Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Kunjamsa Jehová Diosajj munasiñap uñachtʼayistu?

¿Kunjamsa Jehová Diosajj munasiñap uñachtʼayistu?

‘Yatipjjam Dios Awkejj qawqsa munasistu uka.’ (1 JUAN 3:1)

91, 13 QʼOCHUNAKA

1. ¿Kuna toqet amuytʼapjjañapatakis apóstol Juanajj cristianonakar chʼamañchtʼäna, ukat kunatsa?

JEHOVÁ DIOSAN munasiñapat amuytʼapjjañapatakejja, akham sasaw apóstol Juanajj nayra cristianonakar säna: ‘Yatipjjam Dios Awkejj qawqsa munasistu uka’ sasa (1 Juan 3:1). Uka arunakat amuytʼañajj jiwasarus yanaptʼarakistaniwa. Jehová Dios Awkisar munasiñataki ukhamarak Jupar jukʼamp jakʼachasiñasatakiw yanaptʼistani.

2. ¿Kunatsa Diosajj janis munaskistaspa ukham yaqhepanakajj amuyapjje?

2 Yaqhepanakatakejja, qawqsa Jehová Diosajj taqenirus munasistu uk amuytʼañajj wali chʼamawa. ‘Diosajj leyinak churiri, castigasiri ukhamawa’ sasaw amuyapjje. Yaqhepanakasti, Diosan cheqa yatichäwinakap jan yatisarakiw akham sapjje: “Diosajj janiw munasirïkiti, ukhamajj Jupar janiw munasksnati” sasa. Maysa toqetjja yaqhepajj akham amuyapjjaraki: “Jan walinak lurañäni ukasa, Diosajj munasiskakistaniwa” sasa. Ukampis Bibliat yatjjatasajja, Jehová Diosar sum uñtʼtanjja. Bibliajj Diosat akham siwa: “Diosajj munasiñawa” munasiñap laykuw ‘mä sapa Yoqaparojj aka Oraqer khitani’ sasa (Juan 3:16; 1 Juan 4:8). Ukhamäkchi ukasa, uka yatichäwir iyawsañajj yaqhepanakatak  chʼamakïspawa. ¿Kunatsa? Jakäwin jan walinakan uñjasiwayapjjatap laykuw ukham amuyapjjaspa.

3. ¿Kunatsa Jehová Diosajj munasistuwa sasin sistanjja?

3 Jehová Diosajj munasistuwa sasajja, ¿kunatsa sistanjja? Jupaw lurawayistu, jakañsa churawayarakistu (Salmo 100:3-5 liytʼañataki). Ukatwa Bibliajj “Adanasti Diosan wawapänwa” sasin qhanañchi (Luc. 3:38). Ukatsti Jesusajj akham sasaw arkirinakapar mayisiñ yaticharakïna: “Alajjpachankir nanakan Awkejja” sasa (Mat. 6:9). Ukhamajja, kunjamtï mä munasir awkejj wawanakapar munaskejja ukhamarakiw Jehová Diosajj munasistu.

4. 1) ¿Kunjam Awkisa Jehová Diosajja? 2) ¿Kunsa aka yatichäwinsa jutïr yatichäwinsa yatjjataskañäni?

4 Yaqhepanakajja, awk taykapan wali tʼaqhesiyataw jilsuwayapjje, ukatwa jupanakatakejj mä awkin munasiñapat amuytʼañajj chʼamäspa. Ukampis Jehová Diosajj janipuniw tʼaqhesiykistaspati. Jupjam wali munasiri yaqha Awkejj janipuniw utjkaspati (Sal. 27:10). Jehová Diosajj walpun munasistu, kunayman toqetwa yanaptʼarakistu. Uk yatisajja jukʼampiw Juparojj jakʼachasiñ muntanjja (Sant. 4:8). Aka yatichäwinjja, kunjamsa Jehová Diosajj munasiñap uñachtʼayistu, ukwa pusi toqet yatjjataskañäni. Jutïr yatichäwinsti, kunjamsa Diosar munasitas uñachtʼaysna ukwa pusi toqet yatjjataskarakiñäni.

JEHOVÁ DIOSAJJ MUNASIRI WAJJTʼASIRI UKHAMAWA

5. ¿Kamsänsa Pablojj Atenas markan jakasiri jaqenakarojja?

5 Atenas markan walja diosanakaw utjäna, ukwa apóstol Pablojj uka markankasin uñjäna. Uka diosanakas jakañ churirïkaspa ukhamwa uka markankir jaqenakajj amuyapjjäna. Ukatwa Pablojj jupanakar akham säna: “[Jehová Diosankiw] alajjpachas akapachasa. Juparakiw akapachsa ukhamarak taqe ukan utjirinaksa lurejja. [...] Jupajjay taqe jiwasanakarojj jakañsa, samañsa, taqe kunanaksa churchistojja. [...] Jiwasanakajj Diosanwa jakapjjtanjja, sarnaqapjjaraktanjja, utjapjjaraktansa” sasa (Hech. 17:24, 25, 28). Kunanakatï jakañatakisa, kusisit jakasiñatakis munaski ukanakjja Jehová Diosaw churistu. Jichhajja, kunanaksa Diosajj jiwasar munasitap laykojj churistu ukanak mä qawqha yatjjatapjjañäni.

6. ¿Kunjamsa Jehová Diosajj aka Oraq lurtʼawayi? (18 janankir foto uñjjattʼam.)

6 Amuytʼañataki, aka Oraqejj jiwasan jakasiñasatak suma lurtʼatawa (Sal. 115:15, 16). Cientificonakajj walja planetanaksa jikjjatawayapkchejja, jichhakamajj janipuniw aka Oraqer uñtasit yaqha planet jikjjatapkiti. Jehová Diosajja, aka Oraqekwa jakaña utjañapatakejj lurtʼawayi. Ukampis janiw jakañ utjañapatakik lurawaykiti, jan ukasti wali suma, jan ajjsarayasisa, kusisita jakasiñasatakiw lurtʼawayaraki (Isa. 45:18). Aka Oraqejj wali suma luratätap uñjasajja, Jehová Diosajj qawqsa munasistu uk qhanwa amuysna (Job 38:4, 7; Salmo 8:3-5 liytʼañataki).

7. ¿Kunjamsa Jehová Diosajj munasiñap uñachtʼayarakistu?

7 Jehová Diosajj yaqha toqetarakwa munasiñap uñachtʼayistu. Jaqerojj Jupar uñtasitwa lurawayistu (Gén. 1:27). Ukhamatwa Jehová Diosajj qawqsa munasistu uk amuysna, ukatsti Juparus munasiraksna. Kunapachatï awkinakajj wawanakaparu munasipki ukhajja, wawanakajj kusisitaw jikjjatasipjje. Jehová Diosajj qawqsa munasistu uk uñjasajj ukhamarakiw jiwasajj kusisit jikjjatastanjja. Jesusajj sänwa: “Kusisiñanïpjjew  khitinakatejj ajay toqen aynachtʼatäpjjatap amuyasipjje ukanakajja” sasa (Mat. 5:3). Bibliajj sarakiwa: ‘Diosaw taqe kunsa kusisit jakañasatakejj jilarkir churistu’ sasa (1 Tim. 6:17). Cheqansa Jehová Diosajj wali munasiri wajjtʼasiri Diosawa (Sal. 145:16).

JEHOVÁ DIOSAJJ MUNASIÑAMPIW YATICHISTU

8. ¿Kunatsa Jehová Diosampi yatichatäñ muntanjja?

8 Mä awkejja, munasiñatwa wawanakaparojj sum sarnaqapjjañapataki yatichi. Ukampis jichhürunakanjja awk taykanakajj janiw Biblian yatichäwinakaparjam sarnaqapkiti, ukatwa wawanakaparojj kunas walejja, kunas jan walïkaraki uk jan yatichirjamäpkiti. Ukhamatwa wawanakajj jan kun lurirjamäsajj llakita sarnaqjje (Pro. 14:12). Ukampis Jehová Diosajja, ‘cheqa Diosätapat’ wali sumwa wawanakapar yatichi (Sal. 31:5). Kunjam Diosasa, kunjamsa Jupar yupaychañasa uka toqenakatwa yatichistu. Ukatjja, kunjamsa kusisit jakassna uksa yaticharakistuwa (Salmo 43:3 liytʼañataki). Ukhamajja, kuna cheqa yatichäwinak yatichasas Jehová Diosajj munasiñap uñachtʼayistu uk jichhajj yatjjatañäni.

Awk taykanakajja, wawanakapar Biblian cheqa yatichäwinakapat yatichasa, Diosan amigopäpjjañapataki yanaptʼasaw Jehová Diosat yateqasipjje (8-10 tʼaqanak uñjjattʼäta)

9, 10. 1) ¿Kunatsa Jehová Diosajj Jupa toqet yatichistu? 2) ¿Kunsa Jehová Diosajj jiwasat yatichistu?

9 Jehová Diosajj jupar uñtʼañasatakejj wali wakiskiri yatichäwinakwa Jupa toqet yatichistu (Sant. 4:8). Amuytʼañataki, sutipwa qhanañchistu, uka sutipasti taqe sutinakat sipansa walja kutiw Biblian uñsti. Ukatjja kunjamas Jupajja uksa yaticharakistuwa. Sañäni, luratanakapat amuytʼasajja, wali chʼamanïtapa ukhamarak wali yatiñanïtapwa amuytanjja (Rom. 1:20). Ukatsti Biblia liytʼasajja, taqe kun cheqaparu lurirïtapa munasirïtapwa amuyaraktanjja. Jehová Diosar jukʼampi uñtʼañäni ukhajja, jukʼampiw Juparojj jakʼachasiñäni.

10 Jehová Diosajj wali wakiskiri yatichäwinakwa jiwas toqet yatichistu, familiap taypinkataswa yatichistu. Jupasti familiapamp mayachtʼata sumankañana serviñaswa muni. Maysa toqetjja, Jehová Diosajj janiw jaqenakarojj jupanak pachpa apnaqasipjjañapatak lurkiti sasaw Bibliajj qhanañcharaki (Jer. 10:23). Jehová Diosakiw kunjamsa kusisit jakassna uk yati. Ukhamajja, Jupar istʼasa, respetasa sarnaqasakiw kusisita sum jakassna. Taqe ukanakjja Jehová Diosajj jiwasar munasiñatwa yatichistu.

11. ¿Kunsa Jehová Diosajj jutïrin churistani?

11 Mä munasiri awkejja, wawanakapan suma ukhamaraki kusisita jakasipjjañapwa muni. Ukampis jichhürunakanjja, jila parte jaqenakajj jutïrin kunjamänis aka Oraqen jakasiñajj uk janiw yatipkiti, ukatwa kunanakatï akapachan utjki ukanak jikjjatañataki trabajisajj tiempop inamay aptʼasipjje (Sal. 90:10). Ukampis jiwasajja, walpun Jehová Diosar yuspärtanjja. ¿Kunatsa? Jupaw jichhürunakan kusisita jakasiñatakejj yatichistu, jutïrinsti wiñay jakañwa churarakistani.

JEHOVÁ DIOSAJJ EWJJTʼIRI CHEQAÑCHIRI UKHAMAWA

12. Caín chacharusa, Baruc chacharusa ¿kunjamsa Jehová Diosajj yanaptʼäna?

12 Caín chachajj chuymapan mä jan wali amtanïnwa, uk uñjasasti Jehová Diosajj akhamwa jupar säna: “¿Kunats colerasta, ukhamarak uñnaqamas mayjtʼawayaraki? Jumatejj kuna askïki uk lurasma ukkhajja ¿janit jachʼar aptatäkarakismajja?” sasa. Cainatï Diosar istʼaspäna ukhajja, Diosajj bendicispänwa (Gén. 4:6, 7). Ukampis Cainajj janiw Diosar istʼkänti, ukhamätap laykojj jan walinakanwa uñjasïna (Gén. 4:11-13). Yaqha horasasti, Jeremías chachan Baruc secretariopaw qʼala aynachtʼata jikjjatasïna, uk uñjasasti Diosajj  kunas aynachtʼayaskäna uk amuyasiñapatakiw yanaptʼäna. Baruc chachasti, Diosarojj istʼänwa, ukhamatwa jakañap qhespiyasïna (Jer. 45:2-5).

13. Servirinakapajj jan walinakan uñjasipjjäna ukhajja, ¿kunatsa Diosajj jan qhespiykäna?

13 Jehová Diosajj munasiñatwa ewjjtʼistu cheqañcharakistu. Janiw wakiski ukhakejj cheqañchkistuti, jan ukasti Jupar jukʼamp serviñatakiw wakichtʼarakistu (Heb. 12:6). Nayra tiemponjja, Jehová Diosajj ukhamarakiw servirinakapar wakichtʼäna. Kunapachatï José, Moisés ukhamarak David chachanakajj jan walinakan uñjasipjjäna ukhajja, Diosajj janiw uka jan walinakat qhespiykänti. ¿Kunatsa? Jutïrin jukʼamp luräwinaka katoqapjjañapatakiw wakichtʼaskäna. Kunjamsa Jehová Diosajj servirinakapar yanaptʼi, wakichtʼaraki uka toqenakat Biblian liytʼasajja, qawqsa Diosajj munasistu ukwa amuytanjja (Proverbios 3:11, 12 liytʼañataki).

14. Juchar purtʼastan ukhajja, ¿kunjamsa Jehová Diosajj munasiñap uñachtʼayistu?

14 Jiwasatï juchar purtʼasiñäni ukhajja, Jehová Diosan cheqañchäwip katoqasiñasawa, ukhamtï lurañänejja Jupajj munasiñap uñachtʼayistaniwa. ¿Kunjamsa? Isaías profetajj akham sasaw Jehová Diosat qellqäna: “Jupasti perdonañatakejj jankʼakiwa” sasa (Isa. 55:7). Davitasti sarakïnwa: “Tatituw taqpach juchanakajjat pampachitu, jupaw taqe usunakajjat qʼomarachitu; jupaw amay imäwit qhespiyitu, juparakiw munasiñamp khuyapayasiñamp phoqtʼitu; [...] kamisatejj inti jalsut inti jalantkam wali jayajja, ukham jiwasanakat juchanakas jayarstʼayistu” sasa (Sal. 103:3, 4, 12). Kunjamtï uñjktanjja, Jehová Diosajj juchanakas perdonistaspawa.  Ukampis jiwasaw ewjjtʼapa ukhamarak cheqañchäwip katoqasisajj jan wali luräwinakas apanukjjañasa. Amtapuniñäni, Jehová Diosajj munasiñatwa cheqañchistu (Sal. 30:5).

JEHOVÁ DIOSAJJ JARKʼAQASIRIWA

15. ¿Kunjamsa Diosajj jiwasar munasitap uñachtʼayistu?

15 Munasir mä suma awkejja, jan walinakatwa wawanakaparojj jarkʼaqe. Jehová Diosajj ukhamarakiw jan walinakat jarkʼaqestu. Salmo 97:10 qellqatajj siwa: “Aski arkirinakapan jakañaparojj imiwa, ñanqha lurir jaqenakan amparapat qhespiyaraki” sasa. Amuytʼañataki, nayras jan usuchjasiñatakejja, jankʼakiw kuna jan walinakatsa jarkʼaqtanjja. Jehová Diosajj ukhamarakiw servirinakaparojj jankʼaki jan walinakat jarkʼaqe. Jiwasar munasitap laykuw Jupajj ukham luri (Zacarías 2:8 liytʼañataki).

16, 17. ¿Kunjamsa Jehová Diosajj jan walinakat jarkʼaqestu?

16 Jehová Diosajja, nayra tiempotpachsa angelanakap toqepuniw servirinakaparojj jarkʼaqerïna (Sal. 91:11). Amuytʼañataki, Diosan markapar qhespiyañatakejja mä angelakiw mä aruman 185.000 soldadonakar jiwarayäna (2 Rey. 19:35). Nayrïr cristianonak tiemponsti ukhamarakiw angelanakajj Pedrorusa, Pablorusa ukhamarak mayni cristianonakarus carcelat qhespipjjañapatak yanaptʼapjjäna (Hech. 5:18-20; 12:6-11). Khä África toqenkir mä markanjja, jichhakiw guerrajj utjäna. Ukanjja, nuwasiñanakasa, lunthatasiñanakasa, abusañanakasa, jiwayasiñanakasa markpachanwa utjäna. Uka markanjja Jehová Diosan Testigonakapajj taqe kunwa aptʼasipjjäna, ukampis jupanakat janiw maynis jiwkänti. Taqe kunsa aptʼasipkchïnjja, Jehová Diosaw jupanakar yanaptʼaskäna, ukwa jilat kullakanakajj amuyapjjäna. Tʼaqhesipkchïnsa, kusisitakïsipkänwa. Oraqpachan Jilïr Irpirinakan sutipjjar sariri mä jilatajj akham sasaw jupanakar jisktʼäna: “¿Kunjamäsipktasa?” sasa. Jilat kullakanakasti sapjjänwa: “Jehová Diosan yanaptʼapampejj walikïsipktwa” sasa.

17 Awisajja, yaqhep jilat kullakanakajj Jehová Diosar taqe chuyma servipjjatap laykuw jiwayat uñjasipjje. Ukaw Estebanarusa mayni discipulonakarus pasäna. Ukhamajj Jehová Diosajja, janiw servirinakaparojj jiwañat qhespiykapuniti, ukampis Supayan sipitanakanaparu jan jaltʼapjjañapatakiw ewjjtʼi, ukhamatwa jan walinakat jarkʼaqe (Efe. 6:10-12). Uka ewjjtʼanakapajja, Bibliana ukhamarak Bibliat apstʼata qellqatanakanwa jikjjatasi. Amuytʼañataki, Internetan jan wali cheqanakata amuyasiñasataki, qollqeru jan sinti munañasataki, ukhamarak wachoq juchata nuwasiñanakat parlir jan wali peliculanakata, libronakata, anatañ videonakata amuyasiñasatakiw Jehová Diosajj ewjjtʼistu. Cheqansa Diosajj munasistuwa, jan walinakatsa jarkʼaqarakistuwa.

JEHOVÁ DIOSAN MUNATÄÑAJJ WALI ASKIPUNIWA

18. Jehová Diosajj qawqsa jumar munastam uk yatisajja, ¿kunjamas jikjjatasta?

18 Moisés chachajj walja maranakaw Jehová Diosar servïna, taqe uka maranakanjja Jehová Diosan munasiñapwa uñjäna, ukatwa akham säna: “Willjtatpach khuyapayasiñamamp phoqtʼapjjeta, jakañajjansti kusisiñampiw qʼochupjjä” sasa (Sal. 90:14). Apóstol Juanan arunakapat amtañäni, jupajj sänwa: ‘Yatipjjam Dios Awkejj qawqsa munasistu uka’ sasa (1 Juan 3:1). Diosampi munatäñasa, qawqsa munasistu uk yatiñasa jiwasatakejj mä suma bendicionapuniwa.