Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 JUPJAM IYAWSÄWINIPJJAÑÄNI

‘Diosan munañaparjamaw sarnaqäna’

‘Diosan munañaparjamaw sarnaqäna’

NOÉ chachajj wali qaritaw samartʼaski. Mä jachʼa lawa patjjar qontʼasisinjja, wali qarjataw muchʼartʼasi ukat kunja jachʼänis arcajj uks uñtarakiwa. Alquitranas walirak thujstʼani ukat kuna herramientanakampitï irnaqasipki ukanakas istʼasirakiwa. Kunjamsa familiapajj jachʼa lawanakamp irnaqtʼasipki uks uñjarakiwa. Wawanakapasa, yojjchʼanakapasa ukat munat warmipas walja maranakaw arca lurañan yanaptʼasipkaraki. Cheqans lurañanakapampejj sum sarantasipki, ukampis walja lurañanakajj utjaskakiwa.

Jupanakajj loqhepkaspas ukham jaqenakajj amuyapjje. Arcajj niya cajonar uñtata mistuskän ukhajj wal larusipjjäna ukat ‘Uma Juiciow jutani’ sasin Noé chachan yatiyatapatjja, jukʼampiw larusipjjarakïna. Kamisarak Uma Juiciojj oraq qʼal chhaqtayjjaspasti ukajj janipuniw kunapachas uñjaskiti sasaw sapjjäna. Cheqas Noesa ukat familiapasa ina chʼusarus tiempo aptʼasipkaspa ukhamwa amuyapjjäna. Ukampis Jehová Diosajj Noé chacharusa ukat familiaparusa janiw ukham uñjkänti.

Bibliajj akham sistuwa: “[Noé] sapakiw Diosan munañaparjamajj sarnaqäna” sasa (Génesis 6:9). Ukajj ¿kamsañs muni? Kuntï Jehová Diosajj siskänjja, ukarjamapuniw Noé chachajj lurirïna, mä arunjja, istʼirïna ukat mä munat amigoparjamarakiw Jupar wal munasïna. Ukat walja waranqa maranak qhepatjja, Noé chachat akhamwa Bibliajj qhanañchi: ‘Iyawsäwip laykurakiw aka oraqenkirinakarojj juchañchäna’ (Hebreos 11:7). ¿Kunjams uk luräna? ¿Kunsa iyawsäwipat yateqassna?

JAN WALI TIEMPONKKASAS SUM SARNAQÄNA

Noé chachan tiempopanjja, jan wali luräwinakajj jiljjattaskakïnwa. Enoc sat nayra achachilap jakkäna ukhajja, jan walinakajj utjapunïnwa, jupajj ukhamarakiw Diosar istʼas sarnaqäna, ukat mä juiciow taqe jan wali jaqenakar tukjir jutani sasaw yatiyäna. Ukampis Noé chachan urunakapan jan walinakajj sintipunëjjanwa. Cheqas aka Oraqejj jan wali luräwinakamp phoqhantatäkaspas ukat qʼala tukjatäkaspas ukhamänwa Jehová Diosatakejja (Génesis 5:22; 6:11; Judas 14, 15). ¿Kunatsa jan wali luräwinakajj sintipunejjpachäna?

Angelanak taypinwa mä jan waltʼäw utjawayi. Jupanakat mayniw Jehová Dios contra saytʼatayna, ukat juparakiw Adanampir ukat Evampirojj juchar purtʼasiyatayna, ukhamatwa Supayaru jan ukajj Diablor tukuwayi. Noen urunakapanjja, ukhamarakiw yaqha angelanakajj Diosan apnaqäwip contra saytʼapjjäna. Alajjpachan kuna lurañanaktï Diosajj churkäna ukanak jaytasaw jaqer tukusin aka Oraqer saraqanipjjäna, ukat suma uñnaqtʼan warminakampiw casarasipjjäna. Uka jan istʼasiri, jachʼa jachʼa tukuri ukat jupatakik kuns muniri angelanakajja, jaqenakarojj jan wali luräwinakaruw wiytapjjäna (Génesis 3:1-5; 6:1, 2; Judas 6, 7).

Ukham angelanakamp ukat warminakamp mayachasipjjatapatjja, wawanakapajj wali jachʼa tansanaka ukat sinti chʼamanipjjänwa. Uka jaqenakaw aka Oraqerojj jan walinakamp phoqhantayapjjäna. Ukatwa Jehová Diosajj akham sispachäna: ‘Jaqenakan luräwinakapajj sinti jan walipuniwa, amtanakapasa, luräwinakapasa ukhamaraki’ sasa.  Ukatwa 120 maranakat Jehová Diosajj uka jan wali jaqenakarojj tukjañ amtäna (Génesis 6:3-5).

Noé chachasa ukat warmipas wawanakapar jan wali luräwinakat jarkʼaqañatakejj wal chʼamachasipjjäna

Noé chachajj mä suma warminïnwa ukat phesqa pataka jila maranëjjan ukhaw kimsa wawanëjjärakïna, jupanakasti Sem, Cam ukat Jafet satapjjänwa. * ¡Ukham jan wali tiemponakan wawanakar uywañajj wali chʼamäpachänwa! Ukat Noé chachasa, warmipasa wawanakapar jan walinakat jarkʼaqañatak wal chʼamachasipjjäna. Uka jachʼa jaqenakajj wali chʼamani ukat uñtʼata ukhamapjjänwa, wawanakajj ukhamäpki ukanakat wal yateqasiñ munapjje. Uka jachʼa jaqenakan jan wali luräwinakapat yatisikipunïnwa, Noé chachas ukat warmipas janiw ukanakat wawanakapar jarkʼaqerjamapkpachänti. Ukampis Jehová Diosata ukhamarak jan wali luräwinakar uñisitapat yatichapjjarakispänwa. Ukat jan walinak utjatapata ukat Jupa contra saytʼatapatjja, kunjamsa Jehová Diosajj chuym ustʼayasi uk sum amuyapjjañapatakiw yatichapjjañapäna (Génesis 6:6).

Jichhürunakan awk taykanakajj Noé chachat ukat warmipat yateqasipjjarakispawa. Kunattejj uka tiemponjamarakiw aka Oraqejj jan walinakamp phoqhantata. Ukat wawanakan kusistʼäwinakapas jan walinakamp phoqhantatarakiwa. Ukampis awk taykanakajj uka jan waltʼäwinakat jarkʼaqañatakejj sumankañ utjayir Diosar jakʼachasipjjañapatakiw wawanakapar yatichañatak chʼamachasipjje, kunattejj Jehová Diosajj taqe jan walinak tukjani (Salmo 11:5; 37:10, 11). Aka jan wali pachankkasasa suma wawanak maynejj uywaspawa. Noempi warmipampejj ukham lurapjjäna. Wawanakapajj suma jaqenakäpjjänwa ukat jupanakjam Diosar istʼir warminakampiw casarasipjjarakïna.

‘JICHHAJJ MÄ ARCA LURAM’

Noé chachan jakäwipajj mä urunwa mayjtʼäna. Kunattejj Jehová Diosaw jupamp parläna ukat aka pachajj tʼunjatäniwa sasaw yatiyäna ukat akham sarakïnwa: “Jichhajj mä arca lurasim gofer sat maderata” sasa (Génesis 6:14).

Arcajj mä barcor uñtasitäkaspans ukham yaqhep jaqenakajj amuyapjje, ukampis janiw ukhamäkänti. Kunattejj mä jachʼa cajonar uñtatänwa, janiw timonanikänti. Ukat qawqchʼänisa kunjamänisa taqe ukanak Jehová Diosaw sum yatiyäna, ukat manqhäjjapas patäjjapas alquitranampiw uskusiñapäna. Ukat akham qhanañcharakïna: “Mä jachʼa jallu apayanï, ukasti taqe aka oraqpachwa chhaqtayani [...]. Taqe kunatejj aka oraqen utjki ukanakasti jiwarapjjaniwa”. Ukat saskakïnwa: “Uka arcarusti yoqanakamampi, warmimampi, yojjchʼanakamampi, ukhamarak jumampi ukanakaw mantapjjäta” sasa. Ukampis arcarojj taqe kasta animalanakwa irpantapjjañaparakïna. Ukat Uma Juiciotjja, arca manqhankirinakakiw qhespipjjaspäna (Génesis 6:17-20).

Noé chacharojj mä jachʼa luräwiw waktʼäna. Arcajj jachʼañapänwa. Largorojj 133 metroni, anchorojj 22 metroni ukat altorojj 13 metroniraki. Jichha tiempon lamar qotan sarnaqer jachʼa barconakat sipansa, jukʼamp jachʼänwa. ¿Noé chachajj uka luräw katoqpachänti? ¿Jan waltʼäwinakan uñjasisajj quejaspachänti? ¿Kuna luräwtï phoqhañapäkäna  uk jan chʼamäñapatak mayjtʼaypachänti? Bibliajj akham qhanañchi: “Noesti kunjämtejj Diosajj siskatayna ukhamwa [...] luräna” (Génesis 6:22).

Uka luräwejj inas 40 jan ukajj 50 maranakan tukuyaschïna. Nayraqatajj qoqanakaw phatʼanukusin qatattasiniñapäna, ukjarusti khuchhunoqasin jachʼa viganaka, tablanaka apsusiñapäna. Ukat arca lurañatakiw apthapisjjañapäna. Ukat kimsa pisonakaniñapänwa, manqhanjja walja jalanoqat jiskʼa utanakjamañapänwa, punkupasa, jiskʼa ventananakapasa, ukat uma jalaqañapatakejj techopas utjañaparakïnwa (Génesis 6:14-16).

Marat maratjamaw arcajj mä cajonar uñtat mistuskäna. Ukat familiapan yanaptʼaskir uñjasajj Noé chachajj ¡wal kusispachäna! Ukat arca lurañat sipansa, yaqha luräw phoqhañaw jukʼamp chʼamäpachäna. Bibliajj Noé chachat akham siwa: ‘Cheqa arunak parliri’ jan ukajj cheqa arunak yatiyiri sasa (2 Pedro 2:5). Cheqas Noé chachajj jan ajjsartʼasaw ‘Uma Juiciot’ jaqenakar yatiyäna. ¿Uka yatiyawirojj istʼapjjpachänti? Uka toqet Jesusajj akham sänwa: “Janirakiw [istʼapkänti]” sasa. Kunattejj walja manqʼañanakana, umañanakana jakasipkäna, mayninakajj casarasisipkänwa, ukatwa Noé chacharojj jan istʼapkänti (Mateo 24:37-39). Walja jaqenakarakiw Noé chachatsa ukat familiapatsa phiskasipjjpachäna, yaqhepanakajj inas toqjjapchïna jan ukajj nuwjapjjarakchïna.

Jehová Diosajj Noé chacharusa ukat luräwinakaparus bendiciskchïnjja, jaqenakajj jupat larusisipkakïnwa janiw istʼapkänti

Ukhamäkchïnsa, Noé chachasa ukat familiapasa janiw aynachtʼapkänti. Ina chʼusaruw tiempop aptʼasipjje loqhepjjewa sasins jaqenakajj amuyapkchïnjja, jupanakajj arcjja lurasipkakïnwa. Jichhürunakan cristian familianakajj Noetsa ukat familiapan iyawsäwipats yateqasipjjarakispawa. Kunattejj Bibliarjamajj ‘qhepa urunakanktanwa’ sasaw qhanañchi (2 Timoteo 3:1). Jesusajj jichha tiempot parlkasajja, Noen tiempopjamarakïniwa sasaw säna. Ukhamajj Diosan Reinopat yatiykasatï jaqenakajj jan istʼañ munapkani, phiskasipjjani jan ukajj arknaqapjjani ukhajja, cheqpach cristianonakajj Noé chachatwa yateqasipjjañapa, jupajj ukham jan walinakampejj janiw aynachtʼkänti.

“ARCAR MANTJJAM”

Arcajj niya tukuyatajjänwa. Ukhatakisti, Noé chachajj niya 600 maranakanïnwa ukhaw Lamec sat tatapajj jiwjjäna. * Ukat phesqa maranak qhepatsti Matusalén sat achachilaparakiw jiwjjäna, jupajj 969 maranakwa jakawayäna, jupa sapakiw jukʼamp walja maranak jakawayäna sasaw Bibliajj qhanañchi (Génesis 5:27). Matusalén ukhamarak Lamec chachanakajja, Adán chachan tiempopanwa jakapjjarakitayna.

Matusalén sat achachilapajj jiwjjäna uka pachpa maraw Jehová Diosajj Noé chacharojj akham sarakïna: “Familiamampi arcar mantjjam” sasa. Ukat taqe kasta animalanak arcar irpantañama: Qʼoma animalanakata jan ukajj kawkïrinakatï sacrificiot loqtasispäna ukanakat paqallqo pareja ukat jan qʼoma animalanakatsti mä parejakiraki (Génesis 7:1-3).

Taqe kasta animalanak jiskʼan jachʼani, jutaskiri, qatatnaqtaskiri, tuyusinkiri ukat yaqha ukhamanak uñjañajj wali muspharkañapachänwa. Ukampis Noé chachajj janiw animalanakar alistirisa, ni jiktirisa sarkpachänti janirakiw munkir jan munkir uka animalanakar arcar irpantkpachänti, jan ukasti jupanak pachpaw “Noempi chikajj arcaru mantapjjäna” (Génesis 7:9).

Yaqhepanakajj ukajj janiw cheqäkiti sasaw sapjje. Kunjamarak kunayman kasta animalanakajj jan chʼajjwas jakapjjaspasti sasaw sapjjaraki. Cheqas  Diosaw taqe animalanakar lurawayi, ¿janit Jupajj jan nuwtʼasis utjapjjañapatak yanaptʼkaspäna? Jïsa uk lurañajj janiw Jupatakejj chʼamakpachänti. Amtañäni Jehová Diosajj Wila lamar qotjja payaruw jaljtayäna ukat mä kutejj Intsa saytʼayarakïnwa. Ukhamajj kuntï Bibliajj Noé tiempot parlki ukanakajj cheqapuniskiwa.

Diosajj animalanakarojj yaqha toqnam qhespiyaspänwa, uk janiw khitis janiw siskaspati. Ukampis jaqenakaruw taqe kasta animalanak uñjapjjañapatak jaytawayi, ukham lurasinjja, jaqenakar confiyatapwa qalltatpach uñachtʼayäna (Génesis 1:28). Jaqenakan ukat animalanakan jakäwipajj kunja wakiskiris Jehová Diosatakejj ukwa Noé chachan sarnaqäwipat awk taykanakajj wawanakapar yatichapjje.

Ukat mä semanatwa Uma Juiciojj jutani sasaw Jehová Diosajj Noé chachar yatiyäna. Ukürunakanjja, luräwinakapajj waljaw utjpachäna. Amuytʼañäni: animalanakaruw lakinoqañapäna, manqʼaps ukhamaraki ukat familiapan yänakapsa arcarojj apantañaparakïnwa. Ukat Noé chachan warmipasa ukhamarak Sem, Cam ukat Jafet yoqanakapan warminakapas arcan sum jakasiñatakejj sum wakichtʼañatakiw chʼamachasipjjpachäna.

¿Taqe ukanak uñjkasins jaqenakajj istʼapjjpachänti? Janiwa, Jehová Diosajj Noé chacharusa ukat lurañanakaparus bendiciskchïnsa, jaqenakajj janiw istʼapkänti. Ukat walja animalanakar arcar mantir uñjkasas janipuniw istʼapkänti. Jichhürunakanjja, ukhamarakiw uñjasi, akapachan qhep qhepa urunakan jakaskstanjja janiw jaqenakajj istʼañ munapkiti. Kunjamtï apóstol Pedrojj siskänjja, Diosan ewjjanakapar istʼañat sipansa phiskasipjjewa (2 Pedro 3:3-6). Noé chachasa ukat familiapasa ukhamarakiw jikjjatasipjjpachäna.

Ukat ¿kunaratus jupanakat jan larusjjapjjpachäna? Kunaratutï Noé chachajj familiaparus ukat animalanakarus arca manqhar irpantjjäna ukhaw ‘Tatitojj arcan punkup’ jistʼantjjäna sasaw Bibliajj qhanañchi. Diosan uka luräwipaw uka jaqenakarojj umuktʼaypachäna. Jan ukhamäkchin ukhajja, jalluw amuktʼaypachäna, kunattejj walipuniw jallojj purintjjäna ukat Oraqejj umamp phoqhantatäjjänwa, ukhamatwa Diosan arupajj phoqhasïna (Génesis 7:16-21).

Ukham jan wali jaqenakan jiwapjjatapat Jehová Diosajj janiw kusiskänti (Ezequiel 33:11). Antisas jan wali luräwinakap jaytapjjañapatakejj walja kutiw yanaptʼäna. Jupanakatï Noé chachjam Diosan munañaparjam sarnaqapjjaspäna, mä arunjja, Diosar taqe kunan istʼapjjaspän ukhajja, janiw Uma Juicion jiwapkaspänti. Bibliajj akham siwa: ‘Iyawsäwipampiw Noé chachajj’ uka tiempon jakir jaqenakar juchañchäna. Uka tiempon jaqenakajj jan walinakwa lurasipkäna ukwa Noen iyawsäwipajj qhanstayi. Ukat iyawsäwip laykurakiw jupa pachpas qhespiyasi ukat familiaparus ukhamaraki. Noé chachan iyawsäwipattï yateqasïta ukhajja, jumasa ukat familiamas wiñay jakañwa jikjjatapjjäta. Noé chachjamarakiw Jehová Diosamp sum apasïta ukat Jupan suma amigoparakïsmawa.

^ tʼaqa 10 Uka tiempon jaqenakajj jichhürunakat sipans jukʼampwa jakapjjäna, kunattejj Adán ukat Evan tiempopanwa jakapjjäna, jupanakasti jan pantjasiri ukat kʼumar jaqenakapjjänwa.

^ tʼaqa 20 Lamec chachajj wawapar Noé sasaw sutiyäna ukajj inas “Samaraña” jan ukajj “Chuymachtʼaña” sañ munchi, jupat akham arsuwayäna, niyakejjay Diosajj aka oraqerojj maldischejja, aka wawaw taqe jaqenakar samarañ apanini sasa (Génesis 5:28, 29). Lamec chachajj uka arunak phoqhasir janiw uñjawaykänti.