Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jesusajj kusisit jakasiñatakiw yanaptʼistaspa

Jesusajj kusisit jakasiñatakiw yanaptʼistaspa

¿JESUSAJJ kusisit jakaspachänti? Kunjamtï yatktanjja, jakäwipanjja janiw sinti yänakanïkänti ukat janirakiw qamir familia taypins jilsuwaykänti; cheqans ‘janiw kawkhar pʼeqep samartʼayañatakis utjkänti’ (Lucas 9:57, 58). Ukat uñisirinakapajj jupat jan walinak parlapjjäna, ñanqhachapjjäna ukat qheparusti jiwayapjjarakïnwa.

“Ukajj janiw kusisit jakañäkiti”, sasin inas maynejj sischispa. Ukampis kunanaksa jakäwipan lurawayi ukanakat yatjjatañaw wakisispa. Ukhamajj uk pusi toqet yatjjatañäni.

1. JESUSAJJ MÄ AMTAMPIW JAKÄNA: DIOSAN MUNAÑAP LURAÑATAKI.

“Nayan manqʼajjajj khititejj khitankitu ukan munañapa, ukhamarak lurañapa phoqhañajjawa.” (Juan 4:34.)

Jesusajj arunakapans ukat luräwinakapansa alajjpachankir Jehová Dios Awkipan munañap phoqhañatakiw wal chʼamachasïna. * Kunjamtï alayan jiskʼa tʼaqajj siskejja, uka lurañaw jupar wal kusisiyäna, jupatakejj manqʼäkaspas ukhamänwa. Kuna toqetsa parlaskäna uk amuytʼañäni.

Kunapachatï uka arunak arskäna ukhajj niya chika urunwa (Juan 4:6). Jesusajj Samaria qollu thaknamaw saraskpachäna ukat manqʼats awtjayasirakpachänwa. Ukatwa arkirinakapajj akham sapjjpachäna: “Yatichiri, manqtʼasimaya” sasa (Juan 4:31). Qhanañchäwiparjamajja, kuna luräwtï Diosajj churkäna uk phoqhasaw Jesusajj kusisiñ jikjjatäna, mä arunjja, ukaw chʼamañchtʼäna. Taqe ukanak lurasaw Jesusajj wali kusisit jakasïna.

2. JESUSAJJ AWKIPAR WAL MUNASÏNA.

‘Nayajj Awkir munastwa.’ (Juan 14:31.)

Jesusajj alajjpachankaskan ukhajja, Awkipampejj wali sum apasïna. Jupar wali munasitapatwa Awkipan sutipata, amtanakapata ukat kunjam Diosäkitejj ukanak yatiyäna. Ukat luratanakapampisa, arsutanakapampisa ukat amtanakapampisa Diosajj kunjamäkitï uk sum Jesusajj uñachtʼayäna, ukhamajj jupat yatjjatasajj niyas Diosar uñjksna ukhamäspawa. Ukat kunapachatï Felipejj “Awkiru uñachtʼayapjjeta” sasin siskäna ukhajja, akham sasaw Jesusajj säna: “Khititejj nayar uñjkitu ukajj Awkirojj uñjarakiwa” sasa (Juan 14:8, 9).

 Jesusajj Awkipar wal munasitap laykuw jiwañkam istʼäna (Filipenses 2:7, 8; 1 Juan 5:3). Uka munasiñaw Jesusarojj kusisit jakasiñatakejj yanaptʼäna.

3. JESUSAJJ JAQENAKAR WAL MUNASÏNA.

“Janiw jukʼampi jachʼa munasiñanejj utjkaspati kawkïritejj amigonakap layku jakañap aptʼaskis ukat sipanjja.” (Juan 15:13.)

Niyakejjay pantjasirïstanjja, jutïritakejj janiw mä suma suytʼäwejj utjkiti. Bibliajj akham qhanañchi: ‘Mä sapa jaqe toqerakiw, mä arunjja, Adán toqew juchajj aka oraqer mantani, ukat jiwajj uka jucha laykurak utji, ukhamarakiw jiwajj taqe jaqerojj katuntawayi juchachasitap layku’ (Romanos 5:12). Ukhamajj juchar katuyatätas laykojj janiw chʼamasampik jiwañar atipksnati (Romanos 6:23).

Jehová Diosajj jaqenakar wali munasitap laykuw juchata ukat jiwañat qhespiyañ munäna, ukatakejj jan juchani wali munat Yoqap Jesusar khitaniwayi. Jupajj Awkipar ukat jaqenakar munasitap laykuw kuntï Awkipajj siskäna uk taqe chuym phoqhawayi, ukat jan juchan jakäwips jiwasanak laykuw aptʼasiwayi (Romanos 5:6-8). Jupajj jaqenakar wal munasïna ukatwa kusisit jakäna. *

4. JESUSAJJ YATINWA AWKIPAN YUPAR MUNASITAPA UKAT ASKIT UÑJATAPA.

“Akawa munat Wawajjajja, kawkïrirutejj nayajj ajllista ukajja.” (Mateo 3:17.)

Jesusajj bautisaskäna ukhaw uka arunakamp Jehová Diosajj alajjpachata wawapar wal munasitap ukat ajllisitap uñachtʼayäna, ukatwa Jesusajj jan pächasisa akham säna: ‘Awkijajj munasituwa’ sasa (Juan 10:17). Ukhamajj ukanak yatisaw jan ajjsartʼas uñisirinakapan jiskʼachäwinakaparus ukat jan waltʼäwinakarus Jesusajj saykatäna. Ukat niya jiwañampiskäna ukhas janipuniw llakinakamp aynachtʼkänti (Juan 10:18). Awkipajj Jesusar wal munasïna ukat wali askitarakwa uñjäna, ukaw Jesusarojj kusisit jakasiñatakejj yanaptʼäna.

Cheqansa Jesusajj wali kusisitaw jakasiwayi. Ukhamajj jupat yateqasiraksnawa. Jesusajj kusisit jakasipjjañapatakejj kuna suma ewjjtʼanaksa arkirinakapar churäna uka toqenakatwa jutir yatichäwin yatjjataskañäni.

^ tʼaqa 6 Diosan sutipajj Jehová satawa sasaw Bibliajj yatichi.

^ tʼaqa 15 Jesusan loqtasïwipat jukʼamp yatjjatañatakejja, ¿Kunsa Bibliax chiqpachapuni yatichi? sat libron 5 jaljap uñjjattʼäta, ukajj Jehová Diosan Qhanañchirinakapan luratawa.