Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 Wawanakar Yatichañataki

¿Kunsa jan walinak lurir jaqet yateqassna?

¿Kunsa jan walinak lurir jaqet yateqassna?

Jesusarojj jan walinak lurir mä jaqemp parlaskirwa aka dibujon uñjtanjja. Uka jaqejj jan walinak luratanakapat wali llakitäski, ukatwa Jesusarojj akham sasin achiktʼasi: “Taqe markanak apnaqkäta ukkhajj nayat amtʼasitätawa” sasa. Uk istʼasinjja, ¿Jesusajj kamspachänsa? *... Jupajj akham sänwa: ‘Jumajj nayampi chikaw paraisonkäta, [NM]’ sasa.

¿Uka paraisojj kunjamäpachanisa?... Sumti amuyasktan janicha uk yatiñatakejj kuna paraisottï Diosajj Adanampitak ukat Evampitak lurkäna uk amtañäni. ¿Uka paraisojj kawkinkänsa? ¿Alajjpachana jan ukajj aka Oraqencha?...

Jïsa, aka Oraqenkänwa. Ukhamajj kunaratutï uka jan walinak lurir jaqejj mä ‘paraison’ jakasir amuyañäni ukhajja, paraisoptayat aka Oraqen jakasiskirwa amuyañasa. Ukat ¿uka paraisojj kunjamaniw sasmasa?... Uk uñjañäni.

Kuna paraisotï Jehová Diosajj Adanampitak ukat Evampitak lurkäna ukarojj; ‘Edén jardina’ sasaw Bibliajj sutichi. ¿Kunja sumäpachänsa uk amuyasmati?... Jïsa, kawkïr cheqanaktï uñtʼkta ukanakat sipans jukʼamp sumäpachänwa.

Ukhamajj ¿kamsasmasa? ¿Juchanakapat arrepentisir jaqempit Jesusajj aka Oraqenkpachäni?... Janiwa, Jesusajj alajjpachankaskaniwa, ukhatwa paraisoptayat aka Oraqjjar apnaqaskani. Cheqas kunaratutï ‘nayampi chikaw paraisonkäta’ sasin siskäna ukhajja, aka Oraqen jiwatat jaktanisin sum jakasïta siskaspansa ukhamänwa. Ukampis ¿kunatsa Jesusajj jan walinak lurir jaqer paraison jakaypachäni?...

 Uka jaqejj sinti jan walinaks lurkchïnjja. Janiw jupa sapak ukham jan walinak lurawaykiti. Aka Oraqenjja, millón millón jaqenakaw jan walinak lurawayapjje. Ukampis Jehová Diosaru, ukat kuntï jaqenakat mayki ukanak jan uñtʼapjjatapatwa jan walinak lurawayapjje.

Ukatwa uka kasta jaqenakajj jiwatat jaktanipjjani, uka taypinsti janïr jiwkas Jesusamp parlkäna uka jan walinak lurir jaqes jaktanirakiniwa. Ukhaw kunas Jehová Diosan munañapajja uk yateqapjjani ukat Jupar munasipjjaniti janicha uk uñachtʼayapjjarakini.

¿Kunjamsa Diosar munasipjjatap uñachtʼayapjjani?... Jupar istʼasa. ¡Ukhajj taqeniw wali kusisitäñani, kunattejj taqeniw munasipjjañäni ukhamarak Jehová Diosarus wal munasipjjarakiñäni!

Bibliat liytʼañataki

^ tʼaqa 3 Mä wawatakitï aka yatichäw liytʼaskstajja, kimsa puntonak uñjasajja, wawan arstʼañapatakiw saytʼañama.