Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 JEHOVÁ DIOSAN QHANAÑCHIRIPAMPIW PARLTʼASKI

¿Kunatsa Diosajj tʼaqhesiñanak jan jankʼak tukjkpacha?

¿Kunatsa Diosajj tʼaqhesiñanak jan jankʼak tukjkpacha?

Jehová Diosan mä Qhanañchiripaw vecinopampi parltʼaski. Uk uñjksnas ukham amuytʼañäni, Jehová Diosan Qhanañchiripajj Mishel satawa, jupajj Sofía sat mä warmiruw wasitampi visittʼaski.

TʼAQHESTAN UKHAJJ ¿KUNJAMAKIS DIOSAJJ JIKJJATASPACHA?

Mishel: Sofía ¡kamisaki! Walikpun utamankasktajja.

Sofía: Jïsa, jumar uñjasajj kusisiraktwa.

Mishel: Tʼaqhestan ukhajj kunjamakis Diosajj jikjjatasi uka toqetwa pasïrin parlaskayätanjja. * Jaya tiempow ukham jisktʼasjjta sasaw saskayätajja, yamas mamaman mä chijir purtʼasitapatjja jukʼampiw ukham jisktʼasiyäta sarakiyätasä. Jichhajj mamamajj ¿kunjamäskisa?

Sofía: Awisajj walikïskiwa awisajj janiraki, ukampis jichhajj walikïskiwa.

Mishel: Walikjjay walikïskchi. Ukham jan walin uñjasiñajj wali chʼamäpachawa.

Sofía: Jïsa, ukajj ukhamawa, kunapachkamarak ukham tʼaqhesiskakiñäni sasaw awisajj jisktʼasta.

Mishel: Ukham jisktʼasitamajj walikïskiwa. Pasïrin parlaskayätan ukhajja, niyakejjay Diosajj wali chʼamanïchejja, kunatsa tʼaqhesiñ jan jankʼak tukjpacha sasaw jisktʼaskayäsma.

Sofía: ¡Ah jïsa! Amtasisktwa.

Mishel: Bibliajj uka toqet kamsisa uk janïr qhanañchtʼkasajja, pasïrin kunanakatsa parltʼawaytan uk mä qawqhanak amthaptʼañäni.

Sofía: Walikiwa.

Mishel: Nayraqatjja, Biblia qellqaskäna uka tiemponakanjja, suma chuyman mä chachaw ¿kunatsa Diosajj tʼaqhesiñanak jan jankʼak tukjpacha? sasin jisktʼasïna. Ukat Diosajj janiw jupar toqenoqkänti, jukʼamp iyawsäwiniñamawa sasas janirakiw siskänti, ukwa pasïrin yateqaskayätanjja.

Sofía: Nayajj uk janiw yatkayätti.

Mishel: Ukat Jehová Diosajj tʼaqhesktan ukhajj kunjamsa Jupajj jikjjatasi uksa yateqawayaraktanwa. Kunapachatï markapajj tʼaqheskäna ukhajja, Jehová Dios ‘Tatitojj ayqopjjatap uñtanïnwa, arnaqasitanakapsa istʼänwa’ * sasaw Bibliajj qhanañchi saskayätanwa. Ukhamajja, Diosajj tʼaqhesitanakasjja, uñjiwa ukat sinttʼasirakistuwa.

Sofía: Ukhamajj sinttʼaspachistuya.

Mishel: Ukat niyakejjay Diosajj wali chʼamanïchejja, kunjamatsa jan walinak chhaqtayapuniniwa sasaw amuytʼawayaraktanjja.

Sofía: Ukpï jan sum amuyktejja, Jupatï jan walinak chhaqtayañatak chʼamanïchejja, ¿kunatsa jan jankʼak tukjpacha?

¿KHITIS CHEQ PARLASKÄNA?

Mishel: Bibliankir Génesis librot amuytʼañäni, Adanampin Evampin sarnaqäwipat ¿yattati?

Sofía: ¡Ah jïsa! Iglesianwa uk yatichapjjetu. Janiw mä qoqat manqʼapjjätati sasaw Diosajj säna, ukampis jupanakajj janiw istʼapkänti.

 Mishel: Ukhamawa. Ukampis uka nayrajj kunas pasatayna uk yatjjatañäni, kunatsa jaqenakajj tʼaqhestan uka toqetwa qhanañchi. Génesis 3 jalja ukat 1 tʼaqat 5 tʼaqakam ¿liytʼasmati?

Sofía: Kun janisti, akham siwa: “Diosasti taqe animalanak lurkatayna ukanak taypinjja katarejj wali chʼikhïnwa taqe animalanakat sipansa, ukatsti warmiruw jisktʼäna akham sasa: ‘¿Ukhamajj Diosajj sapjjtamti: “Janiw kawkïri qoqan achunakapsa manqʼapjjätati” sasa?’ Warmisti ukjjarojj sarakïnwa: ‘Kawkïri qoqan achupatsa manqʼasipkakiristwa, chika taypinkki uka qoqan achunakapakwa janejj manqʼapkiristtejja. Diosasti sapjjarakituwa: “Janiw uka qoqan achupjja manqʼapjjätati ni llamktʼapjjätasa. Manqʼapjjäta ukhasti jiwapjjataw” sasa’. Kataristi warmirojj sänwa: ‘Janiw ukajj cheqäkiti, kʼariwa. Janiw jiwapkätati. Diosajj yatiwa, kunapachatejj jumanakajj uka qoqan achunakapata manqʼapjjasma ukkhajj yatipjjasmawa kunatejj askïki, ukhamarak ñanqhäki ukanakjja, ukatsti Diosjamäpjjasmawa’ sasa”.

Mishel: Yuspära. Uka jiskʼa tʼaqanakat amuytʼañäni. Eva warmiruw mä katarejj jan ukajj asirojj parljjayäna sasaw nayraqat qhanañchi. Ukat yaqha jiskʼa tʼaqanakanjja, Supayaw asiru toqnäm parläna sasaw qhanañcharaki. * Ukat Supayajj kuna qoqattï Diosajj janiw manqʼapjjätati siskäna uka toqetwa Evar jisktʼäna. Jumanakatï jan istʼapkitäta ukhajj ¿kunaw pasani sasas Diosajj Adanampir Evampir säna?

Sofía: Jumanakajj jiwapjjätawa sasarakis sänjja.

Mishel: Jïsa ukhamawa. Ukjjarusti Supayajj Diosaruw kʼarintäna. Akham sänwa: “Janiw ukajj cheqäkiti, kʼariwa. Janiw jiwapkätati” sasa. Diosarojj kʼariwa sasaw säna.

Sofía: Uk janipuniw istʼirïkti.

Mishel: Kuntï Supayajj Diosjjat siskäna ukajj cheqati janicha ukajj tiempompiw yatisiñapäna. ¿Kunatäpachas uk yattati?

Sofía: Mmm... janiw yatkti.

Mishel: Akham amuytʼañäni. Nayajj jumat sipan jukʼamp chʼamanïtwa sasin sirisma ukhajja, ¿kunjamatsa ukajj cheqati janicha uk yatisma?

Sofía: Inas chʼam yantʼasiñ wakischispa.

Mishel: Ukaw wakisispa. Mä jathi qʼepi utjaspa ukat khitiy aptsna ukarjamaw khitis wali chʼamanïtan uk yatsna. Uk yatiñajj janiw chʼamäkaspati.

Sofía: Jïsa, amuytwa.

Mishel: Ukampis janiw honradökiti sasin jumat parlirista ukhajja, ukajj cheqati janicha uk yatiñajj ¿jukʼamp chʼamäjjaspajjaya?

Sofía: Jïsa, jukʼamp chʼamäspawa.

Mishel: Maynejj honradot janicha ukajj janiw aleq chʼam yantʼasisak yatiskaspati.

Sofía: Ukajj cheqäskapuniwa.

Mishel: Juman honradötam yatipjjañapatakejja, tiempow munasispa, ukhamat kunjam jaqëtas uk uñjapjjañapataki.

Sofía: Jïsa, ukajj walïspawa.

Mishel: Wasitampi Génesis libro uñjjattʼañäni. Nayaw Diosat sipan jukʼamp chʼamanïta ¿sasat Supayajj sispachäna?

Sofía: Janiw ukham siskänti.

Mishel: Uktï saspänjja, Diosajj jankʼakiw ukajj kʼarïtap uñachtʼayaspäna. Ukampis Diosajj janiw honradökiti sasaw Supayajj saskäna. Mä arunjja, Eva warmirojj akham siskaspas ukhamänwa: “Diosajj kʼarintasktamwa; nayaw cheq parlasksma” sasa.

Sofía: Ukham kʼarisitapastï.

Mishel: Diosajj wali yatiñaniwa ukatwa kuntï Supayajj siskäna uk qhanstañapatak tiempo churäna. Ukhamatakwa khitis jupanakat cheq parlaskäna ukajj yatisispäna.

¿KUNAMPSA SUPAYAJJ SISPACHÄNA?

Sofía: Ukhamajj Eva warmejj jiwjjäna ukhay Diosan cheq parlaskatapajj qhan amuyasjjpachänjja.

Mishel: Ukham sañjamäspawa. Ukampis Supayajj janiw ukak siskänti. Mayampi 5 jiskʼa tʼaqa  uñjjattʼañäni. ¿Kunampsa Supayajj Eva warmir sispachäna?

Sofía: Uka qoqan achunakap manqʼapjjäta ukhajja, kunatï askïki, ukhamarak ñanqhäki uk yatipjjätawa sasaw säna.

Mishel: Ukhamawa, ukat manqʼantapjjasma ukhajja, “Diosjamäpjjasmawa” sasaw sarakïna. Ukampejj kunatï askïki ukanakatsa Diosajj jaqenakar jarkʼkaspa ukhamwa amuyayäna.

Sofía: ¡Ah!

Mishel: Uk sasajj Diosaruw kʼarintaskarakïna.

Sofía: ¿Kunjama? Janiw sum amuykti.

Mishel: Ukham sasinjja, Supayajj Diosan yanaptʼapajj janis wakiskaspa ukhamwa Evarojj amuyayäna ukat jiwasarus ukhamwa amuyayañ munistu. Jehová Diosajj kuntï Supayajj siskäna uk qhanstañapatakejj tiempwa Supayar churäna. Ukatwa mä qawqha tiempo aka oraqen apnaqañapatak jaytäna. Ukhamïpanwa jichhürunakan walja tʼaqhesiñanakajj utji, kunattejj Supayaw aka oraqjja apnaqaski, janiw Diosajj apnaqkiti. * Ukampis suma yatiyäwinakaw utji.

Sofía: ¿Suma yatiyäwinaka?

Mishel: Jïsa, Bibliajj pä suma yatiyäwinakwa Diosat yatichistu. Mayajj akawa: kunapachatï tʼaqhesktan ukhajja, Jehová Diosajj uñjaskistuwa. Kuntï David reyejj qellqkatayna uk Salmo 31:7 jiskʼa tʼaqan liytʼañäni. Jupajj jakkäna ukhajj wal tʼaqhesïna ukampis kamsänsa Diosarojj uk uñjañäni. ¿Uka jiskʼa tʼaq liytʼasmati?

Sofía: Jïsa, akham siwa: “Khuyapayasiñam laykuw kusista, kʼuchirasirakta. Jumaw llakinakajj amuyistajja, jakañajjan chijinakap uñjaraktajja”.

Mishel: Davitajj wals tʼaqheskchïnjja, Jehová Diosajj jupar uñjaskatap yatiñajj wal chuymachtʼäna. Jehová Diosajj taqe kunwa uñjaski, kunanakas tʼaqhesiyistu uk jaqenakajj janis amuyapkchejja, Jupajj sumwa amuyistu. Uk yatiñajj ¿jumar chuymachtʼaraktamti?

Sofía: Jïsa, walpun chuymachtʼitu.

Mishel: Payïr suma yatiyäwisti akarakiwa: Diosajj janiw wiñayatak tʼaqhesiñas munkiti. Ukatwa Supayan apnaqat akapachajj niyaw tukjatäni sasin Bibliajj qhanañchi. Ukat kuna jan walinakatï tʼaqhesiyaskistu ukanaksa chhaqtayarakiniwa, kunatï mamitamarusa tʼaqhesiyki ukat jumarus tʼaqhesiyktam uksa chhaqtayjjarakiniwa. Diosajj niyaw taqe jan waltʼañanak chhaqtayjjani sasajj kunatsa sistan uk qhanañchtʼañatak maya seman jutirïsta ukajj ¿walikïspati? *

Sofía: Jïsa, walikïspawa.

¿Biblia toqet kuna jisktʼamas utjiti? Kuntï Jehová Diosan Qhanañchirinakapajj lurapki jan ukajj yatichapki uka toqet ¿kuna jisktʼamach utji? Ukhamächi ukhajja, jupanakar uñjkäta ukhaw jisktʼasma. Jupanakajj taqe chuymaw qhanañchtʼapjjätam.

^ tʼaqa 7 “Jehová Diosan Qhanañchiripampiw parltʼaski” siski uka yatichäwi Yatiyañataki julio 1, 2013 revista uñjjattʼäta. Ukat Internetanjja, www.jw.org/ay cheqanwa utjaraki.

^ tʼaqa 17 Salmo 106:44 uñjjattʼäta.

^ tʼaqa 61 Jukʼamp yatjjatañatakejja, ¿Kunsa Bibliax chiqpachapuni yatichi? sat libron 9 jaljap uñjjattʼäta, uka qellqatajj Jehová Diosan Qhanañchirinakapan luratawa. Ukat Internetanjja, www.jw.org/ay cheqanwa utjaraki.