Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Aka revista liytʼirinakan jisktʼäwinakapa

Aka revista liytʼirinakan jisktʼäwinakapa

Salmo 37:25 qellqatankiri Davitan arunakapasa ukat Mateo 6:33 qellqatankiri Jesusan arunakapasa, ¿Jehová Diosan servirinakapajj janipuniw manqʼ pistʼayasipkaniti sañti muni?

Davitajj sänwa: “Janipuniw aski jaqer apanukut uñjkti, janirakiw wawanakapar mayjasirs uñjkti” sasa (Sal. 37:25). Davitajj janipuniw apanukut uñjaskänti, ukatwa ukham säna. Cheqas Jehová Diosaw jupar sum uñjaskäna. Ukhamajj Diosan servirinakapajj janiw manqʼat pistʼat uñjasipkänti, ni uñjasipkanisa ¿sañti munpachäna? Janiwa.

Walja kutiw Davitajj jan walinakan uñjasïna. Mä kutejja, Saúl reyin arknaqata uñjaskäna ukhajja, manqʼapajj qʼalaw tukusjjäna, ukatwa jupamp sarir chachanakatakisa jupatakisa manqʼa thaqäna (1 Sam. 21:1-6). Ukhaw Davitajj manqʼat pistʼañan uñjasïna. Ukampis Jehová Diosajj janiw jupat armaskänti, yanaptʼänwa. Biblianjja, janiw ‘Davitajj manqʼa mayjasïna’ sasajj mä cheqans siskiti.

Jesusasti sarakïnwa: “Nayraqatajj Diosan reinopa munapjjam, ukhamarak kunatejj cheqäki jupan nayraqatapanjja ukanaka, ukatsti taqe aka yänakajja [manqʼasa, umasa, isisa] jumanakarojj churatakïpjjätawa” sasa (Mat. 6:33). Ukhamajj Diosan Reinopa nayrar uchirinakarojja, Diosajj kunatï wakiski ukjja churapuniniwa sasaw Jesusajj säna. Ukampis qhepatjja, ‘jilanakajajj’ uñisiñat arknaqatäsin manqʼat awtjataw uñjasipjjani sasaw Jesusajj sarakïna (Mat. 25:35, 37, 40). Apóstol Pablojj cheqas ukhamapuniw manqʼatsa umatsa pistʼata awisajj uñjasïna (2 Cor. 11:27).

Kunayman toqet arknaqataw uñjasipjjäta sasaw Jehová Diosajj sistu. Awisajj Supayan kʼarinakap qhanstayañatakejja, manqʼat tʼaqhesiñanwa uñjassna (Job 2:3-5). Sañäni, nazismo gobiernojj apnaqkäna ukhajja, jilat kullakanakasajj campos de concentración sat lugaranakanwa manqʼat tʼaqhesiyata uñjasipjjäna. Supayajj uka toqew Jehová Diosat jitheqtayañ munäna. Ukampis jupanakajj janipuniw Jehová Diosat jitheqtapkänti, Diosas janirakiw jupanakat armaskänti. Kunjamtï Diosajj yantʼanaka aguantapjjañapatakejj taqe cristianonakar jaytkejja, ukhamarakiw jupanakar jaytäna. Ukampisa, Jehová Diosajj khitinakatï sutip layku tʼaqhesipki ukanakarojj yanaptʼapuniwa (1 Cor. 10:13). Filipenses 1:29 qellqatat amtapjjañäni, ukansti siwa: “Cristo laykuw jumanakarojj jupar iyawsañajj churatäpjjtajja, ukhamarak jupa layku tʼaqhesiñasa” sasa.

Sapa maynejj inas tʼaqhesiñan uñjassna jan ukajj yantʼanakan jiwañarus puriraksna. Ukampis Jehová Diosajja, janipuniw servirinakajarojj jaytanukkaniti sasaw arsuwayi. Isaías 54:17 qellqatajj sistuwa: “Jumar tukjañäkis uka armjja janiw khitis jichhakam lurkiti” sasa. Uka qellqatasa yaqha qellqatanakasa, Diosajj markapar jan jaytirïtapwa uñachtʼayistu.