Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Divorciasisajj sum jakasiñajj utjaskaspati?

¿Divorciasisajj sum jakasiñajj utjaskaspati?

“Qʼala aynachtʼataw jikjjatasiyäta, taqe kunas sumakiskänwa, ukat mä akatjamatwa taqe kunas mayjtʼawayjje.” (MARCOS, * jupajj mä mara divorciatawa)

“Chachajajj yaqha warmimpiw sarnaqjjäna, uka warmejj qawqha maranïkäntï phuchajajj ukha maranikïnwa. Divorciasjjapjjayäta ukhajj kusisitakejjayätwa, janiw kunat colerañas utj-jjänti, ukampis jiskʼachata ukat phenqʼachataw amuyasirakiyäta.” (ELVIRA, jupajj 17 maranak divorciatawa)

Yaqhepanakajj jukʼamp kusisit jakasiñatakiw divorciasipjje, ukat yaqhepajj janis divorciasiñ munapkchejja janiw chachaparus jan ukajj warmiparus munkir jan munkir qheparaykaspati. * Cheqas divorciasisajj jakañajj jukʼamp chʼamätapjja, niya taqe divorciatanakaw amuyapjje. Jumatï jichhak divorciasta ukhajja, niya uka pachparakwa amuypachätajja. Ukampis Biblian kawkïr ewjjtʼanakapas maynirojj yanaptʼaspa uk jichhajj yatjjatañäni.

NAYRÏRI: JAN WALI AMUYUNAKA.

Qollqet pistʼañanakasa, wawanakar uywañasa, sapakjam amuyasiñasa ukat jan wali amuyunakas maynir aynachtʼayaspawa. Psicología toqet yatjjattʼat Judith Wallerstein warmejja, akham amuyatayna: divorciasipki ukanakajj walja maranak qhepatsa, apanukutjama ukat engañatjamaw amuyasisipkaki, ukat “jakäwinjja jan waltʼaña, llakinaka ukat saparstʼañaw utji” sasaw sapjje.

MÄ QAWQHA EWJJTʼANAKA

  • Wakischi ukhajj jachaqtʼasim. Divorciaskta uka chachamar munasiskakitam laykojj inas jupampïñ  munaskakchïta. Ukat jan waltʼayasisas jakasiwayapjjstajja, kunjamtï jakasiñ munkayät ukham jan jakasitamat inas llakita jikjjatasta (Proverbios 5:18). Cheqas jachaqtʼasiñajj janiw kuna juchäkisa, kunattejj “jachañ horasa[jja]” utjiwa sasaw Bibliajj qhanañchi (Eclesiastés 3:1, 4).

  • Janipun saparstʼamti. Ukanak pasipan sum amuytʼasiñatakejj inas sapakïñam wakischispa, ukampis janiw walja tiempo saparstʼañamäkiti (Proverbios 18:1). Askïkis ukanakat parltʼam, chachamäkäna ukatak sapa kutis jan wal parlaskäta ukhajja, amigonakamajj jumat jitheqtjjapjjaniwa. Divorciasjjta uka qhepattï mä wakiskir amtar puriñamächi ukhajja, khitirutï confiykta ukampiw yanaptʼayasiñama.

  • Jan usuntañatakejj cuidasiñamawa. Divorciasisin llakisiñajj usuntañaruw puriyaspa, sañäni: pʼeqe usunaka ukat yaqha ukhamanakampiw usuntayaspa. Ukatwa sum manqʼasiñama, ejercicionak lurañama ukat sum ikiñamaraki (Efesios 5:29).

  • Jan wakiskirïki jan ukajj chachamat amtaykiristam ukanak jaqtjjañamawa. Ukampis wakiskir documentonakjja imañamawa. Ukat casarasipkta uka fotonakjja wawanakamatakiw imañama.

  • Jan wali amuyunak apanukuñamawa. Olgan chachapajj yaqha warmimpiw sarnaqjjatayna, ukatwa jupajj divorciasjjäna, ukat akham siwa: “‘¿Kunjam warmipunirak jupasti?’ sasaw sapa kuti jisktʼasirïta” sasa. Ukampis ukak lupʼiskä ukhajj jukʼampikiw llakisjjerista sasaw jupajj amuyasïna (Proverbios 18:14).

    Waljanejja, kunanaktï amuyapki uk qellqtʼasipjjewa, ukat ukaw sum amuytʼasiñatak yanaptʼi. Jumatï ukarjam lurañ munstajja, jan wali amuyunakak qellqañat sipansa, kunatï askïki ukanak qellqañatakiw chʼamachasiñama (Efesios 4:23). Uka amuyunakat pay uñjañäni:

    Jan wali amuyu: Yaqhamp sarnaqatapat nayaw juchanïtjja.

    Suma amuyu: Jupan ukham sarnaqatapat janiw nayajj juchanïkti.

    Jan wali amuyu: Jupampiw suma maranakaj aptʼasiwayta.

    Suma amuyu: Jan ukanakat lupʼjjä ukhajj kusisitakïskawa.

  • Chuym ustʼayir arunak jan yäqamti. Jan amuyasisaw yaqhep amigonakasa familiaranakas chuyma ustʼayiri jan ukajj jan wakiskir arunakampi akham sapjjaspa: “Jupajj janiw jumatakïkänti” jan ukajj “Diosajj divorciasiñjja uñisiwa” sasa. * Ukatwa Bibliajj akham ewjjtʼpachïstu: “Jan istʼamti taqe kuntejj [jaqenakajj] parlapki ukanakjja” sasa (Eclesiastés 7:21). Martinajja, pä maraw divorciatäjje, jupajj akham siwa: “Chuyma ustʼayir arunakat lupʼiñat sipansa, kunjamtï Diosajj amuyki ukham amuyañatakiw chʼamachasta, kunattejj amtanakasat sipansa, Diosan amtanakapajj wali altorakiwa” sasa (Isaías 55:8, 9).

  • Diosaruw mayisiñama. Taqe llakinakam yatiyapjjeta sasaw Diosajj yupaychirinakapar chʼamañchi (1 Pedro 5:7).

¿JANIT AKHAM LURKASMA? Biblian kawkïr jiskʼa tʼaqanakapas yanaptʼiristam uk jiskʼa papelanakar qellqtʼasim, ukat sapa kuti uñjkasma ukhar lipʼkatayam. Aka yatichäwin Biblian jiskʼa tʼaqanakap qhanañchaski ukasa, ukat aka jiskʼa tʼaqanakas walja divorciatanarakuw yanaptʼawayi: Salmo 27:10; 34:18; Isaías 41:10 ukat Romanos 8:38, 39.

Aynachtʼat jikjjatasïta ukhajja, Biblian jiskʼa tʼaqanakapaw yanaptʼätam

PAYÏRI: CHACHAMÄKÄNA UKAMPEJJ KUNJAMS APASISMA.

Julianajj 11 maranakaw jaqechatäna, jupajj akham siwa: “Jan apanukuwayistati sasaw chachajar wal  achiktʼasiyäta. Ukampis apanukjjetän ukhajj jupatakisa ukat kawkïr warmimpitï sarjjäna ukatakis wal colerayäta” sasa. Walja divorciatanakaw khitimpitï jaqechatäkäna ukatakejj mara mara coleratäsipkaki. Ukhamäkchisa, yaqhepajj jan parlañ munkasas parlapjjañapaw wakisini, yamas wawanakanïpjjchi ukhajj wakisipuniniwa.

MÄ QAWQHA EWJJTʼANAKA

  • Chachamäkäna ukampejj sum apasiñamawa. Parlañ wakisini ukhajja, kunatï wakiski ukakwa qhan parlapjjañama, janiw jay parlapjjañamäkiti. Ukham lurasajj janiw toqesiñajj utjkiti sasaw waljanejj sapjje (Romanos 12:18).

  • Janiw chuym ustʼayirjam parlañamäkiti. Kunapachatï maynejj aynachtʼayatjam amuyasi ukhajja, Biblian aka ewjjtʼapaw yanaptʼaspa: “Yatiñan jaqenakajj jukʼakwa parlapjje” (Proverbios 17:27). Ukampis parlkasin toqtasiñ utjirjamäni ukhajja, akham sasmawa: “Uka toqet sum amuytʼasiñ munta, yaqha uruw parlañäni” sasa.

  • Chachamäkän ukampejj janiw panpachanejj akanak apnaqjjapjjañamäkiti: qollqe, documentonaka ukat yaqha ukhamanaka.

¿JANIT AKHAM LURKASMA? Mayantï chachamäkän ukampi parlkasin jumanakat maynejj aynachtʼayatjam amuyaschini, jan ukajj munañaparjamak kuns lurañ munjjchini ukhajja, yaqha urun parlañatakiw mayiñama (Proverbios 17:14).

KIMSÏRI: WAWANAKAR YANAPTʼAÑA.

Divorciasjjäna uka qhepatjja, Mariajj akham siwa: “Wawajajj walpun jachäna, janipuniw amuktʼirjamäkänti ukat wasitatwa ikiñan chhojjontasjjäna. Ukat jilïr phuchajajj kunjamsa jikjjatasïna uk imtʼkchïnsa, kunja llakitänsa uk qhan amuyayäta” sasa. Ukhaman jikjjtasipjje ukhajja, wawanakamajj yanaptʼatamwa munapjje, ukampis inas jan yanaptʼirjamäkstati ni tiemponïkstasa.

MÄ QAWQHA EWJJTʼANAKA

  • Wawanakamajj kunjamsa jikjjatasipjje uk jumar yatiyapjjañapatakiw yanaptʼañama, ‘jan sum amuytʼasis’ kuns sapjjchïtamjja, istʼañamawa (Job 6:2, 3, NM).

  • Sapa mayniw lurañanakam phoqhapjjañama. Juman wali llakita jikjjatasitam laykojj wawanakamajj yanaptʼapjjeristamwa, ukampis janiw jumanakan jan waltʼayasipjjatanakam askichapjjañap suyañamäkiti (1 Corintios 13:11). Kunjamtï jikjjatasta uk janiw wawanakamar taqpun yatiyañamäkiti, ukat janirakiw awkipampi juma lanti parlañapatak khitañamäkiti.

  • Kunjamtï wawanakamajj jakasipki uk janiw mayjtʼayañamäkiti. Jakasipkta uka pachpanwa jakasipjjañama ukat kuntï lurapjjerïkta uksa lurasipkakiñamawa. Ukat sipansa, familjam Biblia liyisipkakisma ukat Bibliat yatjjatasipkakisma ukaw jukʼamp askïspajja (Deuteronomio 6:6-9).

¿JANIT AKHAM LURKASMA? Jichpachaw wawanakarojj wal munasitama ukat kuntï paski ukat jan juchanïpjjatap yatiyañama. Ukat kuns jisktʼapjjätam ukhajj qhanañchtʼañamawa, ukampis divorciasitamat chachamäkän ukas juchanïkaspa ukham janiw amuyayañamäkiti.

Divorciasisajj sum jakasiñajj utjaskakispawa. Elisajja, 16 maraw jaqechatänjja, jupajj akham siwa: “Divorciastwa, ukampis janiw ukham jakasiñ munkayätti, cheqas kunatï pasawayki uk jan askichirjamätaj sum amuyasta ukaw sum jikjjatasiñatak yanaptʼitu” sasa.

^ tʼaqa 2 Yaqha sutinakampi uchatawa.

^ tʼaqa 4 Aka yatichäwin warmitaksa parlkchejja, chacharus yanaptʼarakispawa.

^ tʼaqa 18 Yaqhamp casarasiñ laykuki divorciasipki ukjja, Diosajj uñisiwa. Ukham lurañajj Diosatakejj traicionañamp sasiwa. Ukampis chacha warmit maynitï yaqhamp sarnaqjjchejja, jan juchanïki ukajj divorciasiniti janicha uk jupaw amtjjañapa (Malaquías 2:16; Mateo 19:9).

AKHAM JISKTʼASIÑAMA:

  • ¿Divorciasitätaj sumt amuyastjja?

  • Khitimpitï jaqechatäkayät ukarojj ¿kunjamatsa jan uñisjjerista?