Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Wawanakamar Jehová Diosaru serviñ yatichapjjam

Wawanakamar Jehová Diosaru serviñ yatichapjjam

“Dios Tatitu, nayasti achiktʼassmawa wastatampiy nanakan ukaru uka jaqema khithanim nanakaru yatiyañapataki kunanaktejj lurapkäjja naskani uka wawampejj uka.” (JUE. 13:8)

88, 120 QʼOCHUNAKA

1. Wawanïñap yatïna ukhajja, ¿kunsa Manoa chachajj Diosar mayïna?

MANOA chachasa warmipasa israelitapjjänwa. Jupanakajj wawanïñ janiw suyapkänti. Ukampis mä urojja, mä angelaw Manoan warmipar akham säna: “Mä wawanïyätawa” sasa. Manoajj uk yatïna ukhajj wal kusisïna. Ukampis kunjamsa wawapar uywapjjani uka toqetwa lupʼïna. Uka urunakanjja, walja israelitanakajj jan walinakwa lurapjjerïna. Ukhamajj ¿kunjamsa Jehová Diosar serviñ wawapar yatichapjjaspäna? Manoasti Diosar sänwa: “Dios Tatitu, [...] wastatampiy nanakan ukaru uka jaqema [jan ukajj angelama] khithanim nanakaru yatiyañapataki kunanaktejj lurapkäjja naskani uka wawampejj uka” sasa (Jue. 13:1-8).

2. ¿Kunsa awk taykanakajj lurapjjañapa, ukat uk phoqañatakejj kunas yanaptʼaspa? (“ Jupanakaw Bibliat yatjjatirinakamajja” siski uka recuadro uñjjattʼam.)

2 Jumatï wawanakanïstajja, kunjamsa Manoajj jikjjatasïna uk amuypachätawa. Jumajj Manoa chachjamarakiw wawanakamarojj Jehová Diosar serviñsa Jupar munasiñsa yatichañama (Pro. 1:8). Ukatakejj Familiana Diosar Yupaychañataki Aruma apañaw yanaptʼiristam, ukjja sapa semanaw apañama. Ukaw Jehová Diosata  Bibliata wawanakamar yatichañatakejj yanaptʼätam (Deuteronomio 6:6-9 liytʼañataki). Jesusat yateqasiñajj yanaptʼarakiristamwa. Jupajj janis wawanakanïkchïnjja, kunjamsa arkirinakapar yatichäna ukwa yateqasma. Aka yatichäwinjja, kunjamsa Jesusajj munasirïtapsa altʼat chuymanïtapsa arkirinakapar uñachtʼayäna ukwa yatjjatañäni. Jupajja kunjamsa arkirinakapajj jikjjatasipjjäna, jupanakar yanaptʼañatakejj kunsa luraspäna uk sumwa yatïna. Jichhajj uka toqenakat yatjjatañäni.

WAWANAKAMAROJJ MUNASIPJJAÑAMAWA

3. ¿Kunatsa Jesusan arkirinakapajj jupan munasiñapat jan pächasipkäna?

3 Jesusajja ‘munasipjjsmawa’ sasaw arkirinakapar sirïna (Juan 15:9 liytʼañataki). Jila partejj jupanakamp chikapunïrïnwa (Mar. 6:31, 32; Juan 2:2; 21:12, 13). Jesusajj arkirinakapan yatichiripäkchïnsa amigopänwa. Ukatwa arkirinakapajj munasiñapat jan pächasipkänti. ¿Kunjamsa awk taykanakajj Jesusat yateqasipjjaspa?

4. ¿Kunjamsa awk taykanakajj wawanakaparu munasipjjatap uñachtʼayapjjaspa? (3 janankir foto uñjjattʼam.)

4 Awk taykanaka, wawanakamarojj ‘munasipjjsmawa’ sapjjañamawa. Wali askit uñjapjjatamwa amuyapjjañapa (Mat. 3:17; Tito 2:4). Australiankiri Samuel jilatajj siwa: “Wawäkayäta ukhajja, awkijajj sapa arumaw Bibliat apstʼata sarnaqäwinaka librot liytʼarapirïtäna. Jisktʼanakajsa qhanañchirïtänwa, janïr ikintkasajja qhomanttʼasin jampʼattʼawayirïtänwa. Ukampis awkijan familiapanjja, janiw ukhamanak lurañ yatipkataynati, ukwa qhepat yatiyäta. Awkijajj qawqsa munasitu uk uñachtʼayañatakiw wal chʼamachasïna. Ukhamätapatjja kusisita wali munata ukhamaw jikjjatasiyäta. Jupampis wali sumarak apasiyäta” sasa. Wawanakamarutï ‘munasipjjsmawa’ sasin sapa kuti sapjjäta ukhajja, jupanakajj Samuel jilatjamarakiw jikjjatasipjjani. Ukhamajj wawanakamar jampʼattʼapjjam, qhomanttʼapjjam, jupanakamp parltʼasiñatakisa, manqtʼasiñatakisa, anattʼañatakisa tiempo apstʼasipjjarakim.

5, 6. 1) Arkirinakapar chʼajjwir uñjasajja, ¿kunsa Jesusajj luräna? 2) ¿Kunjamsa awk taykanakajj wawanakapar cheqañchapjjañapa?

 5 Jesusajj akham sänwa: “Khitinakarutejj nayajj munkta, ukanakarojj toqenoqtwa, cheqacharaktwa” sasa (Apo. 3:19). * Jesusajj arkirinakaparuw khitis jukʼamp jilïrejja sasin chʼajjwiri uñjäna. Ukatwa walja kutejj pacienciampi cheqañchäna. Ukampis kunapachasa, kawkhansa munasiñampi cheqañchaspa uk sumwa amuytʼäna (Mar. 9:33-37).

6 Awk taykanaka, wawanakamarojj wal munasipjjpachäta, ukatwa munasiñat cheqañchañ munapjjaraktajja. Kuns jan wal lurapjjani ukhajja, awisajj kunatsa ukham lurapjjatapajj jan walïki uk qhanañchtʼañakiw wakisispa. Ukampis cheqañchatajj janipun istʼasipkani ukhajja, ¿kun lurañäspasa? (Pro. 22:15.) Jesusatwa yateqasipjjasma. Jupjamaw wawanakamarojj pacienciampi yanaptʼapjjañama, ewjjtʼapjjañama, amuytʼayapjjañama. Kunapachasa, kawkhansa munasiñampi cheqañchapjjasma ukwa amuytʼapjjañamaraki. Sudafricankir Elaine kullakajja, kunjamsa awk taykapajj cheqañchapjjäna uk akham amti: “Kunjamsa sarnaqañaja ukjja awk taykajajj qhanañchtʼapjjerïtänwa. ‘Janitï istʼapkitätajja, castigapjjämawa’ sasaw sapjjerïtäna. Aruparjamapuniw phoqapjjerïna. Ukampisa kunatsa castigapjjetani uk nayraqatwa sum qhanañchtʼapjjerïtu, janipuniw coleratajj cheqañchapjjerïkituti. Ukhamatwa nayar wal munasipjjatap amuyirïta” sasa.

ALTʼAT CHUYMANÏPJJAÑAMAWA

7, 8. 1) Jesusan mayisïwip istʼasajja, ¿kunsa discipulonakapajj yateqapjjäna? 2) Wawanakam nayraqatan mayisisajja, ¿kunjamsa Jehová Diosar confiyapjjañapatak yatichapjjasma?

7 Jesusajja katuntatäsin jiwayata uñjasiñapäkäna ukhajja, akhamwa Diosar mayisïna: “Awkejjay, jumajj taqe kun lurañatakiw chʼamanïtajja. Aka kʼallkʼu um umtʼañajjsa apaqtʼasitaya. Ukampis jan nayan munañajjäpati, ukatsipan juman munañamarjam luraspan” sasa (Mar. 14:36). * ¿Jesusan mayisïwip istʼasajj kunjamas discipulonakajj jikjjatasipjjpachäna uk amuyasmati? Jesusajj janis pantjasirïkchïnjja, Awkiparojj yanapwa mayïna, ukham luratapatjja discipulonakapajj wali sumwa yateqasipjjpachäna. Jupjam altʼat chuymanïsin Diosaru yanap mayiñajj kunja wakiskirisa uksa yateqapjjarakpachänwa.

8 Wawanakamajja, kuntï jupanak nayraqatan mayisipkäta ukat yateqasipjjaspawa. Ukampis janiw aleq yatichañatakikejj oración mayisipjjañamäkiti, jan ukasti Diosar confiyapjjañapatakiw yatichapjjañama. ¿Kunjamsa? Wawanakamatak Diosat sapa kuti mayiñat sipansa, Diosarojj jumar yanaptʼañapatakiw mayiñamaraki. Brasil markan jakasiri Ana kullakajj akham siwa: “Awk taykajajj jan waltʼäwin uñjasipjjerïna ukhajja, Diosarupuniw yanap mayipjjerïna. Kunapachatï mamajan awk taykapajj usuntapjjäna ukhajja, awk taykajajj suma amtanakar puriñatakejj Jehová Diosaruw chʼama, yatiñkankaña mayipjjerïna. Sinti jan waltʼäwin uñjasipjjerïna ukhasa, Jehová Diosarupuniw taqe uka llakinakap yatiyapjjerïna. Ukhamatwa Jehová Diosar confiyañ yateqawayta” sasa. Awk taykanaka, wawanakam nayraqatan ukhamarakiw Diosar mayisipjjasma. Amuytʼañataki, Jehová Diosarojj vecinomaru jan ajjsaras Bibliat yatiyañataki yanapwa mayipjjasma, jachʼa tantachäwir sarañataki patronamar jan ajjsaras permiso mayiñatakis Diosar yanap mayipjjarakismawa. Ukhamtï lurapjjäta ukhajja, wawanakamajj Jehová Diosar confiyapjjatamwa amuyapjjani, ukatsti jupanakajj Diosaruw confiyapjjarakini.

9. 1) ¿Kunjamsa Jesusajj altʼat chuymanïñsa, mayninakar yanaptʼañsa arkirinakapar yatichäna? 2) Awk taykanaka, jumanakatï altʼat chuymanïpjjäta, yaqhanakarus yanaptʼapjjarakïta ukhajja, ¿kunsa wawanakamajj yateqasipjjani?

 9 Jesusajj altʼat chuymanïñsa mayninakar yanaptʼañsa luratanakapampiw arkirinakapar yatichäna (Lucas 22:27 liytʼañataki). Jesusajja Jehová Diosar munasitapata, ukhamarak mayninakar yanaptʼañ munatap laykuw jakañap aptʼasïna. Apostolonakapajj ukham lurañwa yateqapjjarakïna. Awk taykanaka, ukhamarakiw luratanakamampi wawanakamar yatichapjjasma. Pä wawani Pranas jilatampita Debbie esposapampit parltʼañäni, jilatajj irpir chuymanjamaw taman yanaptʼaski. Kullakajj siwa: “Esposojajj tamar yanaptʼañatak walja tiempo apsusitapat janipuniw kunapachas colerasirïkti. ‘Nanakajj jupan yanaptʼatäñ munapkä ukhajj yanaptʼapjjetaniwa’ sasaw sirïta” sasa (1 Tim. 3:4, 5). ¿Kunjamsa jupanakan sarnaqäwipajj wawanakapar yanaptʼawayi? Pranas jilatajj siwa: “Wawanakajajj kusisit chuymanïpjjänwa, taqe jilat kullakanakampiw wali sum apasipjjerïna. Jachʼa tantachäwinakansa, jan mayninakan jariyataw yanaptʼapjjerïna” sasa. Jichhajja, familpachaw Diosarojj sapürunjam servisipki. Awk taykanaka, jumanakatï altʼat chuymanïpjjäta, mayninakarus yanaptʼapjjarakïta ukhajja, wawanakamajj jumanakjamäpjjaniwa.

AMUYTʼIRÏPJJAÑAMAWA

10. Galileankir jaqenakajj Jesusar thaqhapjjäna ukhajja, ¿kunsa jupajj luräna?

10 Jesusajj jan pantjasirïnwa, ukatsti jaqenakan amuyupsa yatirakïnwa (Juan 2:25). Jesusajj janiw jaqenakan luratanakapak uñjkänti, jan ukasti kunatsa ukham lurapjje ukwa amuyirïna. Amuytʼañataki, mä urojja Galileankir jaqenakajj Jesusaruw thaqhapjjäna (Juan 6:22-24). Ukampisa janiw Jesusan yatichäwip istʼañatak thaqhapkänti, jan ukasti manqʼa mayiñatakikïnwa, uk Jesusajj sumwa amuyäna. Ukatwa jupanakar pacienciamp cheqañchäna. Jan ukhamäpjjañapatakejj kunsa lurapjjaspa uksa qhanañcharakïnwa (Juan 6:25-27 liytʼañataki).

Diosan arunakap kusisita yatiyapjjañapataki wawanakamar yanaptʼapjjam (11 tʼaqa uñjjattʼäta)

11. 1) Wawanakamajj taqe chuymat yatiyir sarasipki janicha uk amuyañatakejja, ¿kunsa lurapjjasma? 2) ¿Kunjamsa wawanakamarojj taqe chuyma yatiyir sarapjjañapatak yanaptʼapjjasma?

11 Awk taykanaka, janiw Jesusjam jan pantjasirïpktati, janirakiw kunsa wawanakamajj amuyasipki uksa yatipkarakismati. Ukampis kunjamsa jikjjatasipjje uk amuyapjjasmawa. Jupanakajj jumanakamp chikapuniw yatiyirejj mistupjjpacha.  Ukatwa akham jisktʼasipjjañama: “¿Kunatsa yatiyirejj sarapjje? ¿Taqe chuymat yatiyir sarapjje? Jan ukajja, ¿samartʼañ horasan manqtʼasiñasa, umtʼañas awisajj utjki uka laykukich sarapjje?” sasa. Wawanakaman jan taqe chuym yatiyir sarapjjatap amuyapjjäta ukhajja, kunas taqe chuyma yatiyir sarapjjañapatakejj yanaptʼaspa ukwa amuyapjjañama. Yatiyir sarkasajj inas kun lurapjjañapatak chʼamañchtʼapjjchisma.

12. 1) ¿Kunsa Jesusajj arkirinakapar qhanañchäna? 2) ¿Kunatsa Jesusajj wachoq juchar purtʼasiñat arkirinakapar ewjjtʼpachäna?

12 Jesusajj yaqha toqetwa arkirinakapar yanaptʼarakïna. Kunapachatï maynejj jucharu purtʼasi ukhajja, qhepat yaqha jucharuw purtʼasispa ukatsti jukʼamp jachʼa jucharuw purtʼasirakispa, uk Jesusajj sum yatïna. Ukatwa amuyasipjjañapatakejj arkirinakapar ewjjtʼäna. Jupanakajja, wachoq jucha lurañanakajj kunja jan walisa ukjja yatipjjänwa, ukampis kunas maynirojj uka juchar purtʼasiyaspa uk akham sasaw Jesusajj qhanañchäna: “Khititejj mä warmirojj munapayañataki uñtejja, niyaw chuymapanjja jupampi wachoqa juchjja lurjje” sasa (Mat. 5:27-29). ¿Kunatsa Jesusajj ukham ewjjtʼäna? Uka tiemponakanjja, waljaniw wachoq juchanak lurapjjäna, teatronakansa wachoq jucha luririnakwa uñchʼukipjjerïna, jan wali arunaksa istʼapjjarakirïnwa. Jesusajj arkirinakapar wal munasïna, ukatwa kunanakatï juchar purtʼasiykaspa ukanak jan uñchʼukipjjañapatak ewjjtʼäna.

13, 14. Jan walinakar jan purtʼasipjjañapatakejja, ¿kunjamsa wawanakamar yanaptʼapjjasma?

13 Awk taykanaka, kunanaktï Jehová Diosajj uñiski ukanak jan lurapjjañapatakiw wawanakamar yanaptʼapjjañama. Jichhürunakanjja, jiskʼa wawanakajj pornografía uñchʼukiñarusa yaqha ukham qʼañu luräwinak uñchʼukiñarus purtʼasipjjarakispawa. ¿Kunjamsa ukanakat jarkʼaqapjjasma? “Pornografía uñchʼukiñajj janipuniw walïkiti” sasaw wawanakamar sapjjañama. Ukampis janiw ukak sapjjañamäkiti. Akham jisktʼasipjjañamawa: “¿Kunatsa pornografía uñchʼukiñajj jan walïki uk wawanakajajj yatipjjeti? ¿Kunas pornografía uñchʼukiñar apaspa? ¿Wawanakajajj taqe kunti awistʼapjjetu? Jupanakatï pornografía uñchʼukiñar wiytata uñjasipjjani ukhajja, ¿yatiyapjjetaspati?” sasa. Wawanakamajj jiskʼäsipkchi ukasa, akham sasaw jupanakar sapjjasma: “Internetana qʼañu luräwinak luririnakajj uñstanini jan ukajj ukanak uñtañatak wiytat uñjasïta ukhajja, saskakitätawa. Janiw ajjsarätati, yanaptʼañwa munsma” sasa.

14 Kunampis kʼuchirtʼasïta uk wali sumwa amuyasiñama, uk uñjasaw wawanakamajj yateqasipjjarakini. Llätunka tʼaqan parlaniwayktan uka jilatajj siwa: “Awk taykanakajj taqe kunsa arumpejj wawanakapar sapjjaspawa, ukampis wawanakajj kuntï awk taykapajj lurapki uk uñjasaw kuns lurapjje” sasa. Awk taykanaka, jumanakatï musicanaksa, peliculanaksa, libronaksa sumäki uk ajllipjjäta ukhajja, wawanakamajj ukhamarakwa lurapjjani (Rom. 2:21-24).

JEHOVÁ DIOSAW YANAPTʼAPJJÄTAM

15, 16. 1) Wawanakajar uywañatakejj Jehová Diosaw yanaptʼitani sasajja, ¿kunatsa jan pächasiñamäki? 2) ¿Kuna toqetsa jutïr yatichäwin yatjjataskañäni?

15 Manoa chachajj wawapar uywañatak Diosar yanap mayïna ukhajja, ‘Diosajj istʼänwa’ (Jue. 13:9). Awk taykanaka, Jehová Diosajj mayisitanakamar istʼarakiniwa, uka toqet janipun pächasipjjamti. Diosaw wawanakamaru munasipjjatama, altʼat chuymanïpjjatama, kunjamsa jikjjatasipjje uk amuyapjjatam uñachtʼayañatakejj yanaptʼapjjätam.

16 Jehová Diosajja, janiw wawanakamajj jiskʼäsipki ukhaki uywañ yanaptʼapkätamti, jan ukasti qʼajjo wayn tawaqöjjapjjani ukhasa yanaptʼasipkakïtamwa. Jutïr yatichäwinjja, kunjamsa Jesusat yateqasisajj wawanakamar munasipjjatama, altʼat chuymanïpjjatama, kunjamsa jikjjatasipjje uk amuyapjjatam uñachtʼayapjjasma ukanakatwa yatjjataskañäni. Ukhamatwa qʼajjo wayn tawaqöjjapjje uka wawanakamar Diosar servipjjañapatak yatichapjjäta.

^ tʼaqa 5 Biblianjja, cheqañchaña siski uka arojj yanaptʼaña, ewjjtʼaña, amuytʼayaña sañwa muni, awisasti castigaña sañwa munarakispa. Awk taykanakajja, munasiñampiw wawanakapar cheqañchapjjañapa, janipuniw coleratajja.

^ tʼaqa 7 Griego arut “Awkejjay” sasin jaqokipaski uka arjja, wawanakajj awkinakaparu munasiñampi, respetompi jakʼachasiñatakiw Jesusan tiempopan apnaqapjjerïna.