Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jupanakajj taqe chuymaw sarapjjäna: África cheqat Inti jalantaru

Jupanakajj taqe chuymaw sarapjjäna: África cheqat Inti jalantaru

PASCAL chachajj Costa de Marfil sat markan pisin jakasir mä jiskʼa markan jilsuwayi, jupajj sum jakasiñ munäna. Niyakejjay nuwasirïchïnjja (boxeador), akham jisktʼasiri: ‘¿Kawkinsa ukham nuwasiñan nayrar sartaskakirista ukat qamiriptirista?’. Niya 25 maranëjjäna ukhajj Europa toqenwa ukhamäspa sasaw amuyäna. Ukampis ukar mantañatak jan pasaportenïsasa ni yaqha documentonakanïsasa, leyinakajj kunanaktï mayki ukarjam jan phoqasaw mantañapäna.

Khä 1998 maranwa uka chachajj 27 maranïkas viajäna. Jupajj Ghana marknam saräna, Togo ukat Benín marknamwa pasawayäna ukat Birni Nkonni (Níger) markaruw purïna. Ukampis mä jan wali cheqnamwa saraskakiñapäna. Uka markat alay toqer sarañatakejja, Sahara sat wasar pampnamwa camionetat sarañapäna, ukat Mediterráneo sat jachʼa lamar qotar purisajj Europa uksa toqer apir mä barcotwa sarañapäna. Amtapajj ukänwa, ukampis akanak utjipanwa Níger markan qheparäna.

Nayraqat jan qollqeniw uñjasïna. Ukatsti Noé sat precursoraruw uñtʼäna, jupajj Bibliat yatichañ qalltäna. Yateqkäna ukaw chuymapar purtʼäna ukat janiw nayrjam amuyjjänti. Yänak jan ukajj cosasanak jikjjatañat sipans Diosar yupaychañaw nayrankjjäna. Ukat diciembre 1999 maran bautisasjjäna. Jehová Diosar wal yuspäratap uñachtʼayañatakejj 2001 maranwa Níger markan precursorjam irnaqañ qalltkatayna, ukanwa cheqa yatichäwinak yateqäna. ¿Uk amtatapat kunjamsa jikjjatasi? Jupajj akham siwa: “Jakäwijan jukʼamp sumaw jikjjatasta”.

ÁFRICA CHEQAN TAQE CHUYMAW YATIYASIPKI

Anne-Rakel

Pascal jilatjamarakiw Diosar yupaychañan nayrar sartasin waljanejj kusisitäpjje. Ukham amtanak phoqañatakejja, yaqhep jilat kullakanakajj Europa toqet África uksa toqeruw sarjjapjje, ukhamat kawkhantï yatiyirinakajj munaski ukan yanaptʼañataki. Cheqas África cheqat aynach toqenakan yanaptʼañatakejj niya 65 jilat kullakanakaw sarapjje, jupanakajj 17 maranit 70 maraninakäpjjewa. Benín, Burkina Faso, Níger, ukat Togo markanakan yanaptʼasipki. * ¿Kunas uk amtapjjañapatak yanaptʼpachäna, ukat kunjamsa jikjjatasipjje?

Dinamarca markankir Anne-Rakel kullakajj akham siwa: “Awk taykajajj Senegal markanwa misionerjam irnaqtʼapjjäna. Ukham irnaqtʼasajj kunjamäpjjänsa uk wali kusisitaw parlapjjeri, nayajj jupanakjamäñwa munarakiyäta”. Niya 15 mara nayrajja, Togo markan amparamp parlir mä tamaruw sarjjäna, ukhajj 20 jila maranikïskänwa. Ukham amtatapajja, ¿kunjamsa mayninakar yanaptʼäna? Kullakajj akham siwa:  “Qhepatjja, sullka kullakajasa ukat jilajas Togo markan yanaptʼañatakiw jutjjapjjäna”.

Albert-Fayette and Aurele

Franciankir 70 marani Aurele jilatajj akham siwa: “Phesqa mara nayraw jubilasjjta, ukat Paraíso puriniñapkam Francia markan suyaña, jan ukajj Diosatak jukʼamp irnaqañwa amtañajäna”. Jilatajj Diosatak jukʼamp irnaqañ amtäna. Ukat niya kimsa maranak nayraw Albert-Fayette sat warmipampejj Benín markar sarjjapjjäna. Jilatajj akham siwa: “Akaru Diosar servir jutañ amtapjjatajajj wali askipuniwa”. Ukat kusisitaw akham saraki: “Janiw ukakïkiti, qota jakʼan yatiyapkta ukawjanakajj Paraisor uñtatawa”.

Clodomir ukat Lysiane sat chacha warmejj 16 mara nayraw Benín markar sarjjapjjäna. Qalltanjja, familiapata ukat amigonakapatwa llakisipjjerïna ukat janjamakiw yatinoqtkañäniti sasaw amuyapjjarakirïna. Ukampis janiw ajjsarjjapjjänti ukat kusisitaw jakasjjapjjäna. Jilatajj akham siwa: “16 maraw akankjjapjjta ukat yaqhanakarus yanaptʼawayapjjaraktwa, sapa marajj maynirus cheqa yupaychäwir mantañapatak yanaptʼapkirista ukhamawa”.

Lysiane ukat Clodomir jilat kullakajj cheqa yatichäwinak yatichawayki ukanakat mä qawqhanimpi

Johanna ukat Sébastien

Sébastien ukat Johanna chacha warmejj 2010 maranwa Francia markat Benín markar sarjjapjje. Jilatajj akham siwa: “Taman walja lurañanakaw utji. Akan servisajj Diosan markapankir mä escuelarus sarapkirista ukhamawa”. ¿Ukankir jaqenakajj kunjamäpjjesa? Johanna kullakajj akham siwa: “Cheqa yatichäw wal yatjjatañ munapjje. Jan yatiyapkta ukhasa Biblia toqet callen jisktʼasipjjapunituwa ukat qellqatanaksa mayipjjarakituwa”. Uka markar sarañajja, ¿kunjamsa uka chacha warmir yanaptʼawayi? Jilatajj akham siwa: “Jukʼampiw mayachtʼasipjjta. Warmijamp sapüru yatiyañajj wali askiwa” sasa.

Eric ukat Katy chacha warmejj precursorjamaw Benín markat alay toqen irnaqtʼasipki, ukhan jukʼanikiw jakapjje. Tunka mara nayrajj Francia markan jakapkäna ukhajja, kawkhansa yatiyirinakajj munasi uka cheqanakar sarañ toqet parlir yatichäwinakwa liyiñ qalltapjjäna ukat Diosatak sapürunjam irnaqtʼirinakampiw parlapjjäna. Ukaw yaqha markar sarañatak yanaptʼäna ukat 2005 maranwa uka markar sarjjapjjäna. Ukhat jichhakamaw jiljjattir uñjawayapjje. Eric jilatajj akham siwa: “Aka pä mara nayrajja, Tanguiéta grupon llätunka yatiyirinakakïpjjayätwa. Jichhajj 30 yatiyirëjjapjjtwa. Domingo urunakajja, 50 jan ukajj 80 ukhaniw tantachasipjjta. ¡Ukham jiljjattatap uñjañajj janiw kunampis kikpäkiti!”.

Katy ukat Eric

 JANIW JAN ATIPJAÑJAMÄKITI

Benjamin

Yanaptʼañatak yaqha cheqar sarapki ukanakajja, ¿kuna jan walinakansa uñjasipjje? 33 maran Benjamin jilatajj Anne-Rakel kullakan jilapawa. Jupajj khä 2000 maran Dinamarca sat markanwa Togo markan misionerjam irnaqtʼir mä jilatamp parltʼäna. Jupajj akham amti: “Precursorjam irnaqtʼañwa munta sasaw sista ukat akham sasaw jisktʼitäna: ‘¿Togo markan precursorjam irnaqtʼañ munasmati?’ sasa. Ukhajj janïraw 20 maranïkayätsa, ukampis pä kullakajaw ukan servisipkäna, ukhamajj ukar saririskayätwa”. Sum amuytʼasisajj ukaruw sarjjäna. Jupajj janiw francés arut mä arsa yatkänti. Akham saskakiwa: “Nayrïr sojjta phajjsinakajj wali chʼamänwa, janiw ukankirinakampejj sum parltʼaskayätti”. Tiempompejj sum yatjjäna, jichhajj Benín markan Betel utanwa Departamento de Envíos ukat Departamento de Computadoras ukan yanaptʼaski.

Marie -Agnès ukat Michel

Eric ukat Katy jupanakat parlaniwayktan ukanakajja, yaqha aru parlir tamanwa Francia markan janïr Benín markar sarkasin yanaptʼasipkäna. ¿Kunjamtï Francian yanaptʼapkän ukhamarakïnt África cheqanjja? Kullakajj akham siwa: “Mä cheqan sum jakasiñ janiw jikjjatañjamäkänti. Walja phajjsiw jan luzani ukat jan qʼoma umani jakawayapta”. Jilatajj akham sarakiwa: “Uta jakʼankirinakajj wali arumkamaw musica wali jachʼat tocayapjjeri. Paciencianïña ukat yatinoqtañaw wakisi”. Jupanakajj akham sapjjewa: “Kawkharutï jichhak yatiyäwinakajj purki ukan yatiyañajj chʼamäkchisa, walja bendicionanakaw utji”.

Franciankir Michel ukat Marie-Agnès, jupanakajj Benín markaruw sarjjapjjäna ukat niya phesqa maranakaw ukankjjapjje, niya 60 maranakanïpjjewa. Qalltan wal ajjsartʼayasipjjäna. Jilatajj akham amti: “Yaqha cheqar sarañajj janiw walïkaspati sasaw yaqhepajj sapjjetäna. Ukampis janitï Diosaw yanaptʼistani sasin confiyapjjeriskayäta ukhajj ajjsarapjjeriskayätwa, ukatwa Jehová Diosar jukʼamp sum yupaychañataki ukat Jupan yanaptʼat sarjjapjjayäta”.

KUNJAMATSA WAKICHTʼASISPA

Yatiyirinakajj munaski uka cheqanakan yanaptʼirinakajja, nayraqatajj mayni pachpaw wakichtʼasiñapa sasaw sapjje. Ukatakejj tiempökipanwa waktʼayasiña ukat yaqha cheqanakar yatinoqtañ yateqapjjañaparaki, qawqhatï utjkistu ukarjam jakaña ukat Jehová Diosar confiyañaw wakisi (Luc. 14:28-30).

Sébastien jilatajj akham saskakiwa: “Janïr yaqha cheqar sarkasajja, esposajampejj pä maraw qollq tantapjjta. Kusistʼañanakar jan añch qollqe tukjaña ukat jan wakiski uk jan alañwa amtapjjayäta”. Yaqha markan  yanaptʼaskakiñatakejj sapa maraw mä qawqha phajjsinak Europa toqer trabajir sarapjjta, ukhamat marpach Benín markan precursorjam irnaqtʼañataki.

Marie-Thérèse

Marie-Thérèse kullakajja, África cheqat Inti jalant toqer yanaptʼir sarapki uka 20 solter kullakanakat maynïriwa ukat Francia markan auto apnaqerit trabajïna. Ukampis 2006 maran Níger markan mä mara precursorjam irnaqtʼañatakiw trabajopat permiso mayisïna. Ukat jankʼakiw ukham jakañ munatap amuyasïna. Akham siwa: “Franciar kuttʼayät ukhajja, trabajojjan kuna horariontï trabajkayät uk mayjtʼayañapwa patronajarojj mayiyäta, jupatakejj ukajj walikïnwa, jichhajj mayo phajjsit agosto phajjsikamaw auto apnaqerjam Francian trabajta, ukat septiembret abril phajjsikamajj precursorjamaw Níger markan irnaqarakta”.

Saphira

Diosan Reinop nayrar uchapki ukanakarojj kunatï wakiski uk Jehová Diosaw churaskani (Mat. 6:33). Francia markankir niya 30 maran Saphira solter kullakat parltʼañäni, jupajj Benín markanwa precursorjam irnaqtʼaski. Jupajj 2011 maranwa Francia markar kuttʼäna, ukhamat trabajat qollqepampi África cheqan sojjtïr mara precursorjam irnaqtʼañataki. Jupajj akham siwa: “Viernes uröjjänwa uka ururuw trabajojajj tukusjjäna. Pä semanakiw Francian qheparañatakejj utj-jjetäna, ukat Benín markan mä mara jakañatakejj tunka urunakamp qollq jikjjatañajaw wakisïna. Jehová Diosaruw mayisiyäta ukat kunjamsa jikjjatasiyäta ukwa sayäta. Mä jukʼampjjarojj telefonotwa trabaj churir mä agenciajj jawsanitäna, ukhamat mayni lanti pä seman trabajiñajataki”. Saphirajj lunes uruw uka yaqha trabajon irnaqañatak saräna, ukat khititï uka pä semanajj jan ukankañapäkän jupaw juparojj yatichañapäna. “Mä kullakan Precursoranakatak Escuelar sarañatak tunka urunak munatapwa ukan yatta. Ukat juma lantitï maynir trabajir jaytäta ukhakiw permiso churirisma sasaw patronapajj satayna. Jupajj ukhamarakiw Jehová Diosar yanapa mayitayna, ¡Jehová Diosajj panpachaniruw mayisitanakaj istʼapjjetu!”

CHEQPACH KUSISIÑA

África cheqat Inti jalant toqer yanapir sarawayapki uka jilat kullakanakajja, uka mark utapäkaspas ukhamwa uñjapjje, yaqhepasti mä qawqha tiempot markanakaparuw kuttʼawayjjapjje. Ukhamäkchisa ukan yanaptʼawayapki ukanakajja, wali askinak jikjjatasipkakiwa. Cheqpach kusisiñajj Jehová Diosar serviñat jutatapwa yateqawayapjje.

^ tʼaqa 6 Benín markan utjki uka sucursalaw francés aru parliri uka pusi markanak uñji.