Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 SARNAQÄWI

Jukʼamp sum jakasiñwa jikjjatapjjta

Jukʼamp sum jakasiñwa jikjjatapjjta

KUNAPACHATÏ nayasa ukat Gwen sat esposajas phesqa maranïpkayäta ukhaw thoqhoñ yateqañ qalltapjjta. Ukhajj janïraw uñtʼasipkayätti. Ukampis sapa maynitakejja, ballet ukan thoqhoñajj marat maratjamaw jakäwinakajan nayrankäna. Ukhamarusa, nayrar sartasipkayäta ukhaw taqe ukanak apanukuñ amtapjjta, ¿kunatsa?

David: 1945 maranwa Shropshire (Inglaterra) markan nasiwayta. Tatajajj camponkir granjapanwa trabajïna. Escuelat kuttʼasajja, wallpanakar manqʼa churasa, kʼawnanak apthapisa, wakanaka ukat uwijanak awatisaw kusisit jikjjatasirïta. Escuelar sarañajj jan utjkäna ukhajja, tractorampiw awisajj yapu apthapiñan yanaptʼirïta.

Ukampis yaqhanak lurañaw jakäwijan jukʼamp askïna. Jiskʼatpachaw música istʼasajj thoqhoñ munirïta, uk amuyasaw tatajajj phesqa maranïkayäta ukhajj mamajar akham säna: ‘Claqué thoqhoñ yateqañapatak thoqhoñ yatichapki uka escuelar irpam’ sasa. Thoqhoñ yatichirijajja, ‘ballet ukan sumwa thoqtʼasma’ sasaw amuyäna, ukatwa ukan thoqhoñajatak wakichtʼitäna. 15 maranïkayäta ukhajja, Londres markankiri Royal Ballet School sat wali uñtʼat escuelar sarañajatakiw mä beca churapjjetäna. Ukanwa thoqhoñ masijar Gwen sat tawaqor uñtʼayäta.

Gwen: 1944 maranwa Londres markan nasiwayta. Jiskʼatpachaw Diosar confiyañ yateqawayta. Biblia liytʼañsa yantʼirïtwa, ukampis janiw amuyañjamäkänti. Phesqa maranïkayäta ukhaw thoqhoñ escuelar sarañ qalltawayta. Sojjta mara qhepatjja, Gran Bretaña markankir taqe thoqhorinakaw tantachasipjjäna, ukan atiptʼirejj Royal Ballet School ukaruw sarañapäna. Ukat nayaw ukan atiptʼawayta. Uka escuelajja, Georgia markan utjki uka utanakar uñtasit White Lodge sat jachʼa utanwa jikjjatasïna, Londres marka anqäjjan Richmond sat jachʼa plazana. Ukanwa liyiñ qellqañ yatichapjjetäna ukat wali uñtʼat yatichirinakaw thoqhoñatak wakichtʼapjjarakitäna. 16 marankamaw uka escuelan yateqayäta ukat ukhaw Davitar uñtʼawayta. Tiempompejja, jupampiw Covent Gardens (Londres) markana Royal Opera House ukan thoqhoñ qalltayäta.

Walja markanakaruw thoqhoñatak sarapjjerïta

David: Jïsa, Royal Opera House sat wali uñtʼat teatrona ukat London Festival Ballet siski ukanakampiw thoqhoñ qalltapjjayäta (jichhajj Ballet Nacional de Inglaterra sasin uñtʼatäjjewa). Escuela Real de Ballet ukankir mä yatichiripajj Wuppertal (Alemania) markanwa yaqha markanakan thoqhoñatak mä compañía uttʼayäna ukat jupamp sarapjjañajatakiw ajllipjjetäna. Walja maranakaw Dame Margot Fonteyn ukat Rudolf Nureyev sat wali uñtʼat thoqhorinakamp walja  markanakan thoqhowayapjjta. Nanakatakejj thoqhoñakiw nayrankäna. Ukat ukham jakañajj jachʼa jachʼa tukuñaruw apapjjetäna.

Gwen: Nayajj taqe chuymapuniw thoqtʼayäta. Davitampejj jukʼamp nayraruw sartañ munapjjayäta. Cheqas jaqenakatak firmtʼasa, panqaranak katoqtʼasa ukat tʼajjllirtʼir istʼasajj wali kusisitaw jikjjatasipjjayäta. Teatron trabajirinakajj wachoq juchanak luriri, cigarro fumiri, machir jaqenakäpjjänwa ukat kunjamtï jupanakajj suerte churir amuletonak apnaqapjjerïkänjja, ukhamarakiw nayajj apnaqerïta.

JAKÄWINAKAJAJJ JANIW NAYRJAMÄJJÄNTI

Casarasipkta uka uru

David: Walja maranak thoqhoñatak viajisajj qaritäjjayätwa. Ukat niyakejjay mä granjan jilsuwaystjja, ukham wasitat jakasiñwa munayäta. Ukhamajj 1967 maranwa thoqhoñ jaytasajj mä jachʼa granjan trabajiñ qalltayäta, ukajj kawkhantï awk taykajajj jakasipkäna uka jakʼankänwa. Granjan dueñopajj uka pachpanwa mä uta alquilitäna. Tiempompejja, Gwen tawaqoruw nayamp casarasiñapatak jawstʼayäta. Juparojj sapak thoqhoñapatakiw ajlltʼapjjäna, sumwa nayrar sartaskäna. Ukhamajj nayar iyaw sañajj janiw jupatak faciläkänti. Ukhampachasa, iyaw sasaw nayamp casarasïna ukat granjanwa jakasjjapjjayäta, jupajj janiw campon jakañ yatitäkänti.

Gwen: Jïsa, nayatakejj mä granjan jakañajj wali chʼamänwa. Sapüruw wakanakat leche chʼawirïta, khuchinakaru ukat wallpanakar manqʼa liwirïta, janiw nayajj ukanak lurañar yatitäkayätti. Davitajj uywanak sum uñjañatakiw llätunka phajjsinak mä universidadar yateqer saräna. Arumakiw utar kuttʼanjjerïna, ukäñkamajj sapakiw utan qheparirïta. Uka tiempotakejja, Gilly sat nayrïr phuchajaw nasjjäna. Davitan ewjjtʼaparjamaw auto apnaqañ yateqayäta. Mä urojja, uta jakʼankir mä jiskʼa markar sarasaw Gael sat mä warmimp jikista. Juparojj markankir mä tiendan trabajkäna ukhaw uñtʼawayta.

Casarasipjjta uka uru qhepatwa granjan trabajiñ qalltawayapjjta

‘Utajar juntʼüm umtʼir saraskañäni’ sasaw jupajj invittʼitäna. Utapanjja, casaraskäna uka fotonakwa uñachtʼayitäna ukat Salón del Reino sat mä uta anqäjjanwa mä qawqha jaqenakar mä foton uñjayäta. ‘Ukajj ¿kuna iglesiarakisti?’ sasaw Gaelar jisktʼayäta. ‘Esposojampejj Jehová Diosan Qhanañchiripäpjjtwa’ sasin awistʼitäna ukhajja, wal kusisiyäta. ‘Mä tiajaw ukar sararakïna’ sasaw amtayäta. Ukampis uka iglesiar saratapatjja, tatajajj walpun colerirïna, Bibliat apstʼat qellqatanakapsa basuraruw jaqtaraqerïna. Tatajajj suma  chuyman jaqënwa, ukhamajj ‘¿kunatsa munasir tiajatak ukham colerpacha?’ sasaw jisktʼasirïta.

Kunarutï tiajajj iyawskäna ukajj yaqha iglesian yatichäwinakapamp kunansa jan kikpäkäna ukjja ukhapuniw amuyayäta. Kuntï Bibliajj cheqpachapun yatichki ukwa Gaelajj sum qhanañchtʼitäna. ‘Yaqhep yatichäwinakajj janiw Bibliarjamäkiti’ sasin sitäna ukhajj wal muspharayäta. Sañäni, Bibliajj janiw trinidadata ni jan jiwir almanïtanwa sasin yatichkiti (Ecl. 9:5, 10; Juan 14:28; 17:3). Ukat ukhapuniw Diosan Jehová sutip Biblian uñjayäta (Éxo. 6:3, NM).

David: Kuntï Bibliat yateqkäna ukwa esposajajj awistʼitäna. Jiskʼaskayät ukhaw tatajajj akham sitäna: ‘Biblia liytʼañamapuniwa’ sasa. Ukatwa Gael kullakampi ukat Derrick sat esposopamp Bibliat yateqañ qalltapjjta. Ukampis sojjta phajjsinak qhepatjja, Oswestry sat markaruw jakasir sarjjapjjayäta. Ukanwa mä jiskʼa granja alquilasiñatak oraqejj utjäna. Ukansti, Deirdre sat kullakaruw uñtʼapjjayäta, jupajj wali pacienciampiw Bibliat yatichapjjetäna. Qalltanjja, uywampejj jan tiemponikïpjjayätwa, ukhamajj janiw Diosar yupaychañan jankʼak nayrar sartapkayätti. Ukhampachasa, Biblian cheqa yatichäwinakapajj jukʼat jukʼatwa chuymar purtʼapjjetäna.

Gwen: Nayatakejj suerter creyiña jaytañaw wali chʼamänjja. ‘Qamir kankañ churir diosanakaru manqʼa ukat vino’ loqtañat Jehová Diosajj kamsisa uk amuyañatakiw Isaías 65:11 qellqatajj yanaptʼawayitu. Suerte churir amuletonak utjkitäna ukanak jaytañatakejj tiempo ukat Diosat wal mayisiñajaw wakisïna. Maysa toqetjja, ‘jachʼa jachʼa tukurinakajj jiskʼachatäpjjaniwa, ukampis jiskʼachatanakajj jachʼañchatäpjjaniwa’ sasin Bibliajj yatichki uk amuyañaw kunjam jaqenakarus Diosajj thaqhe uk yatiñatak yanaptʼawayitu (Mat. 23:12). Diosajj sapa maynitwa llakisi ukat jiwasar qhespiyañatakisa, yoqaparuw Oraqer khitaniwayi. ¡Uka Diosaruw serviñ munayäta! Uka tiempotakejja, payïr phuchajaw nasjjäna. Ukhamajj familpachaw mä suma Paraison wiñayatak jakasiñäni sasin yateqañajj wali kusiskañawa.

David: Mateo 24 qellqatana ukat Daniel libron jikjjataski uka profecianakasa ukat yaqha profecianakasa, kunjamsa phoqasiwayi uk amuyasaw ‘akaw cheqa religionajja’ sasin jan pächasis sirïta. Janiw kuna luräwis Jehová Diosamp sum apasiñat sipansa jukʼamp askejj utjkaspati sasaw amuyayäta. Tiempompejja, esposajata ukat phuchanakajatwa jukʼamp llakisjjayäta, janiw nayan askijak thaqjjayätti. Cheqas nayan askijak thaqhañasa ukat jukʼamp jachʼa granja jikjjatañ munañas janiw walïkänti, uk amuytʼañwa Filipenses 2:4 qellqatajj yanaptʼawayitu. Antisas Jehová Diosar serviñaw jakäwijan nayrankañapäna. Janiw cigarro fumjjayätti. Ukampis sábado jaypʼojj tantachäwitak tiempo apsuñajj janiw  faciläkänti. Tantachasiñ Utajj 10 kilometronak sarañankänwa ukat ukharakiw wakanakat leche chʼawañajj waktʼapjjetäna. Ukhampachasa, esposajan yanaptʼapampejj janipuniw tantachäwinakat faltasiwayapkti. Domingo alwanakasa, wakanakat leche chʼawañ tukuyasajj Diosan arunakap yatiyirejj phuchanakajar irpapjjapunirïtwa.

Diosar servisajj janiw nayrjam jakjjapjjayätti, ukatwa familiäranakajajj mayjtʼasipjjäna. Esposajan tatapajj sojjta maranakaw jupamp jan parlañ munkänti. Awk taykajajj ukhamarakiw Jehová Diosar serviñat jarktʼañ munapjjetäna.

Gwen: Jehová Diosaw uka jan waltʼäwinak atipjañ yanaptʼapjjetäna. Tiempompejja, Oswestry tamankir jilat kullakanakajj nanakatak mä familiäpkaspas ukhamäpjjänwa. Jan waltʼäwinakan uñjasipkayäta ukhajj jupanakaw wali munasiñamp yanaptʼapjjetäna (Luc. 18:29, 30). 1972 maranwa Diosar jakäwinakaj katuyasis bautisasiwayapjjta. Cheqa yatichäwinak uñtʼapjjañapatakiw nayajj walja jaqenakar yanaptʼañ munayäta, ukatwa precursorjam irnaqañ qalltawayta.

JUKʼAMP SUM JAKASIÑWA JIKJJATAPJJTA

David: Granjan trabajiñajj chʼamakïnwa, ukampis Jehová Diosar yupaychañaw nayrankañapa sasin phuchanakajar yatichañatakiw wal chʼamachasipjjayäta. Tiempompejja, gobiernojj janiw granjan irnaqerinakar yanaptʼjjänti, ukatwa jan granjani jan trabajoni ukham uñjasipjjayäta. Ukat kimsïr phuchajajj mä maranikïskänwa. Ukhaman uñjasisajj Jehová Diosaruw yanaptʼa mayisipjjayäta. Niyakejjay thoqhoñ yatipjjchiyätjja, familiar yanaptʼañatakiw thoqhoñ yatichañatak mä escuela jistʼarapjjta. ‘Jehová Diosar yupaychañaw jiwasatakejj nayrankani’ sasaw familjam amtapjjayäta, ukham lurañajj janiw inamayäkänti. Escuela tukuyasajj kimsa phuchanakajaw precursorjam irnaqañ qalltapjjäna, uk uñjasajj wal kusisipjjayäta. Ukat precursorjamajj sapüruw esposajajj phuchanakajar yanaptʼäna.

Gilly ukat Denise sat jilïr phuchanakajajj casarasjjapjjäna ukhajja, thoqhoñ yatichañatak escuelajj utjapkitäna uk jistʼantañwa amtapjjayäta. Ukat kawkharus yanaptʼir sarapjjerista sasaw sucursalar qellqapjjayäta. Inglaterra markan Inti jalsu aynach toqeruw sarapjjasma sasaw sucursalajj sapjjetäna. Ukat sullkïr Debbie sat phuchajakiw nanakampëjjäna, ukhamajj precursorjam irnaqañwa nayajj amtjjarakiyäta. Phesqa mara qhepatjja, alay toqen tamanakajj utjki ukar yanaptʼir sarapjjañajatakiw khitapjjarakitäna. Debbie phuchajajj casarasjjäna uka qhepatjja, Zimbabue, Moldova, Hungría ukat Costa de Marfil sat markanakanwa Tantachasiñ Utanak lurasiñapatak yanaptʼapjjayäta, 10 maranak ukham yanaptʼañajj wali kusiskañänwa. Ukatsti, Inglaterra markaruw kuttʼapjjayäta, Londres markankir sucursalajj luraskäna ukan yanaptʼañataki. Ukat niyakejjay yapumpi ukat uywampi irnaqañ yatchiyätjja, Betelan utjkäna uka granjan yanaptʼañatakiw jawsapjjetäna. Jichhajja, Inglaterra markan Inti jalanta alay toqenwa precursorjam irnaqtʼasipkta.

Yaqha markanakan Tantachasiñ Utanak lurasajj wali kusisitaw jikjjatasipjjayäta

Gwen: Ballet ukan thoqhoñajj nanakatakejj kusiskañänwa, ukampis ukajj janiw wiñayatakïkiti. Antisas Jehová Diosatak irnaqtʼañaw jukʼamp kusisiñanak apani ukat wiñayatakirakiwa. David esposojampejj irnaqtʼasipkaktwa, ukampis jichhajj precursorjam irnaqtʼañatakiw chʼamachasipjjta. Jakañ churiri cheqa yatichäwinak jaqenakar yatichasajj wali kusisitaw jikjjatasipjjta. Janiw kuna luräwis ukat sipans jukʼamp askejj utjkaspati, yatichapjjta uka jaqenakajj ‘sumat uñtʼatäñ mä cartamp’ sasïpjjewa (2 Cor. 3:1, 2). Janitï cheqa yatichäwinak yateqapkiriskayäta ukhajja, janiw kunas utjapkitasapänti, nayra fotonaka ukat teatronakar thoqhoñatak sarapkayäta uka programanakakiw utjapjjetasapäna.

David: Jehová Diosatak irnaqañ qalltapkayäta ukhat jichhakamajj jakäwinakajajj janiw nayrjamäjjeti. Diosar yupaychañaw suma esposöñataki ukat phuchanakajatak suma awkïñatak yanaptʼawayitu. Míriam warmisa, David reyisa ukat yaqhanakas thoqtʼasaw kusisiñap uñachtʼayapjjerïna sasaw Bibliajj qhanañchi. Nanakajj ukhamarakiw yaqha jilat kullakanakamp chikajj Diosan machaq oraqepan kusisiñat thoqtʼañ suyasipkta (Éxo. 15:20; 2 Sam. 6:14).