Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jehová Diosar yupaychañ utjja wali askit uñjapjjañäni

Jehová Diosar yupaychañ utjja wali askit uñjapjjañäni

“Utamar munañaw tukuntitu.” (JUAN 2:17)

127, 118 QʼOCHUNAKA

1, 2. 1) Diosan nayra servirinakapajj ¿kawkinsa Diosar yupaychapjjerïna? 2) ¿Kunjamsa Jesusajj Diosar yupaychañ templo uñjäna? 3) ¿Kunsa aka yatichäwin yatjjataskañäni?

DIOSAN servirinakapajja, khä nayra maranakatpachwa Diosar yupaychañatakejj mä cheqa thaqhapjjerïna. Amuytʼañataki, Abel chachajj mä altar lurasaw Jehová Diosar sacrificio loqtirïna (Gén. 4:3, 4). Noé, Abraham, Isaac, Jacob, Moisés chachanakajja, Diosar loqtañatakejj altaranakwa lurapjjarakirïna (Gén. 8:20; 12:7; 26:25; 35:1; Éxo. 17:15). Janiw ukakïkiti, Jehová Diosajj israelitanakar Jupar yupaychañataki mä tabernáculo lurapjjañapwa mayïna (Éxo. 25:8). Qhepatsti mä templo lurapjjañapwa mayirakïna (1 Rey. 8:27, 29). Kunapachatï israelitanakajj Babiloniat mistjjapjjäna ukhajja, sinagoganakanwa tantachasipjjäna (Mar. 6:2; Juan 18:20; Hech. 15:21). Ukatjja, nayrïr cristianonakajj utanakanwa tantachasipjjarakïna (Hech. 12:12; 1 Cor. 16:19). Jichhürunakanjja, Jehová Diosan Testigonakapajj aka Oraqpachanwa walja waranqa Tantachasiñ Utanakan Diosar yupaycharaktanjja.

2 Jesusajja, Jerusalén markankir templjja wali askitwa uñjäna. Templor ukham wal munasitap uñjasajja, Jesusan arkirinakapajj  salmo qellqerin aka arunakapwa amtapjjäna: “Utamar munañaw tukuntitu” sasa (Sal. 69:9; Juan 2:17). Kunjamtï yatktanjja, templojj Jehová Diosan utapäkaspas ukhamänwa, ukampis Tantachasiñ Utanakampejj janiw ukhamäkiti (2 Cró. 5:13; 33:4). Ukhamäkchi ukasa, Tantachasiñ Utanakjja wali askitwa uñjañasa, ukanakanwa Jehová Diosar yupaychtanjja. Aka yatichäwinjja, Tantachasiñ Utan kunjamäñasasa, kunjamsa Tantachasiñ Utanak uñjañasa, jukʼampi Tantachasiñ Utanak lurasiñapatakejj kunjamsa yanaptʼsna uka toqenakatwa Bibliarjam yatjjataskañäni. *

TANTACHÄWINAK WALI ASKIT UÑJAPJJAÑÄNI

3-5. 1) ¿Kunatakis Tantachasiñ Utajja? 2) ¿Kunjamsa tantachäwinak uñjañasa?

3 Tantachasiñ Utanakanwa Diosar yupaychtanjja. Tantachäwinakajj Jehová Diosan mä suma regalopawa. ¿Kunatsa ukham sistanjja? Diosamp jukʼamp sum apasiñatakiw yanaptʼistu. Ukhamarusa, Diosajj markap toqew wakiski ukarjam yanaptʼistu ukatjj ewjjtʼarakistu. Tantachäwinakanjja, Jehová Diosata ukhamarak Jesusatwa wali suma yatichäwinak sapa semana katoqtanjja. Jupanakajj ‘mesapat’ manqtʼasiñatakiw jawstʼapjjestu, ukajj mä bendicionapuniwa (1 Cor. 10:21).

4 Jehová Diosajja, Biblia toqew tantachäwinakar sarañasatak mayistu, ukhamat ukan Jupar yupaychañasataki ukhamarak maynit maynikam chʼamañchtʼasiñasataki (Hebreos 10:24, 25 liytʼañataki). Jehová Diosaru respetatas laykojja, tantachäwinakat janipuniw faltasiñ munktanti, sinti usuntañasa jan ukajj yaqha ukhamanakas utj-jjaspa ukhakiw jan sarjjsnati. Maysa toqetjja, arstʼañatak wakichtʼasisaw tantachäwinak wali askit uñjatas uñachtʼaytanjja (Sal. 22:22).

5 Tantachäwinakan sum istʼasasa, Tantachasiñ Uta sum uñjasasa, Jehová Diosar respetataswa uñachtʼayasktanjja. Ukhamarusa, jaqenakajj luratasa ukhamarak sarnaqatasa uñjas Jehová Diosat sum parlapjjañapwa muntanjja. Ukhamatwa Tantachasiñ Utanakan letreropan Jehová sutejj uñsti uka suti jachʼañchañäni (1 Reyes 8:17 uñjjattʼarakismawa).

6. Tantachasiñ Utaru visittʼir yaqhep jaqenakajj ¿kamsapjjesa? (27 janankir foto uñjjattʼam.)

6 Tantachasiñ Uta wali askit uñjatasjja walja jaqenakaw amuyapjje. Amuytʼañataki, Turquía markankir mä chachajja, Tantachasiñ Uta wali suma ukhamarak qʼoma uñjasajja, wal muspharäna. Jilat kullakanakar suma isthaptʼat uñjasasa, kusisita jupar arunttʼir uñjasasa walwa uka chachajj musphararakïna. Taqe ukanak uñjasajja, uka chachajj tantachäwinakaruw sarjjäna, ukatsti mä qawqha tiempot bautisasjjarakïnwa. Jichhajj Indonesia markat parltʼarakiñäni, uka markanjja, mä Tantachasiñ Utaw lurasïna. Uk uñjapjjañapatakisti jilat kullakanakajj vecinonakaru, uka markankir alcalderu ukhamarak yaqha autoridadanakaruw invittʼapjjäna. Alcaldejja, Tantachasiñ Utan jardinap uñjasasa, Tantachasiñ Utajj suma lurtʼatätap uñjasasa walpun muspharäna. Jupasti akham siwa: “Tantachasiñ Utajj wali qʼomawa, ukaw Diosar taqe chuyma iyawsapjjatam uñachtʼayi” sasa.

Tantachasiñ Utanjja Jehová Diosar respetatas uñachtʼayapjjañäni (7, 8 tʼaqanak uñjjattʼäta)

7, 8. ¿Kunjamsa Tantachasiñ Utan Jehová Diosar respetatas uñachtʼaytanjja?

7 Jehová Diosaw tantachäwinakarojj invittʼistu. Jupajja, tantachäwinakar suma isthaptʼat sarañasa, ukatsti ukan sum istʼañaswa muni. Ukhamasti tantachäwinakan kunanakas lurasiñapa kunarakis jan lurasiñapäki ukjja,  janiw mä kamachir uñtat apsuñajj wakiskaspati. Ukampis tantachäwinakanjja, janiw utasansa jikjjatasksna ukham kuns lurañasäkiti. Jehová Diosajja, tantachäwir saririnakajj sum jikjjatasipjjaspa ukwa muni. Ukampis janipuniw kuna luratasampis tantachäwinakar jan askit uñjatas uñachtʼayañ munktanti. Ukatwa tantachäwinakar suma isthaptʼata sartanjja. Tantachäwejj qalltjje ukhajja, janiw mayninakampejj parlktanti, mensajenaksa qellqktanti, janirakiw manqʼktanti ni kunsa umkaraktanti. Awk taykanakasa, wawanakaparojj Tantachasiñ Utan jan anatapjjañapataki jan tʼijnaqapjjañapatakiw yatichapjje (Ecl. 3:1).

8 Tantachasiñ Utarojja, Jehová Diosar yupaychiri ukhamarak Jupat yateqeriw sartanjja. Janiw kuna aljañsa ukar apktanti ni uka toqetsa parlkaraktanti (Nehemías 13:7, 8 uñjjattʼarakisma). Jesusat amtañäni, kunapachatï templo manqhan aljirinak uñjäna ukhajja, walpun colerasïna, ukatwa uka aljirinakar templot alisnuküna (Juan 2:13-17).

JUKʼAMP TANTACHASIÑ UTANAK LURASIÑAPATAKI YANAPTʼAPJJAÑÄNI

9, 10. 1) ¿Kunjamsa jilat kullakanakajj Tantachasiñ Utanak lurasiñapatakejj yanaptʼapjje? 2) ¿Kunas ukham lurasitapat uñjasiwayi? 3) Kawkhanakantï Tantachasiñ Utanak lurañatakejj jan qollqenïpki uka tamanakarojj ¿kunjamsa yanaptʼasiwayi?

9 Taqe aka Oraqpachanjja, walja jilat kullakanakaw Tantachasiñ Utanak lurañ yanaptʼapjje. Jupanakaw Tantachasiñ Utajj kunjamänisa uk sum amuytʼapjje, ukatsti ukarjamaw lurapjje, askichapjjaraki. Taqe ukanakjja jan kun mayisakiw lurapjje. Noviembre 1, 1999 marat 2014 marakamajja, 28.000 jila Tantachasiñ Utanakaw lurasiwayi, sapürojj phesqa Tantachasiñ Utanakas Oraqpachan luraskaspa ukhamawa.

10 Khitinakatï walja utjirinïpki ukanakajja, jukʼa utjirinïpki ukanakar yanaptʼapjjañapawa sasaw Bibliajj sistu (2 Corintios 8:13-15 liytʼañataki). Jehová Diosan markapanjja, waljaniw jan qollqe mayisa Tantachasiñ Utanak lurañ yanaptʼapjje, ukatsti waljanirakiw jukʼampi Tantachasiñ Utanak lurasiñapatakejj qollqemp yanaptʼapjjaraki. Ukhamatwa kawkhanakantï Tantachasiñ Utanak lurañatakejj jan qollqenïpki uka cheqanakan lurasiwayi.

11. Tantachasiñ Uta lurasitapatjja, ¿kamsapjjes yaqhep jilat kullakanakajja, ukat kunjamas jiwasajj jikjjatastanjja?

11 Costa Rica markanjja, mä Tantachasiñ Utajj kimsaqallqo urunakwa lurasiwayi. Ukankir jilat kullakanakajj akham sapjjewa: “Ukham Tantachasiñ Uta lurasitapajj janiw cheqaw sañjamäkiti, Jehová Diosarusa, markaparusa walpun yuspärapjjta, aka Tantachasiñ Utajj Jehová Diosan mä suma regalopapuniwa” sasa. Jehová Diosar ukham  yuspärapjjatap yatiñajja, taqeniruw kusisiyistu. Taqe aka Oraqpachankir jilat kullakanakan mä Tantachasiñ Utanïpjjatap yatisajj walpun kusistanjja. Jehová Diosan bendicionapampejja, walja Tantachasiñ Utanakaw lurasiski. Kunapachatï mä Tantachasiñ Utajj luraski ukhajja, walja jaqenakaw Jehová Diosat jukʼamp yateqañataki tantachäwinakar sarapjje (Sal. 127:1).

12. ¿Kunjamsa jukʼampi Tantachasiñ Utanak lurasiñapatakejj yanaptʼsna?

12 ¿Kunjamsa jukʼampi Tantachasiñ Utanak lurasiñapatakejj yanaptʼsna? Tantachasiñ Uta lurañan jiwasaw yanaptʼsna. Ukatjja, qollqempis taqeniw yanaptʼaraksna. Jiwasatï taqe chuyma kunatï utjkistu ukampi yanaptʼañäni ukhajja, wali kusisitaw jikjjatasiñäni, ukatsti Jehová Diosaruw jachʼañcharakiñäni. Diosar taqe chuyma nayra servirinakatwa yateqasiñ muntanjja. Jupanakajja Diosar yupaychañ cheqanak lurasiñapatakejja, taqe chuymaw qollqemp yanaptʼapjjerïna (Éxo. 25:2; 2 Cor. 9:7).

TANTACHASIÑ UTAJJ QʼOMÄÑAPAWA

13, 14. Bibliarjamajja, ¿kunatsa Tantachasiñ Utajj qʼoma suma apthaptʼata ukhamäñapa?

13 Jehová Diosajj qollana qʼoma ukhamawa, Jupajja taqe kunas sum sarayasispa ukwa muni. Ukatwa Tantachasiñ Utajj qʼoma suma apthaptʼata ukhamäñapa (1 Cor. 14:33, 40, NM). Jehová Diosjam qʼomäñatakejja, amuyusasa, luratasasa, Diosar servitasasa, qʼomäñapawa. Janiw ukakïkiti, cuerposas qʼomäñaparakiwa (Apo. 19:8).

14 Tantachasiñ Utatï wali qʼomänejja, jaqenakar invittʼañ janiw ajjsarkañäniti. Tantachasiñ Uta wali qʼoma uñjasajja, mä suma  qʼoma jutïr pachan jakañ munataswa jaqenakajj amuyapjjani. Ukatjja, aka Oraqe mä suma paraisor tukuykani uka qollana Diosar yupaychatassa amuyapjjarakiniwa (Isa. 6:1-3; Apo. 11:18).

15, 16. 1) ¿Kunatsa Tantachasiñ Uta sapa kuti qʼomachañajj chʼamakïspa? 2) ¿Kunatsa Tantachasiñ Utajj qʼomäñapapuni? 3) Tantachasiñ Uta qʼomachasiñapatakejj ¿kunsa lurapjjta, ukat kunsa sapa maynejj lurañasa?

15 Awisajja, Tantachasiñ Uta sapa kuti qʼomachañajj chʼamakïspawa. ¿Kunatsa? Qʼoma sarnaqañ toqet sapa mayniw mayj mayja amuytanjja. Yaqhepanakajj kawkhantï laqʼasa, ñeqʼesa waljäki uka cheqanakanwa jakasipjje. Yaqhepansti janiw umasa, qʼomachañatak yänakapas utjkarakiti. Ukhamajj kawkinsay jakasstan jan ukajj kunsay jaqenakajj amuyapjjpan, Tantachasiñ Utajj qʼoma suma apthaptʼata ukhamäñapawa. ¿Kunatsa? Tantachasiñ Utanwa Jehová Diosar yupaychtanjja (Deu. 23:14).

16 Tantachasiñ Uta qʼomachañatakejj sum waktʼayasiñapaw wakisi. Ukatakisti irpir chuymaninakaw mä programa wakichtʼapjje, ukatjja kunanakas qʼomachañatakejj munasi ukanaksa wakichtʼapjjaraki. Ukhamarusa, sum qʼomachasiñapatakejja, sapa mayni jilat kullakanakaruw kunsa lurapjjaspa uk sapjje. Tantachasiñ Utan yaqhep cheqanakajja, sapa tantachäwi tukuyaruw qʼomachasiñapa, yaqhep cheqasti mä qawqha tiempotwa qʼomachasiñaparaki. Cheqas Tantachasiñ Uta qʼomäñapatakejj taqeniw yanaptʼsna.

TANTACHASIÑ UTAJJ SUMA UÑJATÄÑAPAWA

17, 18. 1) ¿Kunsa Jehová Diosan nayra servirinakapat yateqassna? 2) ¿Kunatsa Tantachasiñ Utjja wali sum uñjañasa?

17 Nayra maranakanjja, Diosar servirinakapajj wali sumwa templo uñjapjjerïna. Sañäni, Joás (Jehoás) reyejja templo askichapjjañapatakiw Judá markankir sacerdotenakar mayïna, uksti israelitanakajj churapkäna uka qollqempiw lurapjjañapäna (2 Rey. 12:4, 5). Pä patak maranak qhepatsti, ukhamarakiw Josías reyejj templo askichayäna, uksti israelitanakajj churapkäna uka qollqempiw lurayäna (2 Crónicas 34:9-11 liytʼañataki). Jiwasajja, jupanakjamarakiw Tantachasiñ Utjja sum uñjañasa, kunatï askichañajj wakiski uksa askichañasa.

18 Yaqhep cheqanakanjja, janiw Tantachasiñ Utasa, kunanakatï ukan utjki ukanakas suma uñjatäkiti ukwa yaqhep sucursalanakajj amuyapjje. ¿Kunatsa jan suma uñjatäkpacha? Yaqhepanakajj janiw askichañ yatipkiti. Yaqhepanakansti janiw alañatakejj qollqejj utjkarakiti. Ukampis ukhamaruki jaytasjjaspa ukhajja, jukʼampikiw Tantachasiñ Utajj jan waltʼjjaspa. Uk uñjasasti jaqenakajj jan walitwa jiwasar uñj-jjestaspa. Ukatwa Tantachasiñ Uta wali sum uñjañatak chʼamachasiñasa. Ukhamtï lurañänejja, Jehová Diosaruw jachʼañchañäni, jilat kullakanakajj qollqempi yanaptʼapki uksa janiw ina chʼusar tukjkañäniti.

Tantachasiñ Utajj qʼoma ukat wali suma uñjatäñapawa (16, 18 tʼaqanak uñjjattʼäta)

19. Tantachasiñ Uta wali askit uñjatasjja, ¿kunjamsa uñachtʼaysna?

19 Tantachasiñ Uta wali askit uñjañatakiw akan yateqawayktan uka textonakajj yanaptʼistu. Tantachasiñ Utanakajj Jehová Diosankiwa janiw mä jaqenkkisa ni mä tamankkisa. Jehová Diosarutï respetomp uñjstanjja, tantachäwinaksa Tantachasiñ Utsa wali askitwa uñjañäni. Ukatjja, jukʼampi Tantachasiñ Utanak lurasiñapatakis taqe chuymaw qollqesamp yanaptʼañäni, ukatjj qʼomäñapatakisa sum uñjañatakisa chʼamachasirakiñäniwa. Ukhamasti, Jesusat yateqasis sarnaqaskakiñäni, Jehová Diosar yupaychañ utsa wali askit uñjaskakiñäni (Juan 2:17).

^ tʼaqa 2 Aka yatichäwinjja, Tantachasiñ Utanakatwa parli. Ukampis akan yatjjatkañäni uka ewjjanakarjamaw Jachʼa Tantachasiñ Utanakansa yaqha ukham cheqanakansa lurasirakispa.