Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 NAYRÏR JANAN PʼEQEÑCHÄWIPA | ¿SUPAYAJJ CHEQAPUNIT UTJPACHA?

¿Supayar ajjsarañasäspati?

¿Supayar ajjsarañasäspati?

Supayajj monóxido de carbono siski ukar uñtasitawa, jan uñjkayawa ukat jan waltʼayirirakiwa

Monóxido de carbono sasin uñtʼatäki ukajja jan uñjkayawa, janirakiw thujskiti, ukat jaqerus jankʼakirakiw jiwayi. Oraqpachanjja venenompi jiwiri jaqenakatjja, chikataniw uka jan wali samanampi venenjat jiwapjje. Ukampis janiw ajjsarañasäkiti. Uka samana utjatap yatiñatakisa, jarkʼaqasiñatakisa walja maquinanakaw utji, ukatwa jaqenakajj jankʼaki kuns lurañatakejj uka maquinanak utanakan uskupjje.

Supayajj uka jan wali samanar uñtasitarakiwa, jan uñjkayawa ukat jaqenakajj jan amuykayakiw munañaparjam sarnaqjjapjjaspa. Ukampis janiw jupar ajjsarañasäkiti, Jehová Diosajj walja yanaptʼanakwa churistu. Ukanakat mä qawqha jichhajj uñjañäni.

Jiwasaw kuns ajllsna. Santiago 4:7 qellqatajj akham siwa: “Supayatakisti saytʼasipjjarakim, uka Supayasti jumanakatjja jaltawayjjarakiniwa” sasa. Supayajj wali chʼamanïkchisa, kuntï jan munktan ukjja, janiw munkir jan munkir luraykistaspati. Kunsa lurañäni ukajj jiwasatäjjewa. 1 Pedro 5:9 qellqatanjja “wal saytʼasipjjam iyawsañanakamanjja” sasaw ewjjtʼistu, ukham lurañäni ukhajja, jupajj janiw kuns lurjjestaniti. Jesusajj Supayan kimspach yantʼanakaparuw saykatäna, ukat jupajj janiw kuns kamachjjänti (Mateo 4:11). Jiwasajj ukhamarakiw lursna.

Diosan amigopäsnawa. Santiago 4:8 qellqatajj “Diosar jakʼachasipjjam” sasaw chʼamañchistu. Ukjja, Jehová Dios pachpaw amigopäñasatak invittʼistu. ¿Kunjamatsa amigopäsna? Kuntï Bibliajj Jupat yatichki taqe ukanakwa yatjjatañasa (Juan 17:3). Diosat jukʼamp yatjjataskakiñänejja, Juparojj jukʼampiw munasiñäni. Jukʼamp munasiñänejja, jukʼampiw serviñ munarakiñäni (1 Juan 5:3). Ukham chʼamachasiñänejja, ¿kunsa Jupajj lurani? Santiago qellqatajj akham tuktʼayi: “Jupasti jumanakarojj jakʼachasirakiniwa” sasa.

Jan walinakat jarkʼaqasiñasatakejj yanaptʼanakwa Jehová Diosajj churistu

Diosaw imantasiñasajja. Proverbios 18:10 qellqatajj akham siwa: “[Jehová] Tatitun sutipajj imantasiña jachʼa torrer uñtatawa, aski jaqenakajj jupan ukar imantasiñataki jutapki ukanakatakejja” sasa. Ukhamajja Diosan sutipajj janiw jan walinakat jarkʼaqasiñatak mä kunäkaspas ukham aytasiñatakïkiti. Jan ukasti uka suti respetirinakajja, yanaptʼa munapki ukhajj kunapachas Diosar jakʼachasipjjakispawa.

Biblianwa yanaptʼa jikjjataraksna. Hechos 19:19 qellqatanjja mä yateqaskay uñachtʼäwiw utji. Ukanjja, Éfeso markankir mä qawqha jaqenakajj  cristianojjapjjäna ukhajj kunsa lurapjjäna ukjja akham qhanañchi: “Layqäpkäna ukanakajja libronakap apanisinwa taqenin nayraqatapan ninar phichantapjje. Uka libronakasti wali jila alanïnwa. [...] ‘Alapajj mä phesqa tunk waranq qollqjamä[nwa]’”. * Uka cristianonakajja layqasiñatak utjkäna taqe ukanakjja wali jila alanïkchïnsa phichantapjjänwa. Ukajj jiwasatak yateqaskayawa. Jichhürunjja akapachajj layqasiñanakampi phoqantatawa. Kuna lurañanakasa, yänakasa, sumäkaspas ukhamäspawa, ukampis ukanakan layqasiñajj utjapuniwa, ukat sajjranakarus jawsarakispawa. Ukhamajja, taqe ukanakat jitheqtañasapuniwa (Deuteronomio 18:10-12).

Qalltan parlaniwayktan uka Rogelio chachajja, 50 maranëjjäna ukhaw Supayan utjatap amuyjjäna. ¿Kunas yanaptʼäna? Jupajj akham siwa: “Janiw Biblianikayätti, jichhajj Biblianëjjtwa, ukan liytʼasaw Supayajj cheqapun utjatap amuyta. Uk yatiñaw jupat jarkʼaqasiñatak yanaptʼawayitu” sasa.

“[Biblia] liytʼasaw Supayajj cheqapun utjatap amuyta. Uk yatiñaw jupat jarkʼaqasiñatak yanaptʼawayitu”

Jutïr pachan Supayajj jan utj-jjani ukhajja, wali sumwa jakasjjañäni. Supayajj walja jaqenakaruw sallqjaski, ukatsti niyaw ‘nina azufre qotaru jaqontatäni’ sasaw Bibliajj qhanañchi (Apocalipsis 20:10). Ukampis ninasa azufresa janiw mä ajayurojj kuns kamachkaspati, ukhamajj uka qotajj janiw cheqpach nina qotäkiti, jan ukasti wiñayatak tʼunjaña sañwa muni. Ukhamajja, Supayajj wiñayatakiw jiwayatäni. ¡Jehová Diosan loqtirinakapatakejj wali kusiskañapunïniwa!

Uka uru puriniñapkamajja, Jehová Diosatsa ukat amtanakapatsa yateqaskakiñasawa. * Ukhamtï lurañänejja, taqe chuymaw mä urojj akham sañäni “¡Supayajj janiw utj-jjeti!” sasa.

^ tʼaqa 8 Akan parlaski uka qollqenakatï romanonakan denario sat qollqepächïnjja, walja qollqepunïpachänwa. Ukha qollqe jikjjatañatakejj 50.000 urunakaw maynejj trabajañapäna.

^ tʼaqa 11 Supayata ukat kunsa layqasiñ toqet Diosajj amuyi ukanakat jukʼamp yatjjatañatakejja, ¿Kunsa Bibliax chiqpachapuni yatichi? sat libron 10 jaljap uñjjattʼäta, ukjja Jehová Diosan mä Qhanañchiriparuw mayisma.