Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Concienciasajj yanaptʼaskistuti?

¿Concienciasajj yanaptʼaskistuti?

“Aka mandamienton amtäwipajj akawa: Munasipjjam qʼoma chuymat jutki uka munasiñampi suma chuymampi [jan ukajj suma concienciampi, NM].” (1 TIM. 1:5)

57, 48 QʼOCHUNAKA

1, 2. 1) ¿Khitis amuytʼasir chuymani, jan ukajj concienciani lurawayistu? 2) ¿Kunatsa amuytʼasir chuymanïtasat yuspärañasa?

JEHOVÁ DIOSAJJA, kunatï walïki jan walïkaraki uk amuytʼir chuymanwa jaqerojj lurawayistu. Ukajja, conciencia satawa. Uka concienciaw suma luräwinak lurañatakisa, jan walinakar jan puriñatakis yanaptʼistaspa. Ukhamajj Jehová Diosajja, munasiñata ukhamaraki sum sarnaqañas munatap laykuw amuytʼasir chuymani lurtʼawayistu.

2 Jichhürunakanjja, taqeniw amuytʼasiri chuymanïtanjja (Romanos 2:14, 15 liytʼañataki). Jila parte jaqenakajj janis Biblian yatichäwinakaparjam sarnaqapkchejja, jan walinakar uñisiri sum sarnaqer jaqenakajj utjiwa. Jaqenakajja, conciencianïpjjatap laykuw sinti jan walinak jan lurapkiti. Ukampis janitï khitis conciencianïkaspa ukhajja, jaqenakajj jan walinakakwa lurjjapjjaspa, ukhamätapatjja jan walinakajj jukʼampiw jiljjattaspa. ¡Jaqenakaru amuytʼasiri chuymani luratapatjja Jehová Diosar walpun yuspärtanjja!

3. Suma conciencianïñäni ukhajja, ¿kunjamsa tamarojj yanaptʼañäni?

3 Akapachankir jaqenakat sipansa, Diosan servirinakapajj Bibliarjam yatichat suma conciencianïñwa muntanjja. Kunatï walïki jan walïkaraki ukjja Bibliarjamaw amuyañ muntanjja. Jiwasatï  suma conciencianïñäni ukhajja, taman mayachtʼat sarnaqañ utjañapatakiw yanaptʼañäni. Ukampis suma conciencianïñatakejja, janiw kuntï Bibliajj siski ukak yateqañasäkiti, jan ukasti Biblian utjki uka leyinakarojj munasiñasawa, ‘yanaptʼitaniwa’ sasaw taqe chuyma confiyañasaraki. Apóstol Pablojj akham sänwa: “Aka mandamienton amtäwipajj akawa: Munasipjjam qʼoma chuymat jutki uka munasiñampi suma chuymampi [jan ukajj suma concienciampi, NM], ukhamarak cheqpach iyawsäwimpi” sasa (1 Tim. 1:5). Conciencias Bibliarjam yatichañäni ukhamarak kuntï concienciasajj siskistani ukarjam sarnaqañäni ukhajja, Jehová Diosarojj jukʼampiw munasiñäni ukatsti jukʼampiw Juparojj confiyarakiñäni. Cheqansa, concienciasar istʼañäniti janicha ukajj jiwasatäjjewa. Ukarjamaw Jehová Diosampi sum apasitasasa, Jehová Diosar taqe chuyma serviñ munatasasa, kunjam jaqëtansa ukas uñachtʼayasini. Kunjam jaqëtansa ukajja, concienciasar istʼtanti janicha ukanwa qhan amuyasini.

4. ¿Kunsa suma conciencianïñatakejj lurañasa?

4 ¿Kunsa suma conciencianïñatakejj lurañasa? Akanakwa lurañasa: maya, sapüruw Bibliat yatjjatañasa. Paya, Biblia liyisajja lupʼiñasawa. Kimsa, Diosarojj Bibliat yateqktan ukarjam sarnaqañatakiw yanaptʼa mayiñasa. Ukanak lurasajja, janiw Biblian yatichäwinakap aleqak yatjjatañasäkiti, jan ukasti Jehová Diosar jukʼamp uñtʼañatakiw chʼamachasiñasa. Jehová Diosajj kunjam chuymanisa, kunas juparojj kusisiyi, kunas chuymap ustʼayaspa ukanakat amuytʼañatakiw chʼamachasiñasa. Ukham lurañäni ukhajja, suma conciencianïñäniwa ukaw kunatï walïki jan walïkaraki uk jankʼaki amuyañatak yanaptʼistani, ukatjja urut urutjamaw Jehová Diosajj kunjamtï amuyki ukham amuyarakiñäni.

5. ¿Kuna toqenakatsa aka yatichäwin yatjjataskañäni?

5 Inas akham jisktʼassna: “¿Kunjamsa Bibliarjam yatichat concienciasajj suma amtanakar puriñatak yanaptʼistaspa? ¿Kunjamsa jilat kullakanakasan concienciapar respetatas uñachtʼaysna? ¿Kunjamsa concienciasajj suma luräwinak lurañatak yanaptʼistaspa?” sasa. Uka jisktʼanakat amuytʼasajja, kunanakansa concienciasajj yanaptʼistaspa uk kimsa toqet uñjañäni: 1) Qollayasiñ toqeta, 2) kusistʼañ toqeta, 3) Diosan arunakap yatiyañ toqeta.

AMUYTʼASIRÏPJJAÑÄNI

6. ¿Kuna toqetsa walja jilat kullakanakajj jisktʼasipjje?

6 Bibliajja, kunatejj jan waltʼaykistaspa ukanakat jitheqtañaswa mayistu, ukatsti sarakistuwa: “Machir jaqenakampejj jan mayachasimti, janirak sinti manqʼeri jaqenakampisa” sasa (Pro. 23:20; 2 Cor. 7:1). Diosan Arupan ewjjanakaparjam sarnaqañäni ukhasa, usuntañasa, chuymankipstañas akapachan utjakipuniniwa. Ukhamajja, usuntañäni ukhajj kunampis qollayasiñäni uk jiwasaw amtañasa. Yaqhep markanakanjja, jilat kullakanakat waljanejj hospitalanwa qollayasipjje, yaqhepasti qoranakampi jan ukajj yaqha ukhamanakampiw qollayasipjjaraki. Ukatwa walja jilat kullakanakajj kuna kasta qollanakampi qollasiñas walïspa uka toqet jisktʼasipjje. Ukatakisti cartanakwa sucursalar akham sasin qellqapjje: “¿Jehová Diosan servirinakapajj aka kasta qollanakampejj qollasipjjaspati?” sasa.

7. Qollayasiñ toqetjja, ¿kunas suma amtar puriñataki yanaptʼistaspa?

7 Kunjamsa qollayasiñäni uka toqet sucursalarusa irpir chuymaninakarus jisktʼaskchiñänejja, janiw jupanakajj kunampis qollayasiñäni uk sapkistaniti (Gál. 6:5). Antisas kunsa Jehová Diosajj uka toqet amuyi ukwa amtayapjjestani, ukhamat jiwas pachpa amuytʼasisin qollayasiñasataki. Inas akham sas amtayapjjchistani: “Bibliajja, ‘janirak wilsa manqʼapjjamti’ sasaw ewjjtʼistu” sasa (Hech. 15:29). Biblian uka ewjjaparjamajja, janipuniw wiljja manqʼañasäkiti ni uchayasiñasäkisa. Janirakiw wilat pusir jaljaski  (plasma, glóbulos rojos, glóbulos blancos, plaquetas) ukanakampis uchayasiñasäkiti. Uka pusitjja, jukʼampinakaruw doctoranakajj jichhürunakan jaljapjje, ukampis ukanakampi uchayasiñasa jan uchayasiñasa sapa maynin concienciaparjamäjjewa. * Biblian kawkïr ewjjtʼanakapas qollayasiñ toqet yanaptʼarakistaspa uka toqet amuytʼaskakiñäni.

8. ¿Kunjamsa Filipenses 4:5 qellqatajj qollayasiñ toqet yanaptʼistaspa?

8 Proverbios 14:15 qellqatajj akham siwa: “Jan amuytʼasiri jaqejj taqe kuntejj sapki ukarojja iyawsakiwa, ukampis chʼikhi jaqejja amuytʼasiwa kawkinjamas saraski uk[jja]” sasa. Yaqhep usunakatakejj qollajj janiw utjkiti, ukatwa kunampis qollayasiñäni uk amuytʼasiñasa. Yaqhep jaqenakajja, ‘aka qollampejj waljaniw qollasjjapjje’ sasaw sapjjaspa, ukampis ukajj janiw cheqäkaspati, jan ukasti aleq siwsäwikïspawa. Diosan amuytʼayatäsajja Pablojj akham qellqäna: “Suma chuymanïpjjatamajj [jan ukajj amuytʼasirïpjjatamajj, NM] taqe jaqenakan uñtʼatäpan” sasa (Fili. 4:5). Amuytʼasirïñäni ukhajja, janiw waliptañ laykukejj tiempo inamay aptʼaskañäniti, jan ukasti Diosar serviñatakiw jukʼamp chʼamachasiñäni. Jiwasatak llakisjjsna ukhajja, jiwasakis taqe kunat sipans jukʼamp wakiskirïsna ukhamäspawa (Fili. 2:4). Akapachanjja usuntañajj utjakipuniniwa. Ukhamasti, jiwas pachpat sinti llakisiñat sipansa, Jehová Diosar serviñaw jakäwisan jukʼamp wakiskirïñapa (Filipenses 1:10 liytʼañataki).

¿Mayninakarojj jiwasjam lurapjjañapatakit chʼamañchtanjja? (9 tʼaqa uñjjattʼäta)

9. 1) Qollayasiñ toqetjja, ¿kunjamsa Romanos 14:13, 19 qellqatajj yanaptʼistu? 2) Pablon ewjjanakaparjam jan sarnaqsna ukhajja, ¿kunas pasaspa?

9 Roma markan jakasir yaqhep cristianonakajja, jan walinakwa cristiano masinakapat parlapjjäna. ¿Kunatsa? Jilat kullakanakajj manqʼañ toqetsa, Diosar yupaychañ fiestanak toqetsa may maya amuyunïpjjänwa. Ukampis jilat kullakanakapat jan walinak parlasajja, tamaruw jan waltʼayapjjäna. Ukatwa Pablojj jupanakar akham ewjjtʼäna: “Mayninakatakejj mä urojj jukʼampïkaspas ukhamaw yaqha urutjja. Mayninakatakisti taqe urus kikpakïkaspas ukhamarakiwa. Ukampis sapa mayniw amuykis ukjja sum yatiñapa” sasa (Romanos 14:5, 13, 15, 19, 20 liytʼañataki). ¿Kunsa uka arunakat yateqsna? Amuytʼasirïñasawa, mayninakan amuyunakapsa respetañasawa, janiw taqenin jiwasjam amuyapjjañap suyañasäkiti. Ukampis Pablon ewjjanakapar jan istʼksna ukhajja ¿kunas pasaspa? Jilat kullakanakan chuymapwa ustʼaysna, tamansa janiw mayachtʼat sarnaqañajj utj-jjaspati. Amuytʼañataki, mä markanjja, mä chacha warmiw vitaminanak alasipjjañapatak jilat kullakanakar chʼamañchapjjatayna. Yaqhepajj alasipjjänwa, yaqhepasti janiraki. Ukampis uka vitaminanak inamay alasipjjatap amuyasinjja, walja jilat kullakanakajj colerasipjjänwa. ¿Kunas jan walïkänjja? Uka chacha warmejj jan amuytʼasiripjjänwa. Jupanakajj uka  vitaminanak alasipjjchïnsa, janiw jupanakjam qollasipjjañapataki jilat kullakanakar mayiñajj wakiskänti, ukham lurasajj tamaruw jan waltʼayapjjäna.

10. ¿Kunatsa jilat kullakanakasan amtatanakap respetañasa? (8 janankir dibujo uñjjattʼam.)

10 Mä jilatasa, jan ukajj mä kullakasa inas qollayasiñ toqetsa, jan ukajj yaqha ukhamanaksa concienciaparjam lurañ amtchispa. Ukampis ukham amtatapajj janis jiwasatak walïkchinejja, janiw jiskʼachañasäkiti ni amtatap mayjtʼayañapsa mayiñasäkiti. Inas concienciapajj Biblian yatichäwiparjam yatichañajj faltaskchi, ukatwa ukham lurañ amtaspa (1 Cor. 8:11, 12). Jan ukajja, inas jiwasan concienciasajj Biblian yatichäwiparjam yatichañajj faltaskarakchi. Kun lurañatakisa, sapa mayniw amtjjañasa, ukampis amtatasat jan walinakan uñjasisajja janiw mayninakar juchañchañasäkiti.

KʼUCHIRTʼÄWINAK SUM AJLLIPJJAÑÄNI

11, 12. ¿Biblian kawkïr qellqatanakas suma kusistʼañanak ajlliñatakejj yanaptʼistaspa?

11 Taqeniw lartʼasiñsa, anattʼañsa, kusistʼañsa muntanjja, Jehová Diosaw ukham lurtʼawayistu (Ecl. 3:4). Ukampis kusistʼasin sum jikjjatasiñ munstan ukhajja, qawqha tiemposa ukat kunanakampis kusistʼasktan uka toqetwa amuyasiñasa. Ukatakejja, ¿kunjamsa concienciasajj yanaptʼistaspa?

12 Bibliajja, ‘jan wali luräwinakan qhepap jan arkapjjamti’ sasaw ewjjtʼistu. Uka jan wali luräwinakajj akanakawa: wachoqa jucha lurañanaka, qʼañu lurañanaka, vicionaka, idolonakaru yupaychañanaka, layqasiñanaka, uñisisiñanaka, quejanakan sarnaqañanaka, celasiñanaka, jupa pachpatak munañanaka, tʼaqaqtasin yaqha tamanaka tukuñanaka, envidiasiñanaka, jaqe jiwayañanaka, machañanaka, jiljas manqʼañanaka, ukanakaru uñtat yaqha lurañanakampi. “Khitinakatejj akanak lurapki ukanakajja janiw Diosan reinopanjja katoqatäpkaniti” sasaw apóstol Pablojj qellqäna (Gál. 5:19-21). Uk yatisajja, akham jisktʼasiñasawa: “Concienciajarjamajja, ¿markaj toqet saytʼasisin pelot anatañasa, uñchʼukiñasa, jan ukajj usuchjasiñjam anatirinaka uñchʼukiñasa nayatakejj walikïskiti? ¿Kawkïr videonakantï layqasiñanakasa, wachoq jucha luririnakasa, machañanakasa uñachtʼayaski ukanak uñchʼukiñajj walikïskiti?” sasa.

13. ¿Kunjamsa 1 Timoteo 4:8 ukhamarak Proverbios 13:20 qellqatanakajj kusistʼañ toqet suma amtanakaru puriñatakejj yanaptʼistaspa?

13 ¿Kuna yaqha qellqatanakas suma kusistʼañanak ajlliñatakejj yanaptʼarakistaspa? Uka toqet amuytʼaskakiñäni. 1 Timoteo 4:8 qellqatajj akham siwa: “Ejercicio lurañajj kunatakis askiwa” sasa. Jïsa, ejercicio lurañajj jan usuntañatakiw yanaptʼistaspa. Ukampis khitimpis ejercicio lurañäni ukjja sum amuytʼasiñasawa. Proverbios 13:20 qellqatajj siwa: “Suma yatiñan jaqenakamp chika sarnaqerejja, suma yatiñanirakïniwa; jan amuytʼan jaqenakamp chika sarnaqeristi, jan waltʼañaruwa purirakini” sasa. Ukhamajj kusistʼañ toqet suma amtanakaru puriñatakejja, concienciasajj Bibliarjam suma yatichatäñapawa.

14. ¿Mä kullakajj kunjamsa Romanos 14:2-4 qellqatarjamajj sarnaqäna?

14 Christian jilatampita Daniela esposapampit parltʼañäni, jupanakajja pä imill wawanïpjjänwa. Jilatajj siwa: “Familian Diosar Yupaychañataki Arumanjja, kawkïr kʼuchirtʼäwinakas walejja, kawkïrinakas jan walïkaraki uka toqetwa parlapjjerïta. Ukatsti, khitinakas suma amigonakäspa khitinakas janiraki uka toqetsa parlapjjarakirïtwa. Maynïr wawajajja, akham sasaw sapjjerïtu: ‘Colegionjja, yaqhep Testigonakajj kunatï nayatakejj jan walïki ukwa lurapjje. Nayajj jupanakjamwa lurañ munjjarakta’ sasa. Nanakasti sapjjarakirïtwa: ‘Sapa mayniw concienciaparjam kun lurañsa khitimpi sarnaqañsa amtjjañapa’” sasa (Romanos 14:2-4 liytʼañataki).

Bibliarjam yatichat concienciasajja, jan walinakatwa jarkʼaqestaspa (14 tʼaqa uñjjattʼäta)

15. Kʼuchirtʼäwir jan añcha chuyma churañatakejja, ¿kunjamsa Mateo 6:33 qellqatajj yanaptʼistaspa?

 15 ¿Kunas jumatakejj jukʼamp wakiskirejja? Tantachäwinakar sarañasa, Diosan arunakapat yatiyir sarañasa, Bibliat yatjjatañasa ¿jakäwiman wali wakiskiriti? Jan ukajj ¿kʼuchirtʼäwinakach wali wakiskirejja? ¿Kunas kʼuchirtʼäwir jan añcha chuyma churañatakejj yanaptʼistaspa? Jesusan ewjjtʼapaw yanaptʼistaspa, jupasti sänwa: “Nayraqatajj Diosan reinopa munapjjam, ukhamarak kunatejj cheqäki jupan nayraqatapanjja ukanaka, ukatsti taqe aka yänakajja jumanakarojj churatakïpjjätawa” sasa (Mat. 6:33). Ukhamajja, ¿Jesusan ewjjaparjam sarnaqañatakiti concienciamajj yanaptʼtam?

CONCIENCIASAJJ SUMA LURÄWINAK LURAÑATAKIW YANAPTʼISTU

16. ¿Kunjamsa concienciasajj Diosan arunakap yatiyañataki chʼamañchistu?

16 Concienciasatï Bibliarjam suma yatichatächejja, jan wali lurañanakatwa jarkʼaqestani, ukampis janiw ukakïkiti, suma luräwinak lurañatakis yanaptʼarakistaniwa. Concienciaw Diosan arunakapat utat uta yatiyañatakisa, yaqha cheqanakan yatiyañatakis chʼamañchistani. Pablompejj ukaw pasäna, ukatwa jupajj akham säna: “Wakisituwa parlañajjajja. ¡Janitejj Diosan arunakap parlkirist ukajja kunakïkaspa nayatakejja” sasa (1 Cor. 9:16). Pablot yateqasisin Diosan arunakapat yatiyañataki chʼamachasiñäni ukhajja, chuymasan sumaw jikjjatasiñäni. Maysa toqetjja apóstol Pablojj sänwa: ‘Kunatejj cheqäki ukwa parltanjja, uka yatiyäwir istʼañsa jan istʼañsa sapa mayniw concienciaparjam amtjjañapa’ sasa (2 Cor. 4:2).

17. Suma conciencianïtapatjja, ¿kunsa mä kullakajj luräna?

17 Jacqueline kullakat amuytʼañäni. 16 maranïskäna ukhajja ‘jaqejj monot jutatänwa’ sasaw profesorapajj yatichatayna, kullakajj siwa: “Clasejanjja kun yatjjatkasasa arstʼapunirïtwa, ukampis profesorajajj monot jutatätanwa sasin yatichkäna ukhajja, concienciajarjamajja uka toqet parlañajj janiw walïkänti, ukatwa profesorar jakʼachasisin ‘janiw nayajj ukar creykti sasin’ sista. Ukham satajja, profesorajajj janiw coleraskänti, antisas kunjamsa Diosajj lurtʼawayistu uka toqet parlañajatakiw mayitäna” sasa. Concienciaparjam lurasajja, Jacqueline kullakajj wali kusisitapuniw chuymapan jikjjatasïna. ¿Ukhamarakit concienciamajj sumanak lurañatak chʼamañchtamjja?

18. ¿Kunatsa suma conciencianïñajj wali wakiskirejja?

18 Jiwasatï Bibliat yatjjatañäni, lupʼiñäni, ukarjamas sarnaqarakiñäni ukhajja, suma conciencianïñäniwa. Ukajj wali wakiskiriwa, ukhamatwa Diosan yatichäwinakaparjamasa leyinakaparjamas sarnaqañäni. ¿Janit taqenis ukham sarnaqañ munktanjja?

^ tʼaqa 7 Diosan munasiñapan jakasipxañäni libron 215-218 jananak uñjjattʼäta.