Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jesusan jaktatapajj ¿kunatsa wali askejja?

Jesusan jaktatapajj ¿kunatsa wali askejja?

“[Jupajj] jaktawayjjewa.” (MAT. 28:6)

1, 2. 1) ¿Kunsa judionakan religionap pʼeqtʼirinakajj yatiñ munapjjäna? 2) ¿Kunjamsa Pedrojj qhanañchäna? (Aka janankir dibujo uñjjattʼam.) 3) ¿Kunatsa Pedrojj jan ajjsaras qhanañchäna?

JESUSAN jiwatapat mä qawqha urunak pasjjäna ukhajja, Pedrojj Jesusar jiwayañatak pʼeqtʼapkäna uka jaqenak nayraqatapanwa jikjjatasïna. Judionakan religionap pʼeqtʼirinakasti, Pedron mä suchu jaqer qollatapatwa wal colerasipjjäna. Jupanakasti sapjjänwa: “¿Kuna munañampisa jan ukajj khitin sutipjjarusa jumanakajj taqe akanak lurapjjtajja?” sasa. Pedrosti jan ajjsarasaw jupanakar sarakïna: “Khitirutï jumanakajj chʼakkatapkta ukarojja, Diosaw jiwatanak taypita jaktayi. Uka Nazaretankir Jesucriston sutiparuw aka jaqejj kʼumaraptayat uñjasi, jumanak nayraqatana” sasa (Hech. 4:5-10).

2 Amtapjjañäni, Pedrojj uka mä qawqha urunak nayrakiw kimsa kuti Jesusar jan uñtʼir tuküna (Mar. 14:66-72). Ukhamasti, ¿kunatsa jichhajj jan ajjsaras qhanañchpachäna? Qollan ajayuw yanaptʼaskäna, ukatjja janirakiw Jesusan jaktatapatsa pächaskänti. ¿Kunatsa Pedrojj ‘Jesusajj jakaskiwa’ sasin taqe chuym sispachäna? ¿Kunatsa jiwasajj ukham saraksna?

3, 4. 1) Jesusan apostolonakapajj janïr nacipkäna uka nayrajja, ¿kawkïr jaktäwinakas utjawayi? 2) ¿Khitinakarus Jesusajj jaktayäna?

3 Janïr Jesusan apostolonakapajj nacipkäna ukhaw jiwatat jaktañajj utj-jjäna. Ukhamasti, apostolonakajj jaktañ toqetjja  sum yatipjjäna. Sañäni, kunjamsa Eliasasa Eliseosa Diosan chʼamapampejj jiwatanak jaktayapjjäna ukjja sum yatipjjäna (1 Rey. 17:17-24; 2 Rey. 4:32-37). Ukat kunjamsa mä jiwatajj Eliseon chʼakhanakap patjjar purisajj jaktäna uksa sumwa yatipjjarakïna (2 Rey. 13:20, 21). Biblian uka yatichäwinakapajj cheqäskapunitap nayrïr cristianonakajj sum yatipjjäna, jiwasajj ukhamarakiw Biblian qellqatäki uka yatichäwinakarojj iyawstanjja.

4 Jesusajj jiwatanakar jaktaykäna uk yatiñajj chuymaruw purtʼpachïstu. Sañäni, Jesusajj mä viuda warmin sapa yoqapar jaktaykäna ukhajja, uka warmejj walpun kusispachäna (Luc. 7:11-15). Kunapachatï Jesusajj 12 maran mä imill wawar jaktaykäna ukhajja, ukhamarakiw awk taykapajj ¡wali kusisita jikjjatasipjjpachäna! (Luc. 8:49-56.) Ukatjja, Lázaro chachar sepulturapat mistunir uñjirinakasa wal muspharapjjpachäna (Juan 11:38-44).

JESUSAN JAKTÄWIPJAMAJJ JANIW YAQHAJJ UTJKITI

5. Mayni jaktäwinakat sipansa, ¿kunansa Jesusan jaktäwipajj mayjänjja?

5 Jesusan jaktäwipajj janiw mayni jaktäwinakjamäkänti, uk sum apostolonakapajj yatipjjäna. Jesusat nayra jaktirinakajj pachpa cuerponakaparukiw jaktanipjjäna ukat qhepatjja wasitampiw jiwjjapjjäna. Ukampis Jesusajj jan jiwir ajay cuerpwa katoqäna (Hechos 13:34 liytʼañataki). Pedrojj Jesusjjat akham qellqäna: ‘Jañchin jiwatänjja ukampis ajayunjja jaktanjjewa’ sasa. Ukjjarojj saskakïnwa: “Jupasti alajjpacharuw makhatjje ukatsti Diosan kupëjjaparuw qontʼasjje, ukhamarak jichhajj angelanakasa, munañaninakasa, chʼamasa jupar katuyatawa” sasa (1 Ped. 3:18-22). Mayni jaktäwinakajj wali muspharkañäkchïnsa, Jesusan jaktäwipajj wali jachʼa milagropunïnwa.

6. ¿Kunjamsa Jesusan jaktatapajj arkirinakapar yanaptʼäna?

6 Jesusan jaktäwipajj arkirinakaparojj wal yanaptʼäna. Uñisirinakapajj janis Jesusajj jaktankaspa ukhamsa amuyapkchïnjja, Jesusajj wali chʼamani ajayjamaw jakjjäna, janirakiw khiti jaqes jupar jiwayjjaspänti. Ukham jaktatapasti Diosan Yoqapätapwa uñachtʼayäna. Ukatwa arkirinakapajj jan ajjsarapkänti, ni llakisipkarakïnsa, jan ukasti wali kusisitaw jikjjatasipjjäna. Diosan Reinopatjja taqe chuymaw yatiyapjjarakïna. Jesusatï jan jaktankaspänjja, Jehová Diosan amtanakapajj janiw phoqaskaspänti, ukat kuntï arkirinakapajj yatiyapkäna ukajj inamayakispänwa.

7. 1) ¿Kunsa jichhürunakan Jesusajj luraski? 2) ¿Kuna jisktʼanakarus qhanañchaskañäni?

7 Jesusajj janiw milagronak luriri aleq suma jaqekïkänti, uk sumwa Jehová Diosan servirinakapajj yattanjja. Jichhürunakanjja, Jesusajj Diosan arunakap oraqpachan yatiyasiñapatakiw pʼeqtʼaski. Ukat Diosan Reinopan Reyipjamajja, niyaw aka Oraqet jan walinak chhaqtayjjani, mä suma paraisoruw tukuyani, ukanwa jaqenakajj wiñayatak jakasjjapjjarakini (Luc. 23:43). Jesusatï jan jaktankasapänjja, janiw ukham jakañajj utjkasapänti. Ukhamasti, ¿kunatsa Jesusajj jaktaniwa ukat jakaskarakiwa sasin sissna? ¿Kunatsa Jesusan jaktäwipajj jiwasanakatakejj wali askejja?

JEHOVÁ DIOSAJJ JIWAÑJJAROJJ WALI CHʼAMANIWA

8, 9. 1) ¿Kunatsa judionakan religionap pʼeqtʼirinakajj Jesusan sepulturap uñjapjjañap munapjjäna? 2) María Magdalenampi mayni Mariampi Jesusan sepulturapar puripjjäna ukhajja, ¿kunas pasäna?

8 Jesusan jiwatap qhepatjja, jilïr sacerdotenakampi fariseonakampiw Pilaton ukaru sarapjjäna, sapjjarakïnwa: “Tata, nanakajj amtasipjjaraktwa kuntejj uka kʼari parlir jaqejj siskänsa uka. Jupasti sarakïnwa: ‘Kimsürut  jaktawayjjä’ sasa. Jumasti kimsürpachataki guardia uskum, discipulonakapajj jan arum jutasin apasjjapjjañapataki. [Kapasakiw] jupanakajj jaqenakarojj sapjjaspan: ‘Jiwatat jaktjjataynawa’ sasa. Ukhamäspa ukajja, uka qhepa kʼarïkis ukajj nayrirïkis ukat sipansa jukʼamp jan walïspawa” sasa. Pilatosti jupanakarojj sänwa: “Akajj guardia soldadonakajja. Sarapjjamaya jichhajj ukat uka sepulcro uñjayapjjam, kunjämtejj jumanakajj amuyapktas ukhamarjama” sasa (Mat. 27:62-66).

9 Jesusan cuerpopajj qollur lurat mä sepulturan imatänwa, mä jachʼa qalampi atintata. Judionakan religionap pʼeqtʼirinakajja, Jesusan cuerpopajj wiñayatak ukham imatäspa ukwa munapjjäna. Ukampisa, Jehová Diosajj janiw uk munkänti. Jiwatapat kimsa uröjjäna ukhajja, María Magdalenampi mayni Mariampiw Jesusan sepulturapar uñjir sarapjjäna, ukanjja uka jachʼa qalajj apaqatäjjänwa, ukat mä angelaruw uka patjjan qontʼatäskir uñjapjjarakïna. María Magdalenampiru mayni Mariampirojja, uka angelajj Jesusan sepulturap uñantapjjañapatakiw akham säna: ‘Jutapjjam, uñjapjjarakim, janiw akankjjeti, jan ukasti jaktawayjjewa’ sasa (Mat. 28:1-6). ¡Jesusajj jaktayatäjjänwa!

10. ¿Kunanaksa apóstol Pablojj Jesusan jaktatapat säna?

10 Kunanakatï pusi tunka urunakan paskäna ukanakaw Jesusan cheqapun jaktatap uñachtʼayäna. Apóstol Pablojj Corinto markankir cristianonakar nayrïr cartap apaykäna ukanjja sänwa: “Nayraqatajja kuna yatichäwinaktï nayajj yateqktjja ukarakwa jumanakarojj yatichapjjsma; ukasti akhamawa: Cristow Qellqatanakarjamajj [chʼakkatata] jiwawayi juchanakas layku. Jupajj pʼampʼantatänwa kimsürutwa Qellqatanakarjama jakatatarakïnjja, ukatsti Pedroruw uñstänjja, ukhamarak yaqha apostolonakarusa. Uka qhepatsti phesqa pataka jilatanakarurakiw uñstänjja, ukanakatsti waljaniw jakasipki, yaqhepanakasti jiwarjjapjjarakiwa. Uka qhepatsti [Santiagoruw] uñstänjja, ukhamarak taqe apostolonakarusa. Qhep qheparusti, nayarurakiw uñstawayitu, nayajj janis horasapar nacit wawäkirista ukhama” sasa (1 Cor. 15:3-8).

¿KUNJAMATSA JESUSAN JAKTATAP YATTANJJA?

11. ¿Kunatsa “Qellqatanakarjamaw” Jesusajj jaktäna sasin sissna?

11 Maya: Jesusajj “Qellqatanakarjamaw” jaktäna. Biblianjja, Jesusajj jaktaniniwa sasaw qhanañchasjjäna. Sañäni, Davitajj ‘janiw arkiriman sepulcror chhaqañapsa munkätati’ sasaw säna (Salmo 16:10 liytʼañataki). ¿Khititsa Davitajj parlaskäna? Jesusatwa parlaskäna, uksti 33 maran Pentecostés urunwa Pedrojj sum qhanañchäna. Jupasti sänwa: “Davidajj nayratpachas uñjkaspa ukhamwa parlawayäna Jesucriston jaktäwipatjja. Sarakïnwa: ‘[Jupajj] janiw jiwatanak taypinjj qheparkaspati. Janirakiw janchipas ñusjkaniti’ sasa” (Hech. 2:23-27, 31).

12. ¿Khitinakas jaktanit Jesusarojj uñjapjjäna?

12 Paya: Walja jaqenakaw jaktanit Jesusar uñjapjjäna. Jaktjjasinjja 40 urunakampiw Jesusajj discipulonakapar uñstäna. Mä kutejja, kawkhantï imatäkäna uka sepultura nayraqatanwa uñstäna, qhepatjja, Emaús sat markar sarañ thakina ukat yaqha cheqanakampinwa uñstarakïna (Luc. 24:13-15). Awisajja, maynirukiw uñstirïna, kunjamtï Pedrorojj uñstkän ukhama. Yaqhep urunakasti waljanirurakiw uñstirïna. Yamas mä kutejja, ¡phesqa patakatsa jilaniruw uñstäna! Ukhamasti jaktanit Jesusarojj waljanipuniw uñjapjjäna, janiw khitis ukatjj pächaskaspati.

13. Jesusan jaktatapatjja, ¿kunjamsa arkirinakapajj jan pächasipjjatap uñachtʼayapjjäna?

13 Kimsa: Arkirinakapajj Jesusan jaktanitapatjja jan pächasisaw yatiyapjjäna.  Jesusajj jakaskiwa sasin yatiyapjjatap laykojja, waljaniw arknaqata, tʼaqhesiyata, jiwayata uñjasipjjäna. Ukampis apóstol Pedrojj Jesusar uñisipkäna, jiwayañ munapkäna uka judionak nayraqatanjja, jan ajjsarasaw Jesusan jaktatapat arjjatäna. Jesusatï jan jaktkaspäna ukhajja, Pedrojj janiw jakäwip aptʼasirjam arjjatkaspänti. Pedrosa mayni discipulonakasa, Jesusan jakaskatapsa ukat Diosan arunakap yatiyasiñapatak pʼeqtʼaskatapsa sumwa yatipjjäna. Ukhamarus Jesusan jaktatapajja, arkirinakaparojj jupanakan jaktaniñapat jan pächasiñatakiw yanaptʼarakïna. Amuytʼañataki, Estebanajj janïr jiwkasajja, jiwatat jaktañ utjatapjja sum yatïna, uka suytʼäwimpiw jiwarakïna (Hech. 7:55-60).

14. ¿Kunatsa Jesusajj jakaskiwa sasin sasma?

14 Pusi: Jesusajj Reyjam apnaqjjatapasa cristiano tamaru pʼeqtʼaskatapasa qhanaw amuyasi. Cheqpach cristiano tamajj wal jiljjattaski. Jesusatï jan jaktankaspän ukhajja, janiw ukham jiljjatkaspänti, inas jupjjat jan kuns yatkchisänti. Ukampisa, cheqapun jakaskatapsa ukat Diosan arunakap oraqpachan sum yatiyasiñapatak pʼeqtʼaskatapsa sumwa yattanjja.

¿KUNATSA JESUSAN JAKTANITAPAJJ JIWASATAK WALI ASKEJJA?

15. Jesusan jaktanitap yatiñajja, ¿kunatsa jan ajjsaras yatiyir sarañatak yanaptʼistu?

15 Jesusan jaktanitap yatiñajja, jan ajjsaras yatiyañatakiw yanaptʼistu. Diosan uñisirinakapajja, pä waranqa maranakaw suma yatiyäwinak jan yatiyasiñapatakejja, kunayman toqet jarktʼañatak chʼamachasiwayapjje. Sañäni, kʼari yatichäwinakampi, jiskʼachañanakampi, nuwasiñanakampi, jarkʼasiñanakampi, tʼaqhesiyañanakampi ukat jiwayañanakampiw jarkʼañ munistu. Ukampis Biblianjj siwa: “Jumar tukjañäkis uka armjja janiw khitis jichhakam lurkiti” sasa (Isa. 54:17). Ukatwa Supayan apnaqat jaqenakarojj jan ajjsarktanti. Jesusajj jiwasamp chikäskiwa ukat kunjamtï arsuwaykäna, ukarjamaw yanaptʼaskistu (Mat. 28:20). ¡Janipuniw ajjsarañasäkiti! Inamayaw jiwasar amuktʼayañatakejj chʼamachasisipkani.

Jesusan jaktatap yatiñajja, jan ajjsaras yatiyañatakiw yanaptʼistu (15 tʼaqa uñjjattʼäta)

16, 17. 1) Jesusan jaktatapajj ¿kunjamsa yatichäwinakapan cheqätap uñachtʼayistu? 2) Juan 11:25 qellqatarjamajja, ¿kunsa Jehová Diosajj Jesusar churäna?

16 Jesusan jaktatapajja, yatichäwinakapan cheqätapwa uñachtʼayistu. Apóstol Pablojj sänwa: “Cristotejj jan jaktkchejja, yatichapksmas uka arunakajj janipï kunatakis askïkitejja, jumanakan iyawsañanakamasa inamayarakipï” sasa. Biblia toqet yatjjatir mä jaqejj sarakïnwa: “Jesusatï jan jaktkaspäna ukhajja, [...] cristianonakajj kʼari yatichäwinakar iyawsiri ukat jan amuytʼasiri jaqenakampi sasispawa” sasa. Ukhamajja, kuntï Mateo, Marcos, Lucas, Juan qellqatanakan parlki ukajj cuentokïkaspasa ukat mä aleq suma jaqerukis uñisirinakapajj jiwayapkaspa ukhamakïspawa. Ukampis Jesusajj jaktaskapunïnwa, uk yatisaw taqe kuntï yatichkäna ukajj cheqätap yatiraktanjja (1 Corintios 15:14, 15, 20 liytʼañataki).

17 Jesusajj sänwa: “Nayätwa jaktañasa, jakañasa. Khititejj nayaru iyawsarakitu ukajja jiwatäkanisa, jakaniwa” sasa (Juan 11:25). Uka kusiskañ arunakajj phoqasipuniniwa. Jehová Diosajj Jesusaruw chʼam churi, uka chʼamampiw Jesusajj alajjpachar saririnakarusa ukat aka Oraqen walja millón jaqenakarusa jaktayarakini. Jutïrinjja, jiwañajj janiw utj-jjaniti ukwa Jesusan loqtasitapasa jaktatapasa uñachtʼayistu. Ukawa yantʼanak aguantañatakisa jiwañar jan ajjsarañatakisa chʼamañchistu.

18. Jesusan jaktatap laykojja, ¿kunjamsa Diosajj sum uñjistani?

18 Jesusan jaktatapajja, Jehová Diosajj  kunjamsa cheqapar uñjistani ukwa uñachtʼayistu. Apóstol Pablojja, Atenas markankir jaqenakarojj akham sänwa: “[Diosaw] cheqa kankañampi akapacharojj taripani kawkïr jaqtejj jupajj ajlliski uka toqe. Uka jaqen cheqätapjja, jupar jiwatat jaktayasaw taqe jaqenakar qhanpach yatiyi” sasa (Hech. 17:31). Ukhamasti, Jesusaruw Jehová Diosajj Juezjam uttʼayi, jupasti cheqaparjama ukat munasiñampiw uñjistani (Isaías 11:2-4 liytʼañataki).

19. Jesusan jaktatapat yatiñajja, ¿kunatakis yanaptʼistu?

19 Jesusan jaktatapat yatiñajja, Jehová Diosan munañap lurañatakiw yanaptʼistu. Jesusatï jakäwip jan loqtaskaspäna ukat janirak jaktankaspäna ukhajja, janiw kunjamatsa juchampit jiwañampit qhespkasänti (Rom. 5:12; 6:23). Inas akapach jaqenakjam sischisäna: “Manqʼasiñäni, umtʼasiñäni, qharürojj jiwjjchiñänejjaya” sasa (1 Cor. 15:32). Ukampis janiw ukham amuyunakampi sarnaqktanti. Niyakejjay jiwatat jaktañajj utjchinejja, Jehová Diosar taqe chuyma istʼañatakiw chʼamachastanjja.

20. ¿Kunsa Jesusan jaktatapajj Jehová Diosat qhanañchistu?

20 Jesusan jaktatapajja, Jehová Diosajj wali chʼamanïtapa, “jupar thaqerinakarojj bendecirïtapa” uñachtʼayistu (Heb. 11:6). Jehová Diosajj Jesusar jan jiwiri ajay cuerponwa jaktayäna, ukampiw wali chʼamanïtapa, wali yatiñanïtapa, arsutanakap phoqerïtapa uñachtʼayistu. Ukatjja, Jehová Diosajj khitisa taqe kunjjar apnaqañapa ukjja, mä ‘wawaw’ qhanstayani sasaw nayra tiempojj arsuwayäna. Uka profecía phoqasiñapatakejj ‘wawajja’, mä arunjja, Jesusajj jiwasin jaktañapänwa (Gén. 3:15).

21. ¿Kunatsa jiwatat jaktañ utjatapajj jumatak wali askejja?

21 Jaktañ utjatapatjja, ¡walpun Jehová Diosar yuspärtanjja! Apóstol Juanajj akham arunakwa istʼäna: “¡Akajjay, Diosajj jichhajj jaqenak taypinwa jaki! Jupanakampiw jakani, jupanakasti markapäniwa. Dios kipkarakiw jupanakampïni, jupanakan Diosaparakïniwa. Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa” sasa. Ukatsti tronon qontʼatäkäna ukajj saskakïnwa: “Qellqam, aka arunakasti cheqapawa, katuyaskañarakiwa” sasa. ¿Khitis Juanarojj uka arunak yatiyäna? ¡Jaktanit Jesucristow yatiyaskäna! (Apo. 1:1; 21:3-5.)