj jan walin uñjasjjäna ukhajj jupa contraw saytʼjjäna (2 Sam. 15:31). Jichhürunakanjja, ukhamarakiw Diosan markap contra saytʼirinakasa, congregacionar tʼaqanoqtayañ munirinakas “mojjsa arunakampi” parlapjjaspa (Rom. 16:17, 18). Ukampis jupanakan munañap thaqasakiw ukham lurapjjaspa.

8. ¿Kunsa jisktʼasiñasa?

8 Jaqe masisar engañjañataki munasirjam tuktʼañajj janipuniw walïkiti. Jaqenakarojj engañsnawa, ukampis Jehová Diosarojj janiw engañksnati. Jan suma jaqëkasin suma jaqer tuktʼirinakat parlkasajja, Jesusajj akham sänwa: “[Diosajj] wal jupar castigani” sasa (Mat. 24:51). Jehová Diosan servirinakapajj taqe chuymaw maynit maynikam munasiñ muntanjja, ukatwa akham sas jisktʼasiñasa: “¿Jilat  kullakanakarojj cheqapunit taqe chuyma munastjja?” sasa. Kunjamsa jaqe masisarojj ‘taqe chuyma munassna’ ukwa jichhajj llätunka toqet yatjjataskañäni.

“LURATASAMPI CHEQAPAMPI MUNASIÑASAWA”

9. Jilat kullakanakar cheqapun munasstan ukhajja, ¿kunsa lurañäni?

9 Luratanakasat janis yaqhanakajj yatipkchejja, taqe chuymaw yanaptʼañasa. Jilat kullakanakar yanaptʼasajj janiw yaqhanakar yatiyañasäkiti (Mateo 6:1-4 liytʼañataki). Ananías chachampi Safira esposapampejja, qollqemp yanaptʼapjjäna ukhajj yaqhanakan yatipjjañapwa munapjjäna. Qhawqha qollqsa churapjjäna uka toqetsa kʼarisipjjänwa. Ukham kʼari chuymanïpjjatapatjja Diosajj castigänwa (Hech. 5:1-10). Jiwasatï jilat kullakanakar cheqapun munasstan ukhajja, taqe chuymaw jupanakar yanaptʼañäni, janirakiw yaqhanakan yatiñapsa munkañäniti. Ukatakejj Oraqpachan Jilïr Irpirinakan yanapirinakapatwa yateqassna. Jupanakajj Bibliat apstʼat qellqatanak wakichañsa yanaptʼapkchejja, janiw jachʼañchatäñ thaqapkiti, janirakiw kunanakansa yanaptʼasipki uksa yatiyapkarakiti.

10. ¿Kunjamsa yaqhanakar respetomp uñjsna?

10 Respetasirïñasawa (Romanos 12:10 liytʼañataki). Ukatakejj Jesusatwa yateqassna, jupajj apostolonakapan kayunakapsa jareqänwa (Juan 13:3-5, 12-15). Kunatsa Jesusajj ukham luräna uk janiw jupanakajj amuyapkänti. Espíritu santo katoqapjjäna ukhakiw amuyapjjäna (Juan 13:7). Jiwasajj Jesusjam humilde chuymanïñatakiw chʼamachasiñasa, jupjamarakiw yaqhanakarus respetañasa. ¿Kunjamsa uk lursna? Janiw wali yatjjatatätas laykusa, wali utjirinïtas laykusa, ni congregacionan walja lurañak katoqasas jachʼañchasiñasäkiti (Rom. 12:3). Janirakiw yaqhanakar jachʼañchapjjepansa nayarus ukhamarakiw luratajat jachʼañchapjjañapa sasajj envidiasiñasäkiti, jan ukasti jupanakamp chikaw kusisiñasa.

11. ¿Kunatsa ‘walik ukham lurtajja’ sasin taqe chuyma sañasa?

11 Taqe chuymaw jilat kullakanakarojj ‘walik ukham lurtajja’ sañasa. Ukatakejja, kunanaktï sum lurapki ukanak amuyañasapuniwa, ukhamatwa jupanakar chʼamañchtʼañäni (Efe. 4:29). Ukampis janiw kun katoqañ laykuki ukham sañasäkiti, jan ukasti taqe chuymaw sañasa, ewjjtʼañ wakiskani ukhas ewjjtʼañasarakiwa (Pro. 29:5). Maynirutï ‘walik ukham lurtajja’ sissna, ukat jan walinak jupjjat yaqhanakar parlaraksna ukhajja, kʼari chuymani jaqësnawa. Apóstol Pablotwa taqe chuyma munasirïñ yateqasiñasa. Corinto markankir cristianonakan suma luratanakap uñjasajja, “walik ukham lurasipktajja” sasaw jupanakar säna (1 Cor. 11:2). Ukatsti jan wali luratanakapatjja ewjjtʼarakïnwa, qhana arunakampi munasiñampiw kunsa jan wal lurapjjäna uk qhanañcharakïna (1 Cor. 11:20-22).

Yanaptʼa munapki ukanakar yanaptʼasaw katoqtʼasirïtassa munasirïtassa uñachtʼaysna. (Párrafo 12).

12. ¿Kunjamsa taqe chuyma katoqtʼasirïsna?

12 Katoqtʼasirïñasawa. Jehová Diosaw jilat kullakanakar wajjtʼañas muni (1 Juan 3:17 liytʼañataki). Ukjja jan kun katoqañ suyasaw lurañasa. Akham jisktʼasiñasawa: “¿Amigonakajaru, jan ukajj khitinakatï congregacionan wali uñtʼatäpki ukanakarukit katoqtjja? ¿Khitinakatï kuttʼayapkitani ukanakarukit invittjja? ¿Jan ukajj luratajat jan kuttʼayapkitani, jan uñtʼatäpki ukanakar invitaraktcha?” sasa (Luc. 14:12-14). Akham amuytʼañäni, mä jilatajj jan wali amtanakar puritapat yanaptʼa mayistaspa, jan ukajj wajjtʼatas janipun yuspärasirïkchi ukhajja, “maynit maynikam jan quejasis taqe chuyma katoqtʼasipjjam” siski uka ewjjtʼarjamaw  lurañasa (1 Ped. 4:9). Jiwasatï uka ewjjtʼarjam lurañäni ukhajja, cheqpach munasitaswa uñachtʼayañäni, kusisitaw jakasirakiñäni (Hech. 20:35).

13. 1) ¿Kunapachas paciencianïñajj jukʼamp wakisispa? 2) ¿Kunjamsa Diosar serviñan aynachtʼatäpki ukanakar yanaptʼsna?

13 Diosar serviñan aynachtʼatäpki ukanakar yanaptʼañasawa. Jiwasatï jilat kullakanakasar taqe chuyma munasstan ukhajja, “jan chʼamaninakarus yanaptʼapjjarakim, taqenirus pacienciampi uñjapjjam” siski uka arunakarjamaw lurañasa (1 Tes. 5:14). Diosar serviñan aynachtʼatäpki uka jilat kullakanakajja tiempompejj taqe chuymaw Diosar sirvjjapjje. Ukampis yaqhepanakar munasiñampi pacienciampi yanaptʼañajj wakisiskakiwa. ¿Kunjamsa jupanakar yanaptʼsna? Bibliampiw chʼamañchtʼsna, Diosan arunakap yatiyir jiwasamp chik sarapjjañapatakis invittʼaraksnawa, jan ukajj llakinakap cuenttʼapjjestani ukhas istʼaraksnawa. Khitinakas Diosar taqe chuyma servisipki, khitinakas janiraki uksa, janiw uñchʼukiñasäkiti. Awisajj taqeniw aynachtʼsna uk amtañasapuniwa, apóstol Pablos aynachtʼatätwa sasaw säna (2 Cor. 12:9, 10). Cheqas taqeniw jilat kullakanakampi chʼamañchtʼatäñsa yanaptʼatäñsa muntanjja.

14. ¿Kunsa jilat kullakanakampi sum apasiñatakejj lurañasa?

14 Taqenimpis sumankañasawa. Jilat kullakanakampejj sum apasiñasawa. Jan walsa jiwasat amuyapkchi, jan ukajj jan walsa lurapkchistojja sum apasiñatakiw chʼamachasiñasa (Romanos 12:17, 18 liytʼañataki). Maynir chuym ustʼayañäni ukhajj taqe chuymaw perdón mayisiñasa. Amuytʼañataki, ‘janiw colerasiniw siskayätti’ sañat sipansa, ‘janiw chuym ustʼayañ munkayäsmati, perdontʼita’ sasaw sañasa. Taqenimpiw sumankañasa, yamas chacha warminakajj sum apasipjjañapawa. Mä chacha warmitï yaqhanakan uñjkataki sum apasipjjaspa, ukampis utan jan parlasipkaspati, toqesisipkaspa, yamas nuwasisipkaspa ukhajja, janipuniw walïkaspati.

15. ¿Kunanak lurañäni ukhas cheqapun perdonatasajj amuyasini?

15 Perdonasirïñasawa. Maynitï jan amuyasis chuym ustʼayistani ukhajja, perdonañasawa, jan wal lurkistu uksa armjjañasarakiwa. Cristianonakajja “maynit maynikam munasiñamp aguantasisa, espíritu santojj mayachtʼat jakasiñ churkistu ukarjam sarnaqañatak wal chʼamachasisa, sumankañan jaka[saw]” ukham lurtanjja (Efe. 4:2, 3). Taqe chuym perdonañatakejja, ‘janiw kuna jan wal luratas amjjäsiñasäkiti’ jan ukasti armjjañasawa (1 Cor. 13:4, 5). Amjjäsiskaksna ukhajja, janiw jilat kullakanakasampisa ni Jehová Diosampis sum apasjjsnati (Mat. 6:14, 15). Maysa toqetjja, khitinakatï jan wal lurapkistu ukanakatakejj Diosatwa mayirapiñasa, ukhamatwa cheqapun perdonatasajj amuyasini (Luc. 6:27, 28).

16. Maynitï Diosan markapan kun lurañs katoqchi ukhajja, ¿kunsa jan lurañapäki?

 16 Janiw munañasak thaqañasäkiti. Maynitï Jehová Diosan markapan kun lurañs katoqchi ukhajja, kunjamsa cheqpachapun munasirïtap uñachtʼayaspa ukwa amuytʼañapa. ¿Kunjamsa uk luraspa? ‘Kunatejj jaqe masipatak walïki ukwa thaqañapa, janiw jupatakik thaqañapäkiti’ (1 Cor. 10:24). Amuytʼañataki, mä jachʼa tantachäwinjja katoqerinakaw nayraqat mantapjje, ukhamajja purisajj inas jupanakatakisa familiapatakis suma asientonak ajllisiñ munapjjchispa. Ukampis yaqhepajj ukham lurañat sipansa, kawkjantï yanaptʼapkani ukawjanwa qontʼasipjje, janiw suma asientonak ajllipkiti. Ukhamatwa jupanakan munañapak jan thaqapjjatap uñachtʼayapjje. ¿Jiwasajj jupanakjam luraraksnati?

17. Mä cristianotï jachʼa jucha lurchejja, ¿kunsa cheqapun munasirïchi ukhajj lurañapa?

17 Juchanakas arsusjjañasawa, janiw mayampsa lurjjañasäjjeti. Yaqhep cristianonakajja, jan phenqʼachayasiñ layku, jan ukajj yaqhanakar jan chuym ustʼayañ laykuw jachʼa juchanakap imtʼapjje (Pro. 28:13). Ukham lurasajj jan munasirïpjjatapwa uñachtʼayapjje, jupatakisa yaqhanakatakisa juch imtʼañajj jan walipuniwa. Congregacionajj janiw espíritu santon yanaptʼap katoqjjaspati, sumankañas janirakiw utj-jjaspati (Efe. 4:30). Jachʼa juch luriritï cheqpach munasirïchi ukhajja, jilïr irpirinakampiw uka juchapat parltʼañapa, ukhamatwa juparojj yanaptʼapjjani (Sant. 5:14, 15).

18. ¿Kunatsa munasiñajj wali wakiskirejja?

18 Taqe kunat sipansa munasiñaw jilanki (1 Cor. 13:13). Maynit maynikam munasiñäni ukhakiw jaqenakajj Jesusan cheqpach arkiripätas yatipjjani, wali munasiri Jehová Diosat yateqasis sarnaqerïtassa yatipjjarakiniwa (Efe. 5:1, 2). Apóstol Pablojja, ‘munasiñatï nayan jan utjkaspa ukhajj janiw kunäkiristsa’ sasaw qellqäna (1 Cor. 13:2). Ukhamasti, munasiñasajj jan ‘arukïpati’, jan ukasti cheqpach munasitasjja ‘luratanakasampi’ uñachtʼayapjjañäni.