Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 KUNSA LIYTʼIRINAKAJJ YATIÑ MUNAPJJE

¿Lunthat jaqerojj nayampiw alajjpachankäta sasint Jesusajj sispachäna?

¿Lunthat jaqerojj nayampiw alajjpachankäta sasint Jesusajj sispachäna?

Kunatsa ukham jisktʼastanjja, kunattejj Jesusampi chika chʼakkatapkäna uka lunthat jaqerojj akham sasaw Jesusajj säna “Cheqpachawa [‘jichhürpacha’, NM] sisma, jumajj nayampi chika[w] paraisonkjjäta” sasa (Lucas 23:43). Uka paraisojj kawkhankanisa uk Jesusajj janiw siskänti. Ukhamajj uka arunakampejj ¿Jesusajj nayampiw alajjpachar saräta sañt munpachäna?

Alajjpachan jakañataki kuna mayiwinaktï utjki ukarjamat phoqpachäna, uk nayraqat amuytʼañäni. Kawkïr cristianonakatï alajjpachar sarañatak suytʼäwinïpki ukanakajja, umampi ukat qollan ajayumpiw bautisatäpjjäna, ukhamat qollan ajayumpi ajllitasajj Jesusan arkiripar tukupjjäna (Juan 3:3, 5). Ukat Diosan leyinakaparjamaw jan lunthatasisa, cheqapar sarnaqasa ukat khuyaptʼayasisaw jakapjjañapa (1 Corintios 6:9-11). Ukat aka Oraqenkkasajj jiwañkamaw Diosatsa ukat Cristotsa jan jitheqtapjjañapäkiti (Lucas 22:28-30; 2 Timoteo 2:12). Maynitï taqe uka mayïwinak phoqhanejja, askit uñjatasin jaktaniniwa, ukhamat kuna wali wakiskir luräwtï alajjpachan jupanakar suyaski uk phoqhañataki: ukat waranqa maranakaw jaqenak layku Cristomp chikajj sacerdotenakapjjäni ukat reyinakapjjarakini (Apocalipsis 20:6).

Ukampis uka jaqejj mä lunthatjamaw jakawayi ukat lunthatjamarakiw jiwawayi (Lucas 23:32, 39-41). Ukat kunapachatï: ‘Reinomankkäta ukkhajj nayat amtʼasitätawa’ sasin rogtʼasïna ukhajja, Jesusar wali respetatap uñachtʼayaskäna (Lucas 23:42). Ukampis jupajj janiw bautisaskänti, janirakiw Jesusan arkiripjamajj qollan ajayumpi ajllitakänti, ni suma jaqet uñtʼatäkansa ukat luräwinakapansa janiw cheqapäkänti. Ukhamasti, ¿kawkïr arkirinakapatï jan jitheqtasa Diosar taqe chuyma yupaychapkäna ukanakampiw mä reyjam alajjpachankäta sasat Jesusajj sispachäna? (Romanos 2:6, 7.)

Amuytʼañäni: mä jaqejj jumar qollqe lunthatsusin perdontʼita siristam ukat jumajj perdonasinjja jan kijantañwa amtasma. Ukhamäspa ukhajj ¿negociom apnaqañapataki ukat familiam uñjañapatakis uka jaqer jaytasmati? Cheqas janiwa. Uka luräwinakjja, khitirutï jumajj wal atiniskta ukaruw jaytasma. Uka pachparakiwa, khitinakatï alajjpachar sarañataki jawstʼatäpki ukanakajj wali atiniskayatapwa uñachtʼayapjjañapa ukat kunapachatï jaqenakar apnaqapkanejja, Diosan cheqa leyinakaparjamaw sarnaqapjjañaparaki (Apocalipsis 2:10). Lunthatasir jaqejj niya jiwañampïkäna ukhajj Jesusar rogtʼasitapajj taqe chuymäkchïnsa, jupajj janiw atiniskayätap uñachtʼaykänti.

Ukampis ¿janit lunthat jaqerojj jichhürpachaw nayampi chika alajjpachankäta sasin Jesusajj siskäna? Janiwa. Jesusajj janiw uk siskaspänti, kunattejj janiw ukürpach alajjpachar makatkänti, jan ukasti kimsa urunakaw “oraq manqhanka[skäna]” mä arunjja, kawkhantï jiwatanakajj imaski ukana (Mateo 12:40; Marcos 10:34). Ukampis janïra alajjpachar makatkipanjja, Jesusan jaktatapat pusi tunka urunakaw pasäna (Hechos 1:3, 9).

Ukhamajja, kunapachatï Jesusajj aka Oraqe apnaqasajj mä paraisor tukuykani ukhaw uka lunthat jaqejj jaktanini (Hechos 24:15; Apocalipsis 21:3, 4). Jumatï uka paraisotsa ukat kunsa Diosajj ukankañatak mayistu ukanakat yatiñ munsta ukhajja, Jehová Diosan Qhanañchirinakapampiw parltʼañama.