Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 BIBLIAT YATJJATASAW NAYRA JAKÄWINAKAPJJA JAYTAWAYAPJJE

Bibliajj qhana, amuykay arunakampiw qhanañchi ukaw muspharayitäna

Bibliajj qhana, amuykay arunakampiw qhanañchi ukaw muspharayitäna
  • NASÏWIP MARA: 1948

  • MARKA: HUNGRÍA

  • NAYRA JAKÄWIPA: WALJA JISKTʼANAKANÏNWA UKAT WALPUN YATJJATAÑ MUNÄNA

NAYRA JAKÄWIJA.

Hungría markankir Székesfehérvár sat cheqan nasta. Uka markajj 1.000 jila maranakanëjjewa. Payïr Jachʼa Chʼajjwäwejj kunjamsa uka markan jan waltʼayatayna uk amtaskaktwa.

Achachilanakajampiw jilsuwayta. Jupanakat amtasipuntwa, yamas, Elisabeth awichajat wal amtasta. Jupïpanwa Diosar uñtʼawayta. Kimsa maranïkayät ukhatpachwa nanakan Awkija sat oración sapa aruma jupamp chika orasiriyäta. Ukampis niya 30 maraniruw kuntï uka oracionajj sañ munkäna uk amuyaskayäta.

Jiskʼaskayät ukhajja, awk taykajajj arumay uruw uta alañatak trabajipjjäna, ukatwa achachilanakajak uñjapjjetäna. Ukampis sapa pä sabadow familjamajj manqtʼasiñatak tantachtʼasipjjerïta. Ukajj nayatak askipunïnwa.

Awk taykajajj cheqapuniw 1958 maran mä uta alapjjäna. Ukhaw jupanakampi kusisita jakasjjayäta. Ukampis mä jukʼa tiempokiw ukham jakasiyäta, sojjta phajjsitjja tatajaw cáncer usumpi jiwjjäna.

Wali aynachtʼatayätwa. Akham orasirïta: “Dios Tata, tatajar qhespiyakimaya sasaw ruwtʼasiyäsma. Jupan yanaptʼap wal munta. ¿Kunatarak jan istʼistasti?” sasa. Tatajat wal yatiñ munayäta. ‘¿Alajjpacharut sarjjpacha, jan ukajj wiñayatakich chhaqawayjjpacha?’ sasaw jisktʼasiyäta. Awkinïsipki uka wawanakat wal envidiasirïta.

Walja maraw cementerior sapüru sarirïyäta. Tatajar imapkäna uka nayraqatan qonqortʼasisaw akham mayisirïta: “Dios Tata, ampsuma, kawkinkis tatajajja, uk yatiñ munta” sasa. Kunatakis lurpachïstu uk yatiñatakis mayirakiyätwa.

Ukat 13 maranirojj alemán aru yateqañ amtta, ukhamat uka arun walja qellqatanak utjkäna ukan jisktʼanakajat yatjjatañataki. 1967 maranjja, Alemania oriental (jichhajj janiw  utj-jjeti) markankir Jena sat markaruw yateqer sarjjta. Alemania markankir filosofonakan libronakapat wal yatjjatayäta. Yamas kunatsa jaqejj utji uka toqet jukʼamppach yatjjatayäta. Mä qawqha amuyunakajj askjamänwa, ukampis janiw yanaptʼkitänti. Diosar mayisiskakiyätwa.

KUNJAMSA BIBLIAJJ YANAPTʼAWAYITU.

Hungría markaruw 1970 maran kutʼawayjjta, ukanwa Rose tawaqorojj uñtʼta, qhepatjja jupampiw casarasjjta. Uka tiemponjja, Hungría markajj comunismompi apnaqatänwa, ukhamïpansti mä qawqha tiempotjja, Austria markaruw escapjjapjjta. Ukhatjja, Australia markankir Sydney sat markaruw sarapjjañajäna, ukanwa mä tiojajj jakasïna.

Mä qawqha tiempotjja, Austria markan trabajo jikjjatta. Ukan mä trabajir masijaw ‘jisktʼanakamar Bibliaw qhanañchiristam’ sasin mä urojj situ, ukat Bibliat parlir pä libronak churawayitu. Ukaratpach liysusajja, jukʼamp yatiñ munaskakiyätwa, ukatwa Jehová Diosan Qhanañchirinakapar jukʼampi qellqatanak nayar apayaniñapatak qellqta.

Casarasipjjatajat mä mara phoqasipkayät ukhaw Jehová Diosan mä qhanañchiripajj visittʼapjjetu. Kuntï maykayäta ukanak apanitayna, ukat ‘¿Bibliat yatichayasiñ munasmati?’ satajja, jankʼakiw iyaw sista. Wal yatjjatañ munayäta, ukhamïpansti sapa semanan pä kutiw yatichitäna, pusi horanaka.

Kuntï Bibliampi yatichapkitäna ukajja, nayatakejj wali askïnwa. Diosan Jehová sat sutip húngaro arut Bibliajan uñachtʼayapkitäna ukhajj wal muspharayäta. 27 maras misa istʼir sarkchiyätjja, janiw ni mä kutis Diosan sutip istʼirikayätti. Bibliajj qhana, amuykay arunakampiw qhanañchi ukaw muspharayitäna. Jiwatanakajj janiw kuns amuyapkiti, wali sumsa ikipkaspa ukhamäsipkiwa, ukwa Bibliat yateqta (Eclesiastés 9:5, 10; Juan 11:11-15). Paraisonjja, ‘jiwañajj janiw utj-jjaniti’ sasaw Bibliajj qhanañchi, uksa yateqaraktwa (Apocalipsis 21:3, 4). Paraisonjja, ‘jiwatanakajj jaktanipjjaniwa’ ukjja taqe chuymaw suyta, ukan tatajampejj wal jikisiñ munarakta (Hechos 24:15).

Esposajajj taqe chuymaw yanaptʼawayitu. Ratukiw nayrar sartapjjta, pä phajjsitjja kuna qellqatampitï Bibliat yatichapkitäna uk tukuyapjjta. Jehová Diosan Qhanañchirinakapan taqpach tantachäwinakaparuw sarjjapjjäyäta. Jupanakajj munasiri, katoqtʼasiri ukat mayachtʼata ukhamäpjjewa, ukanakajj wal muspharayapjjetäna (Juan 13:34, 35).

Ukat 1976 maranjja, Australia markar sarjjañatakiw permiso churapjjetu. Purisajja, jankʼakiw Jehová Diosan Qhanañchirinakapar thaqtapjjta, jupanakajj sum katoqapjjetu. Ukat 1978 maranwa Jehová Diosan Qhanañchiripäjjapjjta.

WALJA BENDICIONANAKWA KATOQAWAYTA.

Kunanakattï wal yatjjatañ munkayäta uk yatjjatapuntwa. Ukat wali munasir Jehová Dios Awkirus jikjjataraktwa (Santiago 4:8). Janiw ukakïkiti, Diosajj mä Paraíso churapjjäma siskistu ukan tatajar uñjañsa wal suyaskarakta (Juan 5:28, 29).

Ukat 1989 maranjja, kuntï yateqapkayäta uk familianakaru, amigonakaru ukat yaqhanakar parlañatakiw Hungría markar kuttʼapjjta. Cheqas waljaniruw yatichapjjta. Jupanakatjja, 70 jilaw Jehová Diosan Qhanañchiripäjjapjje, mamitajas uka taypinkarakiwa.

Nayajj 17 maraw jisktʼanakajat yatjjatañatak Diosar mayisiyäta, ukat yatjjatawaykt ukhat jichhakamajj 39 maräjjewa. Jichhakamas mayisiskaktwa, ukampis akham sasaw mayisjjta: “Yuspära alajjpachankir Awki, kuntï waynaskäsin ukhajj maykayäsma ukjja, istʼistawa” sasa.