Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Jumajj amttati?

¿Jumajj amttati?

¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼma:

¿Kuna ratus Nisán 14 urun uwij kharipjjañapäna?

Yaqhep Biblianakanjja, “jaypʼu” toqeruw uwijajj kharisiñapäna siwa, mä arunjja, sujsthapiru jan ukajj niya Inti jalantaru. Ukhamajj janïr chʼamakthapkipan kharisiñapäna (Éxo. 12:6). (12/15, 18 ukat 19 jananaka.)

¿Suma amtar puripjjañapatakejj kuna qellqatanakas wayn tawaqonakarojj yanaptʼaspa?

1) Nayraqatajj Diosan Reinopa ukat kunatï cheqäki ukanakwa thaqapjjañapa (Mat. 6:19-34). 2) Mayninakaruw yanaptʼapjjañapa (Hech. 20:35). 3) Waynäkasinwa jan ukajj tawaqökasinwa Jehová Diosar kusisit serviñapa (Ecl. 12:1). (1/15, 19 ukat 20 jananaka.)

1914 marat aksaru caballonakjjat sariri pusi jaqenakajj ¿kamsañsa muni?

Jesusajja, mä janqʼo caballor latʼjjatataw Supayarusa sajjranakarus alajjpachat aka Oraqer jaqoqani. Wila caballor latʼjjatatäki ukajja, aka Oraqen utjki uka chʼajjwañanakampi sasiwa. Ukatjja chʼiyar caballor latʼjjatatäki ukajj manqʼat pistʼañampi sasirakiwa. Qʼello caballor latʼjjatatäki ukasti, jiwayir usunakamp sasirakiwa, ukaw walja jaqenakar jiwarayi (Apo. 6:2-8). (2/1, 6 ukat 7 jananaka.)

¿Kunapachas Corderojj ‘casarasini’? (Apo. 19:7.)

Atipjäwip phoqkani, mä arunjja, Jachʼa Babiloniajj tʼunjatäjjani ukat Armagedonas pasjjani uka qhepatwa Jesucristojj “casarasini” (2/15, 10 jana).

¿Kunatsa nayrïr patak maranakan judionakajj Mesiasar ‘suyapjjäna’? (Luc. 3:15.)

Kuntï Daniel profetajj Mesiasat siskäna uk inas jan sum amuyapkchïnti (Dan. 9:24-27). Ukampis inas kuntï angelanakajj yaqhep uwij awatirinakaru sapkäna uka toqet yatipjjchïna, jan ukajj kuntï Ana warmejj templon Jesusat siskäna uk istʼapjjarakchïna. Magonakas ‘judionakan reyipaw naci’ sas yatisaw Jerusalenar puripjjäna (Mat. 2:1, 2). Ukatjja, Bautisir Juanas ‘Cristojj niyaw purinini’ sasaw yatiyarakïna (2/15, 26 ukat 27 jananaka).

Jïsa sasajj ¿ukarjamapunit phoqta? (2 Cor. 1:18.)

Inas awisajj kuntï arsktan uk jan phoqkchiñäniti, wali wakiskir luräwinak utjatap layku. Ukampis mä cristianojj arsutap phoqañatakipuniw chʼamachasiñapa (3/15, 32 jana).

¿Kunjamatsa pornografía uñchʼukiñarojj jan purtʼasksna?

1) Jan walinak luraskiri, jan ukajj jan wali fotonaka uñstanini ukhajja, ukspachaw maysar uñtañama; 2) janiw jan walinaka lupʼiñamäkiti: kunanakatï qʼoma suma luräwinakäki ukanakwa lupʼiñama ukat Jehová Diosarus mayisiñamarakiwa, 3) Internetanjja janiw pornografianïki uka cheqar mantañamäkiti, ni pornografiani videonaksa uñchʼukiñamäkiti (4/1, 10-12 jananaka).

Mä cristianojj familiap jaytasin yaqha markar trabajir sarjje ukhajja, ¿kunanakas pasaspa?

Awkis jan ukajj taykas familiapampi jan jakki ukhajja, wawanakajj janiw sum jilsupkaspati, janirakiw awkimpis jan ukajj taykapampis sum apasjjapjjaspati. Ukatjja, jayankirïki ukajj wachoqa jucharuw purirakispa (4/15, 19 ukat 20 jananaka).

Lawar chʼakkatatanakarojja, ¿kunatsa kayunakap pʼakirapjjerïna?

Romanonakajja, yaqhep jan wali jaqenakarojj lawar chʼakkatasaw jiwayapjjerïna. Ukatwa judionakajj Jesusamp chika chʼakkatatanakaru kayunakap pʼakirapjjañap mayipjjäna. Ukham pʼakiratajj janiw sum samsjjapjjerïkänti, jankʼakiw jiwjjapjjerïna. Ukhamatwa janejj paqar arumas lawan chʼakkatata uñjasipjjerïkänti (Deu. 21:22, 23). (5/1, 11 jana).

Yatiyir sarkasajja, ¿kuna pusi jisktʼanakatsa amuytʼasiñasa?

¿Khitinakarus yatiyäjja? ¿Kawkinsa parläjja? ¿Kunapach yatiyañas wakisispa? ¿Kunjamsa yatiyäjja? (5/15, 12-15 jananaka.)

¿Cigarrojj qawqhanirus jiwarayi?

Päsir patak maranakanjja, cigarrojj patak millón jaqenakaruw jiwayawayi. Jichhürunakanjja, sapa maraw sojjta millón jaqenakajj jiwarapjje (6/1, 3 jana).