Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 NAYRÏR JANAN PʼEQEÑCHÄWIPA | JAN SINTI LLAKISIÑATAKEJJ ¿KUNAS YANAPTʼISTASPA?

Llakisiñajj oraqpachanwa utji

Llakisiñajj oraqpachanwa utji

“Manqʼa alasiriw sarta, ukampis galletanakak jikjjatta ukat wali jilarakïnwa. Qhepürusti, janiw alasiñatakejj kunas utj-jjänti.” (Paul, Zimbabue)

“Esposojajj janiw jumanakamp jakjjäti, sarjjaw sasaw situ. Ukhajj qʼalpun aynachtʼta. Wawanakajajj kamachapjjakinisa.” (Janet, Estados Unidos)

“Sirenanak wararir istʼasajja, jankʼakiw imantasir tʼijtta, ukat oraqeruw liwnoqtta bomba pasañapkama. Qhepatsa, sustut khatatiskaktwa.” (Alona, Israel)

‘Jan wali tiemponakanwa’ jaktanjja, llakinakas sapüruw utjaraki (2 Timoteo 3:1). Walja jaqenakajja, qollqe toqeta, familiata, guerranakata, usuñanakata ukat jan waltʼäwinak utjipanwa llakisipjje. Sapa mayniw kunayman llakinïpjje. Yaqhepasti, doctorajj cáncer usunïtaw siskitanicha sasaw ajjsarayasipjje. Yaqhepajj wawanakajasa, allchhinakajas kunjamakis jakasipjjani sasaw llakisipjjaraki.

Llakisiñajj utjapuniwa. Sañäni, examen churañatakisa, jaqenak nayraqatan parlañatakisa jan ukajj trabajon katoqayasiñatakisa, mä jukʼa llakissnawa. Cheqas mä jukʼa llakisiñajj jan walinakatsa jarkʼaqarakistuwa. Ukampis llakimpi aynachtʼjjsna ukhajja, jukʼampikiw jan waltʼayistaspa. Niya jichhakiw 68.000 jila, jilïr jaqenakat yatjjatasiwayi, ukanjja, kunjamsa llaki usunakajj waynpacharu tawaqpacharu jiwayaspa ukaw qhanstawayi. Jesusajj ukatwa akham jisktʼpachäna: “Wali llakisitapatsti, ¿khitis jumanakatjja jakañapjja mä horampisa yaptʼasispa?” sasa. Cheqas inamayaw wal llakisisksna, janiw llakisisajj jukʼamp maranak jaksnati. Jesusajj akham ewjjtʼarakïna: “Jan llakisipjjamti” sasa (Mateo 6:25, 27). Ukampis ¿kunjamatsa jan llakimpi aynachtʼksna?

Ukatakejj kunanakas yanaptʼistaspa uk lurañasa, Diosaruw yanaptʼa mayiñasa, ukat kuntï siskistu ukarus confiyañasarakiwa. Paul sat chacharusa, Janet, Alona sat warminakarus kunjamsa ukajj jan sinti llakisiñatak yanaptʼäna, ukanak jichhajj yatjjatañäni. Janis jichhajj jupanakjam jikjjataskstanjja, mä akatjamatwa ukhaman uñjassna.