Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Cheqa yatichäwejj ‘janiw sumankañ apankiti, jan ukasti espada apani’

Cheqa yatichäwejj ‘janiw sumankañ apankiti, jan ukasti espada apani’

Jumanakajj jan amuyapjjamti sumankañsa aka oraqer apankirista ukhamjja; janiw sumankañ apankti, jan ukasti espada apanta” (MAT. 10:34).

CANCIÓN: 123, 128

1, 2. 1) ¿Kunas sumankañatakejj jichhürunakan yanaptʼistu? 2) ¿Kunatsa sumankañajj jichhürunakan jan utjki? (Aka paginankir foto uñjjattʼäta).

TAQENIW jaqe masisampejj sumankañ muntanjja, kusisita jakasiñsa munaraktanwa. Jehová Diosaw ‘sumankañap churistu’ ukatwa Jupar wal yuspärtanjja. Uka sumankañaw jan walinak jan lupʼiñatakisa, jan sint llakisiñatakis yanaptʼistaspa (Fili. 4:6, 7). Maysa toqetjja, Jehová Diosar jakañ vidas katuyasitasatwa Jupampejj ‘sumanktanjja’ (Rom. 5:1).

2 Jehová Diosajj jutïr urunakanwa cheqpach suma jakasiñjja apanjjani. Jichhürunakanjja chʼama tukuñ qhepa urunakanwa jaktanjja, ukatwa jan walinakasa, jan wali jaqenakas utji (2 Tim. 3:1-4). Ukhamarus cristianonakajja, Supay contra, kʼari yatichäwinakap contraw nuwasiñasa (2 Cor. 10:4, 5). Cheqas Jehová Diosar jan servipki uka familiaranakasaw jukʼamp llakinakan uñjasiyistaspa. Inas Bibliar creyitasat jiskʼachapjjchistaspa, jan ukajj familiar tʼaqanoqtayañsa  munksna ukham inas amuyapjjchispa. Jan ukajj akham sapjjestaspawa: “Diosar serviskakïta ukhajj janiw familiajäjjätati” sasa. ¿Familiasajj Diosar serviñat jarkʼistaspa ukhajj kun amtañasasa? ¿Kunsa ukham jan walin uñjasisajj lursna?

FAMILIASAJJ DIOSAR SERVIÑAT JARKʼISTASPA UKHAJJ KUN AMTAÑASASA

3, 4. 1) ¿Kuna jan waltʼañanaksa Jesusan yatichäwinakapajj utjayaspa? 2) ¿Kunapachas Jesusar arkañajj jukʼamp chʼamäspa?

3 Jichhürunakanjja janiw taqenejj Jesusan yatichäwinakaparjam sarnaqañ munapkiti. Yaqhepajj arkirinakap contraw saytʼapjje, Jesusajj ukanak pasañap yatïnwa. Uka jan waltʼañanakaw familiar tʼaqanoqtayaspa. Jesusajj akham sänwa: “Jumanakajj jan amuyapjjamti sumankañsa aka oraqer apankirista ukhamjja; janiw sumankañ apankti, jan ukasti espada apanta. Nayajj jaqenakpur pitthapiriw jutta. Mä jaqejj awkip contraw saytʼani, phuchasti taykap contraraki, yojjchʼasti suegrap contraw saytʼarakini. Cheqansa mä jaqen enemigopajj pachpa utapatwa sartani” sasa (Mat. 10:34-36).

4 ¿Kunatsa Jesusajj “jan amuyapjjamti sumankañsa aka oraqer apankirista ukhamjja” sasin sispachäna? Jupar arkasajj kuna jan walinakansa jaqenakajj uñjasipjjaspa uk amuyapjjañapwa Jesusajj munäna. Cheqas Jesusajj ‘kunatï cheqäki uka toqet qhanañchañwa’ munäna, janiw familianakar tʼaqanoqtayañ munkänti (Juan 18:37). Ukampis awisajj ukaw pasaspa. Jesusar arkañajj chʼamakïspawa, yamas amigonakasasa, jan ukajj familiaranakasas cheqa yatichäwinak jan istʼañ munapkaspa ukhajj jukʼamp chʼamäspawa.

5. ¿Kuna jan walinakansa Jesusan arkirinakapajj uñjasipjje?

5 Khititejj arkañ munkitu ukajj tʼaqesiñanak aguantañapawa sasaw Jesusajj säna. Ukhamajj familiaranakasajj jiwas contra saytʼapkani ukhajja aguantañasawa (Mat. 10:38). Cristotakjam sarnaqañatakejja, arkirinakapajj jiskʼachatasa, janiw familiajäjjätati satpachasa aguantapjjewa. Ukhamanakansa uñjasipkchejja, kuntï aptʼasipki ukat sipansa jukʼampwa katoqapjje (Marcos 10:29, 30 liytʼañataki).

6. Familiaranakasatï Jehová Diosar serviñas jan munapkchejja, ¿kunsa amtañasa?

6 Familiaranakasajj janis Jehová Diosar serviñas munapkchejja, munasiñampiw jupanakar uñjaskakiñasa. Ukhamanakan uñjasisajj ak amtañasawa: Jehová Diosampir Jesusampiruw jukʼamp munasiñasa (Mat. 10:37). Maysa toqetjja, familiasar munasitas toqew Supayajj Jehová Diosat jitheqtayarakistaspa, uksa amtañasarakiwa. Jichhajja, kuna jan walinakansa uñjassna, kunjamsa uka jan walinakar saykatsna uka toqenakat parltʼañäni.

CHACHA WARMIT MAYNEJJ JAN TESTIGÖKASPA UKHAJJ KUNS LURSNA

7. Chacha warmit maynejj jan Testigöki ukhajja, ¿kunsa Testigöki ukajj lurañapa?

7 Casadonakatakejj “tʼaqesiñaw jañchipan utjani”, mä arunjja jan walinakanwa uñjasipjjani sasaw Bibliajj qhañanchi (1 Cor. 7:28). Chachasatï, jan ukajj warmisatï jan Testigökchi ukhajja, jukʼamp jan waltʼayasiñanakaw utjaspa. Ukhamäkchinisa, kunjamtï Jehová Diosajj uka jan walinak uñjki ukham uñjañasawa. Jehová Diosar serviñ janis munkchejja janiw jaljtañsa ni divorciasiñsa amtañasäkiti (1 Cor. 7:12-16). Cristiana warmejja, esposopajj Diosar servipjjañapatak janis familiapar yanaptʼkchejja respetañapawa. Chachajj ukhamarakiw Diosar jan servir warmiparojj munasiñapa, sum uñjañaparaki (Efe. 5:22, 23, 28, 29).

8. Chachasatï jan ukajj warmisatï Diosar jukʼamp serviñas jan munkchi ukhajja, ¿kunsa jisktʼasiñasa?

8 Chachasatï jan ukajj warmisatï Diosar jukʼamp serviñas jan munkchi ukhajja, ¿kuns lursna? Sañäni, mä kullakan esposopajja, ‘janiw yatiyirejj sapüru sarkätati’ sasaw säna. Jiwasatï ukhaman uñjassna ukhajja, akham jisktʼasiñasawa: “¿Jehová Diosar serviñajti jan  munki? Jan ukhamäkchejja, ¿kun lurañajtï munki ukar istʼiristti?” sasa. Sum amuytʼasisa kuns lurañäni ukhajja, janiw ina chʼusat toqesiñajj utjkaniti (Fili. 4:5).

9. Diosar jan servir awkiparu jan ukajj taykaparu respetañjja, ¿kunjamsa mä cristianojj wawanakapar yatichaspa?

9 Chachasatï jan ukajj warmisatï jan Testigökchejja, wawanakar Diosat yatichañajj wali chʼamäspawa. Amuytʼañataki, wawanakarojj awk taykar respetañwa yatichañasa (Efe. 6:1-3). Ukampis ¿chachasatï jan ukajj warmisatï Bibliarjam jan sarnaqkchi ukhajj kuns lursna? Jupar respetañasawa. Jan wali luratanakap uñchʼukiñat sipansa kunanaktï sum lurki ukanakat yuspärañasawa. Janipuniw wawanak nayraqatan jupat jan walinak parlañasäkiti. Jan ukasti, ‘sapa mayniw Diosar serviñ amtjjañasa’ sasaw wawanakar sañasa. Wawanakasan sum sarnaqapjjatap uñjasaw chachasasa, jan ukajj warmisasa Diosat yateqañ munjjaspa.

Wawanakamar Bibliat yatichañatakejj chʼamachasiñamapuniwa.(Párrafo 10.)

10. Cristiano awk taykanakajja, ¿kunjamsa Jehová Diosar munasipjjañapatakejj wawanakapar yatichapjjaspa?

10 Jan Testigöki uka chachasa jan ukajj warmisa, wawanakapajj kʼari religionanakan uñstayata fiestanak amtapjjañapa, uka religionanakan yatichäwinakap yateqapjjañapwa munaspa. Yaqhep chachanakajja, wawanakapar Bibliat yatichañap Testigo esposaparojj jarkʼapjjaspawa. Ukhamäkchisa, kullakajj wawanakapar Bibliat yatichañatak chʼamachasiskakiñapawa (Hech. 16:1; 2 Tim. 3:14, 15). Sañäni, jiskʼa wawanakapar sapa semana Bibliat yatichañapsa, tantachäwinakar irpañapsa inas chachajj jan munkchispati. Kullakajj uka mayitapar respetkchisa, wawanakar Jehová Diosata, leyinakapat yatichañatakejj chʼamachasiskakiñapawa  (Hech. 4:19, 20). Cheqas tiempompejja, wawanakaw Jehová Diosar servipjjaniti janicha uk amtjjapjjañapa (Deu. 30:19, 20). *

FAMILIASAW DIOSAR SERVIÑ JARKʼISTASPA

11. ¿Kunatsa jan Testigöki uka familiarasampejj jan waltʼayassna?

11 Testigonakampi Bibliat yatjjatañ qalltkayätan ukhajja, inas familiasar jan yatiykchiyätanti. Ukampis Jehová Diosar jukʼamp confiyjjasajja, yateqkayätan ukanakat parlañwa munjjayätanjja (Mar. 8:38). Jehová Diosar jan jitheqtas servitasatwa familiarasampejj jan waltʼayassna. Ukhaman uñjasisajj ¿kunsa familiasampi sum apasiskakiñatakisa Jehová Diosar jan jitheqtas serviskakiñatakis lursna? Ukanakat mä qhawqha uñjañäni.

12. ¿Kunatsa yaqhep familiarasajj Testigöñas jan munapkaspa, ukhamïpan kunsa lursna?

12 Kunas familiarasar llakisiyi uk amuyañatakiw chʼamachasiñasa. Biblian cheqa yatichäwip yatjjatasajja wal kusisiyätanjja. Ukampis inas familiasat yaqhepajj engañayasksnasa, jan ukajj jan uñtʼat religionanksnasa ukham amuyapjjchispa. Fiestanakar jan sarjjatasatjja, janis jupanakar munasjjsna ukham inas amuyapjjchispa. Jan ukajj jiwjjapjjani uka qhepat Diosaw castigaspa sasin ajjsarayasipjjarakchispa. Jupanakar yanaptʼañatakejja, kunas llakisiyi, kamsapjjesa uk sum istʼañasawa (Pro. 20:5). Ukatakejj apóstol Pablotwa yateqassna, jupajj “kunaymani jaqenakar” amuyañatakiw chʼamachasïna, ukaw Diosan arunakap yatiyañatakejj yanaptʼäna. Jiwasatï ukham lurarakiñänejja, Diosat kuntï yateqktan ukanak familiasar yatiyaraksnawa (1 Cor. 9:19-23).

13. ¿Kunjamsa jan Testigöpki uka familiaranakasar parlañasa?

13 Munasiñampiw parlañasa. Bibliajj akham siwa: “Arunakamajj sumapunïpan, jayumpi jayuñchtʼatäkaspas ukhama” sasa (Col. 4:6). Familiaranakasar suma arumpi, munasiñampi parlañatakejj Jehová Diosaruw espíritu santop mayisiñasa. Kuna kʼari yatichäwinakarutï familiarasajj creyki ukanakatsa janiw jiskhisiñasäkiti. Jupanakatï luratanakapampisa, jan ukajj arunakapampis chuym ustʼayistani ukhajja, apostolonakatwa yateqasiñasa. Apóstol Pablojj akham sasaw qellqäna: “Jan wali arunakamp toqepjjetu ukhajja, nanakajj bendisipjjtwa, jan waltʼayañatak arknaqapjjetu ukhasti pacienciampiw aguantapjjta, kʼarintapjjetu ukhasa nanakajj suma arunakampiw jupanakar parljjayapjjta” sasa (1 Cor. 4:12, 13).

14. ¿Kunjamsa sum sarnaqatasajj yaqhanakar yanaptʼaspa?

14 Diosan aruparjamaw sarnaqañasa. Familiarasampi sum apasiñatakejj munasiñamp parlañaw yanaptʼistu, ukampis sum sarnaqatasaw jukʼamp yanaptʼistaspa (1 Pedro 3:1, 2, 16 liytʼañataki). Sañäni, sum sarnaqatas uñjasajja, Testigonakajj kunjamsa familiasan sum jakastan wawanakasarus munasiñamp uñjtan, qʼañu juchanakansa jan sarnaqktan, kusisita jakastan ukanakwa jan Testigöpki uka familiaranakasajj amuyapjjani. Jupanakajj janis Testigöpkchinejja, Jehová Diosan arunakaparjam sarnaqaskatas yatisajj kusisitäñasawa.

15. Familiarasampi jan toqesiñatakejja, ¿kun lurañsa janiräkipan amtsna?

15 Kamsañänisa uk janiräkipanwa amuytʼañasa. Kunanakas familiarasamp toqesiyistaspa ukanakat sum amuytʼasajja, kunsa lurañäni uk janiräkipanwa amtañasa (Pro. 12:16, 23). Ukwa Australia markankir mä kullakajj luräna, jupajj akham siwa: “Suegrojajj janipuniw Testigöpjjañaj munkänti. Jupar telefonot janïr jawskasajja, toqesini ukhajj suma arunakampi parltʼañatak yanaptʼapjjeta sasaw esposojampejj Diosar mayisipjjerïta. Kunanakatsa sum parltʼasipjjerista ukanakatsa sum amuytʼapjjerïta. Religión  toqet jan jiskhisiñatakejja, jan jaya tiempo parlañwa amtapjjerïta” sasa.

16. Familiarasampi toqesitasat jiwasas juchanïksna ukham amuyassna ukhajja, ¿kun amtañas yanaptʼistaspa?

16 Cheqas jan Testigöpki uka familiarasampi toqesiñajj kunjamatsa utjaspawa. Familiaranakasarojj wal munastanjja, jupanakampejj sum apasiñwa munaraktanjja. Ukatwa jupanakamp toqesisajj jiwasas juchanïksna ukham amuyassna. Ukhaman uñjasiñäni ukhajja, ak amtañasawa: Jehová Diosaruw familiaranakasat sipansa jukʼamp munasiñasa. Ukhamatwa, jupanakarojj Bibliarjam sarnaqañajj kunja wakiskirisa uk amuyapjjañapatak yanaptʼsna. Cheqas Jehová Diosar servipjjañapatakejj janiw khitirus obligksnati. Ukampis kunjamsa Biblian ewjjtʼanakaparjam sarnaqañajj yanaptʼistu uk amuyapjjañapatakiw yanaptʼsna. Jehová Diosajj wali munasiñapatwa Jupar serviñäniti janicha uk sapa mayni amtañas muni, familiaranakasas jupanakpachpaw amtapjjañaparaki (Isa. 48:17, 18).

MÄ FAMILIARASAW DIOSAT JITHEQTASPA

17, 18. ¿Kunsa familiasat maynejj jan Testigöjje ukhajj lursna?

17 Familiasat maynejj congregacionat jaqsuyasi, jan ukajj jupa pachpa jitheqtañ amti ukhajj wali llakkañawa, mä cuchillompis chuymasar jununtkistaspa ukhamawa. ¿Kunsa ukhaman uñjasisajj lursna?

18 Diosar serviñaw nayrankañapa. Jehová Diosar taqe chuyma confiyaskakiñatakejj sapüruw Biblia liyiñasa, tantachäwinakatakis wakichtʼasiñasawa. Janirakiw tantachäwinakatsa faltasiñasäkiti, yatiyiris sarañasapuniwa, aguantaskakiñatakis Jehová Diosaruw yanaptʼa mayisiñasa (Jud. 20, 21). Ukanak lurkasas llakisiskaksna ukhajj ¿kuns lursna? Jehová Diosar serviskakiñasawa, ukaw jan walinak jan lupʼiñatak yanaptʼistani, jan sinti llakisiñatakis yanaptʼistani. Salmo 73 qellqerirojj kunas pasäna uk amuytʼañäni. Jupajj jan walinakan uñjasisajj jan walinakwa amuyjjäna, walirak llakisjjäna. Ukampis Jehová Diosar jan jitheqtas serviskakiñaw ukham jan amuyjjañatak yanaptʼäna (Sal. 73:16, 17). Jiwasarojj ukham lurañaw yanaptʼarakistaspa.

19. ¿Kunjamsa Jehová Diosan cheqañchäwipar respetsna?

19 Jehová Diosan cheqañchäwipjja respetañasawa. Cheqañchapkistu ukhajj chuym wal usuyastanjja, ukampis cheqañchatäñajj taqenitakis wali wakiskiriwa (Hebreos 12:11 liytʼañataki). Juchapat jan arrepentisipki ukanakampejj ‘jan chikachasipjjamti’ sasaw Jehová Diosajj ewjjtʼistu (1 Cor. 5:11-13). Ukham lurañajj jiwasatak chʼamäkchisa, jupanakampejj wakiski ukhakiw telefonotsa, mensajenak apayasasa jan ukajj yaqha ukhamanakatsa parlañasa.

20. ¿Kunatsa kuttʼaniñap suyaskakiñasa?

20 Pacienciampiw suytʼañasa. Munasir jaqejj taqe kunsa pacienciampiw suytʼi, ukatwa Jehová Diosat jitheqtirinakarojj kuttʼanipjjañap pacienciampi suyasktanjja (1 Cor. 13:7). Congregacionat jaqsut mä familiarasatï kuttʼaniñatak wal chʼamachasiskchi ukhajja, Jehová Diosaruw yanaptʼañapatak mayiñasa. Ukhamat “nayan ukar kuttanjjam” sasin Jupajj siski uka arunakarjam lurañapataki (Isa. 44:22).

21. Familiasatï Jesusar jan arkañas munkchejja, ¿kunsa lurañasa?

21 Jesusajja, jaqenakar munañat sipansa nayaruw jukʼamp munasipjjañama sasaw säna. Discipulonakajajj familiaranakapan uñisitas janipuniw nayat jitheqtapkaniti sasaw confiyarakïna. Familiasatï Jesusar jan arkañas munkchejja, Jehová Diosaruw confiyañasa, aguantaskakiñatakis yanaptʼap mayisiñasaraki (Isa. 41:10, 13). Ukhamtï lurañänejja, Jehová Diosasa Jesusas wal kusisipjjani, jan jitheqtas servitasatjja bendisipjjestaniwa, jiwasas kusisirakiñäniwa.

^ Párrafo 10 Chacha warmit maynik Testigöchi ukhajj kunjamsa wawanakapar Bibliat yatichaspa uka toqet jukʼamp yatjjatañatakejja, “Preguntas de los lectores” siski ukwa La Atalaya 15 de agosto, 2002 revistan español arut liytʼäta.