Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jan cristianöpki uka familiaranakan chuymanakapar kunjams purtʼsna

Jan cristianöpki uka familiaranakan chuymanakapar kunjams purtʼsna

“UTAMAR sarjjam, familianakamar yatiyam kuna muspharkañanaktï [Jehová] Tatitojj jumatak lurki ukanaka, ukhamarak kunjämtejj khuyapayastam ukanakaraki” sasaw jupar arkañ munkäna uka chacharojj Jesusajj säna. Jupanakajja, Galilea lamar qotat Inti jalsu aynach toqenwa Gadara sat cheqan jikjjatasipjjpachäna. Jesusan uka arunakapajja, kunsa jaqenakajj munapjje uk amuyatapwa uñachtʼayi, ukajj kunanakatï jupatak askïki uka toqet familiaranakapar parltʼaña munatapawa (Mar. 5:19).

Jiwasajj ukhamanak jichhürunakan uñjaskaktänwa, yamas yaqhep markanakan yaqhep cheqanakat sipans jukʼampiw uñjasi. Ukatwa maynejj Jehová Diosan serviripar tukjje ukhajja, iyawsäwipat familiaranakapar parlañ muni. Ukampis ¿kunjamatsa uk luraspa? Familiaranakapajj yaqha religionankchi jan ukajj jan taqe chuyma iyawskchi ukhajja, ¿kunjamsa chuymapar purtʼaspa? Biblianwa uka toqet wali wakiskir ewjjtʼanak jikjjatsna.

“MESIASARUW JIKJJATAPJJTA”

Nayrïr patak maranakanjja, Jesusan Mesiasätap Andresaw nayraqat yatïna. Ukat ¿khitirus jankʼak yatiyäna? “Andresajj janïr kunäkipana Simón jilaparuw thaqer saräna, ukatsti sarakïnwa: ‘Mesiasaruw jikjjatapjjta’. (Ukasti Cristo sañwa muni.)” Ukatsti kawkhantï Jesusajj jikjjataskäna ukaruw Pedror irpäna, ukhamatwa Pedrorojj Jesusan arkiripar tukuñapatak yanaptʼäna (Juan 1:35-42).

Niya sojjta mara qhepatjja, Pedrojj Jope markankaskäna ukhaw Cesaria marka alay toqer Cornelio chachan utapar sarañapatak mä invitación katoqäna, uka chachajj soldadonakar pʼeqtʼirïnwa. ¿Khitinakarus ukar purisajj jikjjatäna? Bibliajj akham siwa: “Corneliosti parientenakaparu, suma munat  amigonakapampir jawsthapisinwa jupanakarojj [mä arunjja, Pedroru ukat jupamp chik saririnakar] suyäna”. Corneliojj ukhamwa familiaranakaparojj Pedror istʼapjjañapataki ukat kuntï istʼapki ukarjam amtapjjañapatak yanaptʼäna (Hech. 10:22-33).

Kunjamtï Andresasa ukat Cornelios familiaranakapar uñjapkäna ukatjja, ¿kunsa yateqsna?

Andresasa ukat Cornelios janiw ukhamak familiaranakapar jaytapkänti. Andresaw Pedrorojj Jesusan ukar irpäna, ukat Corneliojj familiaranakapan Pedror istʼapjjañapatakiw tantachthapïna. Ukampis jupanakajj janiw familiaranakapar munkir jan munkir cristianor tukuyapkänti. ¿Kuns ukajj yatichistu? ¿Kunjams jupanakat yateqassna? Inas familiasarojj kunatï wali askïki ukanakat parltʼsna, ukat kunanakatï cheqa yatichäwi yatjjatañatak yanaptʼkaspa uk lursna jan ukajj jilat kullakanakar uñtʼaysna. Ukampis jupa pachpa amtañapatakiw jaytañasa ukat janiw sinti jariyañasäkiti ni munkir jan munkirs yateqayañasäkiti. Kunjamsa familiaranakasar yanaptʼsna ukjja, Alemania markankir Jürgen ukat Petra chacha warmit amuytʼañäni.

Petrajj Jehová Diosan Qhanañchirinakapampiw Bibliat yateqäna ukat mä qawqha tiempot bautisasjjänwa. Jürgen sat chachapajj soldadonak pʼeqtʼirïnwa. Qalltanjja, kuntï warmipajj amtkäna ukajj janiw jupatak walïkänti. Ukampis tiempompejja, Diosan Qhanañchirinakapajj Biblian cheqa yatichäwinakap yatiyapjjatapwa amuyäna. Ukatwa Jehová Diosarojj jakäwip katuyasjjarakïna, jichhajj irpir chuymanjamaw irnaqtʼaski. Familiaranakapajj yaqha religionar sarapki ukanakan chuymapar purtʼañatakejja, ¿kunsa jupajj ewjjtʼi?

Jürgen jilatajj akham siwa: “Janiw munkir jan munkir jiwasjam iyawsapjjañapatak chʼamañchañasäkiti, ni sapa kutis uka toqet parlañasäkiti. Ukham lursna ukhajj jukʼampikiw jan yatiñ munjjapjjaspati. Tiempompejja, jukʼat jukʼatwa yanaptʼsna. Ukat mitanakaparu jan ukajj jupanakjam munir jilat kullakanakar uñtʼayañaw familiaranakasar yanaptʼaspa. Ukaw istʼapjjañapatak yanaptʼaspa”.

“Janiw munkir jan munkir jiwasjam iyawsapjjañapatak chʼamañchañasäkiti, ni sapa kutis uka toqet parlañasäkiti.” (Jürgen)

Apóstol Pedrosa ukat Cornelio chachan familiaranakapas jankʼakiw Biblian yatichäwinakap katoqapjjäna. Ukampis nayrïr patak maranakan jakir jaqenakajj janiw jankʼak mä amtar puripkänti.

JESUSAN JILANAKAPA

Jesusajj yatiykäna ukhajj familiaranakapat waljaniw istʼapjjäna. Ukat inas apóstol Santiagosa (Jacobo) ukat Juanasa, Jesusan primonakapächïna ukat jupanakan taykapajj Salomé satänwa, jupajj Jesusan tiapäpachänwa. Jupajj “khitinakatï yänakapampi [Jesusaru ukat apostolonakar] servipkäna ukanaka[t]” maynïrïpachänwa (Luc. 8:1-3).

Jesusan mayni familiaranakapajj qalltan janiw jupar iyawsapkänti. Amuytʼañataki, bautisasitapat mä mara qhepatjja, jupar istʼañatakiw walja jaqenakajj mä utan tantachasipjjäna. “Uk yatisinsti Jesusan familianakapajj jupar irpjjañatakiw jutapjjäna: ‘Loqheptjjataynawa’” sasaw Bibliajj qhanañchi. Mä qawqha tiempo qhepatjja, Jesusan taykap toqe jilanakapajj kawkirus saräta sasin sapkäna ukhajja, Jesusajj janiw kamskänsa. Kunattejj “janïraw jilanakapajj Jesusar iyawsapkänti” (Mar. 3:21; Juan 7:5).

Kunjamtï Jesusajj familiaranakapar uñjkäna ukat ¿kunsa yateqtanjja? Loqhëtawa sasin mä qawqhanejj sapkäna ukhajja, Jesusajj janiw coleraskänti. Yamas jiwayapkäna ukat jaktkäna uka qhepatjja, familiaparuw chʼamañchtʼäna, kunattejj Santiagoruw uñstäna jupajj taykap toqe jilapänwa. Santiagor  uñstkäna ukajja, juparu ukat taykap toqe mayni jilanakapan Jesusan Mesiasätap qhan amuyapjjañapatakiw yanaptʼpachäna. Ukatwa jupanakajj apostolonak taypinkapjjpachäna ukat Diosat jan jitheqtir mayni servirinakapajj Jerusalén markan mä altus utan tantachasis qollan ajayu katoqapkäna ukanakamp chikäpjjpachäna. Qhepatjja, Judasampi ukat Santiagompejj wali wakiskir luräwinak katoqapjjäna, Judasajj Jesusan taykap toqe jilaparakïnwa (Hech. 1:12-14; 2:1-4; 1 Cor. 15:7).

YAQHEPATAKEJJ JUKʼAMP TIEMPOW MUNASI

“Kunatï askïki uk jikjjatañatakejja paciencia, paciencia ukat jukʼamp pacienciaw munasi.” (Roswitha)

Nayrïr cristianonakjamarakiw yaqhepajj jakañaru apir thakin sarañ amtañatakejj jukʼamp tiemp munapjje. Roswitha kullakat amuytʼañäni, kunapachatï chachapajj 1978 maran bautisaskäna ukhajja, uka kullakajj católica religionaruw taqe chuym saräna. Yateqkäna ukar taqe chuyma atinisisajj kuntï chachapajj amtkäna ukajj jupatak janipuniw walïkänti. Ukampis walja maranak qhepatjja, janiw ukham amuyjjänti. Ukat Jehová Diosan Qhanañchirinakapajj kunatï cheqäki uk yatichapjjatapwa amuyäna ukat 2003 maranwa bautisasjjäna. ¿Kunas ukatak yanaptʼäna? Kunjamtï chachapajj jupar uñjkäna ukawa: chachapajja, jan wal uñjatäsin chuym ustʼayasiñat sipansa, warmiparojj jan ukham amuyjjañapatakiw yanaptʼäna. ¿Kunsa Roswitha kullakajj ewjjtʼi? “Kunatï askïki uk jikjjatañatakejja paciencia, paciencia ukat jukʼamp pacienciaw munasi.”

Monika kullakajj 1974 maranwa bautisasïna ukat pä yoqapajj tunka mara qhepatwa Jehová Diosan Qhanañchirinakapar tukupjjäna. Jupanakajj kawkïr religionarutï sarapkäna ukar sarapjjañapatakejj janis Hans chachapajj jarkʼkchïnjja, 2006 maranwa bautisasjjäna. ¿Kunsa jupanakajj ewjjtʼapjje? “Jehová Diosat janipun jitheqtamti, ukat iyawsäwiman yantʼat uñjaskasas jan aynachtʼamti.” Ukatjja, Hans jilatarojj sapa kutiw munasiñ uñachtʼayapjjäna, ukaw yanaptʼarakïna. Ukat mä urojj cheqa yatichäwirojj mantapuniniwa sasaw suyapjjäna.

DIOSAN ARUPAMP YANAPTʼATA

Cheqa yatichäwejj wiñay jakañar apir umamp sasiwa sasaw Jesusajj mä kutejj säna (Juan 4:13, 14). Familiaranakasajj uka qʼoma umat umtʼapjjañapa ukat yanaptʼatäpjjañapwa muntanjja. Ukampis janiw jankʼaki ukat walj umantayasin ajjskatayañ munktanti. Cheqas yanaptʼasktanti janicha ukajj kunjamsa iyawsäwisat parlasktan ukarjamäniwa. “Aski jaqejj janïra parlkasinjja suma amuytʼasisinwa arsu” ukat “khititejj yatiñampi amuytʼki ukajja, yatiñampiwa parli; arunakapasti sumwa amuytʼayi” sasaw Bibliajj qhanañchi. ¿Kunjamsa ukarjam sarnaqsna? (Pro. 15:28; 16:23).

Mä warmejja, kuntï yateqki uk chachapan istʼañapatakejj “janïra parlkasinjja suma amuytʼasisinwa arsu”, mä arunjja, kuntï siskani uk sum amuytʼasi ukat janiw jankʼak parlkiti. Mayninakat sipans yatiñanïkaspasa jan ukajj jupat sipans jan pantjasis sums lurkaspa ukham janipuniw amuyayañapäkiti. Ukhamatwa, suma amuytʼat arunakapajj chʼamañchtʼani ukat sumankañs utjayarakini. ‘Yatiñampi parlañapatakejja’ warmejj akham sasaw jisktʼasiñapa: “¿Kunapachas chachajar parltʼañjamajja? ¿Kuna toqenakatsa parltʼañ muniri? ¿Kuna toqenakatsa liytʼañ yati? ¿Ciencia, política jan ukajj pelot añattʼañ toqenakatacha? Kunjamtï jikjjataski ukat amuyki uk respetasajja, ¿kunjamsa Biblia toqet yatiñ munañapatak yanaptʼirista?”.

Jehová Diosan jan Qhanañchiripäki uka familianakasan chuymapar purtʼañatakejj janiw kunarutï iyawsktan ukak qhanañchañasäkiti. Kuntï sisktan uk luratanakasampiw uñachtʼayañasa.

YATEQASKAY SARNAQATASA

Parltʼaniwayktan uka Jürgen jilatajj akham siwa: “Biblian aski yatichäwiparjamaw sapür sarnaqañasa. Ukhamatwa jan cristianöpki uka familiarasajj kunatï cheqäki uk amuyani, ukampis inas jan sumpun amuykchiniti”. Warmipajj bautisaskäna ukhat niya 30 mara qhepatwa Hans jilatajj bautisasïna, jupajj akham sarakiwa: “Cristianjam sarnaqañaw wakisi. Ukhamatwa Diosar jan loqtki uka familiarasajj cheqa yatichäwin yanaptʼatap amuyapjjani”. Diosar iyawsatasajj mä qawqha toqenakat mayjtʼayatapwa familiasajj amuyañapa, ukampis ukajj janiw jan walitakïkiti, jan ukasti askitakiwa.

“Cristianjam sarnaqañaw wakisi. Ukhamatwa Diosar jan loqtki uka familiarasajj cheqa yatichäwin yanaptʼatap amuyapjjani.” (Hans)

Diosar jan servir chachan warminakarojj akham sasaw Pedrojj ewjjtʼäna: “Chachanakamar istʼasa sarnaqapjjam, ukhamata inas kawkïri chachas jan Tatitur iyawskchi ukajj jumanakan sarnaqäwinakam toqe Tatitutaki jikjjatatäñapataki jan kuna arumpisa, jan ukasti jumanakan suma sarnaqatam  uñjasaki. Jumanakan kʼachachasiñanakamasti jan patjjatakïkpati ñikʼutanaka kʼachachasiñanakampi, qori yänakampi, ni wali jila alani isinakampisa, jan ukasti suma chuymanïpjjam, ukaw jan tukuskiri, suma munkañajja, llampʼu chuymani. Dios nayraqatansti ukajj wali askiwa” (1 Ped. 3:1-4).

Diosar yupaychir mä warmejja, chachapan chuymaparojj sarnaqatapampiw purtʼaspa sasaw Pedrojj qhanañchäna. Ukarjamaw Christa kullakajj 1972 maran bautisasitap qhepat suma sarnaqatapampi chachapan chuymapar purtʼañ amtäna. Chachapajj Jehová Diosan Qhanañchirinakapamp nayrajj yatjjatkchïnsa, janiw Diosar serviñ amtkänti. Yaqhep tantachäwinakarus saränwa ukat jilat kullakanakampis sumarak apasi, ukat kunsa uka chachajj amtani uksa jupanakajj respetapjjarakiwa. ¿Kunjamsa Christa kullakajj chachapan chuymapar purtʼañatak chʼamachasi?

Jupajj akham siwa: “Kuntï Jehová Diosajj siski ukarjam sarnaqañwa amtta. Ukhamarus ‘jan kuna arumpi’ chachajan chuymapar purtʼañatakiw chʼamachasta. Kunanakatï Bibliarjamajj walikïski ukhajja, kuntï chachajajj maykitu ukwa lurtjja. Ukat kuntï amtki uksa respettwa ukat taqe kuns Jehová Diosan amparaparuw jaytta”.

Christa kullakajja, amtatas mayjtʼayañ wakisitapwa uñachtʼayi. Jupajja, kunanakatï Diosar yupaychañan yanaptʼkistu ukwa luri, sañäni tantachäwinakaru ukat yatiyir jan qheparas saraña. Ukampisa, chachapajj munasiñ uñachtʼayatäña, jupatak tiempo apstʼasiñapa ukat jupampïñ munatapwa uka kullakajj amuyaraki. Cheqas Diosan jan Qhanañchiripäki ukanakarojj ukhamwa uñjañasaraki. “Taqe kunas horasanikiwa” sasaw Bibliajj qhanañchi. Ukhamajj Diosar jan servipki uka familiaranakasamp chikäñatakiw tiempo apstʼasiñasa, jukʼampis chachasamp jan ukajj warmisampïñataki. Jupanakampïsajj sum parltʼastan ukat ukaw jan sapärstʼatäpkaspasa, jaytanukutäpkaspasa ukham jan amuyasipjjañapatak yanaptʼi (Ecl. 3:1).

SUYASKAKIM

Holger jilatajj akham siwa: “Familiaranakasajj jupanakar munasitas amuyapjjañapawa ukat jupanakatakis Diosat mayiñasarakiwa”. Uka jilatan awkipajja, familiapankirinakajj bautisasjjapjjäna ukhat 20 mara qhepatwa bautisasïna. Christa kullakajj akham sarakiwa: “Chachajajj cheqa yatichäw uñtʼaniwa ukat Jehová Dios toqetwa saytʼasini sasaw taqe chuyma suyaskakta”. Familiaranakasat jan Jehová Diosan Qhanañchirinakapäpki ukanakajj janipuniw cheqa yatichäwir mantapkaniti sasin janipun amuyañäniti.

Familiaranakasamp sum apasiñwa amtañasa, ukhamat cheqa yatichäwi uñtʼapjjañapataki ukat Biblian yatichäwipamp chuymar purtʼañasataki. Ukat jupanakarojj ‘suma chuymampi respetompwa’ uñjañ muntanjja (1 Ped. 3:15, NM).