Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jehová Diosarojj ¿cheqpach amigomarjamat uñjaskta?

Jehová Diosarojj ¿cheqpach amigomarjamat uñjaskta?

“Diosar jakʼachasipjjam, jupasti jumanakarojj jakʼachasirakiniwa.” (SANT. 4:8)

1. ¿Kunatsa Jehová Diosampi sum apasiñatak chʼamachasiñasa?

JEHOVÁ DIOSAN Qhanañchirinakapajja, Diosampejj sum apastanjja, janipuniw yaqha ukhamajj utjkaspati. Ukampis ukham sum apasiskakiñatakejj chʼamachasiñasawa. ¿Kunatsa? Supayan apnaqat pachapanwa jaktanjja, ukhamarus pantjasiri jaqerakïtanwa ukanakaw Jehová Diosampi sum apasitas aynachtʼayaspa.

2. 1) Maynimpi sum apasiñajj ¿kunjamasa? (Qhanañchäwi uñjjattʼäta.) 2) ¿Kunjamatsa Jehová Diosampi jukʼamp sum apassna?

2 Jehová Diosarojj ¿cheqpach amigomarjamat uñjaskta? ¿Jupampi jukʼamp sum apasiñ munasmati? Ukatakejj Santiago 4:8 qellqataw yanaptʼiristam, ukanjja siwa: “Diosar jakʼachasipjjam, jupasti jumanakarojj jakʼachasirakiniwa” sasa. Kunjamtï uka qellqatan siskejja, Jehová Diosampi sum apasiñatakejj Diosar jakʼachasiñamawa, Jupasti jakʼachasirakïtamwa. * Jehová Diosar  jukʼamp jakʼachasïta ukhajja, Jupampejj jukʼamp sumwa apasïta. Ukatjja, Jesusjamaw jikjjatasirakïta, jupajj akham sänwa: “Khititï khitankitu ukajja cheqpachapiniwa [...]. Nayajj juparojj uñtʼtwa” sasa (Juan 7:28, 29, MT). Jehová Diosar jakʼachasiñatakejj kuns lursna uk uñjañäni.

¿Kunjamsa Jehová Diosampejj parltʼastanjja? (3 tʼaqa uñjjattʼäta)

3. ¿Kunjamsa Jehová Diosampejj parltʼassna?

3 Jiwasatï Jehová Diosar jakʼachasiñ munstan ukhajja, Jupampejj parltʼasiñasapuniwa. ¿Kunjamsa uk lursna? Uk amuytʼañatakejj pä amigot parltʼañäni. Jupanakatï jan mä cheqanak jakapkchi ukhajja, ¿kunsa lurapjjaspa? Celular toqew qellqasipjjaspa, parltʼasipjjarakispa. Jehová Diosampi sum apasiñajj niya ukhamarakiwa. ¿Kunjamsa Jupampejj parltʼastanjja? Oración sapakuti lurasa (Salmo 142:2 liytʼañataki). ¿Kunjamsa Jehová Diosajj jiwasar parlistu? Biblia toqew parlistu. Ukhamasti Jupar istʼañatakejj sapakutiw Biblia liyiñasa, kuntï liytʼktan uksa lupʼiñasarakiwa (Isaías 30:20, 21 liytʼañataki). Jiwasatï Jehová Diosampi parltʼasiñäni ukhajja, Jupampejj wali sumwa apasiñäni, ukwa jichhajj yatjjataskañäni.

JEHOVÁ DIOSAJJ BIBLIA TOQEW PARLISTU

4, 5. ¿Kunjamsa Jehová Diosajj Biblia toqe parlistu? Uk mä uñachtʼäwimpi qhanañchtʼam.

4 Taqe aka oraqpachankir jaqenakaruw Biblian yatichäwinakapajj yanaptʼaspa, uk sumwa yattanjja. Ukampis Bibliajj sapa mayniruw Jehová Diosaru jakʼachasiñatak yanaptʼistaspa. Ukatakejja, Biblia liyisasa, yatjjatasasa, kunjamsa jikjjatastan uk sumwa amuyañasa. Kunjamsa ukarjam sarnaqsna uksa lupʼiñasarakiwa. Taqe ukanaktï lurañänejja, Jehová Diosas jiwasamp parlkaspa ukhamäniwa. Ukatjja kunjamsa Jehová Diosajj yanaptʼistu uk amuyasajja, jukʼamp sumwa Jupampejj apasiñäni (Heb. 4:12; Sant. 1:23-25).

5 Amuytʼañataki, Mateo 6:19, 20 qellqatanjja Jesusajj akham sänwa: “Akapachanjja jan imapjjamti walja yänakjja” sasa. Uka arunak liytʼasajj ¿kunjamas jikjjatastanjja? Jehová Diosaru jakäwisan nayraru uskuskstan ukhajja, Jupajj ukham luratas uñjasajj sumaw jikjjatasini. Ukampis Jesusan arunakap liytʼasatï Jehová Diosaru jakäwisan jan nayraru uskuskatasa ukhamarak kunatï munaski ukampik jan jakaskatas amuyasstan ukhajja, Jehová Diosajj jupar jakʼachasiñasataki yanaptʼaskatapwa amuyañäni.

6, 7. 1) Bibliat yatjjatasajja, ¿kunjamsa Jehová Diosamp apastanjja? 2) ¿Kuna amtampis Bibliat yatjjatañasa?

6 Kunapachatï Biblia liytʼktan ukhajja,  Jehová Diosar jukʼamp serviñataki jakäwis mayjtʼayañ wakisitapwa amuytanjja. Ukatsti Jehová Diosajj kunjam chuymanisa, kunanaksa munasiñat luri ukanaksa Biblia liytʼasajj amuyaraktanwa. Taqe ukanak yatjjatasajja, Diosarojj jukʼampiw munastanjja. Jupas ukhamarakiw jukʼamp munasistu. Ukhamatwa Jehová Diosampi sum apasitasajj jukʼamp jiltaraki (1 Corintios 8:3 liytʼañataki).

7 Jehová Diosaru jakʼachasiñ munstan ukhajja, mä amtampiw Bibliat yatjjatañasa. Juan 17:3 qellqatajj akham siwa: “Aka wiñay jakañajj juma sapa cheqpach Diosar uñtʼañanwa utji, ukhamarak Jesucristoru kawkïrirutejj jumajj khitankta ukaru” sasa. Cheqas Biblia liytʼasajja, walja suma yatichäwinakwa yatjjattanjja. Ukampis janiw uka amtampik Bibliat yatjjatañasäkiti, jan ukasti Jehová Diosar jukʼamp sum uñtʼañatakiw yatjjatañasa (Éxodo 33:13 liytʼañataki; Sal. 25:4).

8. 1) Azarías reyir Jehová Diosan castigatap Biblian liytʼasajja, ¿kunsa yaqhep jaqenakajj amuyapjjaspa? 2) ¿Jehová Diosan kun luratapatsa jan pächasktanjja?

8 Jehová Diosarutï cheqpach amigosarjam uñjañäni ukhajja, Jupan luratanakapat Biblian yaqhep cheqanakan jan sum qhanañchaski ukhajj janiw pächaskañäniti. Uk sum amuytʼañatakejj Judá marka apnaqeri Azarías reyit parltʼañäni. Kunapachatï jupajj reyjam apnaqkäna ukhajja, markpachaw kʼari diosanakar yupaychapjjäna. Ukampis jupajj janiw ukham lurkänti, jan ukasti luratanakapajj “cheqapänwa Tatitun nayraqatapanjja” sasaw Bibliajj qhanañchi (2 Rey. 15:1-5). Ukampis Jehová Diosajj lepra usumpiw castigäna. ¿Kunatsa? 2 Reyes 15:1-5 qellqatajj janiw uka toqet kamskisa. Ukatwa yaqhepanakajj akham amuyapjjaspa: “Diosajj janiw cheqapäkiti, ina chʼusatakwa Azarías reyir castigäna” sasa. Ukampis jiwasajj Jehová Diosarojj sumwa uñtʼtanjja, Jupajj taqe kunsa cheqaparupuniw luri (Jer. 30:11). Jehová Diosajj kunatsa Azarías reyiru castigäna uk janisay yatkstanjja, cheqaparjam luratapat janiw pächasktanti.

9. ¿Kunatsa Jehová Diosajj Azarías reyir castigäna?

9 Azarías reyin sarnaqäwipatjja, Biblian yaqhep cheqanakanwa jukʼampi qhanañchasi, juparojj Uzías sutimpiw uñtʼasiraki (2 Rey. 15:7, 32). 2 Crónicas 26:3-5, 16-21 qellqatanakanjja, “Uziasan luratanakapasti Tatitun nayraqatapanjja cheqapänwa” sasaw qhanañchi. Ukampis qhepat jachʼa jachʼaw tukjjäna sasaw qhanañcharaki. Mä kutejja, kuntï sacerdotenakaki lurapjjañapäkäna ukwa lurañ munäna. Jan lurañapatakisti 81 sacerdotenakajj ‘janiw uk lurañamajj walïkiti’ sasaw jarktʼañ munapjjäna. Uzías reyejj jachʼa jachʼa tukjjatap laykusti, jupanakatak colerasïnwa, janirakiw istʼkänti. Ukanak yatisaw kunatsa Jehová Diosajj Uzías reyir castigäna uk sum amuytanjja.

10. 1) Jehová Diosajj taqe luratanakapat qhanañchañapjja, ¿kunatsa jan suyktanjja? 2) Jehová Diosan taqe kun cheqapar luratapatjja, ¿kunjamatsa jan pächasksna?

10 ¿Kunsa yateqsna? Azarías reyin sarnaqäwipat Biblian qellqatäki ukajja, kunatsa Jehová Diosajj jupar castigäna uk amuytʼañatakiw yanaptʼistu. Ukampis Bibliankir yaqhep sarnaqäwinakajj janiw ukham qhanañchaskiti. Ukhamätap laykojj ¿Jehová Diosan luratanakapat pächasiñäniti? Jan ukajj ¿taqe kunsa cheqaparuw luri sasiñcha Jupar confiyañäni? (Deu. 32:4.) Biblianjja, Jehová Diosar sum uñtʼañasatakisa confiyañasatakisa sumaw qhanañchasi. Jiwasatï Jupar sum uñtʼañäni, munasirakiñäni ukhajja,  luratanakapata janiw taqpachpun qhanañchañap suykañäniti. Ukampis ¿kunjamatsa Jehová Diosan taqe kun cheqapar luratapat jan pächasksna? Bibliat yatjjatasa. Ukhamatwa Jehová Diosan cheqpacha amigopäñäni (Sal. 77:12, 13).

JEHOVÁ DIOSAMPEJJ ORACIÓN TOQEW PARLASTANJJA

11-13. Jehová Diosajj oracionanakas istʼapuniwa sasajja, ¿kunatsa jan pächasktanjja? (19 janankir dibujo uñjjattʼäta.)

11 Jehová Diosarojj oración lurasaw jachʼañchtansa, yuspärtansa yanaptʼsa mayiraktanjja. Ukanakaw Diosar jukʼampi jakʼachasiyistu (Sal. 32:8). Ukampis jiwasatï Jehová Diosan cheqpach amigopäñ munstan ukhajja, mayisitanakas istʼatapat janiw pächasiñasäkiti.

12 Yaqhep jaqenakajja, janis Diosajj mayisitanakas istʼkaspa, Diosar mayisiñajj sum jikjjatasiñatakïkaspas ukhamwa amuyapjje. Jupanakajj akham sapjjewa: “Oracionajj jan waltʼäwinakasat amuytʼasin askichañatakiw yanaptʼistu” sasa. Cheqas Diosar mayisiñajj ukatakiw yanaptʼistaspa, ukampis Jehová Diosajj cheqpachapuniw mayisitanakas istʼistu. ¿Kunatsa ukham sistanjja?

13 Jesusat parltʼañäni. Janïr aka Oraqer jutkasajja, Jehová Diosajj kunjamsa servirinakapan mayisitanakap istʼäna uk sumwa uñjäna. Kunapachatï Oraqeru jutkän ukhajja, Jesusajj Diosaruw kunjamsa jikjjatasïna, kunsa amuyäna ukanak yatiyirïna. Mä kutejja, arum paqaraw Awkipampi parlasïna (Luc. 6:12; 22:40-46). Ukhamarusa, discipulonakaparuw Diosar mayisipjjañapatak yaticharakïna. Jesusatï oracionanak Diosan jan istʼatap yatisapäna ukhajja, ¿ukanak lurasapänti? Janiwa. Jehová Diosajj oracionanak istʼirïtap Jesusajj yatïnwa, ukatwa mä kutejj akham säna: “Awkiy, yuspagarsmawa nayar istʼatamata. Yattwa jumajj nayarojj istʼapunistawa” sasa. Jiwasajj ukhamarakiw Jehová Diosan oracionanak ‘istʼirïtapat’ confiytanjja (Juan 11:41, 42; Sal. 65:2).

14, 15. 1) ¿Kunatsa Jehová Diosarojj qhana arunakampi mayisiñasa? 2) ¿Kunjamsa mä kullakarojj Diosar mayisiñajj yanaptʼawayi?

14 Jehová Diosajj kunjamsa mayitanakas  istʼi uk awisajj janiw amuyksnati. Ukampis kunsa Diosar mayisiñ muntan uk qhana arunakampi sañäni ukhajja, mayitanakasar Jehová Diosan istʼatap sum amuyañäni. Ukhamatwa Jehová Diosajj wali suma amigosäni. Jiwasatï llakinakas taqe chuyma Jupar yatiyañäni ukhajja, jakʼachasistaniwa.

15 Kathy kullakat parltʼañäni. * Janïr jubilaskasajja, Kathy kullakajj yatiyirejj sarirïnwa, ukampis yatiyañajj janiw gustkänti. Kunapachatï jubilasjjäna ukhajja, mä irpir chuymaniw precursor regularjam irnaqtʼañapatak chʼamañchtʼäna. Ukatwa kullakajj precursorjam serviñ amtäna. Niyakejjay yatiyañajj jan gustkchïnjja, kullakajj Jehová Diosaruw uka toqet yanaptʼatäñatak sapüru mayisïna. ¿Jehová Diosajj mayisitapar istʼpachänti? Jïsa. Jichhajj uka kullakajj kimsa maraw precursorjam serviski. Kathy kullakasti akham siwa: “Walja horanak Diosan arunakap yatiyasasa, kullakanakan yanaptʼatasa, jukʼamp sumwa yatiyjjta, jichhajj yatiyañajj wal gustjjetu. Janiw ukakïkiti, Jehová Diosampis jukʼamp sumwa apasta” sasa. Kunjamtï uñjktanjja, Diosar mayisiñaw Kathy kullakarojj Jehová Diosampi sum apasiñataki yanaptʼawayi.

JIWASAW CHʼAMACHASIÑASARAKI

16, 17. 1) Jehová Diosampi sapürutjam sum apasiñatakejja, ¿kun lurañasasa? 2) ¿Kuna toqetsa jutïr yatichäwin yatjjataskañäni?

16 Jehová Diosarojj sapürunjamaw jakʼachasiskaksna. Ukhamasti, Bibliat yatjjatasina Jehová Diosaru istʼasipkakiñäni. Oración toqes Diosamp parlasiskakiñäni. Ukhamtï lurañäni ukhajja, Jehová Diosampejj jukʼamp sumaw apasiñäni. Yanaptʼapampejja jan walinakan uñjasisas aguantaskakiñäniwa.

Jehová Diosar jakʼachasipuniñäni (16, 17 tʼaqanak uñjjattʼäta)

17 Sapürus Diosar mayiskchiñänejja, jan walinakan uñjasiskaksnawa. Ukhamätap laykuw Jehová Diosar jan confiyjjsnati. Inas akham amuyjjsna: “Diosajj janiw mayisitanakaj istʼjjetuti, ¿janit amigopäjjpachätjja?” sasa. Ukhamtï chuymasan amuyañäni ukhajja, ¿kunsa lursna? Ukwa jutïr yatichäwin yatjjataskañäni.

^ tʼaqa 2 Pä jaqejj munasipki confiyasipki ukhaw purapat sum apasipjje. Ukham sum apasiskakiñatakejj chʼamachasipjjañapawa.

^ tʼaqa 15 Yaqha sutimpi uchatawa.