Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 SARNAQÄWI

Mä awki chhaqayasta, mä awki jikjjatta

Mä awki chhaqayasta, mä awki jikjjatta

AWKIJAJJ Graz (Austria) markanwa 1899 maran nacïna. Nayrïr Jachʼa Chʼajjwäwejj qalltkäna ukhajja, waynitukïskänwa. Ukampis Payïr Jachʼa Chʼajjwäwejj 1939 maran qalltkäna ukhajja, alemán soldadonakaw ejerciton serviñapatak katuntapjjatayna. Rusia markan guerrankkasaw 1943 maran jiwawayjjatayna. Nayajj pä maranikïskayätwa. Janïraw sum jupar uñtʼkayätti. Wawäkasasti wal awkinïñ munirïta, yateqer masinakajar awkipamp uñjirïta ukhajja, jukʼampïriwa. Waynitöjjayäta ukhaw alajjpachankir jan jiwiri Awkit yatjjatta, ukaw ¡wal chuymachawayitu! (Hab. 1:12.)

BOY SCOUTS SAT ORGANIZACIONARUW MANTTA

Wawäkayäta ukha

Paqallq maranïskayäta ukhaw Boy Scouts sat ­organizacionar mantta. Ukjja, 1908 maranwa Gran Bretaña markankiri Robert Stephenson Smyth Baden-Powell sat chachajj uttʼayatayna. Jupasti uka markanjja, teniente generaljamaw ejerciton serviskarakïna. 1916 maransti, Cub Scouts sat seccionwa nayjam jiskʼa wawanakataki uttʼayarakïna.

Sapa semana tukuyajj yaqha lugaranakaruw sarapjjerïta: ukansti carpanakan ikipjjerïta, ukatjja uniformeni, tamboras leqtʼasisa ukhamaw sarnaqapjjerïta. Ukham sarañjja wal munirïta. Mayni masinakajamp qoqanak taypin anatapkayäta ukjja sum amtta, jaypʼunakajj mä cheqar nina naktʼayasaw canttʼasisa muytapjjerïta. Ukatsti, qoqanakatsa animalakatsa sum yateqapjjerïta, ukaw Diosan luratanakapar wali askit uñjañataki yanaptʼawayitu.

Boy Scouts organizacionanjja, taqeniruw suma lurapjjañajatak chʼamachapjjerïtu. Ukatjja “taqe kunatakis wakichtʼata” sasaw aruntasipjjerïta. Ukajj wal gustitäna. Grupojanjja, patakatsa jiläpjjayätwa: niya chikatajj Católico Iglesiatapjjänwa, mä chikatasti protestante iglesiatapjjarakïnwa, mayasti budismo religionatarakïnwa.

Boy Scouts organizacionajja, 1920 marat qalltasajja, mä qawqha marat mararuw jachʼa tantachäwinak apapjje. Ukarusti, walja markanakatwa aywthapipjjaraki. Nayajj paqallqöri jachʼa tantachäwiruw 1951 agosto phajjsin sarawayta, ukasti Bad Ischl (Austria) markanwa apasïna. Llätunkïri jachʼa tantachäwirojj ukhamarakiw 1957 agosto phajjsin sarawayta, ukasti Birmingham (Inglaterra) marka jakʼanwa apasïna. Ukanjja, Boy Scouts organizacionankirinakajja, 33.000 jaqenakaw tantachasipjjäna, jupanakasti 85 markanakatäpjjänwa. Ukat 750.000 yaqha jaqenakas ukankapjjarakïnwa. Inglaterra apnaqeri Isabel reinas ukankarakïnwa. Ukanak uñjasajj wal kusisirïta, mä jachʼa familiankkiristsa ukham amuyasirïta. Ukampis kunas qhepat pasani ukjja janiw amuyirïkti. Qhepatjja, Diosar munasir mä jachʼa familia taypiruw mantawayta.

 JEHOVÁ DIOSAN MÄ QHANAÑCHIPARUW UÑTʼTA

Rudi Tschiggerl jilataw nayraqat Bibliat parlitäna, jupajj pastelanak lurirïnwa

1958 maran niya marzo jan ukajj abril phajjsinakanjja, Grand Hotel Wiesler sat mä hotelanwa camarerot trabajiñatak yateqaskayäta, Graz (Austria) markana. Niya tukuyañampëjjayata ukhawa, Rudolf Tschiggerl sat mä trabajir masijajj Bibliat arjjayitu. Jupasti pastelanak lurirïnwa. Janipuniw uka nayrajj khitis cheqa yatichäwinakjja yatichirïkituti. Trinidad sat yatichäwejj janiw Bibliankkiti sasaw sirïtu. Nayasti uka yatichäw wal arjjatirïta, pantjastaw sasaw sirïta. Rudolforusti Rudi sasaw sapjjerïta, jupajj wali suma jaqënwa, ukatwa Católico Iglesiar kuttʼaniñapataki arjjayirïta.

Mä Biblia apanirapïma sitänwa, ukampis católica Bibliakwa katoqerisma sasaw sayäta. Biblia churitäna ukhajja, jankʼakiw liyiñ qalltayäta, ukampis Biblia taypin Rudin uchata mä tratadop jikjjatta, Sociedad Watchtower ukan imprimita. Uk jikjjatasajj colerasirïtwa, uka tratadojj cheqa yatichäwinaksa qʼewjaykaspa ukham amuyirïta. Ukampisa, jupampi Bibliat yatjjatañ wal munirïta. Qhepatjja, Rudijj janiw mayampsa revistanaksa libronaksa apanjjänti. Niya kimsa phajjsinakjamaw awisaki yateqapjjerïta, awisajj wali arumkamaw Bibliat parlapjjerïta.

Hotelan camarerot trabajiñatak yateqaskayäta uk tukuyjjasajja, mamajajj mä hotelan administradoräñatakiw mä escuelar uchitu. Ukasti Bad Hofgastein sat markankänwa, Alpes sat qollunak jakʼana, ukaruw sarjjayäta. Uka escuelajj Bad Hofgastein markankiri Grand Hotel sat hotelampiw irnaqapjjäna. Awisajj ukaruw jukʼamp yateqañataki sarirïta.

PÄ MISIONERA KULLAKANAKAW VISITAPJJETU

Ilse Unterdörfer ukat Elfriede Löhr kullakanakampiw 1958 maran Bibliat yateqañ qalltta

Rudijj Viena markankiri sucursalaruw kawkjansa jakasta uka toqet qellqatayna, sucursalasti pä misionera kullakanakwa khitanitayna. Ilse Unterdörfer ukat Elfriede Löhr sat kullakanaka. * Mä urojja, hotelan katoqeripaw akham situ: ‘Pä señoraw thaqasktam, jumamp parlañ muni, autopan suyasipki’ sasa. Khitirakïpacha sasaw misturïta. Uka pä kullakanakajja, Alemanian nazismo partidonkirinakajj apnaqapkäna ukat qellqatanakasas jarkʼatäkäna ukhajja, mä cheqat mä cheqaru qellqatanakas apasaw yanaptʼapjjerïtayna, uk qhepatak yatta. Yamas janïra Payïr Jachʼa Chʼajjwäwejj qalltkäna ukhajja, alemanonakan Gestapo sat policianakapaw katuntapjjatayna ukat Lichtenburg markankir campo de concentracionaruw apayapjjatayna. Qhepatjja, Ravensbrück markankir campo de concentracionaruw apayapjjarakitayna, Berlín marka jakʼana.

Kullakanakajj mamaj niya mitäpjjänwa. Wali respetompiw jupanakar uñjirïta, janiw tiempsa apaqañ munirïkti. Janirakiw mä qawqha semananaka jan ukajj phajjsinaka inamay visitayasiñ munkayätti. Ukatwa, sucesión apostólica sat yatichäwi toqet parlir textonak mä listar apanirapita sasin mayta. Markajankir curaruw uk uñjjatayä sasaw sirïta. Curampi parlasajj janiw jukʼamp pächasjjäti sasaw amuyirïta.

CHEQPACH QOLLANA AWKIRUW UÑTʼTA

Mateo 16:18, 19 qellqatankki uka Jesusan arunakaparjamaw  sucesión apostólica sat yatichäwjja catoliconakajj uttʼayapjje. Ukanjja akham yatichapjje: ‘Nayrïr papajj apóstol Pedrönwa, ukat jupar arkiri papanakajj jupan uttʼayatäpjjewa’ sasa. Ukatjja, papajj kuna yatichäwsa arsu ukhajja, janiw pantjaskaspati sasaw sapjje. Ukaruw nayajj creyiyäta. Católica Iglesianjja, mä paparojj qollana awki sasaw uñtʼapjje. Ukhamajj jupatejj Trinidadajj cheqaw sischi ukhajja, cheqaw sañajarakïspawa sasaw amuyayäta. Ukampis jupatï pantjasirïchi ukhajja, Trinidad yatichäwejj pantjatarakispaw sasaw sirïta. Walja catoliconakatakejj sucesión apostólica yatichäwejj wali askit uñjatawa, ukarjamaw walja yatichäwinakarus creyipjjaraki.

Uka toqet curampi parlir sarta ukhajja, janiw jisktʼatajj qhanañchirjamäkänti. Sucesión apostólica toqet parlir mä librokwa churirïtu. Utajan liytʼawayasinjja, jukʼamp jisktʼanakampiw wasitat kuttʼirïta. Jan qhanañchirjamäsajj akham sirïtu: “Janiw iyawsayañ puedkirismati, janirakiw jumas iyawsaykitasmati [...]. Ukhamajj sumak sarjjäta” sasa. Janiw jukʼampsa uka toqet parlañ munjjänti.

Qhepatsti, Ilse ukat Elfriede kullakanakamp Bibliat yatjjatañwa amtawayta. Jupanakaw Jehová Diosaru, cheqpach Qollan Awkiru uñtʼañ yanaptʼawayapjjetu (Juan 17:11). Uka lugaran janïraw mä tamas utjkänti. Kullakanakajja, Bibliat yateqañ munirinakan utanakapanwa tantachasipjjerïna. Mä qawqhanikïpjjänwa. Programajj utjkäna ukarjamaw Ilsempi Elfriede kullakampi niya taqpach qhanañchapjjerïna, janiw bautisat mä jilatas utjkänti. Awisakiw mä jilatajj jutiri, ukatakisti mä localaw alquilasiri.

DIOSAN ARUNAKAP YATIYAÑ QALLTTA

Ilse ukat Elfriede kullakanakajja, 1958 octubre phajjsinwa Bibliat yatichañ qalltapjjetu. Kimsa phajjsitjja, bautisasjjakiyätwa, 1959 enero phajjsina. Janïr bautisaskasajja, kunjamas uta utat yatiyañäpacha uk yatiñatakiwa, jupanakampi misturïta (Hech. 20:20). Nayrïr kutin mistkta uka qhepatjja, mä territorio mayta, ukhamat uka cheqan yatiyañajataki. Mä markpachwa territoriot uñtayapjjerïtu. Ukarojj sapakiw sarañajäna, uta utsa yatiyañajäna, ukat istʼañ munirinakarusti kuttʼañajarakïnwa. Jaya qhepatakwa, mä jilatampejj yatiyir mistta, jupasti tamanak tumptʼir jilatänwa.

Hotelan administradoräñataki yateqaskayäta ukjja, 1960 maranwa tukuyjjta. Ukatsti utajaruw kuttʼjjta, ukhamat Bibliat yateqawaykta ukanak familiajaru yatichañataki. Jichhakamajj janiw maynis cheqa arunak yateqawayapkiti, ukampis mä qawqhanejj mä jukʼa yateqañ munasipkarakiwa.

JUKʼAMPI SERVIÑATAKIW CHʼAMACHASTA

Pä tunka maranïkayäta ukha

1961 maranjja, sucursalajj taqpachan tamanakaruw precursoräpjjañapatak mä carta toqe chʼamañchäna. Ukhajj sapäskayätwa, janirakiw usutäkayätsa, ukhamajj precursorïristwa sasaw amuyirïta. Ukatwa Kurt Kuhn sat tamanak tumptʼir jilatamp parlta, juparusti sistwa: “Mä qawqha phajjsiw autonïñatak trabajtʼañ munta, ukajj precursoräñatakiw yanaptʼitaspa” sasa. Jupasti sarakituwa: “¿Diosar sapüru serviñatakejj Jesusatakisa apostolonakatakisa autojj wakisïnti?” sasa. Ukham sasaw kuntï lurañajäkäna uk qhan sirïtu. Ukhamajj jankʼakiw precursoräñat wakichasirïta. Niyakejjay mä hotelan restaurantepan 72 horanak sapa semana trabajirïstjja, tiempo apsuñajaw wakisïna.

Patronajaruw 60 horanakakiw trabajiñ munta sasin sirïta, jupasti iyaw sasaw sirïtojja, pagojsti  ukhampach pagaskirïtu. Mä qawqhatjja, 48 ho­ranakak trabajiñ munta sasaw sarakirïta, iyaw sasaw sarakirïtu, pagojasti ukhampachakïskiriwa. Qhepatjja, 36 horanakak trabajiñ munta ­sasaw mayirakta, semanan sojjta uruki, sapa urusti 6 horakiraki. Patronajasti iyaw sarakikitänwa, ukampis janiw cheqaw sañja­mäkänti, pa­goj-jja ¡ukhampachwa churaskikatäna! Ukhamatwa precursoräñ qalltta, uka tiemponjja precursorana­kajj sapa phajjsejj 100 horanakwa yatiyapjjañapäna.

Pusi phajjsi qhepatsti, precursor especialata ukhamaraki siervo de congregacionata mä jiskʼa taman uttʼayapjjetu, Spittal an der Drau sat markana. Precursor especialanakajj sapa phajjsejj 150 horanakwa yatiyapjjañapäna. Sapakiw precursor especialjam serviriyäta, Gertrude Lobner sat mä kullakaw wal taman yanaptʼitäna, jupajja siervo de congregacionan yanapiripjamaw yanaptʼitäna. *

YAQHA LURAÑANAKA

1963 maranjja, tamanak tumptʼañatakiw uttʼayapjjetu. Awisajja trenatwa mä tamat yaqha tamarojj jachʼa maletanakas aptʼata sarirïta. Jilapart ­jilat kullakanakajj janiw autonïpkänti, ukatwa trena puriñawjarojj jan jutapjjerïkänti. Nayajj jupanak ukarojj taxit saririskayätwa, ukampis janiw jiskʼachat amuyasipjjañapa munkayätti. Ukatwa qorpachasiñajäkäna ukarojj kayuki sarirïta.

1965 maranjja, sapakïskayät ukhawa, Galaad Escuelar jawsapjjetu (clase 41). Nayamp chika ukankapkäna uka jilatanakas nayjam sapakïsipkarakïnwa. Ukatjja, Austriaruw wasitampi saräta sasaw sapjjetäna. Ukanwa tamanak tumptʼirjam serviñajäna. Ukampis janïr khitkasajja, pusi semanaw Anthony Conte sat tamanak tumptʼir jilatampejj khitapjjerïtu. Jupampejj Cornwall sat lugaranakwa visitapjjerïta, Nueva York markana. Yatiyañ nayjamarakiw wal munirïna ukat wali suma yatichirirakirïnwa.

Casaraskta uka uru

Austriar kuttʼkayäta ukhajja, Tove Merete sat mä suma tawaqoruw uñtʼta. Jupajj phesqa maranitpachwa Diosan cheqa arunakap uñtʼjjatayna. Kunapachatï kunjamsa uñtʼasipjjta jilat kullakanakajj sasin sapjjetu ukhajja, “sucursalaw irpthapipjjetu” sasaw sapjjerïta. Mä mara pasataruw 1967 abril phajjsin casarasipjjta. Panpachaniw tamanak tumptʼirejj sarasipkakiyäta.

Kunjamsa yaqhep cristianonakajj Jehová Diosampi apasipjje ukhamaraki kunjamsa Diosajj wawapäñatak maynir ajlli ukjja Romanos 8:15 qellqataw qhanañchi. Ajllitanakajj akhamwa Awkirojj sapjje: “Nayan Awkejja” sasa. Nayajj 1968 maranwa ukham jikjjatasta. Ukhamatwa kunjamsa Jehová Diosajj khuyapayasiñapat wawapar ­tukuyitu uk amuyawayta. Ukhamatarakwa ajllit cristianonak taypiru mantawayta.

Esposajampejj tamanak tumptʼirejj (circuitonsa distritonsa) sarasipkakiyätwa, 1976 marakama. Juyphipachanjja, awisajj jan calefacciona­niw ikipjjeriyäta. Mä kutejja, patjjankiri iki­ñasa, chhullunkrantayata janqʼoki ukhamaw sartapjjta. Samsupkayäta uka samanaw ukhamar tukutayna. Ukatwa juntʼuptayir mä jiskʼa estufa apasiñ amtapjjayäta, ukhamat jan añcha thayjata ikiñataki. Yaqhep cheqanakanjja, arumanakajj bañor  sarañatakejj khunnamwa sarapjjañajäna, wali thaya arumana. Janiw utanipkayätti, ukatwa kawkirutï uka semanajj qorpachasipjjerïta ukar lunes urumppach qheparapjjerïta, ukhamat martes uru wali alwat yaqha tamar sarjjañataki.

Esposajajj walpun yanaptʼawayitu. Janipuniw kunapachas “yatiyir sarañäni” sasin jariyirïkti, kunattejj Diosan arupata yatiyañarojj wal munasi ukat jilat kullakanakarus ukhamaraki. Jaqenakatsa llakisirakiwa, ukaw nätakejj mä suma yanapajja.

1976 maranjja, Viena (Austria) markankir Betelaruw invitapjjetäna, ukansti sucursalan mä sarayirjam uttʼayapjjetäna. Uka tiemponjja, Europa del Este uksankir markanakan Diosan arunakap yatiyasiñapatakiw uka sucursalajj uñjarakïna, ukatjja jamasatwa qellqatanaksa puriyapjjarakirïna. Ukanwa Jürgen Rundel jilatampejj irnaqtʼawayta, jupaw uka toqenakat sum yatïna. Qhepatsti, Europa del Este toqenkiri tunka arunakaru jaqokipasiñapatakiw pʼeqtʼaskayäta. Jürgen jilatampi Gertrude kullakampejja taqe chuymaw precursor especialjam Jehová Diosar Alemanian servisipki. 1978 maranjja, Austriankir sucursalanjja, sojjta arunakaruw jiskʼa imprentat revistanaka lurañ qalltasiwayi. Ukatjja, kawkïr markanakatï qellqatanak mayipkäna ukanakarus apayapjjarakiyätwa. Otto Kuglitsch jilataw ukanak puriyasiñapatakejj yanaptʼäna, jichhajj uka jilatajj Ingrid esposapampiw Alemania Betelan servisipki.

Austrianjja, kunayman toqetwa Diosan arunakapat yatiyayäta, callenakansa ukhamaraki

Europa del Este toqenkir markanakanjja, ukhamarakiw jilatanakajj mimeógrafo sat maquinanakampi jan ukajj microfilme rollonakampi yanaptʼayasisajj imprimipjjerïna. Ukhamäkchïnsa, yanaptʼajj munasiskakïnwa. Jehová Diosajj ukham chʼamachasitanakaparojj wal yanaptʼawayi. Sucursalanjja ukhamarakiw uka jilat kullakanakarojj wal munasipjjäna, Diosan arunakap yatiyañajj jarkʼatäkchïna ukhasa, Jehová Diosar taqe chuymaw servisipkakïna.

RUMANIA MARKARUW VISITIR SARAPJJTA

1989 maranjja, Theodore Jaracz jilatampiw Rumaniaru sarapjjta, jupajj Oraqpachan Jilïr Irpirinak taypinkirïnwa. Diosan markapar jilat kullakanakar kuttʼañ yanaptʼañatakiw sarapjjayäta. Jupanakajj 1949 mara qalltanwa, Diosan markapat jitheqtapjjäna, ukatjja tamanakwa uttʼayasipjjarakïna. Ukampis yatiyasipkakïnwa ukhamaraki bautisasipkakïnwa. Ukatjja, Diosan markapankir  jilat kullakanakjamarakiw carcelar llawintatas uñjasipjjäna, jan akapachar mitisipjjatap layku. Rumanianjja, Diosan arunakapat yatiyañajj jarkʼatakïskänwa, ukatwa pusi irpir chuymaninakampi Pamfil Albu sat jilatan utapan tantachasipjjta, uka marka uñjiritaki Comité de Paisjam uttʼayatäpkäna uka jilatanakas ukankapjjarakïnwa. Austriatjja Rolf Kellner sat jilataruw irpasipjjarakiyäta, ukhamat Rumanian parlapkäna uka arut jaqokipañapataki.

Qhepür aruma tantachasipjjta ukhajja, Albu jilataw mayni pusi irpir chuymaninakar kuttʼanjjapjjañapataki iyawsayäna, akham säna: “Kuttʼjjañasawa, janitï ukham lurkañänejja, janiw kuttʼañjamäjjaspati” sasa. Ukatwa 5.000 jilat kullakanakajj Diosan markaparu wasitamp kuttʼanjjapjjäna. Ukhamatwa Jehová Diosajj Supayar atipjawayi.

1989 mara tukuyasti, janïra Europa del Este ­toqenjja comunistanakajj tukuskäna ukhawa, Oraqpachan Jilïr Irpirinakajj Nueva York markar sarapjjañajatak invitapjjetäna, ukhamat Betelan irnaqapjjañajataki. ¡Ukajj wali suma yatiyäwipunïnwa! Ukhamatwa 1990 julio phajjsin Brooklyn markankir Betelan irnaqañ qalltapjjta. Ukatsti 1992 maranjja, Jilïr Irpirinakan Comité de Servicio satäkis ukanwa yanapayäta, 1994 maransti Oraqpachankir Irpirinak taypinkjjaraktwa.

LURATANAKAJAT JAN ARMASISAW NAYRAQATAR UÑTTA

Esposajampi Brooklyn (Nueva York) markana

Mä hotelan camarerjam trabajkäyäta ukhatjja, walja maranakaw pasawayjje. Jichhajja, wali kusisitaw aka oraqpachankir jilat kullakanakar Bibliat apstʼat qellqatanaka wakichasiñapatak yanaptʼaskta (Mat. 24:45-47). Phesqa tunka maranak jilaw sapüru Diosatak irnaqtʼawayta, uka toqet lupʼisajja, walpun Jehová Diosarojj yuspärta, wali kusisitapuniw jikjjatasirakta ukat kunjamsa Jehová Diosajj oraqpachankir jilat kullakanakaru bendiciwayi uksa uñjaraktwa. Walja markanakat tantachasipki ukar sarañajj wal gustitu, ukanwa Jehová Dios Awkisaru ukhamarak Arupa sum uñtʼañatak chʼamañchapjjestu.

Walja millón jaqenakampi Bibliat yateqapjjaspa ukat kunatï cheqäki uksa iyawsapjjarakispa, ukatjja aka oraqpachankir jilat kullakanakamp chika mä familiaki Jehová Diosar servipjjaspa ukwa munta ukat ukrakwa Diosar mayiraktjja (1 Ped. 2:17). Ukatjja jiwatanakajj aka Oraqen jaktanipkani uk uñjaniñsa wal suyarakta, ukat awkijar jaktanir uñjañsa munaraktwa. Paraisonjja awkijas taykajas taqe familiajas Diosar serviñ amtapjjaspa ukwa munaraktjja.

Jiwatanakajj aka Oraqen jaktanipkani uk uñjaniñsa wal suyta, ukat awkijar jaktanir uñjañsa munaraktwa

^ tʼaqa 15 Español arut qellqata La Atalaya, abril 15, 1980 revistanwa jukʼampi jupanakjjat qhanañchi.

^ tʼaqa 27 Jichhajja, siervo de congregacionarojj irpir chuymaninakat sarayiri satäjjewa, siervo de congregacionan yanapiripasti secretario satäjjarakiwa.