Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 SARNAQÄWI

Jehová Diosar taqe chuyma serviñ amtawayta

Jehová Diosar taqe chuyma serviñ amtawayta

Colegiot mistjjasajja, 1937 maranwa Iowa (Estados Unidos) markankir Universidadar mantawayta, ukajj jakasipkayät uka jakʼankänwa. Ukat jachʼa edificionakata, warkuskir puentenakat yatjjatañ munapuniriyätwa. Niyakejjay Universidadar sarchiyätjja ukat uk pagañatakis trabajchiyätjja, jan tiemponikiw sarnaqayäta.

Estados Unidos markajj Payïr Jachʼa Chʼajjwäwir mantkäna uka qhepatjja, phesqa maranakaw Universidadan yatjjatjjayäta, ukhajja 1942 qallta maraskänwa, ukat arquitectjam mistuñatakejj mä qawqha phajjsikiw faltjjetäna. Ukhajj pä waynamp chikaw jakayäta, ukat maynïrejj akham sitänwa: “Aynach pisor” visitir jutki ukamp parltʼasmasti sasa. Visitirejj Jehová Diosan Qhanañchiripänwa, John O. (Johnny) Brehmer satänwa. Jupajj kuna jisktʼarus Bibliampipuniw qhanañchirïna, uk uñjasajj wal muspharirïta. Ukat jupampiw Bibliat yatjjatañ qalltawayta, qhepatjja, tiemponïkayät ukhajj jupampiw Diosan arunakap yatiyir sarirïta.

Johnny chachan tatapajj Otto satänwa, jupajj Walnut (Iowa) markan mä bancon pʼeqtʼirjam trabajkäna ukhanakaw Jehová Diosan Qhanañchiripäjjatayna, ukat Diosatak sapüru irnaqañatakiw trabajop jaytatayna. Jupata ukat familiapat yateqasiñaw mä suma amtar puriñatak yanaptʼawayitu.

DIOSAR SERVIÑ AMTAWAYTA

Mä kutejj akham sasaw directorajj situ: ‘Notanakaman aynachtʼasktawa janjamakiw arquitectjam mistkätati’ sasa. Uk sum amuytʼasiñajatakejja, Jehová Diosaruw taqe chuym mayista. Ukat Ingeniería toqet yatichapkitäna ukaw jawsitu, mä trabajotakiw mä ingeniero mayipjjatayna, jupasti nayan sarañajatakiw parlatayna. Ukham luratapat yuspärasinjja, Jehová Diosar serviñ amtawayta sasaw jupar sista. Ukat junio 17, 1942 maranwa bautisasjjta, ukat jankʼakiw precursorjam irnaqañ qalltta, Jehová Diosan Qhanañchirinakapajja, Diosatak sapür irnaqapki ukanakaruw precursor sapjje.

Uka mararakiw cuartelar sarañajatak jawsapjjetäna. Ukat uka oficinar purisajja, janiw guerrar sarkiristti kunattejj concienciajarjamajj janiw walïkiti sasaw sista. Ukat kuna documentonaktï yatichirinakajajj nayan suma yateqerïtajata ukat arquitectjam sum kuns lurañ yatitajat qhanañchkäna uka firmat papelanakwa uñachtʼayta. Ukhamäkchïnsa 10.000 dolaranakwa multa apsupjjetu, ukat phesqa maranakatakiw Leavenworth (Kansas) markankir carcelan jistʼantapjjetu.

CARCELARUW JISTʼANTAPJJETU

Leavenworth (Estados Unidos) markankir carcelaruw 230 ukhanir jistʼantapjjetäna. (Jichhak apstʼat foto)

Carcelan mä granjaw utjäna, ukat ukanjja Jehová Diosan Qhanañchirinakapat 230 jilaw guardianakamp uñjata trabajapjjayäta. Uka guardianakatjja waljaniw guerran jan nuwasiñ munapjjataj yatipjjäna, ukat uk askitwa uñjapjjäna.

Yaqhep guardianakajja, Bibliat yatjjatañatak tantachäwinak apasiñapatakejj yanaptʼapjjetänwa, ukat Bibliat apstʼat qellqatanak carcelar apantañatakis yanaptʼapjjarakitänwa. Carcelan pʼeqtʼkäna ukasa  Consolación (jichhajja, ¡Despertad!) sat revista katoqañatakiw qellqayasïna.

CARCELATWA APSJJAPJJETU UKAT MISIONERJAMAW IRNAQJJTA

Payïr Jachʼa Chʼajjwäwi janïr tukuskipanwa carcelat apsjjapjjetu, febrero 16, 1946 marana, janiw phesqa maranak phoqawaykti kimsa marakiw carcelankayäta. Ukatjja ratukiw precursorjam irnaqjjayäta. Ukat Leavenworth (Kansas) markaruw khitapjjetu. Ukan wal sustjasiyäta, kunattejj Jehová Diosan Qhanañchirinakaparojj wal yaqhachapjjerïna. Trabajo jikjjatañas wali chʼamänwa, yamas jakañatak uta jikjjatañajj jukʼamp chʼamänwa.

Mä kutejj utat uta yatiykasajja, carcelan uñjapkitän ukanakat mä guardiampiw jikista. “¡Mistum akata!” sasaw béisbol anatañ lawa aytʼat arnaqjjetu. Sustjasisajj ukspachaw sarawayjjta. Yaqha utansti, mä warmejj “mä rat akan suytʼam” sasaw punkup jistʼkatasiwayi, ukat mayakwa alay ventanapat qʼañu umamp warjjatanitu. Ukhamanakas utjchïnjja, walja bendicionanak katoqawayta. Bibliat apstʼat qellqatanak churkayät ukanakat yaqhepajj Jehová Diosan Qhanañchiripäjjataynawa, uk mä qawqha tiempotwa yatjjayäta.

Ukat 1943 maranjja, Nueva York markanwa Misioneronakan Bibliat Yatjjatapjjañapatak Galaad Escuelajj uttʼayasïna. Ukat tunkïr yatichäwir sarañajatakiw invittʼapjjetäna, ukat febrero 8, 1948 maranwa uka escuelat mistjjta. Ukjjarusti Costa de Oro (jichhajj Ghana) markaruw khitapjjetäna.

Ukar purisajja, Europa uksa toqenkirinakaru ukat marka apnaqerin yanapirinakaparuw Diosan arunakap yatiyañajäna. Seman tukuyanakajja, mä tamaruw yanaptʼayäta ukat uka tamankirinakaruw utat uta yatiyapjjañapatak yanaptʼarakiyäta. Ukatsti jaya cheqanakan jakasir jilat kullakanakarusa visittʼarakiyätwa, ukat kunjamsa yatiyapjjaspa uksa yaticharakiyätwa. Ukatjja, Costa de Marfil markanwa tamanak tumptʼirjam irnaqarakiyäta.

Uka cheqankirinakjam jakañwa yateqayäta: adobet lurat jiskʼa utanwa ikiyäta, amparampikiw manqʼayäta ukat aleq pamparukiw baño lurirejj sarayäta, kunjamtï israelitanakajj wasaran ‘campamento anqäjjaru’ sarapjjerïna ukhama (Deuteronomio 23:12-14). Ukhamatwa ukankirinakajj nayarusa ukat misionero masinakajarus confiyjjapjjetäna. Ukat yaqhep autoridadanakan warminakapasa Bibliat nanakamp yatjjatañ qalltapjjarakïnwa. Ukat kuna documentotï uka markankañatak utjapkitäna ukjja, jan valoranïñapatakiw uñisipkitän ukanakajj gobiernot mä orden apsupjjäna, ukampis uka warminakaw uka orden jan phoqasiñapatak chachanakapar waytʼapjjäna, ukhamatwa uka ordenajj jan phoqasjjänti.

 África toqenkapki uka misioneronakjamaw paludismo usump usuntta. Wal thayjirïtu ukat jumpʼjarakirïtuwa, calenturas jan amuyunjamaw parlayirïtu. Ukat awisajj kʼatatiñats walpun lakajajj onoqjjeri, ukatwa amparamp kattʼasirïta. Ukhamäkchïnsa Diosar servisajj kusisitäyätwa.

Africankkasajj pusi maraw Eva Hallquist kullakampejj carta qellqasipjjayäta, Estados Unidos markat janïr sarkasaw jupar uñtʼawayta. Ukat Galaad Escuelat 21 yatichäwitwa julio 19, 1953 maran mistuni sasaw yatiyapjjetäna. Ukajj Jehová Diosan Qhanañchirinakapan walja markanakat jachʼa tantachäwejj Nueva York markan Yankee estadionan utjañapäkän ukanwa apasiñapäna. Ukhamajja, ukar sarañatakejj mä barcon capitanapampiw mä amtar mantapjjta; jupajj Estados Unidos markaruw nayar puriyañapäna, ukat pasaje lantejja, barconwa viajkasajj trabajañajäna.

Ukat 22 urunakaw lamar qotnäm barcot sarapjjta awisajj wali thayänwa, ukhampachas puripjjtwa. Purisajj jankʼakiw Jehová Diosan Qhanañchirinakapan oficinapar Eva kullakar thaqher sarta. Ukatjja, uka edificion qhep qhepa pisoparuw irpkatta, uka alayatjja qota lakasa, jachʼa edificionakas sumaw uñjasïna, ukanwa Evarojj nayamp casarasiñapatak mayta. Casarasjjasinjja, Costa de Oro sat markaruw Diosar servir sarapjjta.

FAMILIAR UÑJAÑAW WAKISÏNA

Walja maranakaw Africankapjjayäta, ukat tatamaw canceramp niy jiwañampïski sasaw mamajajj mä carta qellqanitu. Ukat Estados Unidos markar sarañatakiw permiso mayipjjta, permiso churapjjetän ukhajj mäkiw tataj uñjir sarapjjta. Ukampis jukʼampikiw tatajajj usuntjjatayna, puripkta ukat mä qawqha urunakat jiwjjakïnwa.

Ukat wasitatwa Ghana markar kuttʼapjjta, pusi marampiw ukankawayapjjta ukat mamajarakiw usuntjjäna. Mamamar uñjañatak kuttʼañamawa sasaw yaqhep amigonakajj sapjjetäna. Uka amtar puriñajj wali chʼamänwa. Mä 15 maranakaw misionerjam servjjayäta, uka maranakatjja 11 maranakaw warmijampejj serviwayapjjta. Ukampis mamajar uñjañatakiw Estados Unidos markar kuttʼapjjta.

Costa de Oro (jichhajj Ghana) markankir mä pʼeqtʼirimpïsipktwa

Walja maranakaw mamajar uñjañatakejj warmijamp turnasipjjta ukat tantachäwinakar sarirjamäkän ukhas irpapjjarakiyätwa, ukampis enero 17, 1976 maränwa jiwjjäna, 86 maranëjjänwa. Llätunka maranak qhepatjja, warmijarakiw cáncer usumpi usuntäna. Qollasiñapatakejj inamayakiw wal chʼamachasipjjta, jupajj junio 4, 1985 maranwa jiwawayjje. Ukhajj 70 maranëjjänwa.

YAQHA BENDICIONANAK KATOQARAKTA

Ukat 1988 maranjja, Ghana markanwa mä machaq sucursalajj utachañ tukuyasiskäna ukar sarañajatakiw invittʼapjjetäna. ¡Ukankañajj wali kusiskañapunïnwa! Niya 40 maranak nayrajj Ghana markar purkayät ukhajja, Jehová Diosan Qhanañchirinakapajj jukʼanikïpjjänwa. Ukat 1988 maranjja 34.000 ukhanëjjapjjänwa, jichhajj niya 114.000 ukhanëjjapjjarakiwa.

Ghana markar visittʼir saratajat pä mara qhepatjja, Eva warmijan Betty Miller sat suma amigapampiw casarasjjta, agosto 6, 1990 marana. Jupampejj Jehová Diosar taqe chuyma servisipkaktwa. Ukat kunapachatï aka Oraqejj mä suma paraisöjjani ukhajja, panpachaniw achachilanakajarusa, awk taykanakajarusa ukat Evarusa uñjañ munapjjta (Hechos 24:15).

Ukat Jehová Diosajj 70 jila maranak Jupar serviñatak chʼam churatapat walpun yuspärta, taqe ukanakat amtasta ukhajj chuymas wal chʼalljjtitu. Jichhajj 90 jila maranakanëjjtwa, Jehová Diosajj Jupar serviñatak chʼam churaskakituwa.