Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Chʼamachasisktati?

¿Chʼamachasisktati?

FERNANDO * sat mä jilataruw pä irpir chuymanejj parltʼañatak jawstʼapjjäna. Fernandosti wal ajjsarayasïna. Kunapachatï tamanak tumptʼir jilatajj sarjjerïna ukhajja, irpir chuymaninakajj kunan chʼamachasiñapas wakisi ukjja Fernandompejj parltʼapjjapunirïnwa. Walja tiempo pasjjepanjja, inas jan irpir chuymanjam uttʼayjjapjjchitani sasaw Fernandojj amuyjjäna. Ukampis tamanak tumptʼir jilatajj wasitampiw tamapar visittʼäna, ¿kunsa irpir chuymaninakajj sapjjpachäna?

Jupanakat maynïrejj 1 Timoteo 3:1 qellqatwa uñjjattʼayäna, ukjjarusti irpir chuymanjam serviñamatakiw mä carta katoqapjjta sasaw yatiyarakïna. Fernandojj uka arunak istʼasajj “¿kunjama?” sasaw sasa. Irpir chuymanisti wasitampiw qhanañchtʼäna. Uk istʼasajj Fernandojj wal kusisïna. Taman yatiyasjjäna ukhajja, tamankirinakajj ukhamarakiw kusisipjjäna.

Taman luräwinak katoqañ munañajj ¿walikïskiti? Jïsa. Apóstol Pablojj sänwa: “Maynitejj [...] mä jilirïña munchi ukajja, uka luräwejj wali sumawa” sasa (1 Tim. 3:1). Ukarjamaw walja jilatanakajj jukʼamp luräwinak jikjjatañatak chʼamachasisipki, ukhamatwa waljanejj irpir chuymanjamasa yanapiripjamasa servisipki. Ukampis niyakejjay walja tamanakajj jiljjattaskchejja, walja jilatanakan chʼamachasipjjañapaw wakisi. Ukampis ¿kunjamsa irpir chuymanjam serviñarojj uñjapjjañapa? Fernandjam wal llakisiñasa suyañasa ¿walikïskaspati?

“JILIRÏÑA MUNCHI” SISKI UKA ARUNAKAJJ ¿KAMSAÑS MUNI?

1 Timoteo 3:1 qellqatan “munchi” sasin uñstki ukajj griego arunjja, “puriñkam chʼamachasiña” sañ muni, kunjamtï maynejj mä qoqan suma achup apaqañatak amparap puriyañkam loqkatkejja niya ukamp sasiwa. Ukampis Pablojj janiw jan wali amtampi uk munapjjam sasajj siskänti. ¿Kunatsa? Mä jilatajja, janiw irpir chuymanjam uñtʼatäñ layku chʼamachasiñapäkiti, jan ukasti ‘uka luräwin wali sumätap’ laykuw chʼamachasiñapa.

 Irpir chuymanjam serviñatak mayitanakajja, 1 Timoteo 3:2-7 ukat Tito 1:5-9 qellqatanakanwa jikjjatasi. Uka toqet parlkasajja, walja maranak irpir chuymanjam servir Raymundo sat mä jilatajj siwa: “Nayatakejj kunjam jaqëktantejj ukaw jukʼamp askejja. Sum parltʼañas sum yatichañas wali wakisirïkchisa, jan kamskaya jakañasa, jan kunan jiljirïñasa, sum amuytʼasirïñasa, lurañanak sum phoqañasa, katoqtʼasirïñasa, amuyirïñasa ukham wali wakiskirirakiwa” sasa.

Jilat kullakanakarojj kunayman toqet serviskakim

Mä jilatatï suma amtamp irpir chuymanïñ munchi ukhajja, taqe kunan honradötap laykusa, jan walinakampi jan qʼañuchasitap laykusa, jan kamskayaw sarnaqe. Wali amuytʼasiriwa, janirakiw kunansa jiljkaspati, amuytʼiri jaqewa, jakäwipansa suma luririt uñtʼatawa. Ukatwa tamapankir jilat kullakanakajja, “jupajj sum irpistani, jan waltʼäwinsa yanaptʼistaniwa” sasin confiyapjje. Katoqtʼasirïtap laykojja, wayn tawaqonakarusa jichhäsipki uka jilat kullakanakarusa wal chʼamañchtʼi. Suma jaqëtap laykojja, usutanakarusa jilïr jilat kullakanakarusa wal chuymachtʼi ukat yanaptʼarakiwa. Taqe ukanakjja, janiw irpir chuymanïñ laykukejj lurkiti, jan ukasti jilat kullakanakapar serviñ laykuw luri. *

Irpir chuymaninakajja, taman jukʼamp lurañanak katoqañatak chʼamachasirinakarojj ewjjtʼapjjaspawa ukat chʼamañchtʼapjjarakispawa. Ukampis sapa mayniw uka lurañanak katoqañatakejj chʼamachasiñapa. Walja maranak irpir chuymanjam serviri Henry sat jilatajj siwa: “Jumatï irpir chuymanïñ munstajja, mayitanak phoqañatak chʼamachasiñamawa” sasa. Ukat Eclesiastés 9:10 qellqatarjamajj sarakiwa: “‘Kuna lurañatejj jumataki utjki ukjja chʼamamarjam luram’, mä arunjja, wal chʼamachasim. Irpir chuymaninakatï kun luram sapjjstam ukhajja, uk sum phoqañatak chʼamachasim. Kuna lurañtï churapktam ukjja sum luram, pichañ waktʼstam ukhasa, sum phoqam. Luratamasa chʼamachasitamasa janiw inamayäkaniti” sasa. Ukhamajja, jumatï jutïrin irpir chuymanïñ munsta ukhajja, Diosar serviñan kunanak lurañatï utjki ukanjja sum yanaptʼam,  sum phoqarakim. Janiw jachʼa jachʼa tukurïñamäkiti, jan ukasti altʼat chuymanïñamawa (Mat. 23:8-12).

JAN WALI AMUYUNAKSA JAN WALI LURÄWINAKSA APANUKUM

Yaqhep jilatanakajj irpir chuymanjam serviñ laykojja, irpir chuymaninakaruw parljjayapjjaspa. Yaqhepasti, irpir chuymaninakan ewjjtʼatajj colerasipjjarakispawa. Ukampis akham jisktʼasipjjañapaw wakisispa: “¿Nayan askijakti thaqasktjja? Jan ukajj ¿Jehová Diosan uwijanakap altʼat chuymampi uñjañcha muntjja” sasa.

Ukat irpir chuymaninakarojj luratanakapampi ‘mä suma yatichäwi tamar uñachtʼayapjjañapwa’ mayisiraki (1 Ped. 5:1-3). Jan wali amuyunaksa jan wali luräwinaksa apanukupjjañapawa. Maynejj janïras irpir chuymanïkchejja, taqe kun aguantañataki ukat paciencianïñatakiw chʼamachasiñapa. Maynejj irpir chuymanëjjani ukhajja, janiw mä milagro toqejj jan walinak chuymapat apskaspati (Núm. 12:3; Sal. 106:32, 33). Maysa toqetjja, inas mä jilatajja, ‘chuymajanjja janiw kunas nayar juchañchirejj utjkiti’ sasin sischispa (1 Cor. 4:4). Ukampis jilat kullakanakajj luratanakap uñjasajj janiw ukham sapkaspati. Ukhamajj irpir chuymaninakajj Bibliamp sum ewjjtʼapjjätam ukhajja, jan colerasis sum istʼam. Kuntï sapkätam ukar phoqañatak chʼamachasirakim.

¿WALI JAYAT SUYJJTA?

Yaqhep jilatanakajj sinti jayas suyapkaspa ukhamaw amuyasipjje. Jumatï walja maranak irpir chuymanïñ suyasksta ukhajja, ¿awisajj mayjtʼasirïtati? Ukhamächi ukhajja, aka mä qellqatat amtasim, ukanjja siwa: “Suyatäki ukan jan phoqhasitapajja, chuymaruw llakisiyi, munatasarjam phoqhasitapasti jakañ qoqjamawa” sasa (Pro. 13:12, Qullan Arunaka, 2011).

Amtasajj jan phoqaski ukhajja, llakissnawa. Abrahamajj ukhamaw jikjjatasïna. Jehová Diosajj mä wawanïyätaw sasaw säna, ukampis walja tiempow pasjjäna, Abrahamamp Sarampejj janïraw wawanïpkänti (Gén. 12:1-3, 7). Chuymanëjjäna ukhajja, Abrahamajj sänwa: ‘Jehová Dios, ¿kunatakirak walïni juman churatamasti? Jumajj askiw nayan jan wawanïtaj yatistajja. Janiw mä wawsa churkistati’ sasa. Jehová Diosajj churämaw sasins siskchïnjja, niya tunka pusini maranak qhepatakwa uka arsutapajj phoqasiskäna (Gén. 15:2-4; 16:16; 21:5).

Ukham wali jaya tiempo suykasasa, Abrahamajj Jehová Diosar kusisit chuymamp serviskakïnwa. Janiw Diosat pächaskänti, ukatwa pacienciamp suytʼaskakïna. Apóstol Pablojj sänwa: “Abrahamajj llampʼu chuymampiw suytʼäna, ukatsti ukhamapuniw Diosan arsutaparjamajj katoqäna” sasa (Heb. 6:15). Kuntï Abrahamajj suykäna ukat sipansa, Taqe Chʼamani Diosajj jukʼamp bendicïna. ¿Kunsa jupat yateqassna?

Jumatï walja tiempo irpir chuymanïñ suyasksta ukhajja, Jehová Diosar jan qarjtas kusisit serviskakim, jan jupat pächasimti. William sat jilatajj walja jilatanakaruw nayrar sartapjjañapatak yanaptʼatayna, jupasti siwa: “Mayitanak phoqañatakejj tiempow munasi. Mä jilatajj kunjam chuymanisa,  ukat kunanaksa lurañ yati ukanakajj jukʼat jukʼatwa sarnaqataparjama lurataparjama qhansti. Yaqhepajja, irpir chuymanïsakisa nayrar sartatap uñachtʼayaspa ukhamwa amuyapjje. Ukham amuyañajj janiw walïkiti, janiw uka mayak munañasäkiti. Kun lurañat sipansa, kawkin serviñat sipansa, Jehová Diosar jan jitheqtas serviñaw jukʼamp wakiskirejja, ukhamatakwa nayrar sartatassa uñachtʼaytanjja” sasa.

Mä jilatajja, irpir chuymanjam serviñatakejj tunka mar jilaw suyäna. Jupasti Ezequiel 1 jaljat kunsa yateqäna uk amtasajj akham siwa: “Jehová Diosaw markapjja kunjamarutï amtki ukhamar apnaqe. Janiw kunas jiwasan munañasarjam luraskaspati, jan ukasti Jupan amtaparjamakiw kunas lurasispa. Nayajj walsay irpir chuymanïñ munaskchëjja, janiw munañajarusa, ni kunjamäñaptï nayajj munkta ukhamarus luraskaspati. Inas kuntï nayajj munkta ukjja, nayatak jan wakisirïtap Diosajj uñjchispa” sasa.

Jumatï irpir chuymanjam serviñ munstajja, jilat kullakanakan kusisit servipjjañapatak yanaptʼam. Wali jaya tiempos suykasma ukham amuyasstajja, jan llakimpi aynachtʼamti, pacienciamp suytʼaskakim. Raymundo jilatajj saskakiwa: “Taqe kun munirejja, janiw kunampis kusisitäkaspati. Maynitï sinti suyani ukhajja, janiw Jehová Diosar kusisit servjjaspati” sasa. Ukhamajja, Diosan qollan ajayupan luräwip phoqañataki chʼamachasim, cheqansa, paciencianïñamawa. Bibliat yatjjatasin Diosar jukʼamp jakʼachasim. Diosan arunakapat yatiyañataki ukat yatjjatañ munirinakar yatichañataki chʼamachasim. Familiana Diosar yupaychañataki ukat yaqha ukham luräwinakataki familiamar yanaptʼam. Jilat kullakanakarojj chʼamañchtʼapunim. Ukhamatwa Diosar serviñan nayrar sartaskakïta.

Mayitanak phoqañataki chʼamachasiskakim, ukat ukarojj Jehová Diosan mä bendicionaparjam uñjarakim. Janiw Jehová Diosasa ni markapasa juman llakimp aynachtʼañamsa, chuym ustʼayasiñamsa munapkiti. Diosajj jupar suma chuymampi servirinakaparojj wal yanaptʼi ukat bendicirakiwa, ukampis “janiw kuna llakisiñsa ukampi chikajj apayankiti” (Pro. 10:22).

Walja tiemposa irpir chuymanjam serviñatak suyjjstajja, yaqha toqenakat nayrar sartaskakim. Jehová Diosajj kunjamtï chʼamachasiskta ukhamarak kunjamtï familiamarusa tamarusa yanaptʼaskta, ukanakjja janiw armkaniti. Ukhamajja, taman kunan yanaptʼasasa, kusisit chuymamp Jehová Diosar serviskakim.

^ tʼaqa 2 Yaqha sutinakampi uchatawa.

^ tʼaqa 8 Aka yatichäwin utjki uka ewjjanakajj irpir chuymaninakan yanapiripäñ munapki uka jilatanakatakisa wali askirakiwa. Mayitanakajj 1 Timoteo 3:8-10, 12, 13 qellqatanwa jikjjatasi.