Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 NAYRÏR JANAN PʼEQEÑCHÄWIPA | ¿KUNAS BIBLIA LIYIÑATAK YANAPTʼISTASPA?

¿Bibliajj yanaptʼitaspati?

¿Bibliajj yanaptʼitaspati?

Bibliajja janiw mayni libronakjamäkiti, jan ukasti Diosan ewjjanakapaniwa (2 Timoteo 3:16). Uka ewjjanakajj wali sum yanaptʼiristam. Biblia pachpaw akham qhanañchi: “Diosan arupasti jakaskiwa, jachʼa chʼamanirakiwa” sasa (Hebreos 4:12). Bibliajja sapürutaki suma ewjjanakaniwa, Diosar jukʼamp uñtʼañataki, amtanakapsa jukʼamp yateqañatakiw yanaptʼistaspa (1 Timoteo 4:8; Santiago 4:8).

Sum jakasiñatakiw yanaptʼätam. Bibliajj jakäwisansa yaqha toqenakansa, wali sum yanaptʼistaspa.

Jichhak casarasipki ukanakarusa, Biblian ewjjanakapajj yanaptʼarakispawa, ukwa Asia toqenkir mä chacha warmejj uñjapjjäna. Jaqechasipki ukanakatakejja, qalltan maynimpi jakañasa parltʼasiñasa wali chʼamakiwa. Uka chacha warmejja Biblian liytʼapkäna ukarjamaw sarnaqañ qalltapjjäna. ¿Kunjamsa ukajj yanaptʼäna? Annalou sat warmin Vicent esposopajj akham siwa: “Biblian liytʼkayäta ukajja, esposajampi jan waltʼäwinak munasiñampi askichañatakiw yanaptʼawayitu. Ukarjam sarnaqasajj kʼuchikiw jupampejj jakasjjapjjta” sasa. Esposapajj sarakiwa: “Biblian utjki uka sarnaqäwinak liytʼañajj wal yanaptʼawayapjjetu. Chachajampejj mä amtanikëjjapjjtwa, uk yatisaw jichhajj kʼuchiki jakasjjta” sasa.

Diosar uñtʼañatakiw yanaptʼätam. Vicent chachajj akham saskakiwa: “Biblia liyisajj Jehová Diosar jukʼampi jakʼachasitajwa amuyasta” sasa. ¿Kunsa uka arunakajj amuytʼayistu? Diosar jukʼamp uñtʼañatakejj Biblia liyiñaw yanaptʼiristam. Ukhamtï lurätajja Diosan amigopäyätawa. Kunja sumas aka oraqen wiñayataki jutïrin jakasjjañäni uksa yateqarakïtawa (1 Timoteo 6:19). Bibliar uñtasita yaqha librojj janipuniw utjkiti.

Biblia jan jaytjas liyïta ukhajja, sumakiw jakasïta Diosarus jukʼampiw uñtʼarakïta. Ukampis Biblia liykasinjja walja jisktʼanakaw utjätam. Ukhamäni ukhajja, Etiopía markankir jaqetwa amtasiñama. Uka jaqejj Bibliat walja jisktʼanakanïnwa. Felipe chachajj ‘¿kuntï liykta ukjja amuytati?’ sasin jisktʼkäna ukhajja, akham sasaw uka chachajj säna: “¿Kunjämarak nayast amuyästi, jan khitis nayar yatichkitan ukkhasti?” sasa. * Etiopía markankir jaqejja, Felipe chachampiw yanaptʼayasïna (Hechos 8:30, 31, 34). Jumatï Biblia wali sum amuyañ munsta ukhajja, Internetan jw.org cheqan mä formulariojj utjki ukaruw qellqtʼasma, jan ukajj aka revistan utjki uka formularioruw direccionam qellqtʼarakisma. Jan ukasti jakaskta uka cheqan jakasir Jehová Diosan Testigonakapampiw yanaptʼayasisma, jan ukajj kawkjantï tantachasipki uka cheqaruw jupanakampi parltʼañatak sararakisma. Jakäwiman Bibliampi yanaptʼayasiñatakejja, Biblianiñatakiw chʼamañchtʼapjjsma.

Bibliajj confiykañ librowa, ¿kunatsa ukham sissna? sat video uñtañatakiw chʼamañchtʼapjjsma. Ukjja código QR cheqnam mantasa, jan ukajj Internetan jw.org cheqan QELLQATANAKA > VIDEONAKA > BIBLIA siski ukanwa thaqtasma.

^ tʼaqa 8 Biblian ewjjanakapajj kunja sumasa uk jukʼamp yatjjatañatakejj Internetan jw.org cheqanwa QELLQATANAKA siski ukan thaqtasma.

^ tʼaqa 11¿Biblia amuyañajj wakisiti?” sat yatichäwi aka pachpa revistan uñjjattʼam.