Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Nayra awk taykanakajatakejj ¿kuna suytʼäwis utji?

Nayra awk taykanakajatakejj ¿kuna suytʼäwis utji?

COREA markankir mä periodiconjja, aka arunakaw uñstäna: “Shim Cheong sat mä suma chuyman warmejja, janiw Jesusat kuns yatkänti. ¿Infiernonti tʼaqhesiskpacha?” sasa (The Chosun Ilbo).

Uka qhanañchäwitjja wal parlapjjäna, jupajj walja qellqatanakan (literatura) suma uñtʼatawa. Awkipajj juykhünwa, ukat jupar yanaptʼañatakis jakäwip aptʼasirjamänwa. Suma lurawïnakapatjja, mara maranakaw wali askit uñjatäna, yamas Corea markankir familianakanjja, imill wawanakajj jupat yateqasiñatakiw chʼamachasipjje.

‘Kamisarak Shim Cheong warmejj cristianjam jan bautisasitap laykuki infiernon tʼaqhesjjanisti. Ukhajj Criston yatichäwinakapas janïraw markaparojj purkänti ukhaw taqe ukanakajj pasäna’ sasaw waljanejj amuyapjje.

Uka periodiconjja, mä tatakuran arupaw uñstarakïna. ‘Jesusar jan uñtʼkasin jiwapki ukanakajja, ¿infiernorut sarjjapjje?’ sasin jisktʼatajja, akham sänwa: “Janiw yatktänti. ‘Diosajj [uka kasta jaqenakatakejj] mä amtanïpachawa’ sasakiw amuyapjjta” sasa.

¿QHESPIÑATAKEJJ BAUTISASIÑASAPUNITI?

Mä qellqatajj akham siwa: “Qhespiñatakejj bautismojj wali wakiskiriwa. Cristo pachpaw khititejj umampita Ajayumpita jan naskani ukajj, janiw Diosan reinopar mantkaspati sasin säna (Jn 3.5)” sasa (The New Catholic Encyclopedia). Ukatwa waljanejj ‘jan bautisasis jiwapki ukanakajj infiernoruw sarjjapjje, jan ukajj kunjamats tʼaqhesipjjapuniwa’ sasin amuyapjje.

Ukampisa, yaqhepanakatakejj uka yatichäwejj kʼarïkaspas ukhamawa. Millón millón jaqenakaw Biblia jan uñtʼas jiwawayapjje. Ukhamajj ¿jupanakan wiñay tʼaqhesiñapajj wakisipuniti? ¿Bibliajj kamsisa?

¿KUNSA BIBLIAJJ YATICHI?

Diosan arunakap jan uñtʼkas jiwapki ukanakarojj Diosajj janiw yaqhachkiti sasaw Bibliajj qhanañchi. Hechos 17:30 qellqatajj akham siwa: “Diosajj nayra jakir jaqenakan pisi amuyump jakatanakapjja janis kunäkaspa ukhamwa [uñjäna]” sasa. Ukhamajj Diosar jan uñtʼkasa jiwapki ukanakatakejj ¿kuna suytʼäwis utji?

“Jumajj nayampi chika[w] paraisonkjjäta” sasajj ¿kamsañsa Jesusajj munaskäna?

Uk yatiñatakejja, Jesusamp chika pä chachanak chʼakkatatäkän ukanakat maynirirojj Jesusajj kamsänsa uk amuytʼañäni. Uka chachajj Jesusar akham sänwa: “Taqe markanak apnaqkäta ukkhajj nayat amtʼasitätawa” sasa. Uk satajja, Jesusajj akham sänwa: “Cheqpachawa [‘jichhürpacha’, NM] sisma, jumajj nayampi chika[w] paraisonkjjäta” sasa (Lucas 23:39-43).

Ukampejj “alajjpacharuw saräta” sañti Jesusajj munpachäna. Janiwa, uka chachajj janiw wasitamp naskänti, mä arunjja, janiw umatsa ni qollan ajayutsa naskänti, Diosan Reinopar mantañatakejj ukaw munasi (Juan 3:3-6). Ukhamajj ¿kamsañsa Jesusajj munpachäna? Paraisoptayat aka Oraqenwa mayamp jakasjjäta sañwa munaskäna. Uka chachajj judío jaqënwa, Génesis qellqatan Edén jardinat parlki uka Paraisot jupajj sum yatpachäna (Génesis 2:8). Jesusajj mä suma suytʼäwitwa parlaskäna. Paraisoptayat aka Oraqenwa jaktjjäta sasaw uka chacharojj saskäna.

Bibliajj akham siwa: ‘Jiwatanakat ñanqha jaqenakasa, aski jaqenakasa jaktapjjaniwa’ sasa (Hechos 24:15). ‘Ñanqha jaqenaka’ sasinjja, Diosan arunakap jan uñtʼkasa jiwapki uka jaqenakatwa parlaski. Jesusajja, Paraisoptayat aka Oraqen jakasiñapatakiw uka jan wali lurir chacharusa ukat Diosan arunakap jan uñtʼkas jiwapki uka millón millón jaqenakarus jaktayani. Ukat ukanwa Diosan arunakapat yateqapjjani, ukat  ukarjam sarnaqasaw Diosar cheqapun munasipjjatap uñachtʼayapjjani.

ÑANQHA JAQENAKAJJ JAKTJJAPJJANIWA

‘Ñanqha jaqenakajj’ jaktjjapjjani ukhajja, ¿kuntï jakkasin lurawayapki ukarjamat juchañchatäpjjani? Janiwa. Romanos 6:7 qellqatajj akham siwa: ‘Khititejj jiwki ukajj juchatjja librëjjewa’ sasa. Jupanakajj jakäwipampiw taqe juchanakap pagawayjjapjje. Ukhamajj janiw nayra jan wali luratanakapat juchañchatäpkaniti, jan ukasti jaktjjasin kunanaktï lurapkani ukarjamaw juchañchatäpjjani. ¿Kunatsa ukajj jupanakatak wali aski?

Kunattejj Diosan leyinakapwa yateqapjjani, mä arunjja, machaq rollonakaw uñstani sasin Bibliajj siski ukwa yateqapjjani. Ukatjja, “luräwinakaparjam[aw]” juchañchatäpjjani, mä arunjja, uka leyinakar istʼapjjaniti janicha ukarjamaw juchañchatäpjjani (Apocalipsis 20:12, 13). Paraisoptayat aka Oraqen jaktapkani ukanakat jila partejja, ukanpunwa wiñay jakasiñatakejj Diosan munañapat yateqapjjani ukat ukarjam sarnaqañatakis uñachtʼayapjjani.

Biblian uka yatichäwipaw waljanirojj Diosar wasitamp confiyañatakejj yanaptʼawayi. Ukanakat maynïrejj Yeong Sug sat warmiwa. Jupajj Católica Iglesianwa jilsuwayäna, taqe chuymapuniw ukar saräna. Familiaranakapat mä qawqhanejj tatakuräpjjänwa. Jupajj wal monjañ munäna, ukatwa convento utar mantäna, ukampis mä jukʼa tiempokiw ukankäna. Kunanaktï ukan lurapkäna ukajj janiw jupatak askïkänti. ‘Jaqenakajj infiernonwa tʼaqhesipjje’ sasin yatichapki ukajj jupatak janipuniw walïkänti.

Tiempompejja, Jehová Diosan mä Qhanañchiripaw Biblian aka arunakap uñachtʼayäna: “Jakasipki ukanakajja yatisipjjewa jiwjjañanakapa, ukampis jiwatanakajj janiw kunsa yatipkiti” sasa (Eclesiastés 9:5). Ukatjja, “nayra awk taykanakamajj janiw infiernon tʼaqhesiyatäpkiti, antisas ikisipkaspas ukhamäsipkiwa ukat jiwatat jaktañwa suyasipki” sasaw qhanañchäna.

Biblian yatichäwinakap walja jaqenakajj jan uñtʼapkatapjja, Yeong Sug warmejj sum yatïna. Ukatwa, kuntï Mateo 24:14 qellqatan Jesusajj siskäna ukarjam lurañ amtäna. Ukan akham siwa: “Diosan reinopat aka suma yatiyäwisti aka oraqpachanwa yatiyatäni, ukhamat taqe markanakan yatipjjañapataki, ukatsti akapachan tukusiñapaw jutani” sasa. Kuna suma yatiyäwinaktï Bibliat yateqawaykäna ukanakwa jaqenakar jichhajj yatiyaski.

‘DIOSATAKEJJ TAQE KASTA JAQES MAYAKIWA’

Biblianjja akham siwa: “Diosatakejj taqe kasta jaqes mayak[iwa]. Jupasti kuna kast jaqerus katoqakiwa, khitinakatejj jupar ajjsarki, ukhamarak aski lurapki taqe ukanakarusa” sasa (Hechos 10:34, 35). Taqe kuns cheqapar uñjiri Diosar confiyañajj wali askiwa. ¿Kunatsa? Kunattejj Diosajj ‘askimpir cheqampir muniriwa’ (Salmo 33:5).