Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 JUPJAM IYAWSÄWINÏPJJAÑÄNI

“Jupamp chikasti paqallqonikiw qhespiyasïnjja”

“Jupamp chikasti paqallqonikiw qhespiyasïnjja”

NOÉ chachampi familiapampejj arca manqhankasipkiwa. Anqansti, wal jallojj purintaski. Ukat aceitempi nakhir micharakiw jupanakan ajanunakapar qhantʼaski. Nayranakapasti wali sustjatäpkaspas ukhamaw amuyasi, kunattejj arcan techoparusa ukhamarak anqans wal jallojj purintaski, janipuniw kunas istʼañjamäkiti.

Noé chachajj warmiparu, kimsa yoqanakaparu ukat yojjchʼanakaparuw uñti. Ukat chuymas chuymaw jikjjatasi, kunattejj walja jaqenakaw jan waltʼäwin jikjjatasisipki. Ukampis Noé chachan munat familiapajj jupamp chikaw jan kunas kamachtʼata arcankasipki, ukatwa jupajj wali kusisita jikjjatasi. Ukat jupanakamp chikaw Diosar mä oracionan wal yuspärarakpacha, inas wali jachʼat mayisirakchi ukhamat familiapamp istʼayasiñataki.

Noé chachajj wali iyawsäwinïnwa, ukatwa Diosajj juparusa ukat familiaparus jarkʼaqäna (Hebreos 11:7). Niyakejjay arca manqhankjjapjjchïnjja, ¿iyawsäwinïñajj wakisiskakpachänti? Jïsa, yamas jutïr urunakatakejj wakisiskakïnwa. ¿Jiwasat kamsasirakispasa?, ukhamarakiw jukʼamp iyawsäwinïñajj wakisi, kunattejj qhep qhepa urunakan jakasktanjja. Ukhamajj kunsa Noé chachan iyawsäwipat yateqassna, uk jichhajj yatjjataskañäni.

‘PUSI TUNKA URUMPI, PUSI TUNKA ARUMAMPI’

“Pusi tunka urumpi, pusi tunka arumampiw” jalluntäna (Génesis 7:4, 11, 12). Ukat umajj jiljjattaskakïnwa, ukhamatwa Noé chachajj Jehová Diosan aski jaqenakar khuyapayasitapa ukat jan wali jaqenakar juchañchatapa sum amuypachäna.

Amtañäni, walja angelanakaw Dios contra saytʼasipjjäna, kunattejj Supayaw uk lurapjjañapatak chʼamañchäna, ukat alajjpachan ‘lurañanakap’ apanukusin aka Oraqeruw saraqanipjjäna suma uñnaqtʼan warminakamp jakañataki, ukat jupanakampiw wawanakanipjjäna, jupanakasti jachʼa jaqenakapjjänwa (nefilim). Taqe ukanakwa Uma Juiciojj chhʼaqtayäna (Judas 6; Génesis 6:4). Cheqas taqe kunatï aka Oraqen utjki ukanakatjja jaqeruw jukʼamp sum Diosajj luräna, ukhamajj angelanakan Dios contra saytʼasipjjatapat Supayajj wal kusispachäna, kunattejj jaqenakajj jukʼamp jan walinakwa lurjjapjjäna.

Ukampis Uma Juiciojj Dios contra saytʼir angelanakarojj alajjpacharuw kuttʼayäna, amtañäni, aka Oraqen jaqjam jakañatakejj jañchini chʼakhaniw tukupjjäna, ukampis kuttʼañatakejj taqe ukanakwa jaytjjapjjäna; janiw mayampis jaqjam tukjjapjjaspati. Ukat warminakaparusa, wawanakaparus ukhamakwa apanukuwayjjapjjäna. Jupanakajj ukapachankir jan wali jaqenakamp chikaw jiwarjjapjjäna.

Niya 700 maranak janïr Uma Juicio purinkipanwa, Enoc chachan tiempopan Jehová Diosajj ‘jan wali jaqenakarojj tukjawa’ sasin arsüna (Génesis 5:24; Judas 14, 15). Ukampis marat maratjamaw jaqenakajj jukʼamp jan walinak lurjjapjjäna, mä arunjja, Oraqe tukjapjjäna ukat jan wali luräwinakamp kunaw phoqhantayapjjäna. Jichhajj kuntï Diosajj arsuwaykän ukaw phoqhasiñapänjja. Noé chachasa, familiapasa taqe ukanak uñjasajj ¿kusisipjjpachänti?

 Janiwa, ukat wali munasiri Diosajj janirakikiw kusiskänti (Ezequiel 33:11). Antisas kunayman toqetwa yanaptʼäna. Nayraqatajj amuyasipjjañapatakejj Enoc chacharuw khitäna, ukjjarusti Noé chacharuw arca luram sasin sarakïna. Jïsa, Noé chachasa familiapasa walja maranakaw jaqenakan uñjkata arca lurasipkäna. Diosajj Noé chacharojj “cheqa arunak” yatiyañapatakiw uttʼayäna. Jupasti Enoc chachjamarakiw Diosan juiciopat jaqenakar yatiyäna (2 Pedro 2:5). ¿Ukampis istʼapjjpachänti? Uka toqet Jesusaw sum qhanañchistu, niyakejjay kuntï paskäna uk sum uñjkchïnjja, jupajj akham sänwa: “Janirakiw amuyasipkänti kunürutejj uma juiciojj purinisin taqeniru apasjjäna ukürkama” sasa (Mateo 24:39).

Ukat Jehová Diosajj arcan punkup jistʼkatkäna ukhajja, ¿kunjamakis Noejj familiapampi jikjjatasipjjpachäna uk amuyasmati? Pusi tunka urunak jalluntañ qalltkäna ukhajja, jupanak pura sum uñjasiñatakisa, animalanakar sum uñjañatakisa wal chʼamachasipjjpachäna. Ukampis mä qawqha urunakatjja, arcajj akatjamat onjjtpachäna, ukat niyakejjay umajj jukʼat jukʼat wal jiljjataskchïnjja arcajj “uma patanwa tuyuskäna” (Génesis 7:17). ¡Taqe ukanakajj Jehová Diosan chʼamap uñachtʼayi!

Ukat familiapamp chika jikjjatasitapata ukat jaqenakar khuyaptʼayañatak jupanakar ajllitapat Noé chachajj Jehová Diosar wal yuspärpachäna. Cheqansa, ukürunakan yatiyañajj wali chʼamäpachänwa, kunattejj jaqenakajj jan istʼasiripjjänwa, Noé chachan jilanakapasa, kullakanakapasa ukat sobrinonakapas utjpachänwa, ukampis janiw jupanakajj istʼapkpachänti (Génesis 5:30). Ukampis jaqenakar yanaptʼañatak qawqha tiempsa Noejj familiapampi apsusipjjäna uks amtasipjjpachänwa.

Jehová Diosajj pachpakiskiwa (Malaquías 3:6). Jesusajj jichhürunakat parlkasajj “Noé chachan tiempopjamarakïniwa” sasaw säna (Mateo 24:37). Cheqas qhep qhepa urunakanwa jakasktanjja, ukat niyarakiw akapachajj tukusjjani. Jichhürunakan Jehová Diosan markapajj ukhamarakiw istʼañ munirinakarojj yatiyaski. ¿Jumajj istʼätati? Jumatï cheqa yatichäwinak yateqstajja. ¿Yaqhaqanakar yatiyañatak chʼamachasismati? Ukatakisti Noé chachampit ukat familiapampit yateqassna.

 “KIMSAQALLQONIKIRAKIW UMA TOQE QHESPIYASIPJJÄNA”

Niyakejjay arcajj uma patnam tuyuskchïnjja, animalanakan ojjopjjatapas ukat arcan onoqetapas istʼaspachänwa. Ukampis ¿jachʼa uma mathapinakatsa jan ukajj arcatsa Noé chachajj llakispachänti? Janiwa, jichhürunakan yaqhep jaqenakajj ‘arcajj aynachtʼpachänwa’ sasaw sapjje. Ukampis Noé chachajja janiw ukham amuykänti. Bibliajj akham siwa: “Iyawsäwi laykuw Noé chachajj [...] arcsa luräna” sasa (Hebreos 11:7). Cheqas kuntï Jehová Diosajj Noerojj jumarusa ukat familiamarusa nayaw uñjasipkäma sasin siskäna, uka arunakaruw wal atinisïna (Génesis 6:18, 19). Niyakejjay Diosajj taqe kunanakatï alajjpachan utjki ukat aka Oraqen utjki ukanak lurchejja, ¿janit arca jarkʼaqañatak chʼamanïkarakpachäna?, jïsa chʼamaniwa. Noé chachajj ukar wal atinisïna, ukatwa Jehová Diosajj juparusa ukat familiaparus ‘uma toqe qhespiyäna’ (1 Pedro 3:20).

Pusi tunka urunak pasjjepansti janiw jallojj purintjjänti. Calendariosarjamajja, 2370 nayrïr pacha (n.p.) maranwa diciembre phajjsin jallojj apjjtjjpachäna. Niyakejjay umajj jachʼa qollunak chhaqtaychïnjja, uka patanjamwa arcajj tuyuskäna (Génesis 7:19, 20). ¿Kunjamsa Noé chachajj Sem, Cam ukat Jafet, wawanakapamp animalanakar manqʼayañataki, qʼomäpjjañapataki ukat jan usunïpjjañapatak chʼamachasipjjän uk amuysnati? Cheqansa, animalanakar arcar mantapjjañapatakisa ukat jan uripjjañapatakisa Diosarakiw ukham tukuypachäna. *

Kunapachas jallojj qalltäna ukat apjtäna uk Noé chachajj sum yatïna. Kunattejj 150 urunakaw Oraqejj umamp phoqhantatänjja sasaw qhanañchi. Ukhamasti, umajj jukʼat jukʼatwa wañantjjäna. Ukat 2369 nayrïr pacha maran abril phajjsinwa ‘arcajj Ararat sat qollunak pataru saytʼjjäna’, ukajj jichha tiempon Turquía markanwa jikjjatasi. Ukat 73 urunakatjja, junio phajjsin walja jachʼa qollunakaw uñjasjjarakïna. Kimsa phajjsinak qhepatsti septiembre phajjsin Noé chachajj arcan techopat mä cheq apaqjjäna, ukhamatwa lupisa samanasa arcar mantjjpachäna. Ukampis janïr uk lurkasajj arcat mistuñjamat janich uk yatiñatakejj mä cuervo antutäna, ukajj wals jalnaqkchïnjja janiw kawkhar saytʼañapas utjkänti; ukjjarusti mä paloma antutarakïna ukasti ukhamarakikiw arcar kuttʼanjjäna, ukampis qhepatjja janiw kuttʼanjjänti (Génesis 7:24–8:13).

Jan walinakan jikjjataskasas Noé chachajj familiapar ajay toqet chʼamañchtʼapunirïnwa

Cheqas Noé chachatakejj Diosar yupaychañaw nayrankäna. Kunattejj Jupaw wal yanaptʼaskäna, ukhamajja, familiapamp chika Diosat mayisiñataki ukat Jupjjat parltʼañataki tantachtʼasipjjapunpachänwa. Ukat kuna amtar puriñatakis Diosat mayisipunirïnwa. Sañäni: kunaratutï umajj mä mara pasatat qʼal wañantjjäna ukhajja, janiw arcat jankʼak mistuñ amtkänti (Génesis 8:14). Jan ukasti Jehová Diosajj kamsanis uk suyaskäna.

Familia pʼeqtʼirinakajj Noé chachat wal yateqasipjjaspa. Jupajj wali sum taqe kuns apnaqäna, wali suma trabajirïnwa ukat familiaparojj wal yanaptʼarakïna. Ukampis taqe kunat sipansa, Jehová Diosan munañap lurañaw nayrankäna. Jiwasatï ukham lurañänejja, familiaranakasasa ukat amigonakasasa walja askinak katoqapjjani.

“ARCAT MISTJJAM”

“Arcat mistjjam, warmimampi, yoqanakamampi, yojjchʼanakamampi kuna” sasaw Jehová Diosajj säna. Ukar sum istʼasajja taqpachaniw arcat mistjjapjjäna, ukjjarusti animalanakaw aywsjjapjjarakïna, ukampis janiw ratuk chhuksuwayapkänti. Uka toqet Bibliajj akham qhanañchi: “Uywañ animalanakatsa, pampankir animalanakatsa, oraqenjam qatatnaqtir animalanakatsa, [...] taqeniw mistunjjapjjäna” sasa (Génesis 8:15-19). Arcat mistjjasinjja, taqe kunas sumakïpachänwa, sañäni; Ararat siski uka jachʼa qollunjja, samanasa, Oraqesa qʼomakejjpachänwa, wali chʼaman jaqenakasa, Diosar kutkatasir angelanakasa ukat jan walinak lurir jaqenakasa janirakiw utjjpachänti. * Ukhamajj wasitatwa taqe kuns qalltapjjasapäna.

Kuns nayraqat lurañapäna uk sum Noé chachajj yatïna. Ukatwa Jehová Diosar yupaychañ qalltäna:  ukatakejj mä altarwa wakichäna, ukatsti kawkïr animalanakatï Diosatak qʼomänjja ukanakwa Jupar loqtäna (qʼoma animalanakat paqallqoni arcar mantkäna ukanakata) (Génesis 7:2; 8:20). Uk uñjasajj ¿kunjamakis Diosajj jikjjataspachäna?

Bibliajj akham qhanañchi: ‘Tatituruw uka suma qʼaphejj purïna’ sasa. Kunjamtï yatktanjja, jaqenakajj jan wali luräwinakapampiw chuymap usuyapjjäna, ukampis ‘jichhat aksarojj taqeniw mä familjam yupaychapjjetani’ sasaw Diosajj chuymapan amtpachäna, uk amuyañaw wal kusisiypachäna. Ukampis janiw jan pantjasipjjañap suykänti, kunattejj jiskʼa tʼaqajj akham saskakiwa: “Jaqesti waynatpacha ñanqha lurañakpunwa amtaskejja” sasa (Génesis 8:21). Ukampis kunjamsa Jehová Diosajj wali paciencianïtapa ukat jaqenakar khuyapayasirïtapa uñachtʼayäna uk uñjaskakiñäni.

Amtañäni, kunaratutï Adanampi Evampejj Diosar jan istʼapkäna uka qhepatjja, Diosajj oraqerojj maldecïnwa ukatwa yapuchañajj wali chʼamäpachänjja, ukampis uka maldicionjja Diosajj chhaqtayjjarakïnwa. Cheqas Noé chachan Lamec awkipaw jupar Noé sas sutichäna, uka sutisti “Samaräwi” jan ukajj “Chuymachäwi” inas sañ munchi, kunattejj aka wawaw taqe llakinakasat “chuymachäwi” apanistani sasaw Lamec chachajj arsüna. Ukhamajj uka arunak phoqhasir uñjañatakejj Noé chachajj wal kusispachäna, ¡oraqen yapuchañajj janiw chʼamäjjänti! Ukatwa Noé chachajj jankʼaki oraq yapuchpachäna (Génesis 3:17, 18; 5:28, 29; 9:20).

Arcat mistjjasajja, Noé chachampi familiapampejj wali sumwa Oraq jikjjatapjjäna

Ukat Noen wawanakaparojj sum jakapjjañapatakiw mä qawqha leyinak Diosajj churäna, sañäni: janiw jaqe masipar jiwayapjjañapakänti, ni wilsa jan wali amtanakamp apnaqapjjañapäkanti. Ukat taqenimpirakiw mä arustʼäwir mantäna: ‘Janipuniw mayamps Uma Juiciomp tukj-jjäti’ sasaw arsüna. Ukatakejj mä suma kurmi uñstayäna. Ukhamajj kurmi uñjasajj kuntï Diosajj arskäna uk amtañasapuniwa (Génesis 9:1-17).

Aka sarnaqäwitï mä cuentokïspajja, “ukhamatwa mä suma kurmejj uñstatayna” sasin tukuyañajj wali sumäspawa. Ukampis janiw mä cuentokïkiti, cheqapuniw Noé chachajj utjäna, ukat jakäwipan jan walinakajj utjarakïnwa. Ukürunakanjja, jichhürunakat sipansa jaqenakajj walja maranakaw jakapjjerïna, Noé chachajj Uma Juicio pasatatjja, 350 maranakampiw jakaskäna. Ukampis jan walinakajj utjaskakïnwa, sañäni: mä kutejj machjasitaynawa, ukat uk uñjasaw Canaán allchhipajj jukʼamp jan wal luräna, taqe ukanakaw wawanakapar wal aynachtʼayäna. Ukat kuna jan walinaktï Nemrod chachan urunakapana, ukat kunjamsa wawanakapan wawanakapajj yaqha diosanakar yupaychapjjäna ukanaksa Noé chachajj uñjarakïnwa. Ukampis ¿askinakajj utjarakpachänti?, jïsa. Sem wawapajj familiapatakejj yateqaskañ iyawsäwinïnwa (Génesis 9:21-28; 10:8-11; 11:1-11).

Ukhamajj Noé chachjamarakiw iyawsäwisan wal chʼamachasiñasa. Cheqas waljaniw Diosat jitheqtapjjaspa jan ukajj jan kuns yatiñ munapkchispati, ukhamanak uñjasajj janiw jupanakjam lurañasäkiti. Ukat jiwasatï Diosat jan jitheqtas sapürutjam serviñäni ukhajja, Jupajj wali askit ukanak uñjani. Ukat Jesusan arunakapas phoqhasirakiniwa, jupajj akham sänwa: “Khititejj tukuykama saytʼkani ukawa qhespiyatäni” sasa (Mateo 24:13).

^ tʼaqa 17 Waljanirakiw akham amuyapjje: ‘Diosaw animalanakarojj jan manqʼa munir tukuypachäna ukhamat manqʼa jan munapjjañapataki’ sasa. Ukhamäkchin janisa, kuntï Diosajj Noé chacharusa ukat familiaparus siskän uk phoqhänwa.

^ tʼaqa 22 Uma Jucionwa Edén jardinajj chhaqtjjäna, ukhamatwa punkup uñjapkäna uka querubín sat angelanakan luräwinakapajj tukusjjäna, ukat alajjpacharuw kuttʼawayjjapjjarakïna. Ukhakamajj 1600 maranakaw ukankapjjäna (Génesis 3:22-24).