Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 NAYRÏR JANAN PʼEQEÑCHÄWIPA | ¿KUNA KʼARI YATICHÄWINAKAS JAQENAKAR DIOSAT JITHEQTAYI?

Diosan arunakapaw qhespiyistaspa

Diosan arunakapaw qhespiyistaspa

Mä urojja, Jesusajj Awkipatwa Jerusalenan parläna, ukat kuna kʼarinaktï uka tiempon religión pʼeqtʼirinakajj yatichapjjäna uk sum qhanstayäna (Juan 8:12-30). Kuntï siskäna ukajja, kunjamsa jichhürunakan utjki uka yatichäwinak uñjañasa uk amuyañatakiw yanaptʼistu. Jupajj akham sänwa: “Jumanakatejj cheqpach saytʼapjjäta kuntejj sapjjsma ukhamarjama ukkhajja, nayan cheqpacha discipulonakajjaw tukupjjäta. Uñtʼapjjarakïtawa kunatejj cheqäki ukjja, uka cheqa kankañasti qhespiya[pjjarakïtamwa]” sasa (Juan 8:31, 32).

“Jumanakatejj cheqpach saytʼapjjäta kuntejj sapjjsma ukhamarjama” sasin Jesusajj siskäna ukajja, religionanakajj kunatï cheqäki ukti yatichasipki janicha uk amuyañatakïnwa. Kunapachatï Diosat kuns parlapjjätam ukhajja, akham jisktʼasiñamawa: “¿Uka arunakajj kuntï Jesusajj yatichkäna ukat kuntï Bibliajj yatichki ukarjamäskiti?” sasa. Apóstol Pablor istʼapkäna ukanakajja, kuntï jupajj siskäna ukajj cheqapunïskiti janicha uk yatiñatakejj Qellqatanakatwa yatjjatapjjäna, jiwasajj jupanakatwa yateqasiñasa (Hechos 17:11).

Ukwa Marco, Rosa ukat Raimunda jupanakajj lurapjjäna: Jehová Diosan Qhanañchirinakapampiw Bibliat yatjjatapjjäna. ¿Kunsa jupanakajj yatjjatawayapjje?

Marco: “Yatichapkitäna uka jilatajja, kuntï warmijampi jisktʼapjjerïta ukarojj Bibliampipuniw qhanañchapjjerïtu. Ukat jukʼat jukʼatwa Jehová Diosar munasjjapjjayäta ukat chacha warmjamas jukʼamp sumwa apasjjapjjta”.

Rosa: “Bibliajj jaqenakan amuyuparjam Diosat qhanañchañ munir aleq librokïkaspas ukham amuyayäta. Ukampis tiempompejja, kuna jisktʼanakatï utjkitäna ukjja, Biblianwa jikjjatta. Jichhajja, Jehová Diosarojj cheqapunis uñjkirista ukhamwa amuyta, ukat Juparojj wal confiyarakta”.

Raimunda: “Jumar uñtʼañ yanaptʼita sasaw Diosar mayisiyäta. Ukat mä qawqha tiempotjja, chachajamp chikaw Bibliat yateqañ qalltapjjta. Kunatï Jehová Diosat cheqäki ukat kunjam Diosäkitï ukwa yateqapjjayäta. Uk yatisajj wali kusisitäpjjayätwa”.

Bibliajj Diosat janiw kunatï cheqäki ukak qhanañchkistuti, jan ukasti kunjam Diosäkiti uksa qhanañcharakistuwa. Ukat “kuntï Diosajj munasiñampi churkistu ukanak amuytʼañasataki[s]” yanaptʼarakistuwa (1 Corintios 2:12). Kuntï Bibliajj Diosatsa, amtanakapatsa ukat jutïr urunakats qhanañchki ukanakat ¿janit juma pachpa yatjjatkasma? Jumatï Bibliat jukʼamp yateqañ munasmajja, Jehová Diosan Qhanañchirinakapan Internetan www.jw.org/ay cheqar mantasaw mayisma. Uktï lurätajja, jumatakejj Diosar munasiñajj janiw chʼamäkaniti.