Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Santonakar mayisiñajj walikïskpachati?

¿Santonakar mayisiñajj walikïskpachati?

KUNARATUTÏ llakinakan jikjjatastan ukhajja, kunjamatsa yanap thaqhapuntanwa. Ukatwa yanaptʼayasiñatakejj khititï uka toqet experiencianïki ukat sum istʼkistaspa uka amigor jakʼachastanjja. Cheqas mä suma amigojj yanaptʼañatakejj experiencianïñapawa ukat khuyaptʼayasirïñaparakiwa.

Mayisiñ munapki ukanakajj uka pachparakwa lurapjje. Niyakejjay jupanakatak Diosajj jan jakʼachasiñjamäkchejja, Diosar mayiskañat sipansa santonakarukiw mayisjjapjje. ‘Uka santonakajj jiwasjamaw yantʼanakana ukat jan waltʼäwinakan uñjasiwayapjje, ukhamajj istʼapjjestaniwa’ sasinwa yaqhepanakajj amuyapjje. Amuytʼañataki, khitinakatï wali munat yänakap chhaqhayapki ukanakajja, san Antonio de Padua sat sutini santoruw mayisipjje, kunattejj jupaw chhaqhat yänaksa ukat lunthatsut yänaksa uñjaski sasaw sapjje. Ukat usut animalanakanïpki ukanakajja, san Francisco de Asís sat sutini santorurakiw mayisipjjaraki. Ukat llakinakan uñjasisajj san Judas Tadeo sat sutini santorurakiw mayisipjje.

Ukampis Bibliarjamajj ¿santonakar mayisiñajj walikïskpachati? ¿Ukham mayisïwinak Diosajj istʼpachati? ¿Diosajj kamspachas santonakar mayisiñatjja? Cheqas ukanakat yatjjatañajj wakisiwa.

¿BIBLIAJJ KAMSPACHAS SANTONAKAR MAYISIÑATJJA?

Santonakar mayisiñajj iglesia catolican yatichäwipawa, uka yatichäwirjamajj ‘santonakaw Dios nayraqatan jaqenakatak achiktʼapjjaspa, kunattejj jupanakajj Dios nayraqatan wali askit uñjatäpjjewa’ sasa (Catecismo de la Iglesia Católica). Ukhamajj santonakar mayisirinakajj jupanakan yanaptʼatäñwa suyapjje, kunattejj santonakas Dios nayraqatan askit uñjatäpkaspa ukhamwa amuyapjje.

¿Bibliajj ukhampunt yatichpacha?, waljaniw jïsa sasin sapjje. Uk sañatakejj kuntï apóstol Pablojj Roma markankirinakar qellqkäna uka arunak aytasipjje, ukan akham siwa: ‘Jilatanaka, nayajj achiktʼasipjjsmawa Jesucristo layku, kuna munasiñtejj ajayojj churkistu ukanjja nayampi mayachasipjjam nuwasiñana, Diosatsa nayjjat mayipjjarakim’ sasa (Romanos 15:30). ¿Uka arunakampejj naya toqew Diosar mayisipjjañama sasat apóstol Pablojj cristiano jilanakapar saskpachäna? Janiwa. Antisas nayatak mayirapipjjeta sasaw saskäna. Cheqas Pablojj ak sañ munaskäna; ‘mä cristiano jilatajj yaqha jilatatakejj Diosat mayirapispawa’ sasa. Ukhamasti, Pablon uka arunakapajj aka yatichäwi contrawa: “Diosamp istʼayasiñatakejj alajjpachankir santonakaruw mayisiñasa,  ukat jupanakaw kuntï Diosar mayktan uk yatiyjjapjjani” sasa. Ukhamajj ¿kunatsa uk jan lurañasäki?

Kunattejj Jesusajj akham sänwa “Nayätwa thakejja, cheqasa, jakañasa. Naya toqekiw Awkin ukar puriñajj utji” sasa (Juan 14:6). Ukat saskakïnwa “nayan sutejjar mayipkäta ukjja Awkejj churapjjätam[wa]” sasa (Juan 15:16). Jesusajj janiw nayar mayipjjeta ukat nayaw awkijar jumanakat mayirapipjjäma sasin siskänti. Ukhamajj mayisitanakas istʼayasiñasatakejj Jesucriston sutipjjaruw Diosar mayisiñasa, janiw kuna santonak toqes mayiñasäkiti.

Mä kutejja, Jesusan arkirinakapajj Diosar mayisiñ yatichapjjeta sasinwa sapjjäna, ukatwa jupajj akham säna “Orapkäta ukkhasti sapjjam: ‘[Alajjpachankir nanakan] Awkejja, sutimajj jachʼañchatäpan’” sasa (Lucas 11:2). Ukhamajj kunaratutï Diosar oración mayiskañäni ukhajj Jupa saparukipuniw mayisiñasa, janiw Jesusarusa ni santonakarusa. Jesusan uka arunakaparjamajj Diosarukipuniw Jesusan sutipjjaru mayisiñasa, janiw santonak toqe mayisiñasäkiti.

Ukampis Diosar mayisiñajj yupaychäwisan wali wakiskiripuniwa, ukat jan Diosäki ukanakar mayisiñajj Biblian yatichäwinakap contrawa (Juan 4:23, 24; Apocalipsis 19:9, 10).

¿DIOSAR JAKʼACHASIÑ AJJSARAÑASÄSPATI?

Jesusajj Wali Uñtʼat Arstʼäwipanjja, kunjamsa mä jiskʼa wawajj manqʼa munasin awkipar mayi, uka toqetwa mä uñachtʼäwi luräna. ¿Mä awkejj wawapan tʼantʼa mayipan mä qala churaspati jan ukajj chawlla mayipan mä asiru churaspati? (Mateo 7:9, 10.) Wawanakapar munasir mä awkejj janiw ukham lurkaspati.

Jehová Diosajj mä munasir awkjamajj Jupampi parltʼasiñaswa muni

Niya ukar uñtasit mä munasir awkit parltʼarakiñäni. Jumatï awkjamajj wawamamp sum apasiñatak chʼamachasta ukat kuntï mayktam uks istʼapuniraksta ukham amuytʼañäni. Ukat wawamajj juman yanaptʼam munasajj ajjsarañat yaqha jaqe toqnam mayisiristam ukhajja, ¿kunjamakis jikjjatasisma? Ukat sapa kutis yaqha jaqe toqnamak mayisiskiristam ukat jutïritakis ukham amtaniskakïtap amuyasajj ¿walikiw sasmati? Cheqas janiw walïkaspati. Antisas mä munasir awkejj wawanakapan jan ajjsaras jupamp parltʼasipjjaspa ukat kuntï munapki uk mayisipjjaspa ukwa muni.

Kunjamsa mä jiskʼa wawajj manqʼa munasin awkipar mayi uka uñachtʼäwit Jesusajj akham sasinwa istʼirinakapar qhanañchtʼäna: “Jumanakajj ukham jan walïkasinsa, sumäkis ukwa wawanakamarojj churapjjtajja. ¡Alajjpachankir Awkimasti ukatsa jukʼampiwa khitinakatejj jupar mayki ukanakar sumanaka churañatakejja!” sasa (Mateo 7:11). Kunjamtï mä munasir awkejj kunatï sumäki uk wawanakapar churañ munkejja, ukat sipans jukʼampwa alajjpachankir Awkisajj mayisitanakas istʼañsa ukat jaysañsa munaraki.

Juchanakasat wali llakitas jikjjataskchiñänejja, Jehová Diosajj Jupar mayisiñaswa muni. Jupajj janiw khitirus mayisïwinak istʼañapatak uttʼaykiti. Antisas Bibliajj akham sasaw ewjjtʼistu: “Diosar llakinakam katuyam, jupasti chʼaman tukuyätam” sasa (Salmo 55:22). Janipuniw santonakarojj mayisiñasäkiti ni jupanak toqes Diosar mayisiñasäkarakiti. Ukhamajj jan ajjsaras Jehová Diosar mayisiskakiñäni.

Alajjpachankir Awkisajj sapa maynitwa llakisi. Kuna jan walinakasatsa wal yanaptʼañ munistu, ukat Jupar jakʼachasiñasatakis jawsarakistuwa (Santiago 4:8). Cheqansa, ‘mayisitanakasar istʼir’ ¡Dios Awkisar jakʼachasitasat wali kusisitaw jikjjatastanjja! (Salmo 65:2.)