Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Mä jachʼa regalo katoqapjje

Mä jachʼa regalo katoqapjje

KHÄ 2013 maran abril phajjsit 28 urunak saraqatarojja, mä tantachäwiw Nagoya (Japón) markan apasïna. 210.000 jila jaqenakaw uka tantachäwirojj sarapjjäna, yaqhepanakajj Internet toqew uñtapjjäna. Oraqpachankir Jilïr Irpirinak taypinkir Anthony Morris jilataw ukankäna. Jilatajja, uka tantachäwin akham sänwa: “Mä machaq librow lurasiwayi” sasa. Uka librojj La Biblia: el Evangelio según Mateo satänwa. Ukankir jilat kullakanakajja, ¡wali kusisitapuniw ampar tʼajjllirapjjäna!

Uka librojja, 128 jananakaniwa, Traducción del Nuevo Mundo Bibliatwa Mateo qellqatajj japonés arur jaqokipasiwayi. Morris jilatajj sänwa: “Aka librojj wali askipuniwa, Japón markankirinakar yanaptʼañatakiw lurasiwayi” sasa. ¿Kunatsa uka librojj wali askejja? ¿Kunatsa lurasiwayi? ¿Kunjamsa Japón markankirinakajj uka libro katoqapjjäna?

¿KUNJAM LURTʼATASA?

Librojj kunjam luratas uk uñjasajja, walja jaqenakaw muspharapjje. Japonés arojja, alayat aynacharuw qellqasispa, jan ukajj chʼeqat kupiruw qellqasirakispa. Japón markanjja, jila parte libronakasa, revistanakasa, español arjamarakiw chʼeqat kupiru qellqasi. Jehová Diosan Qhanañchirinakapan qellqatanakapas ukhamarakiw uka markan qellqasi. Ukampis uka machaq librojja, kunjamtï Japón markan periodiconakasa, yaqha qellqatanakasa luraskejja, ukham alayat aynachar qellqatawa. Ukaw Japón markankirinakarojj facil liytʼañatak yanaptʼi. Uka machaq librojj janiw sapa janan pʼeqeñchäwinëjjeti, jan ukasti uka lantejj qellqat taypiruw subtitulonakajj uchasiwayi, ukhamat liytʼirinakajj sum amuytʼapjjañapataki.

Libro katoqasajja, jankʼakiw jilat kullakanakajj liytʼapjjäna. 80 jila marani mä kullakajj siwa: “Mateo qellqat walja kutiw liytʼawayta, ukampis jichhajj subtitulonakasa alayat aynacharu qellqasitapasa sum amuytʼañatakiw yanaptʼitu. Jesusan Wali Uñtʼat Arstʼäwipat wali sum amuyjjta” sasa. Mä tawaq kullakajj sarakiwa: “Ratukiw liysuwayta. Chʼeqat kupiru qellqatajj nayatak wali khusäkchisa, walja jaqenakajj alayat aynacharuw liytʼañ munapjje”.

JAPÓN MARKANKIRINAKATAK LURAT LIBRO

Aka librojja, Japón markankirinakatakejj wali askipunïniwa. ¿Kunatsa ukham sistanjja? Janis waljanejj Bibliat sum yatipkchejja, liytʼañ wal munapjje. Yaqhepajj janiw Biblianïpkiti, ukhamajj Bibliankir mä librsa jichhajj liytʼjjapjjaniwa.

¿Kunatsa Mateo qellqatajj Japón arur jaqokipasiwayi? Kunapachatï jaqenakajj Bibliat parlir istʼapki ukhajja, Jesusatwa amtapjje. Cheqas Mateo qellqatajja, Jesusan nasïwipata, nayra awkinakapata, Wali Uñtʼat Arstʼäwipata, qhepa urunakatwa parli. Uka toqenakatjja, waljaniw Japón markankirinakajj yatiñ munapjje.

 Jilat kullakanakajja, yatiyañatakisa, Bibliat jukʼamp yatiñ munapki ukanakar kuttʼañatakisa, uka libro jaytañatak apasipjjapuniwa. Mä kullakajj siwa: “Bibliat yatichañ qalltañatakejj janiw añcha chʼamäjjeti. Librojj churaskäna ukürpachaw mä libro maynir jaytawayta” sasa.

¿KUNJAMSA UKA LIBRO KATOQASIPJJÄNA?

Japón markankirinakajja, niya sapa kutiw aka arunak sapjje: “Kʼullkʼu punku toqe mantapjjam”, “janiraki perlanakamsa khuchinakarojj warjjaruyapjjamti”, “jan llakisipjjamti kunatï qharürojj paskani ukatjja” sasa (Mat. 6:34; 7:6, 13). Khitis uka arunak säna ukjja, waljaniw jan yatipkiti. Ukatwa Jesusan arunakapätap yatipjjañapatakejja machaq libro jilat kullakanakajj churapjje. Jaqenakajj wal muspharapjje, ukatsti sapjjarakiwa: “Biblia may kutikis liytʼañ munapuniyätwa” sasa.

Jilat kullakanakajja, waljaniruw Mateo libro jaytapjje. Ukat kunapachatï wasitampi jupanakan ukar kuttʼapjje ukhajja, jaqenakajj ‘jankʼakiw liytʼapjjta’ sasaw sapjje. ¡Yaqhepanakajj qʼalwa liysupjje! 60 marani mä chachajj akhamwa mä jilatar satayna: “Kutin kutinwa liytʼta, walpun chʼamañchtʼawayitu. ¿Janit Bibliat jukʼampi yatichkitasma?” sasa.

Walja jaqenak utjki uka cheqanakansa, jilat kullakanakajj Mateo librompiw yatiyapjjaraki. Mä kullakajja, uka librwa mä tawaqor churatayna, ukatsti correopwa churarakitayna. Mä hora pasatatsti, uka tawaqojj mä mensaje kullakar aptʼayatayna, ukansti sänwa: “Niyaw libro liyiñ tukuyjjta, ukampis jukʼamp yatiñwa munirista” sasa. Mä semana qhepatjja, Bibliat yateqañwa qalltäna, ukat tantachäwinakarus sarjjarakïnwa.

Japón markankir tamanakajja, 1.600.000 jila machaq libronak katoqawayapjje. Sapa phajjsiw waranq waranqa libronak jaqenakar jaytapjje. La Biblia: el Evangelio según Mateo libron qallta janapanjja, qellqerinakajj akham sapjjewa: “Aka libro liytʼasajja, Bibliat jukʼampi yatjjatañamataki yanaptʼiristam ukwa munapjjta” sasa.