Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jehová Diosajj Churirisawa ukat Jarkʼaqerisawa

Jehová Diosajj Churirisawa ukat Jarkʼaqerisawa

“Nayar munasitap laykusti, juparojj qhespiyäwa, nayar uñtʼatap laykusti, juparojj imarakïwa.” (SAL. 91:14)

1, 2. Familia taypinsa ukat Diosar uñtʼañansa, ¿kunansa mayj mayjätanjja?

JEHOVÁ DIOSAW familia utjañapatak uttʼayawayi (Efe. 3:14, 15, NM). Ukampisa, mä familia taypitakstänsa sapa mayniw mayj mayjätanjja ukat sarnaqäwisansa ukhamaraki. Inas maynejj nasïwipatpach jilïrkam awk taykapampi jakawaychi. Ukat inas mayninakajj usunaka, chhijinak utjipana jan ukajj yaqha ukham jan waltʼäwinakan awk taykapar aptʼasiwayapjjchi. Yamas yaqhepajj awk taykapar janiw uñtʼasipkiti.

2 Jehová Diosan servirinakapajj ukhamarakiwa. Jupan familiap taypinktanwa ukampis janiw Diosar mä kikpa uñtʼawayktanti. Inas jumajj mayninakjam ‘cheqa yupaychäwin jilsuwaysta’ ukat awk taykamas Biblian aski yatichäwinakapat yatichawayarakstam (Deu. 6:6, 7). Jan ukajj inas kunjamtï waljanejj Diosan arunakap yatiyasitap toqe uñtʼawayapki ukhamästa (Rom. 10:13-15; 1 Tim. 2:3, 4).

3. ¿Kunansa taqenis mä kikpakïtanjja?

3 Yatjjataniwayktan uka toqenakat mayj mayjäkstansa, taqeniw aka toqenakat kikpätanjja: Adán chachan jan istʼasirïtapatwa jucha, pantjasiña ukat jiwaña katoqtanjja (Rom. 5:12). Ukhamäkchisa, Diosan cheqpach yupaychirinakapjamajj Jehová Diosarojj  ‘Awkisarjamaw’ jakʼachassna. Diosan ajllit nayra markapat parlkasajj Isaías 64:8 qellqatajj akham siwa: “Jumaw nanakan awkejjätajja” sasa. Ukhamarusa, Jesusajj mayisiñ yatichkäna uka mayisïwinjja akham arunakampirakiw qalltäna: “Alajjpachankir nanakan Awkejja, sutimajj jachʼañchatäpan” sasa (Mat. 6:9).

4, 5. Jehová Dios Awkisar jukʼamp munasiñatakejja, ¿kunanaksa yatjjataskañäni?

4 Alajjpachankir Awkisajj khitinakatï jupar confiyasin sutip jachʼañchapki ukanakarojj sum uñji ukat jarkʼaqaraki. Jupajj akham sistuwa: “Nayar munasitap laykusti, juparojj qhespiyäwa, nayar uñtʼatap laykusti, juparojj imarakïwa” sasa (Sal. 91:14). Cheqas Jehová Diosajj munasiñampiw uñisirinakapat markapar qhespiyi ukat jan tukjatäñatakiw jarkʼaqaraki.

5 Alajjpachankir Awkisar jukʼamp munasiñatakejja, aka kimsa toqet yatjjatañäni: 1) Jehová Diosajj Churirisawa, 2) Jehová Diosajj Jarkʼaqerisawa ukat 3) Jehová Diosajj cheqpach Amigosawa. Ukanakat yatjjatkasajja, kunjamsa Diosampi apasisktan uka toqet lupʼiñasajj wali askïspawa ukat kunjamatsa Awkisarjam jachʼañchsna ukanakats amuytʼañasarakiwa. Ukat kuna bendicionanaktï Jehová Diosajj Jupar jakʼachasipki ukanakarojj churi ukanakat lupʼiñas wali askirakïniwa (Sant. 4:8).

JEHOVÁ DIOSAJJ CHURIRISAWA

6. ¿Kunjamatsa Diosajj “taqe kunatejj askïki” uk churirïtap uñachtʼayi?

6 Discípulo Santiagojj akham sänwa: “Taqe kunatejj askïki ukhamarak cheqäki ukajj alajjpachatwa juti, khititejj alajjpach qhananak lurki uka Diosawa churistu” (Sant. 1:17). Jakäwejj Jehová Diosan mä aski churäwipawa (Sal. 36:9). Ukat jakäwisan Jehová Diosan munañap luratasatjja, jichhürunakan walja bendicionanakwa katoqtanjja ukat jutïrins paraison wiñay jakasiñ suytʼäwinïtanwa (Pro. 10:22; 2 Ped. 3:13). Ukampis niyakejjay Adán chachan juchar purtʼasitapat pantjasirïstanjja ukat jiwarakstanjja, ¿kunjamarak uk katoqsnasti?

7. ¿Kunjamsa Jehová Diosajj Jupampi sum apasiñatak mä thaki jistʼararapistu?

7 Cheqpachansa, Jehová Diosajj walja toqenakatwa Churirïtap uñachtʼayi. Amuytʼañataki, khuyaptʼayasirïtapatwa qhespiyistu. Cheqas taqeniw juchararätanjja, kunattejj nayrïr awk taykasatwa jucha katoqtanjja (Rom. 3:23). Ukampisa, Jehová Diosajj munasiñapatwa Jupampi sum apasiñasatakejj mä thakjam jistʼararapistu. Ukatwa apóstol Juanajj akham säna: “Diosajj khitaniw mä sapa Wawapa aka oraqeru, wiñay jakañanïñasataki, ukhamanwa Diosajj munasiñap uñachtʼayistu jupa toqe. Akhamankiw munasiñajja: janiw jiwasanakati Diosar munapkäyätanjja, jan ukasti jupaw munistu Wawap khitanisina juchanakasat qhespiyañataki” (1 Juan 4:9, 10).

8, 9. ¿Kunjamsa Jehová Diosajj Abraham ukat Isaac tiempon Churirïtap uñachtʼayäna? (16 janankir foto uñjjattʼam.)

8 Khä 1800 nayrïr pacha maranjja, Jehová Diosajj Jupat jan jitheqtir jaqenakarojj wiñay jakañ churañ munatapwa Abrahaman mä sarnaqäwipajj uñachtʼayäna. Ukat Hebreos 11:17-19 qellqatan akham qhanañchi: “Abrahamajj iyawsäwi laykurakiw, kunapachatejj Diosajj yantʼkäna ukapachajj Isaac wawapjj apanïna sacrificion loqtañataki. Jupajj jankʼakïnwa uka mä sapa wawap loqtañatakejja, Diosajj juparojj arsuwaykchïn ukasa: ‘Isaac wawam toqew jumajj wawanakanïyäta’ sasa. Abrahamajj yatïnwa Diosajj jiwatanak jaktayañatakis chʼamanïtapa, ukasti mä arunjja akhamäspawa: Abrahamajj wastatsa wawapjja jiwatanak taypit katoqaspa ukhamawa”. Kunjamtï Abrahamajj wawap loqtañatakejj jankʼakïkänjja, Jehová Diosajj ukhamarakiw taqe jaqenak layku Yoqapar loqtañatakejj jankʼakïna (Juan 3:16, 36 liytʼañataki).

9 Kunapachatï sacrificiojam loqtatäñat qhespkäna ukhajja, ¡kunja kusisitak Isaacajj jikjjataskäna! Jupa lanti mä sacrificio loqtatäñapatak Jehová Diosajj ‘mä orqo oveja qoqa taypin  achuntata’ churatapat wal yuspäräna (Gén. 22:10-13). Ukatwa uka cheqajj akham sasin sutichatäna “Jehová-yiré”, (NM) uka arojja, Hebreo arun akham sañ muni “Tatitojj kunatï wakiski uk churasiriwa” sasa (Gén. 22:14).

SUMANKTHAPIÑATAK CHURÄWI

10, 11. ¿Khitinakas “sumankthapiyañ arunak” yatiyapjjañapatakejj sarayapjjäna, ukat kunjamsa uk lurawayapjje?

10 Jehová Diosajj taqe kuntï churawaykistu ukanakat lupʼisajja, Jesucriston loqtasitapatak Diosampejj sum apassna ukwa amuytanjja. Apóstol Pablojj uk sum amuyäna ukatwa akham sas qellqäna: “Maynin taqenitaki jiwatap yatjjasina, ukatarakwa taqenisa jiwapjjaraki. Cristojj taqenitakiw jiwi, khitinakatejj jakasipki ukanakajj jan jupanakpachataki jakjjapjjañapataki, jan ukasti Cristotaki jakjjapjjañapataki, jupanak layku jiwasina jaktki ukataki” (2 Cor. 5:14, 15).

11 Nayra patak maranakan jakapkäna uka cristianonakajja, Diosar wal munasipjjäna ukat Jupar yupaychañs wali askit uñjapjjarakïna. Ukatwa “sumankthapiyañ arunak” taqe chuyma katoqapjjäna. Diosat yatiyapjjatapasa ukat arkiripar tukuyapjjatapas suma chuyman jaqenakarojj Jehová Diosampi sumankañataki, Jupamp sum apasiñataki ukat tiempompejj Diosan wawanakapar tukupjjañapatakiw yanaptʼapjjäna. Jichhürunakanjja, ajllit cristianonakajj ukhamarakiw Diosat yatiyasipki. Ukat Jehová Diosana ukat Criston khitanakapjamajja, jaqenakarojj Diosar uñtʼapjjañapataki ukat Jupar servipjjañapatakiw yanaptʼasipki (2 Corintios 5:18-20 liytʼañataki; Juan 6:44; Hech. 13:48).

12, 13. Jehová Diosajj kunanaktï churkistu ukanakatjja, ¿kunjamsa yuspäratas uñachtʼaysna?

12 Jehová Diosar Churirirjam uñjapjjatapatjja, aka Oraqen wiñay jakañ suytʼäwinïpki uka cristianonakajj ajllit cristianonakamp chikaw Diosan Reinopat yatiyapjje. Uka luräwin Jehová Diosan mä churäwipwa apnaqaraktanjja, ukasti Bibliawa (2 Tim. 3:16, 17). Diosan amuytʼayat Arup sum apnaqasajja, jaqenakaruw wiñay jakañ katoqapjjañapatak yanaptʼtanjja. Ukampis janiw uka yanaptʼanikïktanti, Jehová Diosajj qollan ajayupwa uka luräwi phoqañatakejj churawayistu (Zac. 4:6; Luc. 11:13). Ukham lurasajj walja askinakaw jikjjatasi, kunjamtï Anuario de los testigos de Jehová sat libron sapa marajj uñachtʼayaski ukhama. ¡Kunja askisa Awkisaru ukat Churirisaru jachʼañchki uka luräwin yanaptʼañajja!

13 Niyakejjay Jehová Diosajj taqe kun churawaychistojja, akham sasaw jisktʼasiñasa: “Jehová Diosajj kunanaktï churki ukanakat yuspärataj uñachtʼayañatakejja, ¿yatiyir sarkasajj kuntï lurirjamäkta ukti lurasktjja? ¿Suma yatiyäwinak yatiyañatakejj kunanakansa chʼamachasiñajajja?”. Jakäwisan Diosan Reinop nayrar uchasaw taqe uka churäwinakapat yuspäratas uñachtʼaysna. Ukhamtï lurañänejja, Jehová Diosajj kunatï jakañatak munaski uk churistaniwa (Mat. 6:25-33). Diosajj munasiñampiw uñjistu ukatwa kunatï Jupatak askïki uk lurañ muntanjja ukat chuymaps kusisiyañ munaraktanjja (Pro. 27:11).

14. Markapajj jan walinakan uñjaskäna ukhajja, ¿kunsa Jehová Diosajj luräna?

14 Davitajj akham sasaw qʼochüna: “Tatay, nayajj jan kunanïtwa, llakitarakïtwa, janikiy nayat armasistati; jumaw nayan arjjatirijjätajja, qhespiyasiñajjätasa” (Sal. 40:17). Diosajj walja kutiw markaparojj tamjam qhespiyäna, yamas enemigonakapampi wali arknaqata uñjasipkäna ukhaw qhespiyäna. ¡Cheqas ukham jan walinakan uñjasisin Jupat jan jitheqtañatak yanaptʼatapata ukat ajay toqet sapa kuti walja yanaptʼanak churatapat Diosar wal yuspärtanjja!

JEHOVÁ DIOSAJJ JARKʼAQERISAWA

15. Kunjamsa mä munasir awkejj wawanakapar jarkʼaqe uk mä uñachtʼäwimpi qhanañchtʼam.

15 Mä munasir awkejj janiw kuntï wawanakapajj  munki ukak churkiti, jan ukasti jarkʼaqarakiwa. Wawapatï jan walin uñjasispajja, kunjamatsa qhespiyapunispawa. Mä jilatajj wawäkasin kuna jan waltʼäwintï uñjaskäna ukwa amti. Jupajj awkipampejj yatiyäwit utaruw kuttʼasinipkäna, ukat thakinjam jutkasajj walja uma mantir mä jawir makatapjjañapäna. Uka alwajj wal jallojj purintatayna ukatwa jawirajj jiljjattäna. Ukat qalat qal thoqtʼas maysar makatapjjañapäna. Jupajj awkip nayraw saräna ukat mä akatjamat qalar jan sum taktʼasitapat umar jalaranttäna ukat pay kutiw umar chhaqaranttäna. Awkejj jankʼakiw wawar katjjarüna ukat umamp ajjskatas jiwañatwa qhespiyäna, ¡ukham qhespiyatapat wal wawajj yuspäräna! Alajjpachankir Awkisajj ukhamarakiw jan waltʼayir umar uñtata aka jan wali pachata ukat akapach apnaqer Supayat qhespiyistu. Cheqpachansa, Jehová Diosaw cheqpach jarkʼaqerisajja, janiw Jupjamajj utjkaspati (Mat. 6:13; 1 Juan 5:19).

16, 17. Kunapachatï israelitanakajj amalecitanakamp nuwasipkäna ukhajja, ¿kunjamsa Jehová Diosajj jupanakar yanaptʼäna ukat jarkʼaqäna?

16 Israelitanakar Egipto markan esclavöñat qhespiykäna ukhasa, ukat khä 1513 nayrïr pacha maran mä milagro toqe Wila lamar qotan qhespiykäna ukhas Jehová Diosajj wali munasiri jarkʼaqerïtapwa qhan uñachtʼayäna. Ukat Sinaí qollur wasar pampnam sarkasajja, israelitanakajj Refidim cheqaruw puripjjäna.

17 Génesis 3:15 qellqatarjamajja, Supayajj jan yanaptʼirinjam israelitanakarojj inas kunaymanit jan waltʼayañ thaqchïna. Uksti Amalec markankirinak toqew luräna, jupanakajj Diosan markapar uñisirïpjjänwa (Núm. 24:20). Jehová Diosajj kunsa Jupat jan jitheqtir pusi chachanak toqejj luräna uk amuytʼañäni, jupanakajj Josué, Moisés, Aarón ukat Hur sat chachanakawa. Kunapachatï Josué chachajj amalecitanakamp nuwaskäna ukhajja, Moisés, Aarón ukat Hur chachanakajj uka jakʼankir  mä qollun jikjjatasipjjäna. Kunapachatï Moisés chachajj amparap altor loqtäna ukhasti israelitanakajj nuwasiñan atipapjjänwa. Ukampis amparanakap altoru loqtatajj qarjtjjäna ukhajja, Aaronampi, Hur chachampejj amparanakap katjjasipjjäna. Ukhamasti Jehová Diosan yanaptʼata ukat Jupan jarkʼaqataw “Josué chachajja amalecitanakarojj [...] tukjäna” (Éxo. 17:8-13). Ukat Moisesajj mä altarwa wakichäna ukarojj “Jehová-nisí” sasaw sutichäna, uka arusti Hebreo arurjamajj “Jehová Diosaw imantasiñajajja” sañwa muni (Éxo. 17:14, 15, NM).

SUPAYAN AMPARAPAT JARKʼAQATA

18, 19. ¿Kunjamsa Jehová Diosajj jichhürunakan jarkʼaqestu?

18 Khitinakatï Jehová Diosar munasipki ukat istʼapki ukanakar Jupajj jarkʼaqewa. Kunapachatï uñisirinakasajj jan waltʼayistu ukhajja, kunjamtï israelitanakajj Refidim cheqan Diosamp jarkʼaqatäñ thaqapkäna ukhamarakwa jiwasajj lurtanjja. Jehová Diosajj walja kutiw markaparojj tamjam jarkʼaqawayi, ukat Supayan amparapats jarkʼaqarakistuwa. Kunjamsa Jehová Diosajj walja kuti jilat kullakanakasar kunatï Bibliarjamajj jan walïki uk jan lurañ munapjjatapat jarkʼaqawayi uk amuytʼañäni. Khä 1930 ukat 1940 mara qalltanakan kunapachatï Hitler chachajj Alemania marka apnaqkäna ukhajja, uka markansa ukat yaqha markanakansa ukaw uñjasïna. Jilat kullakanakajj arknaqat uñjasipkäna uka sarnaqäwinakat Anuario sat libron liytʼktan ukat lupʼktan ukhajja, Jehová Diosar Jarkʼaqerisarjam jukʼamp confiyañatakiw yanaptʼistu (Sal. 91:2).

Jehová Diosajj cristian jilat kullakanakas toqew jan wali tiemponakan Jupat jan jitheqtañasatak yanaptʼistaspa (18 tʼaqat 20 tʼaqakam uñjjattʼäta)

19 Jehová Diosan markap toqe ukat Bibliat apstʼat qellqatanakap toqnamwa suma ewjjanak katoqtanjja, ukhamat jarkʼaqatäñataki. Kunjamsa uka ewjjtʼanakajj aka qhepa maranakan yanaptʼawayi uk uñjañäni. Akapachajj urut urutjamas jan walir saraskchi ukat qʼañu luräwinak uñchʼukiñas jukʼamp jiljjataskchi ukasa, Jehová Diosajj horasaparuw ukanakat amuyasiñasatak kutin kutin suma ewjjtʼanaka churawayistu. Amuytʼañataki, Internetan redes sociales satäkis ukan jan wali amigonak jan jikjjatañatakiw mä Awkjam amuyasiñasatak ewjjtʼistu (1 Cor. 15:33). *

20. ¿Kuna yanaptʼsa ukat jarkʼaqäwsa cristian taman jikjjattanjja?

20 ¿Kunjamsa Jehová Diosamp ‘yatichatätas’ uñachtʼaysna? Diosan arunakapar istʼasa (Isa. 54:13). Tamanakasanwa yanaptʼatäña ukat jarkʼaqatäña munktan ukanak katoqtanjja, kunattejj ukanwa Diosat jan jitheqtir irpir chuymaninakajj yanaptʼa ukat Bibliarjam ewjjtʼanak churistu (Gál. 6:1). Jehová Diosajj jaqenak ‘churäwinakjam churkistu’ uka taypiw munasiñampi uñjatap uñachtʼayistu (Efe. 4:7, 8). ¿Kunsa lurañasäspa? Jaysasirïña ukat istʼasirïñasawa, ukhamatwa Jehová Diosajj bendicistani (Heb. 13:17).

21. 1) ¿Kun lurañsa amttanjja? 2) ¿Kunsa jutïr yatichäwin yatjjataskañäni?

21 Qollan ajayumpi ukat alajjpachankir Awkisan ewjjtʼanakapamp yanaptʼayasiñäni. Ukatsti Jesucriston sarnaqäwipatwa lupʼiñasa ukat jupjam sarnaqañatakiw chʼamachasiñasa. Jesusajj jiwañkamaw istʼasirïtap uñachtʼayäna ukatwa jupajj suma bendicionanak katoqäna (Fili. 2:5-11). Jiwasatï Jehová Diosar taqe chuyma confiyañäni ukhajja, jupjamarakiw bendicionanak katoqañäni (Pro. 3:5, 6). Ukhamajj Jehová Diosarukipun Churirisarjama ukat Jarkʼaqerisarjam uñjapjjañäni. Cheqas ¡Jupar serviñajj wali askiwa ukat kusiskañarakiwa! Jichhajj ¿kunatsa Jehová Diosajj cheqpach Amigosawa sasin saraksna? Uka jisktʼat yatjjatasajja, Jupar munasitasajj jukʼampiw jiljjattani. Uka toqetwa jutïr yatichäwin yatjjataskañäni.

^ tʼaqa 19 Uka toqet ewjjtʼanakjja, aka yatichäwinakanwa jikjjatäta: “Internetar wali amuyumpi mantañäni” Yatiyañataki agosto 15, 2011, 3 janat 5 janakama; “¡Supayan sipitanakapat amuyasipjjañäni!” ukat “¡Janipun Supayan sipitanakapar jaltʼañäniti!” Yatiyañataki agosto 15, 2012, 20 janat 29 janakama.